Bophelo le Bodiredi bja Jesu

Boikarabelo bja go ba Morutiwa

KA MORAGO ga go tloga ngwakong wa Mofarisei yo a tumilego, yo go lego molaleng gore ke setho sa Sanhedrin, Jesu o tšwela pele a lebile Jerusalema. Mašaba a mantši a a mo latela. Eupja maikemišetšo a bona ke eng? Ke’ng seo se tlogago se akaretšwa tabeng ya go ba molatedi wa gagwe wa kgonthe?

Ge ba dutše ba sepela, Jesu o retologela go mašaba gomme mohlomongwe o ba makatša ge a re: “Xe motho à e-tla xo Nna à sa hlôye tat’axwe le mm’axwe le mosadi le bana le bana babô le dikxaetšedi, le byôna bophelô bya xaxwe, a ka se ke a ba morutiwa wa-ka.”

Ke’ng seo Jesu a se bolelago? E sego gore balatedi ba gagwe ba swanetše go hloya metswalo ya bona e le ka kgonthe. Go e na le moo, ba swanetše go ba hloya ka kgopolo ya go ba rata go se nene go feta kamoo ba mo ratago ka gona. Go bolelwa gore Jakobo rakgolokhukhu wa Jesu o be a ‘hloile’ Lea gomme a rata Rahele, e lego seo se bego se bolela gore Lea o be a ratwa go se nene go feta Rahele ngwanabo.

Le gona, ela hloko gore Jesu o boletše gore morutiwa o swanetše go hloya “le byôna bophelô bya xaxwe.” Mo le gona seo Jesu a se bolelago ke gore morutiwa wa kgonthe o swanetše go Mo rata kudu go fetiša kamoo a ratago bophelo bja gagwe ka gona. Ka gona Jesu o gatelela gore go ba morutiwa wa gagwe ke boikarabelo bjo bohlokwa. Ga se selo se se swanetšego go dirwa ka ntle le go naganišišwa ka kelohloko.

Mathata le tlaišo di a akaretšwa tabeng ya go ba morutiwa wa Jesu, bjalo ka ge a tšwela pele go bontšha: “E a sa rwalexo [kota ya gagwe ya tlhokofatšo] a tla a nthšala moraxo, a ka se ke a ba morutiwa wa-ka.” Ka gona, morutiwa wa kgonthe o swanetše go ikemišetša go rwala boikarabelo bjo bo swanago bja kgobošo bjoo Jesu a ilego a bo rwala, go akaretša gaešita le go hwa diatleng tša manaba a Modimo ge e ba go nyakega, e lego seo Jesu a tlago go se dira go se go ye kae.

Ka gona, go ba morutiwa wa Kriste ke selo seo mašaba ao a bego a mo latela a bego a swanetše go se hlahlobišiša ka kelohloko. Jesu o gatelela therešo ye ka go diriša seswantšho. O re, “ké mang mo xo lena, yo a rexo xe a rata xo axa morako o motelele, a se thome a dula a bala thšêlêtê ya xaxwe, a tle a bone xe a na le ye e lekanetšexo xo tlo phetha modiro woo? E se bê mohlomongwê xe a beile mothêô a šitwa xo phetha; a tloxa a kwêrwa ke bohle ba ba di bonaxo, ba re: Motho é ó thomile xo axa; ’me o šitilwe xo phêtha.”

Ka gona Jesu o bontšha mašaba ao a mo latelago gore pele ba e-ba barutiwa ba gagwe, ba swanetše go ba ba ba ikemišeditšego ka go tia gore ba ka phetha seo se akaretšwago, go etša ge monna yo a ratago go aga morako o motelele a kgonthišetša pele a thoma gore o na le ditlabakelo tša go o phetha. Jesu ge a nea seswantšho se sengwe o tšwela pele ka gore:

“Xoba kxoši ké efe, yeo e rexo xe e tšwela kxoši e nngwe dira, e ka se kexo ya thoma xo dula ya eleletša xe xo tlo kxônêxa xe e ka tšwa le ba dikete tše lesome a y’o xahlana le e a mo tšwetšexo le ba dikete tše masome a mabedi? Xe a bôna xo sa kxônexe, ó tlo roma batseta, a loba yola a sa le kxolê.”

Ka morago Jesu o gatelela ntlha ya diswantšho tša gagwe, gomme o re: “Xo byalo le mo xo lena; e a sa fularelexo tšohle tše a naxo natšo’, a ka se ke a ba morutiwa wa-ka.” Ke seo mašaba ao a bego a mo latela, ee gaešita le motho o mongwe le o mongwe yo a ithutago ka Kriste ba swanetšego go ikemišetša go se dira. Ba swanetše go ikemišetša go gafa selo se sengwe le se sengwe seo ba nago le sona, dilo ka moka tša bona, go akaretša bophelo ka noši, ge a ba ba tla ba barutiwa ba gagwe. Na o ikemišeditše go dira se?

Jesu o tšwela pele ka gore, “Letswai ke selô se botse.” Thutong ya gagwe ya Thabeng o boletše gore barutiwa ba gagwe ke “letswai la lefase,” e lego se se bolelago gore ba na le tutuetšo ya tšhireletšo bathong, go etša ge letswai la kgonthe a le leo le šireletšago. Jesu o phetha ka gore, “Fela, xe le tapa, le sa tlo nokwa ka’ng? Xa le sa na modiro mo thšemong le mo moroleng; ba le lahlela kxakala. E a naxo le ditsebe tša xo kwa a a kwe.”

Ka gona Jesu o bontšha gore gaešita le bao e bilego barutiwa ba gagwe ka nako e teletšana ga se ba swanela go nyefiša boikemišetšong bja bona bja go tšwela pele. Ge a ba ba dira bjalo, ba tla fetoga bao ba se nago mohola, a lego bao ba kwerwago ke lefase le gomme ba se swanelege pele ga Modimo, ge a le gabotse ba tliša kgobošo go Modimo. Ka gona, go swana le letswai leo le se nago matla le le tapilego, ba tla lahlelwa kgakala, ee, ba fedišwa. Luka 14:25-35; Genesi 29:30-33; Mateo 5:13.

◆ Go ‘hloya’ metswalo ya motho le go itlhoya ga motho ka noši go bolela’ng?

◆ Jesu o nea diswantšho dife tse pedi, gomme tse di bolela’ng?

◆ Ke eng seo se bolelwago ke ditlhaloso tša go phetha tša Jesu mabapi le letswai?