Thuto 4

Kamoo o ka Ithutago ka Modimo ka Gona

O ka ithuta ka Jehofa ka go bala Beibele. Kgale-kgale Modimo o ile a kgetha batho ba itšego gore ba ngwale dikgopolo tša gagwe. Mangwalo ao a bitšwa Beibele. Lehono re ithuta ka Modimo ka go bala Beibele. Ka ge Beibele e hupere lentšu la Jehofa goba molaetša, e bitšwa Lentšu la Modimo. Re ka dumela seo Beibele e se bolelago ka gobane Jehofa le ka mohla ga a aketše. “Ga go kgonege gore Modimo a aketše.” (Ba-Hebere 6:18, NW) Lentšu la Modimo le hupere therešo.—Johane 17:17.

Beibele ke e nngwe ya dimpho tše bohlokwa-hlokwa tšeo Modimo a re filego tšona. E swana le lengwalo le le tšwago go tate yo lerato le le yago go bana ba gagwe. E re botša ka kholofetšo ya Modimo ya go fetola lefase gore e be lefelo leo le kgahlišago la go dulwa—e lego paradeise. E re botša ka seo a se dirilego nakong e fetilego, seo a se dirago gona bjale le seo a tlago go se dira nakong e tlago bakeng sa bana ba gagwe ba botegago. E bile e re thuša le go rarolla mathata a rena le go hwetša lethabo.—2 Timotheo 3:16, 17.

Dihlatse tša Jehofa ke bagwera ba Modimo; di tla go thuša gore o kwešiše seo Beibele e se rutago. E fo di botša gore o nyaka go ithuta Beibele. Ga di lefiše tšhelete bakeng sa se. (Mateo 10:8) Go oketša moo, o ka ba gona dibokeng tša Bokriste. Tše di swarelwa mafelong a borapedi ao a bitšwago Diholo tša Mmušo. Ge e ba o e-ba gona dibokeng tša Bokriste, o tla gola ka pela tsebong ya gago ya go tseba ka Modimo.

O ka ithuta ka Modimo dilong tšeo a di dirilego. Ka mohlala, Beibele e re: “Modimo ó hlodile lexodimo le lefase.” (Genesi 1:1) Ge Jehofa a be a bopa “lexodimo,” o ile a dira le letšatši. Ka gona seo se re botša eng ka Modimo? Se re botša gore Jehofa o na le matla a magolo. Ke yena feela a bego a ka kgona go dira selo se matla bjalo ka letšatši. Se re botša le gore Jehofa o bohlale, ka ge go ile gwa nyakega bohlale bakeng sa go dira letšatši leo le re neago phišo le seetša gomme le ka mohla le sa ke le felelwa ke matla.

Tlholo ya Jehofa e bontšha gore o a re rata. Nagana ka mehuta ka moka ya dienywa yeo e lego gona mo lefaseng. Jehofa nkabe a ile a re nea mohuta o tee wa seenywa—goba a se re nee selo le gatee. Go e na le moo, Jehofa o re neile mehuta e mentši ya dienywa di e-ya ka mehuta-huta e mentši ya dibopego, bogolo, mebala le tatso. Se se bontšha gore Jehofa ke Modimo yo a sa bontšhego lerato feela eupša gape ke yo a fago kudu, yo a naganelago le yo botho.—Psalme 104:24.