Leina le Emela’ng?

Mosadi wa Moethiopia o belega ngwana wa mošemanyana. Eupša lethabo la gagwe le fetoga sello ge a bona ngwana a letše gomme a sa šikinyege. Ge makgolo’a ngwana a tšea leseana leo le sa šikenyegego gore a yo le hlapiša, gatee-tee le thoma go šikinyega le go hema gomme le a lla! Leina la tatago ngwana yo le bolela gore “Mohlolo,” ka gona batswadi ba ile ba kopanya leina leo le lentšu le lengwe la se-Amharic gomme ba rea mošemanyana Mohlolo o Diregile.

Kua Burundi, lesogana le tšhabela mašole ao a nyakago go le bolaya. Ge le dutše le ikutile sekgweng, le ikana gore ge e ba Modimo a ka le phološa le tla rea leitšibulo la lona Manirakiza, yeo e bolelago gore “Modimo ke Mophološi.” Nywaga e mehlano ka morago, le thabetše gore le sa phela, lesogana leo le rea morwa wa lona wa leitšibulo leina leo.

GO REA bana maina ao a nago le seo a se bolelago go ka ba go sa tlwaelega go batho ba bangwe, eupša mokgwa wo o be o dirišwa mehleng ya bogologolo. Ge e le gabotse, Beibele e na le maina a bjalo a makgolo. Go kwešiša seo se bolelwago ke maina a fapanego a batho go tla dira gore o holwe ke mmalo wa gago wa Beibele. Ela hloko mehlala e sego kae feela.

Maina ao a Bego a E-na le Seo a se Bolelago ka Mangwalong a Seheberu

Le lengwe la maina a pele ao a ngwadilwego ka Beibeleng ke Sethe, leo le bolelago “O Hlomile.” Mmago Sethe e lego Efa o ile a hlalosa lebaka leo ka lona a mo reilego leina leo ka gore: “Modimo ó mphile ngwana e mongwê ’bakeng sa Abele yo Kaine a mmolailexo.” (Genesi 4:25) Setlogolo sa Sethe e lego Lamege, o reile morwa wa gagwe Noage, yeo e bolelago “Go Khutša” goba “Khomotšo.” Lamege o itše o reile morwa wa gagwe leina leo ka gobane “yêna-yó ó tlo re khutšiša medirô ya rena le ditapišêxo tša matsôxô a rena tše di tšwaxo lefaseng lé le Morêna a le roxilexo.”—Genesi 5:29.

Modimo ka boyena o ile a fetoša maina a batho ba itšego ba bagolo ka morero wa boporofeta. Ka mohlala, o ile a fetoša leina la Aborama leo le bolelago gore “Tate o Godišitšwe” gore e be Aborahama, leo le bolelago “Tatago Ditšhaba.” Ka go dumelelana le leina la gagwe, Aborahama o ile a ba tatago ditšhaba tše dintši. (Genesi 17:5, 6) Ela hloko gape le mosadi wa Aborahama e lego Sarai, yo go ka diregago gore leina la gagwe le bolela “Senganga.” O swanetše go ba a ile a thaba gakaakaang ge Modimo a mo rea leina le lengwe e lego “Sara,” leo le bolelago “Kgošatšana,” e lego leo le bego le lebiša tlhokomelo go beng ga gagwe makgolokhukhu wa dikgoši.—Genesi 17:15, 16.

Le gona, Modimo o ile a kgethela bana ba itšego maina. Ka mohlala, o ile a botša Aborahama le Sara gore ba ree morwa wa bona Isaka, yeo e bolelago “Disego.” Ka mehla leina leo le be le tla gopotša banyalani bao tsela yeo ba arabetšego ka yona ge ba be ba e-kwa gore ba tla ba le morwa botšofading bja bona. Ge Isaka a gola go ba mohlanka yo a botegago wa Modimo, go ka direga gore leina la gagwe le ile la tšwela pele go thabiša Aborahama le Sara ge ba dutše ba thabela go dula le morwa yo yoo a rategago.—Genesi 17:17, 19; 18:12, 15; 21:6.

Ngwetši ya Isaka e lego Ragele o ile a rea morwa wa gagwe wa mafelelo leina ka lebaka le le fapanego. Ge a dutše a le kgaufsi le go hwa, Ragele o ile a rea ngwana yoo Benoni, e lego leo le bolelago “Morwa wa Bohloko Bja-ka.” Monna wa gagwe yo a hwetšwego e lego Jakobo o ile a fetoša leina leo ganyenyane gore e be Benyamini, leo le bolelago “Morwa wa le Letona La-ka.” Leina leo le be le sa emele feela go ratega, eupša gape le be le emela thekgo.—Genesi 35:16-19; 44:20.

Ka dinako tše dingwe batho ba be ba rewa maina goba ba a amogela go dumelelana le dika tša bona. Ka mohlala, Isaka le Rebeka ba ile ba ba le morwa yo a belegwego a e-na le moriri o mohwibidu le o mogolo go swana le kobo ya boya, ke moka ba mo rea Esau. Ka baka la’ng? Ka Seheberu, leina leo le bolela “Seo se Nago le Boya.” (Genesi 25:25) Bjalo ka ge go boletšwe pukung ya Ruthe, Naomi o be a e-na le barwa ba babedi. Yo mongwe o be a reilwe Mahlone, yeo e bolelago “Yo a Babjago, Sekoka” gomme yo mongwe a rewa Kileone yeo e bolelago “Bofokodi.” Ga go bolelwe ge e ba ba reilwe maina a nakong ya ge ba belegwa goba ka morago, eupša go bonala a swanetše ka gobane masogana a a mabedi a hwile ka pela.—Ruthe 1:5.

Mokgwa o mongwe o bego o tlwaelegile e be e le wa go rea batho maina a mafsa goba go fetoša maina a bona ganyenyane. Ge a boela Betlelehema gomme a diila ka baka la go lahlegelwa ke monna le barwa, Naomi o be a se sa nyaka go bitšwa ka leina la gagwe, leo le bolelago “Lethabo La-ka.” Go e na le moo, o phegeletše gore: “Lesang xo mpitša ka la Naomi; a nke Le re Mara ka xobane Yo-matla-ka-moka ó ntirile tše di xalakaxo ruri.”—Ruthe 1:20, 21.

Mokgwa o mongwe gape e be e le wa go reelela ngwana ka tiragalo ya bohlokwa. Ka mohlala, leina la moporofeta Hagai le bolela gore “O Belegwe Letšatšing la Moletlo.”a

Maina ao a Bego a E-na le Seo a se Bolelago Mehleng ya Bokriste

Leina la Jesu le bontšhitše karolo yeo a tlago go e bapala. Pele a belegwa, Modimo o ile a laela batswadi ba gagwe gore: “Leina la gagwe [le] mmitše Jesu,” e lego leina leo le bolelago gore “Jehofa ke Phološo.” Ka baka la’ng? Morongwa yo a bego a bolela le Josefa o itše: “O tla phološa batho ba gabo dibeng tša bona.” (Mateo 1:21) Ka morago ga ge Jesu a tloditšwe ka moya o mokgethwa nakong ya ge a kolobetšwa, leina la gagwe le ile la kopanywa le sereto sa Seheberu e lego “Mesia.” Ka Segerika sereto sona seo se fetoletšwe e le “Kriste.” Direto tše ka bobedi di bolela “Motlotšwa.”—Mateo 2:4.

Jesu ka boyena o ile a kgethela barutiwa ba gagwe maina ao a ba hlalosago. Ka mohlala, o reile Simone leina la se-Semite e lego Kefase, leo le bolelago “Lwala.” Kefase o ile a tsebja kudu ka leina la gagwe le le fetoletšwego ka Segerika e lego “Petro.” (Johane 1:42) Jesu o ile a rea barwarre bao ba fišegago e lego Jakobo le Johane gore ke “Boaneregese,” yeo e bolelago “Barwa ba Modumo.”—Mareka 3:16, 17.

Barutiwa ba Jesu ba ile ba tšwetša pele mokgwa wa go rea batho maina a oketšegilego. Mohlala o mongwe ke wa morutiwa Josefa, yoo baapostola ba mo reilego Baranaba, yeo e bolelago “Morwa wa Khomotšo.” Baranaba o ile a phelela leina la gagwe ka go homotša ba bantši maikwelong le ditirišanong tša bona le Modimo.—Ditiro 4:34-37; 9:27; 15:25, 26.

Bohlokwa bja Leina la Gago

Ga re kgone go ikgethela leina leo re le newago ge re belegwa. Lega go le bjalo, ke rena re ikgethelago tsela yeo re nyakago go tsebja ka yona. (Diema 20:11) Ke ka baka la’ng o sa ipotšiše gore: ‘Ke leina lefe leo Jesu goba baapostola ba bego ba ka nnea lona ge e ba ba be ba ka dumelelwa go dira bjalo? Ke leina lefe leo le bego le ka swanela seka sa-ka se segolo goba botumo bja-ka?’

Re swanetše go naganišiša ka mo go tseneletšego ka potšišo ye. Ka baka la’ng? Kgoši Solomone yo bohlale o ngwadile gore: “Tumô e phala lehumô.” (Diema 22:1) Ka kgonthe, ge e ba re e-ba le leina goba botumo bjo bobotse motseng wa gabo rena, re na le selo sa bohlokwa kudu. Lega go le bjalo, sa bohlokwa le go feta ke gore ge e ba re itirela leina le lebotse go Modimo, re tla ba le lehumo le sa felego. Bjang? Modimo o holofetša gore o tla ngwala maina a bao ba mmoifago ka ‘pukung ya gagwe ya kgopotšo’ gomme o tla ba nea kholofelo ya bophelo bjo bo sa felego.—Maleaki 3:16; Kutollo 3:5; 20:12-15.

[Mongwalo wa tlase]

[Ntlhakgolo go letlakala 15]

Ke leina lefe leo le bego le ka hlalosa botumo bja-ka gabotse?

[Lepokisi/Seswantšho go letlakala 14]

Imanuele e be e le Mang?

Maina a batho ba bangwe ka Beibeleng e be e le a boporofeta gomme a hlalosa modiro woo motho yoo a bego a tla o dira. Ka mohlala, moporofeta Jesaya o ile a budulelwa go ngwala gore: “Bônang, kxarebe e tlo ima, ya bêlêxa morwa, ’me O mo reê ’ina la Imanuele.” (Jesaya 7:14) Leina le le bolela gore “Modimo ó na le rena.” Bahlalosi ba bangwe ba Beibele ba lekile go kgokaganya go phethagatšwa ga mathomo ga boporofeta bjo le yo mongwe wa dikgoši tša Isiraele goba yo mongwe wa barwa ba Jesaya. Lega go le bjalo, mongwadi wa Ebangedi e lego Mateo o bontšhitše gore boporofeta bja Jesaya bo phethagaditšwe ka mo go feletšego go Jesu.—Mateo 1:22, 23.

Ba bangwe ba boletše gore ka go diriša leina la Imanuele go Jesu, Beibele e ruta gore Jesu ke Modimo. Lega go le bjalo, ge e ba re nea mabaka ka mokgwa wo, gona go ra gore Elihu yo a ilego a homotša le go phošolla Jobo, le yena e be e le Modimo. Ka baka la’ng? Leina la gagwe le bolela gore “Modimo Wa-ka ke Yena.”

Jesu ga se a ka a bolela gore ke yena Modimo. (Johane 14:28; Bafilipi 2:5, 6) Eupša o ile a bonagatša semelo sa Tatagwe ka mo go phethagetšego, le gona o ile a phethagatša dikholofetšo tša Modimo ka moka tša mabapi le Mesia. (Johane 14:9; 2 Bakorinthe 1:20) Leina Imanuele le hlalosa gabotse karolo yeo Jesu a e phethago bjalo ka Peu ya Mesia e lego setlogolwana sa Dafida, yena yoo a bontšhago gore Modimo o na le bao ba Mo rapelago.

[Seswantšho]

IMANUELE “Modimo ó na le Rena”

[Lepokisi/Seswantšho go letlakala 15]

Leina la Bohlokwa Kudu

Leina la Modimo le tšwelela ka makga a ka bago 7 000 ka Beibeleng. Leina le, bjalo ka ge le emelwa ke ditlhaka tše nne tša Seheberu e lego יהוה, gantši le fetolelwa e le “Jehofa” ka Sepedi. Leina leo le bolela’ng? Ge Moše a botšiša ka leina la Modimo, Jehofa o ile a araba ka gore: “Ke Tla Ba se sengwe le se sengwe seo ke kgahlwago ke go ba sona.” (Ekisodo 3:14, The Emphasised Bible, ka J. B. Rotherham) Ka baka leo, leina la Modimo ke kgonthišetšo ya gore o tla ba selo le ge e le sefe seo go nyakegago gore a be sona e le gore a phethagatše merero ya gagwe. (Jesaya 55:8-11) Ge Modimo a dira kholofetšo, re ka thea maphelo a rena kholofetšong yeo ka kgodišego. Ka baka la’ng? Ka gobane leina la gagwe ke Jehofa.

[Seswantšho go letlakala 13]

ABORAHAMA “Tatago Ditšhaba”

[Seswantšho go letlakala 13]

SARA “Kgošatšana”