Bophelo le Bodiredi bja Jesu

Kholofelo Mehleng ya Bofelo

GE LABOBEDI, Nisani 11 le tla tloga le feta, Jesu o na le baapostola ba gagwe Thabeng ya Mehlware. Ba sa tšwa go tloga tempeleng yeo ba kgonago go e bonela tlase, gomme Jesu o sa dutše a boledišana le bona ka pontšho ya go ba gona ga gagwe matleng a Mmušo le ya bofelo bja tshepedišo ya dilo.

Jesu ge a tšwela pele ka ditlhaloso tša gagwe, o ba lemoša ka go latela bo-Kriste ba maaka. O re go tla dirwa maiteko “xore, xe xo kxônêxa, ba forê le bôná bakxêthwa.” Eupja ka go swana le manong ao a bonelago kgole, bakgethwa ba ba tla kgobokana moo dijo tša kgonthe tša moya di swanetšego go hwetšwa gona, e lego go Kriste wa kgonthe nakong ya go ba gona ga gagwe a sa bonagale. Ba ka se ke ba forwa gomme ba bokana gotee go Kriste wa maaka.

Bo-Kriste ba maaka ba ka tšwelela feela e le ba bonalago. Ka mo go fapanego, go ba gona ga Jesu e tla ba mo go sa bonagalego. Go tla diragala nakong e boifišago historing ya motho, go etša ge Jesu a re: “Ké mo letšatši lè tl’o xo fifala, le kxwedi ya tlo lesa xo étša.” Ee, le e tla ba lebaka le leso-leso bophelong bja motho. Go tla ba bjalo ka ge eka letšatši le fsifetše nakong ya mosegare, bjalo ka ge e ka kgwedi ga e sa ediša bošego.

Jesu o tšwela pele ka gore, “le matla a lexodimo a tlo šišinyêxa.” Ka gona o bontšha gore magodimo a kgonthe a tla nea pontšho e lemošago. Magodimo e ka se be feela bodulo bja dinonyana, eupja a tla tlala difofane tša ntwa, di-rocket, le dinyakišiši tša sebakeng. Poifo le bošoro di tla feta selo lege e le sefe seo se ilego sa diragala historing e fetilego ya batho.

Ka baka leo, Jesu o re go tla ba le “tlalêlô dithšabeng. Di tlo xakanêxa xe lewatlê le duma, mafula a lôna à tsoxile. Batho ba tlo nôlêxa môkô ka poifô le ka xo dula bà re lefase le sa tlô wêlwa ke eng?” Ka kgonthe, mehla e meso-meso bophelong bja motho e tla iša nakong yeo ka yona go etša ge Jesu a bolela, “pontšho ya Morwa-motho e [tlagogo] bonala legodimong; gomme mohlang wo merafo ka moka ya lefase e tlo lla ka go itshetla.”​—Phetolelo ya Kgale.

Eupja ga se bohle bao ba tlago go ba ba lla ge ‘Morwa Motho a e-tla ka matla’ go tla go senya tshepedišo ye e mpe ya dilo. “Bakxêthwa,” e lego ba 144 000 bao ba tlago go tšea karolo gotee le Kriste Mmušong wa gagwe wa legodimo ba ka se ke ba lla, le gona go ka se ke gwa lla gaešita le bagwera ba bona, bao Jesu pejana a ilego a ba bitša “dinku tše dingwê.” Go sa šetšwe mehla e meso-meso historing ya motho, ba ba amogela kgothatšo ya Jesu: “E re xe tšeo di thôma xo dirêxa, Le inamoloxê, Le tsošê dihlôxô tša lena, ka xobane xo tla ba xò batamêla topollô ya lena.”

E le gore barutiwa ba gagwe bao ba bego ba tla ba ba phela mehleng ya bofelo ba tle ba lemoge go batamela ga bofelo, Jesu o nea seswantšho se: “Bônang moxó le dihlare ka moka. Xe Le bôna di hloxile Le’e Le tsebê ka nnoši xore lehlabula le batametše. Dirang byalo le tabeng yé; xe Le bôna dilo tšeo di dirêxa, Le tsebê xore mmušô wa Modimo o batametšê. Ruri, ke a Le botša, di tlo dirêxa tšohle moloko wó ò sešo wa fêla.”

Ka gona, ge barutiwa ba gagwe ba bona dibopego tše dintši tše fapanego tša pontšho di phethagala, ba swanetše go lemoga gore bofelo bja tshepedišo ya dilo bo kgaufsi le gore Mmušo wa Modimo kapejana o tla fediša bokgopo ka moka. Ge e le gabotse, bofelo bo tla tšwelela nakong ya ge batho bao ba bonago phethagalo ya dilo ka moka tšeo Jesu a bolelago ka tšona ba sa phela! Jesu ge a lemoša barutiwa bao ba bego ba tla ba ba phela nakong e bohlokwa ya mehla ya bofelo, o re:

“Fêla, Le itôtê xore dipelo tša lena di se kê tša imêlwa ke bohori le xo boiwa, le dipelaêlô tša bophelô byono, ’me letšatši leo la tlo Le wêla sehloxo. Xobane le tlo etša sefu xe le wêla ba ba dutšexo lefaseng mo xo fêla. Phakxamang-xe, Le fêlê Le rapêla ka mabaka ohle, xore Le hwetšwê Lè loketše xo phônyôkxa tšeo ka moka di tl’o xo dirêxa, le xo tlo êma pele xa Morwa-motho.” Mateo 24:​23-51; Mareka 13:​21-37; Luka 21:​25-36; Kutollo 14:​1, 3; Johane 10:16.

◆ Ke maemo afe a lefase ao a swayago go ba gona ga Kriste?

◆ Ke neng moo ‘ditšhaba ka moka tša lefase di tlago go itshetla ka sello,’ eupja ke’ng seo balatedi ba Kriste ba tlago go ba ba se dira?

◆ Ke seswantšho sefe seo Jesu a se neago go thuša barutiwa ba gagwe ba nakong e tlago go lemoga nako yeo ka yona bofelo bo lego kgaufsi?

◆ Ke temošo efe yeo Jesu a e neago ba bangwe ba barutiwa ba gagwe bao ba tlago go ba ba phela mehleng ya bofelo?