Kgaolo ya Botshelela

Jehofa​—‘Modimo wa Toko le Mophološi’

Jesaya 45:1-25

1, 2. Ke dikgonthišetšo dife tšeo di newago go Jesaya kgaolo 45, gomme ke dipotšišo dife tšeo di tlago go ahla-ahlwa?

DIKHOLOFETŠO tša Jehofa ke tše di botegago. Ke Modimo wa kutollo le Modimo wa tlholo. O ipontšhitše leboelela e le Modimo wa toko le Mophološi wa batho ba ditšhaba ka moka. Tše ke tše dingwe tša dikgonthišetšo tše di kgothatšago tše di hwetšwago go Jesaya kgaolo 45.

² Go oketša moo, Jesaya kgaolo 45 e hupere mohlala o makatšago wa bokgoni bja Jehofa bja go bolelela dilo pele. Moya wa Modimo o dira gore Jesaya a kgone go lebelela dinageng tša kgole le go lekola ditiragalo tša nywaga-kgolong e tlago, gomme o mo tutueletša go hlalosa tiragalo yeo e lego gore ke Jehofa a nnoši, Modimo wa boporofeta bja kgonthe yo a bego a ka kgona go e bolelela pele ka go nepagala gakaalo. Tiragalo yeo ke efe? E kgoma batho ba Modimo bjang mehleng ya Jesaya? E bolela eng go rena lehono? A re hlahlobeng mantšu a moporofeta.

Kahlolo ya Jehofa Malebana le Babele

3. Jesaya 45:1-3a e hlalosa phenyo ya Korese ka mantšu afe a kwagalago?

³ “Morêna ó bolêla le Motlotšwa w’axwe, ké Korese a mo rexo: Ke mo swere ka letsôxô l’axwe le letona, xore dithšaba ke di dixêlê pele xa xaxwe; ke hlamolla dikxoši, ke mmulêla mejakô, [dikgoro di se ke tša tswalela, PK]. Ó re: Ké Nna ke Xo êtaxo pele; ke latša makukunô; ke phšatla mamati a mphiri, ke thokxa maphekô a thsipi. Ke Xo nea matlôtlô a fihlilwexo, le matsaka a a utilwexo.”​—Jesaya 45:1-3a.

4. (a) Ke ka baka la’ng Jehofa a bitša Korese gore ke “Motlotšwa” wa gagwe? (b) Jehofa o tla kgonthišetša bjang phenyo bakeng sa Korese?

⁴ Jehofa ka Jesaya o bolela ka Korese bjalo ka ge eka o be a phela, gaešita le ge mehleng ya Jesaya Korese a be a sešo a belegwa. (Ba-Roma 4:17) Ka ge Jehofa a kgetha Korese e sa le pele bakeng sa go phetha modiro o kgethegilego, Korese go ka thwe ke “Motlotšwa” wa Modimo. Ka ge Modimo a mo eteletše pele, o tla fenya ditšhaba, a dire gore dikgoši di fokole gomme di se ke tša kgona go iphemela. Ke moka ge Korese a hlasela Babele, Jehofa o tla kgonthišetša gore mejako ya motse e tlogelwa e butšwe, a e dire yeo e se nago mohola go etša dikgoro tšeo di robagantšwego. O tla etelela Korese pele, a tloša mapheko ka moka. Mafelelong, madira a Korese a tla fenya motse gomme a tšea ‘matsaka a wona a a utilwego,’ lehumo la wona le le bolokilwego diphapošing tša lefsifsi tša ka tlase. Se ke seo Jesaya a se bolelago e sa le pele. Na mantšu a gagwe a a phethagala?

5, 6. Boporofeta bja go wa ga Babele bo phethagala neng gona bjang?

⁵ Ka ngwaga wa 539 B.C.E.​—nywaga e ka bago 200 ka morago ga go bega ga Jesaya boporofeta bjo​—Korese o fihla e le ka kgonthe merakong ya Babele bakeng sa go hlasela motse. (Jeremia 51:11, 12) Lega go le bjalo, ba-Babele ga ba tshwenyege. Ba nagana gore motse wa bona ke wo o sa fenywego. Merako ya wona e metelele e be e tšwelela ka godimo ga mekero e išago fase yeo e tladitšwego ke meetse a tšwago Nokeng ya Eforate, yeo e bopago karolo ya tshepedišo ya tšhireletšo ya motse. Lebakeng la ka godimo ga nywaga e lekgolo, ga go na lenaba leo le kgonnego go hlasela Babele ka tlhaselo ya gatee-tee! Ge e le gabotse, Belesatsara yo e bego e le mmuši wa Babele ka nako yeo, o ikwa a šireletšegile kudu moo e lego gore o bina monyanya le ditho tša kgoro ya gagwe. (Daniele 5:1) Bošegong bjoo​—bošegong bja October 5/6—​Korese o phetha leano le bohlale kudu la tša bohlabani.

⁶ Karolong ya ka godimo ya noka go tloga Babele, baentšeneare ba Korese ba ile ba epa go phatša leriba la Noka ya Eforate, ba fapoša meetse a yona e le gore a se hlwe a elelela thoko ya borwa go ya motseng. Go se go ye kae, tekanyo ya meetse a noka ka gare le go dikologa Babele e fokotšega kudu moo madira a Korese a kgonago go hlaphuhla ka meetseng go ya bogareng bja motse. (Jesaya 44:27; Jeremia 50:38) Ka mo go makatšago, bjalo ka ge Jesaya a boletše e sa le pele, dikgoro tša hleng ga noka di butšwe. Madira a Korese a šwahlela Babele ka bontši, a hlasela ngwako wa kgoši gomme a bolaya Kgoši Belesatsara. (Daniele 5:30) Phenyo e fela ka bošego bjo tee. Babele e wele gomme boporofeta bo phethagala ka botlalo.

7. Bakriste ba matlafatšwa bjang ke phethagalo e makatšago ya boporofeta bja Jesaya mabapi le Korese?

⁷ Phethagalo e nepagetšego ya boporofeta bjo e matlafatša tumelo ya Bakriste lehono. E ba nea lebaka le le tiilego la go dumela gore diporofeto tša Beibele tšeo di sego tša phethagala le tšona ke tše di botegago ka mo go feletšego. (2 Petro 1:20, 21) Barapedi ba Jehofa ba a tseba gore tiragalo yeo e swantšheditšwego ke go wa ga Babele ka 539 B.C.E.​—go wa ga ‘Babele o Mogolo’​—e šetše e diregile morago kua ka 1919. Lega go le bjalo, ba lebeletše pele tshenyegong ya mokgatlo woo wa mehleng yeno wa bodumedi gotee le go tlošwa mo go holofeditšwego ga tshepedišo ya dipolitiki ka tlase ga taolo ya Sathane, go lahlelwa ga Sathane sekoting le go tla ga magodimo a mafsa le lefase le lefsa. (Kutollo 18:2, 21; 19:19-21; 20:1-3, 12, 13; 21:1-4) Ba a tseba gore diporofeto tša Jehofa ga se dikholofetšo tša lefeela, eupša ke ditlhaloso tša ditiragalo tša kgonthe tša nakong e tlago. Kholofelo ya Bakriste ba therešo e a matlafatšwa ge ba gopola phethagalo ya ditaba ka moka tša boporofeta bja Jesaya mabapi le go wa ga Babele. Ba a tseba gore Jehofa ka mehla o phethagatša lentšu la gagwe.

Lebaka Leo ka Lona Jehofa a Tlago go Kgahlišwa ke Korese

8. Lebaka le lengwe leo ka lona Jehofa a dirago gore Korese a fenye Babele ke lefe?

⁸ Ka morago ga go bolela yo a tlago go fenya Babele le kamoo se se tlago go dirwa ka gona, Jehofa o tšwela pele go hlalosa lebaka leo ka lona Korese a tlago go newa phenyo. Jehofa o bolela ka mokgwa wa boporofeta le Korese, o re, e le “xore O tsebê xobane ké Nna [Jehofa, PK] ke Xo biditšexo ka leina l’axo, Nna Morêna Modimo wa Isiraele.” (Jesaya 45:3b) Ke mo go swanelago gore mmuši wa mmušo wa bone wa lefase wa histori ya Beibele a lemoge gore phenyo ya gagwe e kgolo e tlile ka baka la thekgo ya yoo a mo fetago ka bogolo​—Jehofa, Mmuši wa Legohle. Korese o swanetše go lemoga gore yo a mmitšago goba a mo romago ke Jehofa, Modimo wa Isiraele. Pego ya Beibele e bontšha gore Korese o ile a lemoga e le ka kgonthe gore phenyo ya gagwe e kgolo e be e e-tšwa go Jehofa.​—Esera 1:2, 3.

9. Ke ka lebaka lefe la bobedi Jehofa a dirago Korese gore a fenye Babele? 

⁹ Jehofa o hlalosa lebaka la bobedi leo ka lona a dirago gore Korese a fenye Babele ka gore: “Xe ke Xo bitša ka leina l’axo, ka Xo hlaola Ò sešo wa ntseba, ké ka ’baka la Jakobo mohlanka wa-ka, le Isiraele mohlaolwa wa-ka.” (Jesaya 45:4) Phenyo ya Korese ya go fenya Babele ke yeo e kgomago lefase kudu. E swaya go wa ga mmušo o mongwe wa lefase le go rotoga ga o mongwe gomme e tlogela leswao la yona historing bakeng sa meloko e tlago. Lega go le bjalo, ditšhaba tše di dikologilego tše di bogetšego ditiragalo ka poifo mohlomongwe di be di tla makatšwa ke go tseba gore tše ka moka di direga ka baka la mathopša “a nyatšegago” a dikete tše sego kae ao a lego Babele​—ba-Juda, ditlogolo tša Jakobo. Lega go le bjalo, baphologi ba ba setšhaba sa bogologolo sa Isiraele ke bao ba tlogago ba sa nyatšege mahlong a Jehofa. Ke “mohlanka” wa gagwe. Go ditšhaba ka moka tša lefase, ke bona “mohlaolwa” wa gagwe. Gaešita le ge Korese pele a be a sa tsebe Jehofa, o dirišwa ke Jehofa e le motlotšwa wa Gagwe bakeng sa go wiša motse wo o gannego go lokolla mathopša a wona. Ga se morero wa Modimo gore batho ba gagwe ba hlaotšwego ba gateletšege ka mo go sa felego nageng e šele.

10. Ke lebaka lefe la bohlokwa-hlokwa leo ka lona Jehofa a dirišago Korese go fediša Mmušo wa Lefase wa Babele?

¹⁰ Go na le lebaka la boraro, e bile e le la bohlokwa-hlokwa leo ka lona Jehofa a dirišago Korese go wiša Babele. Jehofa o re: “Ke Nna Jehofa, ga go e mongwe, ka ntle ga-ka ga go Modimo; ke be ke šetše ke go hlamile ka marumo o sešo wa ntseba. Gore kua bohlabatšatši le bodikelatšatši go tsebje gobane ga go e mongwe ge e se Nna; ke Nna Jehofa, ga go sa le e mongwe.” (Jesaya 45:5, 6, PK) Ee, go wa ga Mmušo wa Lefase wa Babele ke pontšho ya Bomodimo bja Jehofa, bohlatse go yo mongwe le yo mongwe bja gore ke yena a nnoši yo a swanelwago ke go rapelwa. Ka ge batho ba Modimo ba lokolotšwe, batho ba ba tšwago ditšhabeng tše dintši​—go tloga bohlabela go ya bodikela​—ba tla lemoga gore Jehofa ke Modimo a nnoši wa therešo.​—Maleaki 1:11.

11. Jehofa o bontšha bjang gore o na le matla a go phethagatša morero wa gagwe mabapi le Babele?

¹¹ Gopola gore boporofeta bjo bja Jesaya bo begilwe nywaga e ka bago 200 pele ga tiragalo. Ba bangwe ge ba bo kwa, ba ka ba ba ile ba ipotšiša gore, ‘Na Jehofa ruri o na le matla a go bo phethagatša?’ Bjalo ka ge histori e hlatsela, karabo ke ee. Jehofa o hlalosa lebaka leo ka lona e lego ga tlhaologanyo go dumela gore a ka kgona go phetha seo a se bolelago: “Ké Nna Mmopi wa seetša, Mo-hlôla-lefsifsi, ke tliša moláô [“khutšo,” PK]; ke hlôla mabošula; ké Nna Morêna ke diraxo tšeo tšohle.” (Jesaya 45:7) Se sengwe le se sengwe tlholong​—go tloga seetšeng go ya lefsifsing​—le se sengwe le se sengwe historing​—go tloga khutšong go ya bošuleng​—di ka tlase ga taolo ya Jehofa. Go fo etša ge a hlola seetša sa mosegare le lefsifsi la bošego, ka mo go swanago o tla hlolela Isiraele khutšo gomme Babele a e hlolela bošula. Jehofa o na le matla a go hlola legohle, gape o na le matla a go phethagatša diporofeto tša gagwe. Seo ke se se kgothatšago go Bakriste lehono, bao ba ithutago lentšu la gagwe la boporofeta ka mafolofolo.

12. (a) Jehofa o dira gore magodimo a seswantšhetšo le lefase di tšweletše eng? (b) Mantšu a Jesaya 45:8 a hupere kholofetšo efe e homotšago bakeng sa Bakriste lehono?

¹² Ka mo go swanetšego, Jehofa o diriša ditiragalo tšeo di diregago ka mehla tlholong go bontšha dilo tšeo di tlago go diragalela ba-Juda bao ba thopilwego: “Hee wêna lexodimo, rôthá, Ò le moo xodimo; maru a a nešê tokô, lefase le bulêxê le medišê phološô, le hloxišê tokô. Ké Nna Morêna ke diraxo tšeo.” (Jesaya 45:8) Go fo etša ge magodimo a kgonthe a dira gore pula e neago bophelo e ne, Jehofa o tla dira gore ditutuetšo tša go loka di elele godimo ga batho ba gagwe di e-tšwa magodimong a seswantšhetšo. Le gona go fo etša ge lefase la kgonthe le bulega bakeng sa go tšweletša dipuno tše dintši, Jehofa o tla bitša lefase la seswantšhetšo gore le tšweletše ditiragalo ka go dumelelana le morero wa gagwe wa go loka​—kudu-kudu phološo bakeng sa batho ba gagwe ba ba thopilwego Babele. Ka 1919, Jehofa o ile a dira gore “lexodimo” le “lefase” di tšweletše ditiragalo ka tsela e swanago e le gore a lokolle batho ba gagwe. Bakriste lehono ba thabišwa ke go bona dilo tše bjalo. Ka baka la’ng? Ka gobane ditiragalo tšeo di matlafatša tumelo ya bona ge ba dutše ba lebeletše pele nakong ya ge magodimo a seswantšhetšo, e lego Mmušo wa Modimo, a tla ba a tliša ditšhegofatšo lefaseng la go loka. Ka nako yeo toko le phološo tše di tšwago magodimong a seswantšhetšo le lefaseng la seswantšhetšo di tla ba ka tekanyo e kgolo kudu go feta ge Babele ya bogologolo e be e phekgolwa. Seo e tla ba phethagalo ya mafelelo e kgahlišago gakaakang ya mantšu a Jesaya!​—2 Petro 3:13; Kutollo 21:1.

Ditšhegofatšo tše di Tlišwago ke go Lemoga Bogoši bja Jehofa

13. Ke ka baka la’ng e le bošilo go batho go hlohla merero ya Jehofa?

¹³ Ka morago ga tlhaloso ye ya ditšhegofatšo tše di thabišago tša nakong e tlago, mokgwa wa go hlalosa wa boporofeta o fetoga gatee-tee gomme Jesaya o tsebatša madimabe ao a lego gabedi: “Kotsi e tlo wêla mo-lwa-le-Mmopi-wa-xaxwe, etšwe è le lekôpêlô la sebopiwa sa mmu. A fa letsopa le ka ra mmopi wa lôna la re: O dira’ng? Le sebopiwa sa xaxo a se ka re: Xa O na diatla? Kotsi e tlo wêla yo a raxo rr’axwe a re: O re’ng Ò tswala? A ra mosadi a re: O re’ng Ò bêlêxa?” (Jesaya 45:9, 10) Go bonala eka bana ba Isiraele ba ganetša seo Jehofa a se bolelago e sa le pele. Mohlomongwe ga ba dumele gore Jehofa o tla dumelela batho ba gagwe ba e-ya bothopša. Goba mohlomongwe ba sola kgopolo ya gore Isiraele e tla lokollwa ke kgoši ya setšhaba sa baheitene go e na le kgoši ya ngwako wa Dafida. Go bontšha bošilo bja dikganetšo tše bjalo, Jesaya o bapiša baganetši le marathana a lahlilwego a letsopa le ditsekana tša dibjana tša letsopa tšeo di bego di tla beta pelo bakeng sa go belaela bohlale bja modiri wa tšona. Sona selo seo mmopi wa letsopa a se bopilego ga bjale se bolela gore mmopi ga a na diatla goba matla a go bopa. A bošilo bjo bokaakang! Baganetši ba swana le bana bao ba bago le sebete sa go swaya matla a batswadi ba bona a taolo diphošo.

14, 15. Mantšu “Mokxêthwa” le “Mmopi” a utolla eng ka Jehofa?

¹⁴ Jesaya o nea baganetši ba bjalo karabo ya Jehofa e rego: “Morêna Mokxêthwa wa Isiraele, Mmopi wa xaxo ó re: Tša mehla e tlaxo botšišang Nna; tša bana ba-ka, le tša dibopya tša diatla tša-ka, di laêlwa ke Nna. Lefase ké Nna ke le dirilexo, ka bopa motho mo xo lôna; ké Nna ke bapilexo maxodimo ka diatla tša-ka, ka bitša makôkô ka-moka a ôna. Ké Nna ke tsošaxo Korese, a tsoxa ka tokô; ke mo lokišetša tsela tša xaxwe ka moka; ké yêna a tl’o xo tsoša motse wa-ka; ó tlo hunolla batlêngwa ba-ka xò se selopolla le selobá. Ó r’yalo Morêna wa mašaba.”​—Jesaya 45:11-13.

¹⁵ Go hlalosa Jehofa e le “Mokxêthwa,” go gatelela bokgethwa bja gagwe. Go mmitša “Mmopi,” go gatelela tshwanelo ya gagwe bjalo ka Mmopi bakeng sa go dira phetho ya kamoo dilo di tlago go šoma ka gona. Jehofa o kgona go tsebiša bana ba Isiraele ka dilo tšeo di tlago le go hlokomela modiro wa diatla tša gagwe, ke gore, batho ba gagwe. Se sengwe gape, melao ya motheo ya tlholo le kutollo e bontšhwa e le yeo e tswalanago. Ka ge e le Mmopi wa legohle ka moka, Jehofa o na le tshwanelo ya go hlahla ditiragalo ka tsela yeo a e ratago. (1 Koronika 29:11, 12) Tabeng yeo e ahla-ahlwago, Mmuši yo a Phagamego o dirile phetho ya go tsoša Korese, moheitene go ba molopolodi wa Isiraele. Go tla ga Korese gaešita le ge e sa dutše e le ga nakong e tlago, ke mo e lego ga kgonthe go etša go ba gona ga legodimo le lefase. Ka gona, ke ngwana ofe wa Isiraele yo a bego a ka ba le sebete sa go swaya Tate, “Morêna wa mašaba” diphošo?

16. Ke ka baka la’ng bahlanka ba Jehofa ba swanetše go ikokobeletša yena?

¹⁶ Tšona ditemana tše tša Jesaya di swere lebaka le lengwe gape leo ka lona bahlanka ba Modimo ba swanetšego go ikokobeletša yena. Diphetho tša gagwe ka mehla ke tšeo di holago bahlanka ba gagwe. (Jobo 36:3) O dirile melao bakeng sa gore batho ba gagwe ba ikhole ka yona. (Jesaya 48:17) Ba-Juda ba mehleng ya Korese bao ba amogelago bogoši bja Jehofa ba hwetša se e le sa therešo. Korese a gata mogato ka go dumelelana le toko ya Jehofa, o ba romela gae ba e-tšwa Babele e le gore ba kgone go aga tempele lefsa. (Esera 6:3-5) Ka mo go swanago lehono, ditšhegofatšo di hwetšwa ke bao ba dirišago melao ya Modimo maphelong a bona a letšatši le letšatši le bao ba ikokobeletšago bogoši bja gagwe.​—Psalme 1:1-3; 19:7; 119:105; Johane 8:31, 32.

Ditšhegofatšo Bakeng sa Ditšhaba tše Dingwe

17. Ka ntle le Isiraele, ke bomang bao ba tlago go holwa ke ditiro tše phološago tša Jehofa, gona bjang?

¹⁷ Isiraele e ka se be setšhaba se nnoši seo se tlago go holwa ke go wa ga Babele. Jesaya o re: “Go bolela Jehofa, o re: Ditheko tša ba-Egipita, le maruo a ba-Kuše le a ba-Seba [“bašomi ba sa lefšego ba Egipita le bagwebi ba Ethiopia le ba ba-Seba,” NW] banna ba leemo le letelele, [ba] tlo tla go wene, e be [ba] gago, ba tlo go šala nthago, ba sepela ba tlemilwe ka diketane, gomme ba tlo khunama pele ga gago, ba go rapela ba re: Ruri, Modimo o go wene, ga go sa na le modimo o mongwe.” (Jesaya 45:14, PK) Mehleng ya Moše, “lešaba la mahlakanasêla” la bao e bego e se ba-Isiraele le ile la sepela le ba-Isiraele Khudugong ya bona ya go huduga Egipita. (Ekisodo 12:37, 38) Ka tsela e swanago, batho ba šele ba tla sepela le mathopša a ba-Juda ao a boelago gae a e-tšwa Babele. Batho ba bao e sego ba-Juda ba ka se gapeletšwe go sepela, eupša ‘ba tlo itshepelela.’ Ge Jehofa a re, “ba tlo khunama pele ga gago” gomme “ba go rapela,” o šupa go go ikokobetšeng ka go rata le potego tšeo di bontšhwago ke batho ba šele ba, go Isiraele. Ge e ba ba tlemilwe ka diketwane, e tla ba e le ka boithatelo, e le go bontšha go rata ga bona go hlankela batho ba Modimo ba kgwerano, bao ba tlago go ba botša ba re: “Modimo o go wene.” Ba tla rapela Jehofa bjalo ka basokologi ka tlase ga dithulaganyo tša kgwerano ya gagwe le Isiraele.​—Jesaya 56:6.

18. Ke bomang lehono bao ba hotšwego ke go lokolla ga Jehofa “Ba-Isiraele ba Modimo,” gona ka ditsela dife?

¹⁸ Ga e sa le go tloga ka 1919 ge “Ba-Isiraele ba Modimo” ba be ba lokollwa bothopšeng bja moya, mantšu a Jesaya a bile le phethagalo e kgolwanyane go feta mehleng ya Korese. Ba dimilione lefaseng ka bophara ba bontšha go rata go hlankela Jehofa. (Ba-Galatia 6:16; Sakaria 8:23) Go swana le “bašomi” le “bagwebi” bao Jesaya a boletšego ka bona, ba gafa matla a bona le matlotlo a tša ditšhelete ba thabile bakeng sa go thekga borapedi bja therešo. (Mateo 25:34-40; Mareka 12:30) Ba ineela go Modimo le go sepela ditseleng tša gagwe, gomme ka lethabo ya ba bahlanka ba gagwe. (Luka 9:23) Ba rapela Jehofa a nnoši, ba thabela mehola ya go gwerana le “molaki [wa Jehofa] e a bôtêxaxo yo bohlale,” yo a lego tswalanong e kgethegilego ya kgwerano le Modimo. (Mateo 24:45-47; 26:28; Ba-Hebere 8:8-13) Le ge e se batšea-karolo kgweranong yeo, “bašomi” le “bagwebi” bao ba holwa ke yona gomme ba kwa melao yeo e tswalanago le yona, ba bolela ka sebete gore: “Ga go sa na le modimo o mongwe.” Ke mo go thabišago gakaakang lehono go iponela ka noši koketšego e kgolo kudu palong ya bathekgi ba bjalo ba ratago ba borapedi bja therešo!​—Jesaya 60:22.

19. Go tla direga’ng ka bao ba phegelelago go rapela medimo ya diswantšho?

¹⁹ Ka morago ga go utolla gore batho ba ditšhaba ba tla kopanela go rapeleng Jehofa, moporofeta o tsebatša gore: “Ka kxonthe, O Modimo mo-se-bônwe, Modimo wa Isiraele, O Mophološi”! (Jesaya 45:15) Gaešita le ge Jehofa a sa bontšhe matla a gagwe mo nakong ye, nakong e tlago a ka se sa ikuta. O tla ipontšha e le Modimo wa Isiraele, Mophološi wa batho ba gagwe. Lega go le bjalo, Jehofa e ka se be Mophološi wa bao ba botago medimo ya diswantšho. Jesaya o bolela ka ba bjalo gore: “Ba tlo lewa ke dihlong bà nyatšexile, bà sepela bà le nyatšexong, babetli bao ba medimo ya diswanthšô.” (Jesaya 45:16) Go kokobetšwa ga bona e ka se be feela maikwelo a nakwana a go nyatšega le go lewa ke dihlong. Go tla bolela lehu​—go fapana le se se latelago seo Jehofa a se holofetšago Isiraele.

20. Ke ka tsela efe Isiraele e tlago go hwetša “phološô ye e sa felexo”?

²⁰ “Xe e le Isiraele, yêna ó tlo phološwa ke Morêna [“ka go ba boteeng le Jehofa,” NW] ka phološô ye e sa felexo. Lena Le ka se lewe ke dihlong; Le ka se nyatšêxe xo ya xo ile.” (Jesaya 45:17) Jehofa o holofetša Isiraele phološo e sa felego, eupša se se ithekgile ka maemo. Isiraele e swanetše go dula e le “boteeng le Jehofa.” Ge Isiraele e kgaola botee bjoo ka go gana Jesu e le Mesia, setšhaba se tla lahlegelwa ke tebelelo ya sona ya “phološô ye e sa felexo.” Lega go le bjalo, ba bangwe go Isiraele ba tla bontšha tumelo go Jesu gomme ba e tla ba motheo wa Isiraele ya Modimo, yeo e tlago go tšea sebaka sa Isiraele ya nama. (Mateo 21:43; Ba-Galatia 3:28, 29; 1 Petro 2:9) Isiraele ya moya le ka mohla e ka se ke ya kokobetšwa. E tla tsenywa ‘kgweranong ya neng le neng.’​—Ba-Hebere 13:20.

Jehofa ke yo a Botegago Tlholong le Kutollong

21. Jehofa o ipontšha bjang e le yo a botegago ka mo go feletšego tlholong le kutollong?

²¹ Na ba-Juda ba ka ithekga ka kholofetšo ya Jehofa ya phološo e sa felego bakeng sa Isiraele? Jesaya o a araba: “Xobane Morêna Mo-hlôla-maxodimo, Yêna Modimo-dimo Mmopi wa lefase, a le dira a le thêkxa, a se le bope ya ba la lefêla, a le dirêla xo dulwa ke batho, ké Yêna a rexo: Morêna ké Nna, xa xo sa n’e yo mongwê. Tše ke di boletšexo xa nka ka di dira thopa kè le felô xa naxa ya lefsifsi; xa nka ka botša bana ba Jakobo ka re: E tla ba lefêla xe Le nnyaka. Nna Morêna ke boletše tokô, ke kwaditše tše boló.” (Jesaya 45:18, 19) Ka lekga la bone le la mafelelo kgaolong ye, Jesaya o thoma karolo e matla ya boporofeta ka polelwana e rego: “Go bolela bjalo Jehofa.” (Jesaya 45:1, 11, 14, PK) Jehofa o re’ng? O bolela gore ke yo a botegago bobedi tlholong le kutollong. Ga se a bopa lefase “ya ba la lefêla.” Ka mo go swanago, ga a laele batho ba gagwe, e lego Isiraele gore ba mo tsomele “lefêla.” Go etša ge morero wa Modimo ka lefase o tla phethagala, ka mo go swanago morero wa Modimo bakeng sa batho ba gagwe ba hlaotšwego o tla phethagala. Go fapana le dipolelo tše di utegilego tša bao ba hlankelago medimo ya maaka, mantšu a Jehofa a bolelwa phatlalatša. Mantšu a gagwe ke a go loka gomme a tla phethagala. Bao ba mo hlankelago ba ka se mo hlankelele lefeela.

22. (a) Ba-Juda bao ba išitšwego bothopša Babele ba ka kgonthišega ka eng? (b) Bakriste lehono ba na le kgonthišetšo efe?

²² Bakeng sa batho ba thopilwego ba Modimo ba ba lego Babele, mantšu ao ke kgonthišetšo ya gore Naga ya Kholofetšo e ka se dule e le lešope. E tla dulwa gape. Le gona dikholofetšo tša Jehofa go bona di a phethagala. Ka kokeletšo, mantšu a Jesaya ke kgonthišetšo go batho ba Modimo lehono ya gore lefase le ka se fetoge lešope le le sentšwego​—leo le fišitšwego lore-lore, bjalo ka ge ba bangwe ba dumela, goba ya ba le le sentšwego ka dipomo tša nuclear, go etša ge ba bangwe ba boifa bjalo. Modimo o rulagantše gore lefase le tla ba gona ka mo go sa felego, le apešitšwe ka botse bja paradeise le go dulwa ke badudi ba go loka. (Psalme 37:11, 29; 115:16; Mateo 6:9, 10; Kutollo 21:3, 4) Ee, go etša tabeng ya Isiraele, mantšu a Jehofa a tla ipontšha e le a botegago.

Jehofa o Katološa Kgaugelo ya Gagwe

23. Ditla-morago tša bao ba rapelago medimo ya diswantšho ke dife, gomme bao ba rapelago Jehofa dilo di ba sepelela bjang?

²³ Phološo ya Isiraele e gatelelwa mantšung a latelago a Jehofa: “Bokanang Le tleng, lena ba-phônyôkxa-dithšabeng, Le batamêlê bohle. Bao ba xo rwala ’swanthšô tša dikwata, ba kxopêla xo modimo o sa phološexo, bôná xa ba tsebe selô. Bolêlang, Le botšaneng ditaba, Le eletšanê seng! Dilô tšé ké mang e a kwaditšexo è sa le kxaleng, a di bolêla mehleng yela? A xa se Nna Morêna? Xa xo Modimo, xe e se Nna Modimo wa tokô, Mophološi; ké Nna fêla, xa xo e mongwê.” (Jesaya 45:20, 21) Jehofa o laletša ‘baphonyokgi’ gore ba bapiše go phologa ga bona le seo se diragalelago bao ba rapelago medimo ya diswantšho. (Doiteronomio 30:3; Jeremia 29:14; 50:28) Ka ge barapedi ba medimo ya diswantšho ba rapela le go hlankela medimo e se nago matla yeo e sa kgonego go ba phološa, “xa ba tsebe selô.” Borapedi bja bona ke bja lefeela​—bja lefeela la mafeela. Lega go le bjalo, bao ba rapelago Jehofa ba hwetša gore o na le matla a go phethagatša ditiragalo tšeo a di boletšego e sa le pele, “è sa le kxaleng,” go akaretša phološo ya batho ba gagwe ba thopilwego Babele. Matla le go bonela pele mo go bjalo di hlaola Jehofa go medimo ka moka e mengwe. Ka kgonthe, ke ‘Modimo wa toko le Mophološi.’

“Xo Phološa ké xa Modimo wa Rena”

24, 25. (a) Ke taletšo efe yeo Jehofa a e dirago, gomme ke ka baka la’ng go se na pelaelo gore kholofetšo ya gagwe e tla phethagala e le ka kgonthe? (b) Ke eng seo Jehofa a se nyakago ka mo go swanetšego?

²⁴ Kgaugelo ya Jehofa e mo tutueletša go dira taletšo e rego: “Boêlang xo Nna Le phološwê, lena ba maxómô ohle a lefase; xobane Modimo ké Nna, xa xo sa n’e yo mongwê. Ke enne ka Nna; molomong wa-ka xo tšwile therešô ka Lentšu le ka se kexo la xomišwa, la xo re: Matôlô ohle a tlo nkhunamêla; maleme ohle a tlo êna ka Nna! Ba tlo mpolêla ba re: Tokô le matla, di mo xo Morêna à nnoši. A xo tliwê xo Yêna. Bohle ba ba lwaxo le Yêna ba tlo lewa ke dihlong. Peu yohle ya Isiraele e tlo lokafala ka Morêna, e tlo ithêta ka Yêna.”​—Jesaya 45:22-25.

²⁵ Jehofa o holofetša Isiraele gore o tla phološa bao ba lego Babele bao ba boelago go yena. Ga go kgonege gore boporofeta bja gagwe bo palelwe ka gobane Jehofa o na le kganyogo gotee le bokgoni bja go hlakodiša batho ba gagwe. (Jesaya 55:11) Mantšu a Modimo ke ao a botegago ka bowona, eupša a bjalo kudu-kudu ge Jehofa a tsenya keno ya gagwe bakeng sa go a tiišetša. (Ba-Hebere 6:13) O nyaka ka mo go swanetšego boikokobetšo (‘matolo ohle a tlo khunama’) le boitlamo (“maleme ohle a tlo êna”) go bao ba kganyogago kamogelo ya gagwe. Ba-Isiraele bao ba phegelelago go rapela Jehofa ba tla phološwa. Ba tla kgona go ikgantšha ka seo Jehofa a ba direlago sona.​—2 Ba-Korinthe 10:17.

26. “Lešaba le lexolo” le le tšwago ditšhabeng ka moka le arabela bjang taletšong ya Jehofa ya gore ba boele go yena?

²⁶ Lega go le bjalo, taletšo ya Modimo ya go boela go yena ga se ya lekanyetšwa go mathopša a Babele ya bogologolo. (Ditiro 14:14, 15; 15:19; 1 Timotheo 2:3, 4) Taletšo ye e sa dutše e e-tšwa, gomme “lešaba le lexolo la . . . dithšaba ka moka” le a arabela gomme le tsebatša gore: “Xo phološa ké xa Modimo wa rena . . . [le] xa Kwana [Jesu].” (Kutollo 7:9, 10; 15:4) Ngwaga le ngwaga, bao ba sa tšwago go kopanela ba makgolo a dikete ba oketša lešaba le legolo ka go retologela go Modimo, ba lemoga bogoši bja gagwe ka botlalo gomme ba tsebatša phatlalatša go mmotegela ga bona. Go oketša moo, ba thekga Isiraele ya moya, yeo e lego “peu ya Aborahama,” ka potego e sa kwanantšhego. (Ba-Galatia 3:29) Ba bontšha lerato la bona la go rata molao wa go loka wa Jehofa ka go tsebatša lefaseng ka bophara gore: “Ruri toko e tletšego le matla di go Jehofa.”a (NW) Lengwalong la gagwe le le yago go ba-Roma, moapostola Paulo o ile a tsopola phetolelo ya Septuagint ya Jesaya 45:23 bakeng sa go bontšha gore yo mongwe le yo mongwe yo a phelago mafelelong o tla lemoga bogoši bja Modimo gomme o tla reta leina la gagwe ka mo go tšwelago pele.​—Ba-Roma 14:11; Ba-Filipi 2:9-11; Kutollo 21:22-27.

27. Ke ka baka la’ng Bakriste lehono ba ka ba le kholofelo e feletšego dikholofetšong tša Jehofa?

²⁷ Ke ka baka la’ng ditho tša lešaba le legolo di ka holofela gore go retologela go Modimo go bolela phološo? Ka gobane dikholofetšo tša Jehofa ke tše di botegago, go etša ge mantšu a boporofeta ao a hwetšwago go Jesaya kgaolo 45 a bontšha bjalo ka mo go kwagalago. Go fo etša ge Jehofa a bile le matla le bohlale bakeng sa go hlola magodimo le lefase, ka mo go swanago o na le matla le bohlale tša go phethagatša diporofeto tša gagwe. Le gona go etša ge a ile a kgonthišetša gore boporofeta bjo bo lego mabapi le Korese bo phethagale, ka mo go swanago o tla phethagatša boporofeta le ge e le bofe bjo bongwe bja Beibele bjo bo sa dutšego bo tla phethagala. Ka lebaka leo, barapedi ba Jehofa ba ka holofela gore go se go ye kae Jehofa o tla ipontšha gape e le ‘Modimo wa toko le Mophološi.’

[Mengwalo ya ka tlase]

[Caption on page 80]

Jehofa yo a hlolago seetša le go hlola lefsifsi, a ka dira khutšo le go hlola bošula

[Caption on page 83]

Jehofa o tla dira gore “lexodimo” le neše ditšhegofatšo gomme “lefase” le tšweletše phološo

[Caption on page 84]

Na ditsekana tše di lahlilwego tša dibjana tša letsopa di swanetše go belaela bohlale bja modiri wa tšona?

[Caption on page 89]

Jehofa ga se a ka a bopa lefase a le bopela lefeela