‘Go Fetola ka Mantšu a Tiilego’

THUTONG ya thabeng, Jesu o ile a šupa go “Molaô le Baporofeta.” Karolo ya boraro ya Mangwalo a Sehebere e be e le Mengwalo, yeo e bego e akaretša dipuku tša direto tše di swanago le Dipsalme le Diema. (Mateo 7:12; Luka 24:44) Tše le tšona di be di e-na le bohlale bja Modimo.

Ka mohlala, diema di lemošitše baahlodi ba Isiraele ya bogologolo gore: “Yo a rago e mobe a re: O lokile; batho ba tlo mo roga, gomme ditšhaba di tlo mmefelelwa. Eupja ba ba mo solago ba tlo ratega, gomme tšhegofatšo e botse e tlo ba tlela. E a fetolago ka mantšu a tiilego o atla melomo.”—Diema 24:24-26, Phetolelo ya Kgale.

Ge e ba moahlodi a ile a ineela tutuetšong ya tsogo le kobong le go ahlola sepitša gomme a bolela yo mobe e le wa go loka, ba bangwe ba be ba tla mmona e le yo a sa swanelwego ke boemo bja gagwe. Ee, gaešita le ditho tša “ditšhaba” tša Ba-ntle tšeo di kwelego ka phošo e bjalo ya kahlolo di be di tla e nyatša! Ka lehlakoreng le lengwe, ge e ba moahlodi a ile a sola motho e mobe ka sebete gomme a fetotše ka mantšu a tiilego tabeng e rerwago, o be a tla hwetša tlhompho le lerato la batho. Batho ba bantši ba be ba tla tutueletšega go mo kganyogela “tšhegofatšo e botse.” Go bjalo ka ge seema se tšwela pele go bolela gore: “E a fetolago ka mantšu a tiilego o atla melomo.”

Go atla mo go bjalo go swantšheditše tlhompho e tiilego—magareng ga moeletši le bao ba bonago tsholo ya gagwe e lebanyago. Mohlomongwe gaešita le yo a solwago ka boyena a ka amogela tsholo gomme a bontšha lerato go moahlodi. Diema 28:23 e re: “Mo-sôla-batho ó tlo bá a ratwa, xwa nyatšêxa wa ’leme la boreledi.” Ka gona bao ba dirago e le bagolo ba phuthego lehono ba swanetše go phema go dumelela ditswalano tša bogwera goba tša lapa di nyatšiša kahlolo ya bona. Ka go nea keletšo e nyakegago ka go tia, bagolo ba tla hwetša tlhompho ya phuthego.