Bophelo le Bodiredi bja Jesu

Keletšo ya ge a Tloga

SEJO sa segopotšo se fetile, eupja Jesu le baapostola ba gagwe ba sa dutše ka ngwakong wa ka godimo. Lege Jesu kgaufsinyana a tla be a ile, eupja o sa na le dilo tše dintši tše a tlago go di bolela. O ba kgothatša ka gore: “Dipelo tša lena di se thšoxê; dumelang Modimo.” Eupja go nyakega mo go oketšegilego. O oketša ka gore: “Le Nna Le ntumêlê.”

Jesu o tšwela pele ka gore: “Ngwakong wa Tate xo na le madulô a mantši.” “Ke ya xo Le lokišetša sebaka . . . xore mo Nna ke lexo xôna le lena Le bê xôna.” Baapostola ga ba lemoge gore Jesu o bolela ka go ya legodimong, ka gona Tomase o a botšiša: “Mo O yaxo xa re xo tsebe; ’me tsela re ka e tseba bya’ng?”

Jesu o araba ka gore: “Tsela ké Nna, le therešô, le bophelô.” Ee ke feela ka go mo amogela le go ekiša tsela ya gagwe ya bophelo moo mang le mang a ka tsenago ngwakong wa legodimong wa Tate ka gobane, bjalo ka ge Jesu a bolela: “Xa xo e a tlaxo xo Tate xe e se ka Nna.”

Filipi o a kgopela: “Morêna, re laetšê Tat’axo; ké mo re tl’o xo wa pelo.” Go bonagala Filipi a rata gore Jesu a neele ponagalo ya Modimo, go etša e swanago le yeo e kilego ya neelwa mehleng ya bogologolo diponong tša Moše, Eliya le Jesaya. Eupja ge e le gabotse, baapostola ba na le selo se se kaone kudu go feta dipono tša mohuta woo, go etša ge Jesu a bolela gore: “E sa le mola kè na le lena, ’me xa O ešo wa ntseba? Filipi, e a bonexo Nna ó bone Tate.”

Jesu o tloga a bonagatša semelo sa Tatagwe mo e lego gore go phela le yena le go mo ela hloko, ge e le gabotse go ka swanago e le ka kgonthe le go bona Tatagwe. Lega go le bjalo Tate ke o mogolo go Morwa, bjalo ka ge Jesu a dumela gore: “Mantšu a ke a bolêlaxo le lena xa ke bolêle a-ka.” Jesu ka mo go swanetšego o tšea dithuto ka moka tša gagwe e le tša Tatagwe wa legodimong.

Go swanetše go ba go kgothatša baapostola gakaakang go kwa Jesu bjale a ba botša gore: “E a ntumêlaxo, ó tlo dira medirô ye ke e diraxo, ò tlo dira le e fetišaxo yeo”! Jesu ga a bolele gore balatedi ba gagwe ba tla ba le matla a magolo a go dira mehlolo go feta kamoo a dirilego ka gona. Aowa, eupja o bolela gore ba tla tšwetša pele bodiredi ka nako e telele, lefelong le legolo kudu le bathong ba bantši kudu.

Ka morago ga go tloga ga gagwe, Jesu Kriste a ka se lahle barutiwa ba gagwe. O a ba holofetša: “Se Le se kxopêlaxo ka Leina la-ka, le xe e ka ba’ng, ke tlo se dira.” O tšwela pele a re: “Ke tlo kxopêla Tate, a tlo Le nea Molwedi e mongwê, xore a tle a dulê le lena xo iša xo sa felexo. Ké Môya wa therešô.” Bjale, ka morago ga go rotogela legodimong, Jesu o tšhollela moya o mokgethwa go barutiwa ba gagwe, e lego mothuši yena yo o mongwe.

Go tloga ga Jesu go kgaufsi, bjale ka ge a bolela gore: “Xo šetše lebakanyana, ’me lefase le ka se hlwê le mpôna.” Jesu o tlo ba sebopiwa sa moya seo motho a ka se kego a se bona. Eupja gape Jesu o holofetša baapostola ba gagwe ba ba botegago gore: “Xe e le lena Le tlo mpôna, Xobane ke a phela, ’me le lena Le tlo phela.” Ee, Jesu a ka se ke a tšwelela go bona feela ka sebopego sa motho ka morago ga tsogo eupja ka nako e swanetšego o tlo ba tsošetša bophelong gore ba be gotee le yena legodimong e le dibopiwa tša moya.

Jesu ga bjale o bolela molao o bonolo: “E a naxo le melaô ya-ka, ’me a e lôtôla, ké yêna a nthataxo. ’Me e a nthataxo, ó tlo ratwa ke Tate. Le Nna ke tlo mo rata ka ipônatša xo yêna.”

Tabeng ye moapostola Judase, yo gape a bitšwago ka la Tadeo, o tsena ditaba gare ka gore: “Morêna, molato ké eng, xe O tlo ipônatša xo rena, e sexo xo lefase?”

Jesu o a araba: “Xe motho a nthata, ó tlo lôtôla Lentšu la-ka; le Tate ó tlo mo rata . . . E a sa nthatexo, xa a lôtole mantšu a-ka.” Go fapana le balatedi ba gagwe ba ba kwago, lefase le hlokomologa dithuto tša Kriste. Ka gona ga a ikutolle go bona.

Nakong ya bodiredi bja gagwe bja lefaseng, Jesu o ile a ruta baapostola ba gagwe dilo tše dintši. Ba tla di gopola bjang ka moka ga tšona, kudu-kudu gaešita le mo nakong ye ba palelwa ke go swara tše dintši? Ka mo go thabišago, Jesu o holofetša gore: “Yêna Molwedi Môya-mokxêthwa, wo Tate a tl’o xo o roma ka Leina la-ka, o tlo Le ruta tšohle, o tlo Le xakolla tšohle tše ke Le boditšexo tšôna.”

Jesu o ba homotša gape ka gore: “Ke Le tloxêlêla moláô; ke Le fa moláô wa-ka . . . Dipelo tša lena di se huduêxê, di se šiê.” Ka kgonthe, Jesu o a tloga, eupja o hlalosa gore: “Xe Le nthata, Le tlo thaba xe ke re: Ke ya xo Tate; xobane Tate ó mphetha ka boxolo.”

Nako yeo e šetšego Jesu a e-na le bona ke e kopana. O re: “Nka se hlwê ke bolêla tše ntši le lena, xobane mmuši wa lefase ó e-tla; xomme xa a na se a tl’o xo ntira sôna.” Sathane Diabolo, yo a ilego a kgona go tsena go Judase le go mo tanya, ke mmuši wa lefase. Eupja Jesu ga a na bofokodi bja sebe bjo Sathane a ka bo dirišago e le gore a mo aroše go direleng Modimo. John 14:​1-31; 13:​27; Luka 22:​3, 4; Ekisodo 24:​10; 1 Dikxoši 19:​9-13; Jesaya 6:​1-5.

▪ Jesu o ya kae, gomme Tomase o hwetša karabo efe mabapi le tsela e yago moo?

▪ Ka kgopelo ya gagwe, go bonagala Filipi a nyaka gore Jesu a mo nee eng?

▪ Ke ka baka la’ng yo a bonego Jesu e le yo a bonego Tate?

◆ Balatedi ba Jesu ba dira modiro o mogolo bjang go feta kamoo a dirilego?

▪ Ke ka kgopolo efe Sathane a ka se kego a tanya Jesu?