Phemang Leswiswi le Tšwele Pele le Sepela Seetšeng

1-2. (a) Paulo o be a le boemong bja mohuta mang ge a be a ngwalela Baefeso lengwalo, gona ke ka baka la’ng a ile a le ngwala? (b) Re tlo araba dipotšišo dife?

GE MOAPOSTOLA Paulo a be a golegilwe kua Roma, o be a nyaka go kgothatša bana babo le dikgaetšedi. O be a sa kgone go ba etela, ka gona o be a ba ngwalela mangwalo. Mo e ka bago ka 60 goba 61 C.E. o ile a ngwalela Baefeso lengwalo.—Baef. 1:1; 4:1.

² Mo e ka bago mengwaga e lesome pele Paulo a ka golegwa, o ile a fetša nakonyana a le Efeso a bolela le go ruta ditaba tše dibotse. (Dit. 19:​1, 8-10; 20:​20, 21) O be a rata bana babo kudu e bile a nyaka go ba thuša gore ba dule ba botegela Jehofa. Eupša ke ka baka la’ng a ngwaletše Bakriste ba tloditšwego lengwalo a ba botša ka seetša le leswiswi? Le gona Bakriste ka moka ba ka ithuta’ng go keletšo yeo a e filego Baefeso? A re boledišaneng ka dikarabo tša dipotšišo tše.

GO TLOGA LESWISWING GO YA SEETŠENG

3. Ke mantšu afe ao Paulo a ilego a a diriša lengwalong leo a le ngwaletšego Baefeso?

³ Paulo o ngwaletše Bakriste ba Efeso gore: “Le kile la ba leswiswing, eupša bjale le seetšeng.” (Baef. 5:8) Paulo mo o dirišitše mantšu seetša le leswiswi go hlalosa kamoo Baefeso ba fetošitšego tsela yeo ba bego ba phela ka yona. A re boneng gore ke ka baka la’ng Paulo a boletše gore Baefeso ba ile ba ba “leswiswing.”

4. Ke ka ditsela dife Baefeso ba bego ba le bodumeding bja maaka?

⁴ Bodumedi bja maaka. Pele Baefeso bao Paulo a ba ngwaletšego lengwalo e ka ba Bakriste, ba be ba le bodumeding bja maaka e bile ba dumela go maleatlana. Motseng wa Efeso go be go na le tempele yeo e tumilego ya Aratemise, yeo batho ba kgale ba bego ba e lebelela e le e nngwe ya dilo tše di makatšago tše šupa, tšeo batho ba di bopilego mo lefaseng. Batho bao ba bego ba eya moo tempeleng ba be ba rapela medingwana. Batho bao ba bego ba bopa diswantšho tša medingwana, ba be ba dira tšhelete e ntšhi ka go rekiša medingwana yeo moo tempeleng. (Dit. 19:​23-27) Godimo ga moo, batho ba Efeso ba be ba tsebja kudu ka maleatlana.—Dit. 19:19.

5. Ke ka ditsela dife Baefeso ba bego ba itshwara ka tsela e gobogilego?

⁵ Boitshwaro bjo bo gobogilego. Batho ba Efeso ba be ba tsebja ka boitshwaro bjo bobe e bile ba se na dihlong ka seo ba se dirago. Dipolelo tše di sa hlwekago di be di kwewa moo go kgobokanego batho, mafelong a boithabišo le menyanyeng ya bodumedi. (Baef. 5:3) Batho ba bantšhi ba Efeso ba be ba se “sa lešwa dihlong ke boitshwaro bja bona bjo bobe” e lego polelwana yeo e bolelago gore ba be ba retetše dipelong tša bona. (Baef. 4:​17-19) Pele Baefeso ba ka ithuta se se lokilego le se se fošagetšego, ba be ba sa tshwenywe ke matswalo a bona ge ba dira se se fošagetšego, e bile ba se na taba gore Jehofa o ikwa bjang ka se ba se dirilego. Paulo o ba hlalositše gore “ba leswiswing e bile ba ka se hwetše bophelo bjo Modimo a re tshepišitšego bjona.”

6. Ke ka baka la’ng Paulo a ile a botša Baefeso gore gona bjale ke “seetša”?

⁶ Baefeso ba bangwe ba ile ba tloga leswiswing. Paulo o ngwadile gore, “bjale le seetša ka ge le le balatedi ba Morena.” (Baef. 5:8) Ba ile ba thoma go phela ka melao ya Modimo yeo e bego e le seetša seo se ba hlahlago. (Ps. 119:105) Baefeso ba ba ile ba tlogela bodumedi bja maaka le boitshwaro bjo bo gobogilego. Ba ile ba ‘ekiša Modimo’ gomme ba leka ka matla a bona ka moka go mo hlankela le go mo kgahliša.—Baef. 5:1.

7. Boemo bja rena bo swana bjang le bja Bakriste ba bantšhi ba Baefeso?

⁷ Ka tsela e swanago, le rena pele re ithuta therešo re be re le bodumeding bja maaka e bile re phela bophelo bjo bo gobogilego. Ba bangwe re be re keteka matšatši a maikhutšo ao a theilwego bodumeding bja maaka mola ba bangwe re be re phela bophelo bjo bo gobogilego. Eupša ka morago ga gore re ithute ka melao ya Modimo ya mabapi le se se lokilego le se se fošagetšego, re ile ra dira diphetogo. Re ile ra thoma go phela ka tsela yeo Jehofa a nyakago re phela ka yona. Ka baka la se, re ile ra thabela mehola e mentšhi. (Jes. 48:17) Eupša ga bjale re dula re lebeletšana le diteko. Re swanetše go tloga leswiswing ka mo go feletšego gomme re ‘tšwele pele re itshwere bjalo ka batho bao ba sepelago seetšeng.’ Re ka dira seo bjang?

Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0

PHEMANG GO BA LESWISWING

8. Go ya ka Baefeso 5:​3-5, Baefeso ba be ba swanetše go phema’ng?

⁸ Bala Baefeso 5:​3-5. E le gore Bakriste ba Baefeso ba pheme go ba leswiswing ka go itshwara gampe, ba be ba swanetše go phema go dira dilo tšeo di ka nyamišago Jehofa. Seo se be se sa akaretše feela boitshwaro bjo bo gobogilego, eupša se be se akaretša le dipolelo tše mpe. Paulo o ile a gopotša Baefeso gore ba swanetše go phema go dira dilo tše ge e ba ba nyaka go “tsena Mmušong wa Kriste le wa Modimo.”

9. Ke ka baka la’ng re swanetše go gana go dira dilo tšeo di ka feleletšago di dira gore re dire bootswa?

⁹ Le rena re swanetše go dula re elwa e le gore re se ke ra ba le kabelo “[medirong] ya leswiswi yeo e se nago mohola.” (Baef. 5:11) Ke nnete gore gantšhi ge motho a lebelela dilo tše di sa hlwekago, a bolela ka tšona, goba a di theetša, goba bonolo gore a di dire. (Gen. 3:6; Jak. 1:​14, 15) Nageng e nngwe, sehlopha sa bana babo rena se ile sa thoma go ba “bagwera” gomme sa boledišana Inthaneteng. Bontšhi bja bona ge ba thoma go boledišana ba be ba bolela ka dilo tša moya. Eupša ge nako e dutše e eya dilo tšeo ba bego ba bolela ka tšona di be di sa thabiše Jehofa. Ba be ba thoma go bolela kudu ka thobalano. Ka morago ga moo bana babo rena ba bangwe ba ile ba bolela gore dipoledišano tše tšeo di sa hlwekago di dirile gore ba feleletše ba dira bootswa.

10. Sathane o leka bjang go re fora? (Baefeso 5:6)

¹⁰ Lefase le leo le sa hlwekago le leka go re fora gore re dumele gore dilo tšeo Jehofa a di lebelelago di se tša hlweka, ga se phošo go di dira. (2 Pet. 2:19) Se ga se re makatše! Ke kgale Diabolo a leka go timetša batho ka go dira gore ba se ke ba lemoga se se lokilego le se se fošagetšego. (Jes. 5:20; 2 Bakor. 4:4) Ga re makale ge re bona dimubi tše dintšhi, mananeo a thelebišene le diwepesaete di kgothaletša batho go dira dilo tšeo Modimo a sa di nyakego! Sathane o leka go dira gore re nagane gore ga se phošo go dira dilo tše di sa hlwekago le go ba le boitshwaro bjo bo gobogilego e bile o nyaka re nagana gore di ka re thabiša.—Bala Baefeso 5:6.

11. Mohlala wa Angela o bontšha bjang bohlokwa bja go diriša keletšo yeo e lego go Baefeso 5:7? (Bona le seswantšho.)

¹¹ Sathane o nyaka gore re fetše nako e ntšhi re phela le batho bao ba ka dirago gore go be boima gore re kwe melao ya Jehofa. Ke ka baka leo Paulo a ilego a kgothaletša Baefeso gore: “Le se ke la gwerana le batho ba mohuta woo,” e lego bao ba dirago se se fošagetšego mahlong a Modimo. (Baef. 5:7) Re swanetše go ba šedi kudu go feta Baefeso ba kgale ka gobane lehono ga re fetše nako e ntšhi re phela le batho bao re ba bonago ka go lebanya feela, eupša re e fetša re boledišana le ba bangwe ka inthanete. Angelaa yo a dulago Asia, o lemogile gore social media e ka ba kotsi. O re: “Ganyenyane ganyenyane e ka fetola tsela yeo motho a naganago ka yona. Ke ile ka se sa tshwenyega ge ke na le ‘bagwera’ bao ba sa hlomphego melao ya motheo ya Beibele. Mafelelong ke ile ka thoma go nagana gore go lokile go phela bophelo bjo bo sa thabišego Jehofa.” Bagolo ba bangwe ba ile ba bontšha Angela lerato ka go mo thuša go dira diphetogo tšeo di swanetšego. O re: “Gona bjale ke dula ke nagana ka dilo tša moya go e na le go nagana ka social media.”

12. Re tlo thušwa ke eng gore re dule re ekwa melao ya Modimo ya se se lokilego le se se fošagetšego?

¹² Re swanetše go ganetša tsela yeo lefase le naganago ka yona ya gore boitshwaro bjo bo gobogilego bo a amogelega. Re a tseba gore dilo tšeo di fošagetše. (Baef. 4:​19, 20) Ke mo go botse go ipotšiša gore: ‘Na ke fetša nako e ntšhi go sa hlokagale ke na le batho bao ke tsenago le bona sekolo, bao ke šomago le bona le ba bangwe bao ba sa hlomphego melao ya Modimo ya boitshwaro? Na ke bontšha sebete ka go latela melao ya Jehofa le ge ba bangwe ba ka mpolela gampe?’ Ka ge lengwalo la 2 Timotheo 2:​20-22 le bolela, re swanetše go hlokomela gabotse le bagwera bao re ba kgethago le ka phuthegong. Re dula re gopola gore ba bangwe ba ka no se re thuše gore re dule re botegela Jehofa.

SEPELANG BJALO KA ‘BATHO BA SEETŠA’

13. Go ‘itshwara bjalo ka batho ba seetša’ go bolela’ng? (Baefeso 5:​7-9)

¹³ Paulo o ile a kgothaletša Bakriste ba kua Efeso gore ba se ke ba phema feela leswiswi, eupša ba tšwele pele ba sepela bjalo ka ‘batho ba seetša.’ (Bala Baefeso 5:​7-9.) Seo se bolela’ng? Re swanetše go itshwara bjalo ka Bakriste ba therešo ka dinako ka moka. Tsela e nngwe yeo re ka dirago se ka yona ke ka go bala le go ithuta Beibele le dikgatišo tša rena tšeo di theilwego Beibeleng. Go bohlokwa kudu go ithuta ka mo go tseneletšego go mehlala le dithuto tša Jesu Kriste e lego “seetša sa lefase.”—Joh. 8:12; Die. 6:23.

14. Moya o mokgethwa o ka re thuša bjang?

¹⁴ Re hloka le thušo ya moya wa Modimo o mokgethwa gore re dule re itshwere bjalo ka ‘batho ba seetša.’ Ka baka la’ng? Ka gobane ga go bonolo gore re dule re hlwekile lefaseng le leo le šilafetšego. (1 Bathes. 4:​3-5, 7, 8) Moya wa Modimo o ka re thuša gore re se ke ra nagana go swana le batho ba lefase le bao ba sa lebelelego dilo ka tsela yeo Modimo a di lebelelago ka yona. Moya wa Modimo o ka re thuša gape gore re “sepele tseleng ya go loka le ya therešo.”—Baef. 5:9.

15. Re ka dira’ng gore re hwetše moya o mokgethwa? (Baefeso 5:​19, 20)

¹⁵ Tsela e nngwe yeo re ka hwetšago moya o mokgethwa ka yona, ke ka go o rapelela. Jesu o boletše gore Jehofa “o tla nea gakaakang moya o mokgethwa go bao ba mo kgopelago.” (Luka 11:13) Re hwetša moya o mokgethwa gape ge re tumiša Jehofa mmogo re le dibokeng tša Bokriste. (Bala Baefeso 5:​19, 20.) Moya o mokgethwa wo o tšwago go Modimo o ka re thuša gore re phele ka tsela yeo e mo thabišago.

16. Re ka thušwa ke eng gore re dire diphetho tše bohlale? (Baefeso 5:​10, 17)

¹⁶ Ge e ba go na le phetho e bohlokwa yeo re swanetšego go e dira, re swanetše go “kwešiša seo Jehofa a nyakago [re] se dira” gomme re se dire (Bala Baefeso 5:​10, 17.) Ge re diriša melao ya motheo maemong ao re kopanago le ona, go swana le ge re nyaka tsela ya Modimo ya go nagana. Ge re diriša melao yeo ya motheo, re tlo kgona go dira diphetho tše dibotse.

17. Re ka diriša bjang nako ya rena ka bohlale? (Baefeso 5:​15, 16) (Bona le seswantšho.)

¹⁷ Paulo o ile a eletša gape Bakriste ba Efeso gore ba diriše nako ya bona ka bohlale. (Bala Baefeso 5:​15, 16.) Sathane e lego lenaba la rena, o nyaka gore re dule re swaregile ka mediro ya lefase le, moo mafelelong re ka ikhwetšago re se sa na nako ya go hlankela Jehofa. (1 Joh. 5:19) Se se ka dira gore go be bonolo gore Mokriste a thome go nagana kudu ka dilo tše di bonagalago, thuto goba mošomo go e na le go hlankela Jehofa. Ge e ba seo se ka direga, seo se tla ba se bontšha gore Mokriste o thoma go nagana go swana le batho ba lefase bao ba sa hlankelego Jehofa. Ke nnete gore ga se phošo go ba le dilo tše, eupša ga se tša swanela go tla pele maphelong a rena. Go sepela bjalo ka ‘batho ba seetša,’ go ra gore re swanetše go diriša “nako ya [rena] go dira dilo tše bohlokwa.”

18. Donald o ile a dira’ng e le gore a diriše nako ya gagwe ka bohlale?

¹⁸ Nyaka ditsela tšeo di ka go thušago gore o hlankele Jehofa ka mo go oketšegilego. Se ke seo Donald yo a tšwago Afrika Borwa, a se dirilego. O re: “Ke ile ka nagana ka bophelo bja ka gomme ka rapela Modimo ka mo go tseneletšego gore a nthuše gore ke oketše tirelo ya ka. Ke ile ka rapela gore ke hwetše mošomo wo o tlago go mpha nako ya gore ke bolele ditaba tše dibotse. Jehofa o ile a nthuša gore ke hwetše mošomo woo. Nna le mosadi wa ka re ile ra thoma go tsenela tirelo ya nako e tletšego.”

19. Re ka dira’ng e le gore re tšwele pele re sepela bjalo ka “bana ba seetša”?

¹⁹ Lengwalo leo Paulo a le ngwaletšego Baefeso, le swanetše go ba le ile la ba thuša gore ba dule ba botegela Jehofa. Le rena keletšo yeo e ka re thuša. Ka ge re ithutile, e ka re thuša gore re kgethe boithabišo bja rena le batho bao re gweranago le bona ka bohlale. E ka re thuša gore re be le lenaneo leo le tšwelago pele la go ithuta Beibele e le gore seetša sa therešo se dule se re hlahla. Le re bontšha gape bohlokwa bja moya o mokgethwa wo o ka re thušago gore re tšweletše dika tše dibotse. Go diriša seo Paulo a se ngwadilego go ka re thuša gore re dire diphetho tše bohlale tšeo di sepedišanago le tsela ya Jehofa ya go nagana. Ka go dira dilo tše, re tlo phema go ba leswiswing la lefase le gomme ra dula re le seetšeng!