“Modimo Wa Khutšô” O Hlokomela Batlaišegi

BEIBELE e hlalosa ka mo go kwalago gore Dafida wa kgale o be a tlwaetše tlaišego. O phetše ka nywaga e mmalwa e le motšhabi, a lelekišwa ka go se kgaotše ke kgoši e kgopo le ya senganga yeo e bego e ikemišeditše go mmolaya. Lebakeng le la tlaišego, Dafida o ile a utama mafelong a lego lekatana. Eupša o ile a dira selo se sengwe gape. O ile a rapela Jehofa ka go tšwa pelong mabapi le bothata bja gagwe. O ile a ngwala ka morago mabapi le phihlelo ya gagwe gore: “Ke hlaboša lentšu kè bitša Morêna. . . . Ke thšollêla dillô tša-ka pel’a xaxwe, ke mmotša se se ntlaletšaxo.”—Psalme 142:1, 2.

Lehono ba bangwe ba be ba tla kwera go ithekga ga Dafida ka Modimo. Ba be ba tla bolela gore thapelo ke seikokotlelo feela sa tša monagano le gore ke tshenyo ya nako ge e lebelelwa ka tsela ya kgonthe. Lega go le bjalo, go bota ga Dafida Modimo e be e se ga lefeela ka gobane manaba a gagwe a ile a fenywa mafelelong. Ge a be a lebelela morago phihlelong ya gagwe, Dafida o ile a ngwala gore: “Mmôtlana šó, a bitša Morêna, a mo kwa, a mo phološa mo mahlomoleng a xaxwe ohle.” (Psalme 34:6) Modimo wa therešo yoo Dafida a ilego a retologela go yena o bitšwa mafelong a mangwe gore ke “Modimo wa khutšô.” (Ba-Filipi 4:9; Ba-Hebere 13:20) Na o tla re hlakodiša tlaišegong ra ba le khutšo?

Jehofa o a go Hlokomela

Jehofa ga a kgole ge e le mabapi le mathata a batho ba gagwe. (Psalme 34:15) O šetša le dinyakwa tša motho yo mongwe le yo mongwe yo a mmoifago, eupša e sego tša bahlanka ba gagwe e le sehlopha feela. Ge Salomo a be a neela tempele Jerusalema ya kgale o ile a lopa Jehofa gore a theetše “dithapelo ka moka, le ditopo ka moka tše di ka bewago ke motho ofe le ofe, goba ke setšhaba sa gago sa Isiraele, ge ba lemoga tshwenyo ye ba tshwenywago ka yona le bohloko bja bona.” (2 Koronika 6:29, PK, mongwalo o sekamego ke wa rena.) Go etša ge Salomo a ile a dumela, motho yo mongwe le yo mongwe o na le tlaišego ya gagwe ka noši e fapanego yeo a swanetšego go e kgotlelela. Go motho yo mongwe e ka ba bolwetši bja mmele. Go yo mongwe e ka ba kgateletšego ya maikwelo. Ba bangwe ba ka tlaišwa ke lehu la moratiwa. Go hloka mošomo, bothata bja tša boiphedišo le mathata a lapa le tšona ke ditlaišego tše di tlwaelegilego mehleng ye e thata.

Anke o nagane go se nene ka ‘tshwenyo yeo o tshwenywago ka yona le bohloko bja gago.’ Mohlomongwe o ile wa ikwa ka dinako tše dingwe bjalo ka mopsalme Dafida yo a ngwadilego gore: “Ke hloloxetšwe monkwêla-bohloko, ka mo hlôka; wa xo nkhomotša xa ke mmône.” Lega go le bjalo, o ka kgodišega gore Modimo o kgomega ka boemo bja gago ka gobane Dafida o ngwadile ka morago psalmeng yona ye gore: “Xobane badiidi Morêna ó a ba kwa; ’me baxolêxwa ba xaxwe xa’ ba nyatše.”—Psalme 69:20, 33.

Ge re diriša mantšu a Dafida ka kgopolo e nabilego, re ka kgonthišega gore Mmopi wa batho o kwa dithapelo tša bao go ka thwego ba golegilwe ke ditlaišego tša bona. Go feta moo, o arabela boemong bja bona. Ela hloko dipolelo tše di latelago tše di utollago kwelobohloko ya Jehofa go batlaišegi.

“O se kê wa hlakiša mohloloxadi le sešuana. Xe O ka bá wa ba hlakiša, ’me ba ntelêla, ke tlo kwa sellô sa bôná; ’me boxale bya-ka bo tlo tuka.”—Ekisodo 22:21-23.

“Byale Modimo, a a ka se namolêle bakxêthwa ba xaxwe ba ba mmitšaxo mosexare le bošexo, le xe a ka ba letetša?”—Luka 18:7.

“O tla hlakodiša modiitšana ge a goeletša, le mohlaki yo a hlokago mothuši. O tla gaugela yo madi-mabe le modiitšana, o tla phološa meoya ya bahumanegi. O tla phološa meoya ya bona tshenyegong le bošorong, gomme madi a bona e tla ba a bohlokwa mahlong a gagwe.”—Psalme 72:12-14, PK.

“Yo a kgwathišago lena [batho ba Modimo lefaseng], o kgwathiša thaka ya leihlo [la-ka, NW].”—Sakaria 2:8, PK.

Mehlala ye e sego kae e bontšha kgahlego e tseneletšego ya Mmopi wa rena boiketlong bja batho ba gagwe. Ka gona, re na le lebaka le le kwalago la go latela keletšo ya moapostola Petro e rego: “Dipelaêlô tša lena ka moka di lahleleng xodimo xa xaxwe, xobane ké Yêna a Le belaêlêlaxo.” (1 Petro 5:7) Eupša Modimo o tla re thuša bjang dinakong tša tlaišego?

Kamoo Modimo a Thušago Batlaišegi ka Gona

Go etša ge re šetše re bone, Dafida ge a be a tlaišega o ile a rapela Modimo ka go tšwa pelong bakeng sa tlhahlo. Ka nako e swanago, o ile a gata mogato wa go imolla boemo pele, a diriša boikgakanyo gore a ngwegele bao ba mo lelekišago. Ka go rialo, go ithekga ka Jehofa go kopane le boiteko bja motho ka noši di dirile gore Dafida a kgone go kgotlelela bothata bja gagwe. Re ka ithuta’ng go se?

Ge re lebeletšane le tlaišego, ruri ga se mo go fošagetšego gore re gate mogato pele ka tlhaologanyo go rarolla bothata. Ka mohlala, ge Mokriste a ikhwetša a se na mošomo, na a ka se ke a dira boiteko bja go hwetša mošomo? Goba ge e ba a babja mmeleng, na a ka se ke a tsoma tlhokomelo ya tša kalafo? Ka kgonthe, gaešita le Jesu yo a bego a e-na le matla a go fodiša mehuta ka moka ya malwetši o ile a dumela gore ‘ba ba babjago ba nyaka ngaka.’ (Mateo 9:12; bapiša le 1 Timotheo 5:23.) Go ba gona, mathata a mangwe a ka se ke a tlošwa; a upša a swanetše go kgotlelelwa. Lega go le bjalo, Mokriste wa therešo ga a lebelele tlaišego ka boyona e le go loka go etša ge ba bangwe ba dira. (Bapiša le 1 Dikxoši 18:28.) Go e na le moo, o gata megato le ge e le efe yeo a ka e kgonago gore a lebeletšane le tlaišego ya gagwe.

Lega go le bjalo, ke mo go nago le tlhaologanyo ka nako e swanago go iša taba go Jehofa ka thapelo. Ka baka la’ng? Sa pele, ka go ithekga ka Mmopi wa rena re thušwa go “kgonthišetša dilo tša bohlokwa kudu.” (Ba-Filipi 1:10, NW) Ka mohlala ge re tsoma mošomo, go ithekga ka Modimo ka thapelo go tla re thuša gore re se ke ra amogela modiro o lwantšhanago le melao ya Beibele ya motheo. Gape, re tla phema go ‘arošwa tumelong’ ke go rata tšhelete. (1 Timotheo 6:10) Ruri, ge re dira diphetho tše boima—mabapi le mošomo goba sebopego le ge e le sefe se sengwe sa bophelo—re swanetše go latela keletšo ya Dafida e rego: “Lahlêla Morêna morwalô wa xaxo; Yêna ó tlo Xo babalêla; a ka se kê a bá a lesa moloki xe a ka šuthišwa.”—Psalme 55:22.

Thapelo e bile e re thuša gore re boloke teka-tekano ya rena ya monagano e le gore tlaišego ya rena e se ke ya re fenya. Moapostola Paulo o ngwadile gore: “Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô.” Ka mafelelo afe? “Khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.” (Ba-Filipi 4:6, 7) Ee, khutšo, e lego khutšo ya Modimo. Khutšo yeo ‘e feta tlhaologanyo yohle,’ ka gona e ka re tiiša ge re imelwa ke maikwelo a gateletšago. E tla ‘boloka dipelo tša rena le dikgopolo,’ ka go rialo ya re thuša go phema go arabela ka tsela ya bošilo le yeo e sego ya bohlale yeo e ka oketšago tlaišego ya rena.—Mmoledi 7:7.

Go sa na le tše dintši tšeo thapelo e ka di dirago. E ka ba le tutuetšo pheletšong ya boemo. Ela hloko mohlala wa Beibele. Ge moapostola Paulo a be a golegilwe kua Roma, o ile a kgothaletša Bakriste-gotee le yena gore ba mo rapelele. Ka baka la’ng? O ba ngwaletše gore: “Ke Le rapêla xa-xoloxolo xore Le dirê byalo, xore ke bušetšwê xo lena ka pelá.” (Ba-Hebere 13:19) Paulo o be a tseba gore dithapelo tše di sa kgaotšego tša badumedi-gotee le yena di be di ka ba le tutuetšo mabapi le nako yeo a bego a tla lokollwa ka yona.—Filemone 22.

Na thapelo e ka fetoša mafelelo a tlaišego ya gago? E ka a fetoša. Lega go le bjalo, re swanetše go lemoga gore ga se ka mehla Jehofa a arabago dithapelo tša rena ka tsela yeo re ka e letelago. Ka mohlala, Paulo o ile a rapela leboelela mabapi le “phatša nameng” ya gagwe—mohlomongwe e le bothata bja mmele bjo bo sepedišanago le go bona ga gagwe. Go e na le go tloša tlaišego, Modimo o ile a botša Paulo gore: “Kxauxêlô ya-ka a e Xo lekanê, xobane matla a-ka a iphêtha phokolong.”—2 Ba-Korinthe 12:7-9.

Ka gona, ka dinako tše dingwe mathata a rena a ka se ke a tlošwa. Go e na le moo, re tla ba le sebaka sa go bontšha go ithekga ga rena ka Mmopi wa rena. (Ditiro 14:22) Go feta moo, re ka kgonthišega gore gaešita le ge Jehofa a sa tloše tlaišego o tla “bea sebaka sa xo tlo efoxa, xore [re] kxônê xo kxôtlêlêla.” (1 Ba-Korinthe 10:13) Ee, ke ka lebaka le le kwalago ge Jehofa a bitšwa “Modimo wa khomotšô yohle, e a re homotšaxo mahlokong a rena ohle.” (2 Ba-Korinthe 1:3, 4) O re nea seo re se nyakago gore re kgotlelele re e-na le khutšo e kgolo.

Go se go ye Kae—Lefase le se Nago Tlaišego le tla tla!

Mmopi o holofetša gore o tla tloga a fediša ditlaišego tša batho ka Mmušo wa gagwe. O tla phetha bjang se? Ka go tloša Sathane Diabolo, yena mohlohleletši yo mogolo wa tlaišego le lenaba le legolo la khutšo, yoo Beibele e mo hlaolago e le “modimo wa tshepedišo ye ya dilo.” (2 Ba-Korinthe 4:4, NW) Eupša taolo ya gagwe godimo ga batho e tla tloga e fela. Go fedišwa ga gagwe go tla bula tsela gore ditšhegofatšo tše sa balegego di tlele bao ba boifago Modimo. Beibele e holofetša gore Jehofa o tla “phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:1-4.

Na lefase le le se nago tlaišego le kwala e le taba e kgahlišago kudu go ka ba therešo? Re tlwaetše kudu go phela ka mathata mo e lego gore re gateletšegile kudu go ka akanya ka go se be gona ga ona. Eupša go se be le poifo, pelaelo le manyami ke sona selo seo Modimo a bego a se reretše batho go tloga go bopšeng, gomme morero wa gagwe o tla atlega.—Jesaya 55:10, 11.

Ye ke kholofelo yeo Sonia, Fabiana le Ana bao go boletšwego ka bona sehlogong sa mathomo ba e hweditšego. Sonia yoo barwa ba gagwe ba babedi ba bolailwego ke AIDS o hweditše khutšo e kgolo e tlišwago ke kholofelo yeo Beibele e e neago—e lego tsogo ya baloki le ba sa lokago. (Ditiro 24:15) O re: “Selo se tee seo se kgonthišeditšwego ke gore kholofelo ya rena e feta bohloko le ge e le bofe.”

Ge a be a sa dula lefelong la ditšhiwana, Ana o ile a etelwa ke yo mongwe wa Dihlatse tša Jehofa. Ana o re: “O ile a mpontšha leina la Jehofa ka Beibeleng gomme ka lla megokgo ya lethabo. Ke be ke nyaka thušo o šoro gomme ke ile ka ithuta gore go na le Modimo yo a re hlokomelago.” Ka morago ga ge a tlogile lefelong la ditšhiwana, Ana o ile a amogela thuto ya Beibele gomme a ithuta mo go oketšegilego ka ditšhegofatšo tša Jehofa. Ka gona o ile a neela bophelo bja gagwe go Jehofa gomme a bontšha se ka kolobetšo. “Ga e sa le go tloga ka nako yeo ke ile ka tšwela pele ke ithekgile ka Jehofa ka thapelo, gomme ke homotšwa ke kgonthišetšo ya gore o tla nthuša.”

Fabiana le yena o hweditše khomotšo e kgolo le khutšo ya monagano tlaišegong ya gagwe ka go ithuta ka dikholofetšo tša Modimo tša bokamoso. “Go ithuta therešo e tšwago Beibeleng go bjalo ka go tloga lefelong la lefsifsi la kgampi go tsena ka phapošing e bulegilego, e nago le seetša le e kgahlišago.”—Bapiša le Psalme 118:5.

Eupša khutšo ya kgonthe lefaseng ka moka e tla tla bjang, gona neng? Anke re boneng dihlogong tše latelago.

[Seswantšho go letlakala 7]

Thapelo e ka re thuša go tsepelela kholofetšong ya Modimo ya lefase le le se nago tlaišego