Bophelo le Bodiredi bja Jesu

Bodiredi Tempeleng bo a Fetšwa

JESU o tšwelela la mafelelo tempeleng. Ge e le gabotse, o fetša bodiredi bja gagwe bja phatlalatša lefaseng, ka ntle ga ditiragalo tša go sekišwa le go bolawa ga gagwe matšatšing a mararo ka morago. Bjale o tšwela pele ka go kgalema ba-mangwalo le Bafarisei.

O bolela ka makga a mangwe a mararo gore: “Le ba madi-mabe lena ba-mangwalô le bafarisei, lena baikaketši.” O thoma ka go bolela madimabe go bona ka baka la ge ba hlatswa ‘sego le mogopo ka ntle, mola ka gare di tletše bohodu le bojato.’ Ka gona, o a ba kgala: ‘Thomang ka go hlatswa sego le mogopo ka gare, ke mo di tlogo hlatswega le ka ntle.’

Ka morago o bolela madimabe go ba-mangwalo le Bafarisei ka baka la go bola ga dipelong moo ba lekago go go uta ka borapedi bja ka ntle. O re: “Le swana le mabitla a a takilwexo ka phêpa, a a bôxêxaxo ka ntlê, mola ka xare à tletše marapô a bahu le makxapa fêla.”

Mafelelong, boikaketši bja bona bo bontšhwa ka go rata ga bona go aga mabitla a baporofeta le go a thakga e le go dira gore mediro ya bona ya botho e hlokomelwe. Lega go le bjalo, bjalo ka ge Jesu a ba pepentšha, ke “bana ba babolai ba baporofeta.” Ee, mang le mang yo a ikemišetšago go pepentšha boikaketši bja bona, o ba kotsing!

Jesu ge a tšwela pele, o bolela mantšu a gagwe a matla a kahlolo. O re: “Hee lena dinôxa, matswinyana a marabê, kahlolô ya xo tlo Le iša [Gehenna, NW] Le tlo e phônyôkxa bya’ng?” Gehenna ke moedi wo o bego o dirišwa e le lefelo la Jerusalema leo go tšhollelwago ditšhila go lona. Jesu o bolela gore ba-mangwalo le Bafarisei ka go phegelela tsela ya bona e mpe, ba tla welwa ke tshenyego ya ka mo go sa felego.

Mabapi le bao a ba romago e le baemedi ba gagwe, Jesu o re: “Ba bangwê ba boná Le tlo ba bolaya la ba bapola . . . ba bangwê Le tlo ba ôtla diphuthexong, la ba hlômara la hlakanya metse. Ya tlo ba xôna xo Le rolêla madi a baloki bohle a a thšollotšwexo lefaseng, a tla xo lena xo tloxa ka madi a Abele moloki xo iša mading a Sakaria morwa wa Barakia [yo a bitšwago Joyada go 2 Koronika] yo Le mmolailexo xare xa Ntlo-kxêthwa le aletare. Ruri ke a Le botša, ka moka tšeo di tlo rolêlwa moloko wó.”

Ka gobane Sakaria a ile a sola baetapele ba Isiraele ka go se boife, ‘bona ba ile ba mo lakana gomme ba mo thuma ka mafsika a le mo lapeng la ngwako wa Jehofa, ba dira bjalo ba romilwe ke kgoši.’ Eupja bjalo ka ge Jesu a bolela, Isiraele e tla lefa bakeng sa madi a baloki ba bjalo ka moka ao a tšholotšwego. Ba lefa nywageng e 37 ka morago ka 70 C.E., nakong ya ge madira a Roma a senya Jerusalema gomme ba-Juda ba fetago milione ba bolawa.

Ge Jesu a nagana ka boemo bjo bjo bo boifišago, o kwa bohloko. O bolela gape gore: “Hee Jerusalêma! Hee Jerusalêma! Wene O bolayaxo baporofeta, O thumaxo ka mafsika ba ba romilwexo xo wene! Ké xa-kae kè ratile xo phuthêla bana ba xaxo bo-ka kxoxo xe e phuthêla bana ba yôna ka tlase xa diphêxo tša yona; xomme Le xanne.”

Jesu bjale o oketša ka gore: “Xo tloxa byalo Le ka se hlwê Lè mpôna xo fihla xe Le tlo re: Xo rêtwê e a tlaxo ka Leina la Morêna.” Letšatši leo le tla ba nakong ya go ba gona ga Kriste ge a tsena Mmušong wa gagwe wa legodimo gomme batho ba mmona ka mahlo a tumelo.

Jesu bjale o ya lefelong leo go lona a ka bonago polokelo ya mahumo ka tempeleng gomme mašaba a tšhela tšhelete ka go yona. Bahumi ba tšhela ditšhelete tše dintši. Eupja mohlologadi wa modiitšana o a tsena gomme o tšhela ditšheletšana tše pedi tša matla a manyenyane kudu.

Jesu o bitša barutiwa ba gagwe, o re: “Ruri, ke a Le botša, mosadi eo wa mohlôlôxadi wa modiitšana ó thšetše xa-xolo xo fetiša bohle ba ba thšetšexo fá polokelong.” Ba swanetše go ba ba makatšwa ke kamoo se se ka bago bjalo ka gona. Jesu o a hlalosa: “Bao bohle ba nthšitše xo tše di ba tlaletšexo; xe e le yêna ó nthšitše bohumanexing bya xaxwe, a thšêla tšohle tše a bexo a na natšô’, è le tšohle tše a bexo a tlo phela ka tšôna.” Jesu ka morago ga go bolela ditaba tše, o tloga tempeleng la mafelelo.

Barutiwa ba gagwe ka go makatšwa ke bogolo le botse bja tempele ba re: “Moruti, O k’O bônê mabyê a makaakaa á, le moaxêlô wa ôna.” Ee, mafsika a bolelwa e le a botelele bjo bo fetago dimithara tše 11, bophara bjo bo fetago dimithara tše 5 le bogodimo bjo bo fetago dimithara tše 3!

Jesu o a araba o re: “A [le] a e bôna meaxô yé e mekaakaa? Xa xo lefsika fá le le tl’o xo leswa lè le xodimo xa le lengwê le s’a šuthišwa.”

Ka morago ga go bolela ditaba tše, Jesu le baapostola ba gagwe ba tshela Moedi wa Kidirone gomme ba namela thaba ya Mehlware. Ba ka bona tempele e botse kudu ba le moo. Mateo 23:​25–24:3; Mareka 12:​41–13:3; Luka 21:​1-6; 2 Koronika 24:​20-22.

◆ Jesu o dira’ng nakong ya go etela ga gagwe la mafelelo tempeleng?

◆ Boikaketši bja ba-mangwalo le Bafarisei bo bontšhwa bjang?

◆ Go bolelwa’ng ka ‘kahlolo ya Gehenna’?

◆ Ke ka baka la’ng Jesu a bolela gore mohlologadi o ntšhitše mo gontši go feta bahumi?