Na o Nyaka go ba wa Pele ka Dinako Tšohle?

NA O tseba motho le ge e le ofe yo a nyakago go ba wa pele ka dinako tšohle?— A ka kgoromeletša yo mongwe ka thoko gore e be yena wa pele mothalading. Na o kile wa bona seo se direga?— Morutiši yo Mogolo o ile a ba a bona batho ba bagolo ba leka go ikhweletša maemo a pele goba a bohlokwa kudu. Gomme o be a sa rate seo. Anke re bone seo se ilego sa direga.

Beibele e re botša gore Jesu o be a laleditšwe dijong legaeng la Mofarisei, yo e bego e le moetapele wa bodumedi yo bohlokwa. Ge Jesu a se na go fihla, o ile a thoma go bogela baeng ba bangwe ge ba tsena gomme ba ikgethela madulo a ka pele. Ka gona o ile a thoma go botša bao ba bego ba laleditšwe kanegelo. Na o tla rata go e-kwa?—

Jesu o itše: ‘Ge motho yo mongwe a go laletša monyanyeng wa lenyalo, o se ke wa ikgethela madulo a ka pele goba a bohlokwa kudu.’ Na o tseba lebaka leo ka lona Jesu a ilego a bolela seo?— O ile a hlalosa gore go ka ba go laleditšwe motho yo mongwe wa bohlokwa kudu. Ka gona, ka ge o ka bona seswantšhong, yo e lego mong wa monyanya o a tla gomme a re: ‘Šuthela monna yo sebaka, gomme o dulele mola.’ Moeng a ka ikwa bjang ka nako yeo?— O tla lewa ke dihlong ka gobane baeng ba bangwe ka moka ba be ba tla mmogela ge a e-ya boemong bja tlasana le bjo e sego bja bohlokwa kudu.

Jesu o be a bontšha gore ga se mo go swanetšego go nyaka maemo a ka pele. Ka gona o ile a re: ‘Ge o laleditšwe monyanyeng wa lenyalo o ye o dule sebakeng sa ka morago. Ka gona yo a go laleditšego a ka tla gomme a re, ‘Mogwera wa-ka, fetela kua sedulong sa ka pele.’ Ka nako yeo o tla hwetša hlompho ka pele ga baeng ba bangwe ka moka ge o fetela boemong bjo bokaone.’—Luka 14:1, 7-11.

Na o hweditše ntlha ya kanegelo ya Jesu?— Anke re diriše mohlala go bona ge e ba o hweditše ntlha. Akanya o namela pese yeo e tletšego kudu. Na o swanetše go akgofela go hwetša setulo gomme o tlogela motho yo mogolo a eme ka maoto?— Na Jesu o be a tla rata ge e ba o be o ka dira seo?—

Motho yo mongwe a ka bolela gore Jesu ga a na taba le seo re se dirago. Eupša na o dumela seo?— Ge Jesu a be a le monyanyeng o mogolo wa dijo legaeng la Mofarisei, o ile a bogela batho ge ba le gare ba kgetha madulo a bona. Na o nagana gore o na le taba le seo re se dirago mo nakong ye go swana le nakong e fetilego?— Ga bjale ka ge Jesu a le legodimong, ga go pelaelo gore o boemong bjo bobotse bja go ka re bogela.

Ge motho yo mongwe a leka go ba wa pele, seo se ka baka mathata. Gantši go ba le ngangišano gomme batho ba a galefa. Ka dinako tše dingwe se se direga ge bana ba sepela gotee ka pese. Gatee-tee ge mejako ya pese e bulega, bana ba kitimela go ba ba pele. Ba nyaka madulo a makaone, ao a lego kgaufsi le mafasetere. Go ka direga’ng ka nako yeo?— Ee, ba ka galefelana kudu.

Go nyaka go ba wa pele go ka baka mathata a mantši. Go ile gwa ba gwa baka mathata gare ga baapostola ba Jesu. Go etša ge re ithutile go kgaolo 6 ya puku ye, ba ile ba ngangišana seng sa bona gore yo mogolo gare ga bona e be e le mang. Jesu o ile a dira’ng ka nako yeo?— Ee, o ile a ba phošolla. Eupša ka morago ba ile ba ba le ngangišano e nngwe. Anke re bone kamoo e thomilego ka gona.

Baapostola gotee le ba bangwe ba sepela le Jesu ka lekga la mafelelo go ya motseng wa Jerusalema. Jesu o be a dutše a bolela le bona ka Mmušo wa gagwe, ka gona Jakobo le Johane ba be ba dutše ba nagana ka go buša e le dikgoši gotee le yena. Ba be ba bile ba boditše mmago bona Salome ka taba ye. (Mateo 27:56; Mareka 15:40) Ka gona ge ba le tseleng ba e-ya Jerusalema, Salome o tla go Jesu, o khunama ka pele ga gagwe gomme o mo kgopela gore a mo dire ka botho.

Jesu o botšiša gore: ‘O nyaka’ng?’ O araba ka gore o nyaka barwa ba gagwe ba dula kgaufsi le Jesu Mmušong wa gagwe, yo mongwe ka go le letona gomme yo mongwe ka go le letshadi. Ka gona, ge baapostola ba bangwe ba lesome ba tseba seo Jakobo le Johane ba bego ba romile mmago bona gore a se kgopele, o nagana gore ba ile ba ikwa bjang?—

Ee, ba ile ba galefela Jakobo le Johane. Ka gona Jesu o nea baapostola ba gagwe ka moka keletšo e nngwe e botse. Jesu o ba botša gore babuši ba ditšhaba ba rata go ba ba matla le ba bohlokwa. Ba nyaka go ba maemong a phagamego moo yo mongwe le yo mongwe a ba theetšago. Eupša Jesu o botša balatedi ba gagwe gore ga se ba swanela go ba bjalo. Go e na le moo, Jesu o re: ‘Yo a ratago go ba yo mogolo go lena a e be mohlanka wa lena.’ Nagana ka seo!—Mateo 20:20-28.

Na o tseba gore modiro wa mohlanka ke ofe?— Ke go direla batho ba bangwe, e sego go lebelela gore ba bangwe ba mo direle. O tšea boemo bja tlasana e sego boemo bja ka pele. O dira dilo bjalo ka motho yo a nago le bohlokwa bjo bonyenyane e sego bjalo ka yo a lego bohlokwa kudu. Le gona, gopola gore Jesu o boletše gore yo a nyakago go ba wa pele o swanetše go dira dilo bjalo ka mohlanka go ba bangwe.

Bjale o nagana gore seo se bolela’ng go rena?— Na o nagana gore mohlanka a ka ngangišana le mong wa gagwe mabapi le gore ke mang yo a ilego go hwetša setulo se sekaone? Goba na o be a ka ngangišana le yena mabapi le gore ke mang a ilego go ja pele? O nagana’ng?— Jesu o ile a hlalosa gore mohlanka ka dinako tšohle o etiša mong wa gagwe pele bophelong bja gagwe.—Luka 17:7-10.

Ka gona go e na le go leka go ba wa pele, ke eng seo re swanetšego go se dira?— Ee, re swanetše go ba bjalo ka bahlanka go ba bangwe. Gomme seo se bolela go etiša ba bangwe pele bophelong bja rena. Se se bolela go lemoga gore ba bangwe ba bohlokwa kudu go re feta. Na o ka nagana ka ditsela tšeo ka tšona o ka etišago ba bangwe pele?— Mohlomongwe o ka boela morago go matlakala 40 le 41 gomme o lebelele gape tše dingwe tša ditsela tša kamoo o ka etišago ba bangwe pele ka go ba hlankela.

O tla gopola gore Morutiši yo Mogolo o be a etiša ba bangwe pele bophelong bja gagwe ka go ba hlankela. Bošego bja mafelelo bjoo a bo feditšego a e-na le baapostola ba gagwe, o ile a ba a khunama gomme a ba hlapiša maoto. Ge e ba le rena re etiša ba bangwe pele ka go ba hlankela, re tla be re thabiša Morutiši yo Mogolo le Tatagwe, Jehofa Modimo.