Thabelang Jehofa le Hlalale

GO PHETHWA ga modiro le ge e le ofe o bohlokwa ka katlego ka mehla ke nako ya go thaba. Modiro wa go aloga wo o bego o swerwe ka March 13, 1999 Lefelong la Thuto la Watchtower Patterson, New York ka ntle le pelaelo e be e le nako e bjalo bakeng sa barutwana ba 48 ba sehlopha sa bo-106 sa Sekolo sa Beibele sa Watchtower sa Gilead.

Mantšu a go bula a Theodore Jaracz, yo e lego setho sa Sehlopha se Bušago le sealoga sa sehlopha sa bošupa sa Gilead, gomme e le modula-setulo wa lenaneo la dialoga a ile a gatelela mantšu a Psalme 32:​11: “Thabêlang Morêna! Baloki, hlalalang!” Ge a be a hlalosa lebaka leo ka lona go bego go swanetše gore bohle ba thabe tiragalong ye o ile a re: “Re a thaba mabakeng a swanago le a ka baka la seo Jehofa a se phethago ka bao ba lokilego dipelong, go akaretša le barutwana ba rena ba Gilead.” Le ge e le gore ke barutwana ba dirile dithulaganyo tša go tla Sekolong sa Gilead gomme ba katanetše go swanelegela tirelo ya boromiwa, Jehofa ke yena a dirilego gore go kgonege gore se sengwe le se sengwe se feleletše ka katlego. (Diema 21:5; 27:1) Ngwanabo rena Jaracz o ile a gatelela gore leo ke lebaka la ‘go thabela Jehofa.’

Gare ga bao ba bego ba le holong ya Patterson go be go e-na le ditho tša malapa le baeng ba barutwana bao ba bego ba e-tšwa dinageng tše 12 go tla go bona tiragalo ye e thabišago. Ka ge ba 5 198 bao ba bego ba le gona​—go akaretša le ditho tša lapa la Bethele Brooklyn, Patterson le Wallkill tšeo di bego di gokagantšwe ka mogala le bidio​—ba be ba letetše lenaneo leo le bego le tla latela, go be go le molaleng gore go be go buša moya wa lethabo.

Go Kgothaletšwa go Kgomarela Moya wa Lethabo

Ge Ngwanabo rena Jaracz a be a fetša go nea mantšu a gagwe a go bula, o ile a rola seboledi sa pele go tše hlano tšeo di bego di lokišeditše keletšo e kgothatšago ya Mangwalo, e sego bakeng sa dialoga tša Gilead feela, eupša le bakeng sa bohle bao ba bego ba le gona.

Motho wa pele wa go bolela e bile William Malenfant, e lego sealoga sa sehlopha sa bo-34 sa Gilead yo ga bjale a hlankelago e le mothuši wa Komiti ya go Ruta ya Sehlopha se Bušago. Polelong ya gagwe ya sehlogo se se rego “‘Tšohle’ ga se Lefeela” yeo e bego e theilwe go Mmoledi 1:2 o ile a rotoša potšišo e rego: “Na Salomo o be a tloga a bolela gore tšohle ka kgopolo e tletšego ya se se bolelwago ke lentšu leo, ke lefeela?” Karabo e bile gore: “Aowa. O be a bontšha gore merero ya batho yeo e hlokomologago seo thato ya Modimo e lego sona, mediro yeo e fapanego le seo thato ya Modimo e lego sona​—dilo tšeo ka moka ke lefeela.” Ka mo go fapanego, go rapela Modimo wa therešo Jehofa, ga se lefeela; go ithuta Lentšu la Modimo, e lego Beibele le go le ruta ba bangwe le gona ga se lefeela. Modimo ga a lebale maiteko a bjalo a bahlanka ba gagwe. (Ba-Hebere 6:​10) Ge e le gabotse, gaešita le ge batho bao ba amogelwago ke Modimo ba ka welwa ke mathata, ba tla ‘bolokega polokong ya ba ba phelago go Jehofa.’ (1 Samuele 25:​29, PK) A kgopolo e thabišago gakaakang! Go gopola dintlha tše go ka thuša bahlanka ba Jehofa ka moka gore ba kgomarele moya wa lethabo.

John Barr, e lego setho sa Sehlopha se Bušago o ile a kgothatša sehlopha se se alogago ka polelo ya gagwe e rego, “Hwetša Lethabo Kabelong ya Gago ya Boromiwa.” O ile a bontšha gore boromiwa ke taba e sa lego e ratwa ke Jehofa Modimo ka mehla. “Ke selo seo se kgokaganego le pontšho ya Jehofa ya lerato la gagwe la go rata lefase. O rometše Morwa wa gagwe yo a tswetšwego a nnoši mo lefaseng. Jesu e be e le moromiwa yo a phagamego kudu, moromiwa wa gomang-ka-nna.” Le ge dialoga di be di ka naganišiša ka diphetogo tšeo Jesu a bego a swanetše go di dira gore a atlege kabelong ya gagwe lefaseng, mehola ya tirelo ya Jesu ya boromiwa e sa dutše e hwetšagala bakeng sa bohle bao ba tla ikholago ka yona. Go ya ka mantšu a Ngwanabo rena Barr se ke ka gobane Jesu o be a thabela go dira modiro wa Modimo, le gona o be a rata bana ba batho. (Diema 8:​30, 31) Ngwanabo rena Barr o ile a kgothaletša dialoga gore di kgomarele dikabelo tša tšona, e sego feela ka baka la gore e be e le taba e nyakago kgotlelelo eupša ka gobane ba thabela go dira bjalo. O ile a kgothaletša sehlopa gore: “Botang Jehofa; a ka se le nyamiše.”​—Psalme 55:22.

Sehlogo se se bego se kgethilwe ke seboledi se se latelago, Lloyd Barry e lego setho se sengwe sa Sehlopha se Bušago e be e le se se rego, “Go Sepela Leineng la Jehofa ka mo go sa Felego.” Ngwanabo rena Barry yo a ilego a hlankela e le moromiwa ka nywaga e fetago e 25 Japane ka morago ga go fetša sehlopheng sa bo-11 sa Gilead o ile a anega tše dingwe tša diphihlelo tša baromiwa ba nakong ya pele gomme a hlalosa le ditlhohlo tšeo ba bego ba swanelwa ke go lebana le tšona. Ke keletšo efe e šomago yeo a bego a e swaretše sehlopha seo se bego se aloga? “Godimo ga tšohle, kgomarelang boemo bja lena bja moya. Gape le ithute leleme le setšo. E-bang le metlae. Le gona le kgomareleng modiro; le se ke la lapa goba la tlogela.” Ngwanabo rena Barry o ile a botša dialoga gore dikabelong tša bona tše di fapa-fapanego ba be ba tla gahlana le batho ba bantši bao ba sepelago leineng la medimo le medingwana e fapa-fapanego, gomme a ba gopotša mantšu a Mika a rego: “Byale xe sethšaba se sengwê le se sengwê sè e-ya ka tsela ya modimo wa sôna, rena re tlo fêla rè e-ya ka tsela ya Morena Modimo wa rena ka mehla le xo ya xo ile.” (Mika 4:5) Mohlala wa baromiwa ba pele ka ntle le pelaelo ke tutuetšo e matla kudu bakeng sa bahlanka ka moka ba Modimo ya gore ba tšwele pele ba sepela leineng la Jehofa gomme ba mo hlankele ka potego.

Yo a latetšego lenaneong e bile mohlahli wa Gilead e lego Lawrence Bowen. Sehlogo sa polelo ya gagwe se be se rotoša potšišo e rego “O tla Itlhatsela o le Bjang?” O ile a bontšha gore katlego tirelong ya Modimo e ithekgile ka tumelo le go bota Jehofa. Go ithekga ka Jehofa ka mo go feletšego go ile gwa dira gore Kgoši Asa a fenye madira a manaba a banna ba milione ka phenyo e kgolo. Lega go le bjalo, o ile a gopotšwa ke moporofeta Asaria ka go nyakega ga gore a tšwele pele a ithekgile ka Modimo: “Jehofa o na le lena, ka gobane le na le Yena.” (2 Koronika 14:​9-12; 15:​1, 2, bapiša le PK.) Ka ge leina la Modimo e lego Jehofa, le fetiša mogopolo wa gore o itlhatsela e le selo le ge e le sefe se se nyakegago bakeng sa go phetha morero wa gagwe​—go sa šetšwe ge e ba seo se bolela go ba Monei, Mošireletši goba gaešita le Mophethi wa Kahlolo​—baromiwa bao ba ithekgilego ka Jehofa gomme ba šoma ka go dumelelana le morero wa gagwe ba tla atlega dikabelong tša bona. (Ekisodo 3:​14) Ngwanabo rena Bowen o ile a phetha ka gore: “Le ka mohla le se lebale gore ge feela o dira morero wa Jehofa gore e be morero wa gago, o tla go dira gore o be ka tsela le ge e le efe yeo e nyakegago bakeng sa go phetha kabelo ya gago.”

Seboledi sa mafelelo karolong ye ya lenaneo e bile Wallace Liverance yo e kilego ya ba moromiwa gomme ga bjale e le mongwadiši sekolong. Polelo ya gagwe yeo e bego e e-na le sehlogo se se rego, “Bolokang Lentšu la Modimo le Phela Gomme le Šoma go Lena” e ile ya lebiša tlhokomelo molaetšeng o sa palelwego goba kholofetšo ya Modimo yeo ka mehla e tšwelago pele e lebile phethegong ya yona. (Ba-Hebere 4:​12) E tutuetša maphelo a bao ba e dumelelago gore e ba tutuetše. (1 Ba-Thesalonika 2:​13) Lentšu leo le ka bolokwa bjang le phela e bile le šoma maphelong a rena? Ka go ithuta Beibele ka mafolofolo. Ngwanabo rena Liverance o ile a gopotša dialoga ka mekgwa ya go ithuta Beibele yeo ba ithutilego yona Gilead yeo e bego e akaretša go bala le go hlarolla kgopolo le tirišo ya Lentšu la Modimo. O ile a tsopola mantšu a Albert Schroeder setho sa Sehlopha se Bušago seo se bego se hlankela e le modula-setulo wa komiti yeo e theilego Sekolo sa Gilead nywaga e 50 e fetilego: “Ka go diriša taba e dikologilego, motho o kgona go hwetša tutuetšo e feletšego, e nepagetšego ya moya yeo Modimo a dirago gore e hwetšagale ka Lentšung la gagwe.” Mokgwa wo wa go ithuta Beibele o boloka Lentšu la Modimo le phela e bile le šoma.

Diphihlelo le Dipoledišano tše di Thabišago

Ka morago ga dipolelo batheetši ba ile ba ipshina ka diphihlelo tše di thabišago go tšwa go barutwana. Ka tlase ga tlhahlo ya Mark Noumair yo e kilego ya ba moromiwa gomme ga bjale e lego mohlahli sekolong sa Gilead, sehlopha sa barutwana se ile sa anega le go bontšha kamoo ba bego ba leka go nea bohlatse maemong a fapa-fapanego. Ba bangwe ba ile ba kgona go thoma le go swara dithuto tša Beibele le batho tšhemong ka go ba ba elago hloko maemo a bona le dipolelo le go ba ba bontšhago kgahlego ya motho ka noši. Ka gona barutwana ba be ba ‘itota ba bile ba lota le thuto’ gomme ba be ba tloga ba kgahlegela go thuša ba bangwe gore ba hwetše phološo.​—1 Timotheo 4:16.

Go ile gwa newa ditšhišinyo tše dintši tšeo di šomago, gomme lethabo la tirelo ya boromiwa le ile la ba la bonagatšwa ke banababo rena ba mmalwa bao ba nago le phihlelo bao ba bego ba hwetša tlwaetšo sekolong sa ditho tša dikomiti tša makala seo se bego se swerwe Lefelong la Thuto la Watchtower. Banababo rena Samuel Herd le Robert Johnson bao e lego ditho tša ntlong-kgolo ba ile ba swara dipoledišano tše di phelago le baemedi ba tšwago diofising tša makala tša Mokgatlo, Bolivia, Zimbabwe, Nicaragua, Central African Republic, Dominican Republic, Papua New Guinea le Cameroon.

Ka morago ga diphihlelo le dipoledišano, Gerrit Lösch yo a alogilego sehlopheng sa bo-41 sa Gilead, yo ga bjale e lego setho sa Sehlopha se Bušago o ile a nea polelo ya mafelelo sehlogong se se šišinyago mogopolo se se rego “Na o ‘Motho yo a Rategago’?” Ngwanabo rena Lösch o ile a thoma ka go gopotša dialoga gore Jesu, Morwa yo a phethagetšego wa Modimo, o be a sa lebelelwe e le yo a rategago bathong eupša “o be a nyaditšwe a lahlilwe ke batho.” (Jesaya 53:3) Ka gona ga go makatše gore lehono dikarolong tše dintši tša lefase baromiwa ga ba amogelege. Ka lehlakoreng le lengwe, nywageng ya Daniele e metelele ya ge a be a hlankela Babele, Mmopi o ile a bitša Daniele “morategi” gararo a diriša morongwa. (Daniele 9:​23, PK; 10:​11, 19, PK) Ke’ng seo se dirilego Daniele gore a be bjalo? Le ka mohla ga se a ka a kwanantšha melao ya motheo ya Beibele ge a be a itumelelanya le setšo sa Babele; o be a botega ka ditsela ka moka, le ka mohla a sa diriše boemo bja gagwe bakeng sa go ikhola; gomme e be e le morutwana yo mafolofolo wa Lentšu la Modimo. (Daniele 1:​8, 9; 6:4; 9:2) Le gona o be a rapela Jehofa ka mehla gomme o be a akgofela go tumiša Modimo bakeng sa seo a kgonnego go se fihlelela. (Daniele 2:​20) Ka go latela mohlala wa Daniele, bahlanka ba Modimo ba ka ipontšha e le bao ba rategago, e sego go lefase eupša go Jehofa Modimo.

E le go phetha lenaneo leo le agago moyeng, modula-setulo o ile a bala dithelekeramo le melaetša e mengwe yeo e bego e e-tšwa lefaseng ka bophara. Ke moka, ba bangwe le ba bangwe ba banyalani ba 24 ba ile ba amogela mangwalo a bona, e bile go tsebišwa le naga ye ba abetšwego go yona. Mafelelong moemedi wa sehlopha o ile a bala lengwalo leo le ngwaletšwego Sehlopha se Bušago le lapa la Bethele, leo le bego le bolela ka tebogo ya sehlopha bakeng sa tlwaetšo le go lokišeletšwa mo ba go hweditšego dikgweding tše hlano tše fetilego.

Ge lenaneo le fihla mafelelong a lona, ‘go thaba le go leboga’ go be go kwala lešabeng leo le bego le e-ya ka magoro.​—Nehemia 12:27.

[Seswantšho go letlakala 27]

Dipalo-palo tša Sehlopha

Palo ya dinaga tšeo di emetšwego: 10

Palo ya dinaga tšeo ba abetšwego go tšona: 19

Palo ya barutwana: 48

Palo ya banyalani: 24

Palogare ya nywaga: 33

Palogare ya nywaga therešong: 16

Palogare ya nywaga bodireding bja nako e tletšego: 13

[Seswantšho go letlakala 25]

Sehlopha sa bo-106 sa Dialoga tša Sekolo sa Beibele sa Watchtower sa Gilead

Lelokelelong le lego ka mo tlase, methaladi e balwa go tloga ka pele go ya ka morago gomme maina a lokeleditšwe go tloga ka go le letshadi go ya go le letona mothalading o mongwe le o mongwe.

(1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Spe- ta, R.; Coleman, R.; Breward, L; Davault, W. (7) Smith, D.; Lehtimäki, T.; Petersen, P.; Thompson, G.; Vaz- quez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.