Bophelo le Bodiredi bja Jesu

Paseka ya Mafelelo ya Jesu e Kgaufsi

GE LETŠATŠI la Labobedi, Nisani 11, le sobela, Jesu o fetša go ruta baapostola Thabeng ya Mehlware. E bile letšatši la leema-ema le le thata gakaakang! Mo nakong ye, mohlomongwe ge a boela Bethania go yo robala, o botša baapostola ba gagwe gore: “Le a tseba, xo sa šetše matšatši a mabedi, ké mo xo tlaxo monyanya wa Paseka; xomme Morwa-motho ó tlo xafêlwa xo bapolwa sefapanong.”

Mohlomongwe Jesu o diriša letšatši le le latelago la Laboraro, Nisani 12, a khuditše gotee le baapostola ba gagwe. Letšatši pele ga leo, o be a ile a kgalemela baetapele ba bodumedi phatlalatša, gomme a lemoga gore ba tsoma go mmolaya. Ka gona, ka Laboraro ga a itšweletše molaleng, ka ge a sa nyake ge selo lege e ka ba sefe se šitiša go bina ga gagwe monyanya wa Paseka le baapostola ba gagwe bošegong bjo bo latelago.

Go sa dutše go le bjalo, baperisita ba bagolo gotee le banna ba bagolo ba setšhaba ba bokane lapeng la moperisita o mogolo Kayafa. Ka ge ba hlabilwe ke mantšu a matla a Jesu letšatšing le le fetilego, ba loga maano a go mo swara ka bohlale gomme ba mmolaye. Le gona ba tšwela pele ba re: “Fêla, re se kê ra di dira byale monyanyeng, xore xo se kê xwa tsoxa moferefere sethšabeng.” Ba boifa batho, bao ba ratago Jesu.

Ge baetapele ba bodumedi ba sa loga maano a mabe a go bolaya Jesu, ba amogela moeti. Se se ba tlabago ke ge ba bona e le o mongwe wa baapostola ba Jesu, Judase Isikariote, yena yoo Sathane a mo tsentšego kgopolo e mpe ya go eka Mong wa gagwe. Ba thaba gakaakang ge Judase a botšiša gore: “Le tlo mpha’ng xe ke mo xafêla diatleng tša lena?” Ba dumela ka dipelo tše tšhweu go mo lefa mašeleng a 30 a silifera, e lego tefo ya go reka mohlanka go ya ka kgwerano ya Molao wa Moše. Go tloga moo go ya pele, Judase o nyaka sebaka se sebotse sa go gafela Jesu go bona, go se batho ba bantši kgaufsi.

Nisani 13 e thoma ka Laboraro ge letšatši le sobela. Jesu o be a gorogile go tšwa Jeriko ka Labohlano; ka gona, bjo ke bošego bja botshelela le bja mafelelo bjo a bo dulago mo Bethania. Letšatšing le le latelago, la Labone, go tla nyakega gore go dirwe ditokišetšo tša mafelelo bakeng sa monyanya wa Paseka wo o thomago ge letšatši le sobela, nakong ya ge kwana ya Paseka e swanetše go hlabja gomme e bešwe ka moka. Ba tla binela monyanya kae, le gona ke mang yo a tlago go dira ditokišetšo?

Jesu ga se a ka a nea tsebišo yeo, mohlomongwe e le go dira gore Judase a se ke a kgona go tsebiša baperisita ba bagolo, e le gore ba ka swara Jesu nakong ya monyanya wa Paseka. Lega go le bjalo, mohlomongwe kapejana mathapameng a Labone, Jesu o romela Petro le Johane go tšwa Bethania ka gore: “Yang Le re lokišetšê Paseka re tlê re jê.”

Ba mmotšiša ba re: “O rata xe re ka e lokiša kae?”

Jesu o hlalosa ka gore: “E tlo re xe Le tsêna motseng, Le tlo xahlana le motho e a rwelexo moêta wa meetse. Le mo latêlê, Le yê ngwakong wo a tsênaxo xo wôna. Le bolêlê le mong wa ngwakô woo Le re: Moruti ó re: Ngwakô o kae wo nkaxo jêla Paseka xo wôna le barutiwa ba-ka? Ó tlo Le laetša ngwakô o moxolo wa xodimo, wo o adilwexo maxoxwa. Le lokiše xôna-fao.”

Ga go na pelaelo gore mong wa ngwako ke morutiwa wa Jesu yoo mohlomongwe a letetšego kgopelo ya Jesu mabapi le go diriša ngwako wa gagwe bakeng sa tiragalo ye e kgethegilego. Lega go le bjalo, ge Petro le Johane ba fihla Jerusalema, ba hwetša selo se sengwe le se sengwe se le ka yona tsela yeo Jesu a e boletšego e sa le pele. Ka gona bobedi bja bona ba lokiša kwana le go dira ditokišetšo tše dingwe ka moka bakeng sa batho ba 13 bao ba tlago go ba gona monyanyeng, e lego Jesu le baapostola ba gagwe ba 12. Mateo 26:​1-5, 14-19; Mareka 14:​1, 2, 10-16; Luka 22:​1-13; Ekisodo 21:32.

◆ Jesu go bonagala a dira’ng ka Laboraro, gomme ka baka la’ng?

◆ Ke pitšo ya eng yeo e swerwego lapeng la moperisita o mogolo, gomme ke ka morero ofe Judase a etelago baetapele ba bodumedi?

◆ Ke bomang bao Jesu a ba romelago Jerusalema ka Labone, gomme ka morero ofe?

◆ Bao ba romilwego ba hwetša eng seo se utollago gape matla a Jesu a go dira mehlolo?