THUTO 33
Dilo Tšeo Mmušo wa Modimo o Tlago go re Direla Tšona
Mmušo wa Modimo o šetše o thomile go buša kua legodimong. Go se kgale, o tla be o buša le mo lefaseng, gomme wa tla wa re direla dilo tše dintši tšeo di kgahlišago. A re kwe ka tše dingwe tša dilo tšeo, tšeo le wena o ka felago pelo ya go tlo di bona.
1. Mmušo wa Modimo o tlo dira eng gore mo lefaseng go be le khutšo le toka?
Jesu Kriste, e lego Kgoši ya Mmušo wa Modimo, o tlo fediša batho ba babe ka moka le mebušo ka moka ka ntwa ya Haramagedone. (Kutollo 16:14, 16) Ka nako yeo, go tlo phethagala seo lengwalo la Psalme 37 temana 10 le re tshepišago sona. Le re: “Go se gokae yo kgopo o tla be a se sa le gona.” Jesu o tlo diriša Mmušo wa Modimo go netefatša gore lefaseng ka moka go be le toka, e bile batho ba phele ka khutšo.—Bala Jesaya 11:4.
2. Bophelo bo tlo ba bjang mo lefaseng ge dilo di le ka tsela yeo Modimo a bego a nyaka gore di be ka yona?
Ge Mmušo wa Modimo o tla be o buša mo lefaseng, ‘baloki e tla ba beng ba lefase gomme ba tla dula mo go lona ka mo go sa felego.’ (Psalme 37:29) O nagana gore bophelo bo tlo ba bjang mo lefaseng ge batho ka moka ba lokile, ba ratana e bile ka moka ba rata Jehofa? Ruri bo tlo thabiša kudu! Go ka se sa ba le motho yo a babjago, e bile re tlo phela go ya go ile go se na motho yo a hwago.
3. Mmušo wa Modimo o tlo re direla eng mo lefaseng ka morago ga gore o fediše dilo tše mpe?
Ka morago ga gore Modimo a fediše dilo ka moka tše mpe, Jesu o tlo buša e le Kgoši ka mengwaga e 1 000. Ka yona nako yeo, yena le bao a tlago go buša le bona, e lego ba 144 000, ba tlo thuša batho gore ba se sa ba le sebe. Ge mengwaga yeo e 1 000 e fela, lefase ka moka e tla be e le paradeise e botse, gomme batho ka moka ba tla be ba thabile ka ge ba tla be ba phela ka melao ya Jehofa. Ka morago ga moo, Jesu o tlo šuthelela Tatagwe e lego Jehofa, gore e be yena a bušago. Ka yona nako yeo, ‘leina la Jehofa le tlo kgethagatšwa.’ (Mateo 6:9, 10) Batho ka moka ba tlo bona gore Jehofa o kgona go buša e bile o na le taba le bona. Ke moka Jehofa o tlo fediša Sathane, batemona, le batho ka moka bao ba kgethilego go se phele ka melao ya gagwe. (Kutollo 20:7-10) Dilo ka moka tše dibotse tšeo Mmušo wa Modimo o tla bego o di dirile mo lefaseng, di ka se tsoge di fedile.
ITHUTE KA MO GO TSENELETŠEGO
Ekwa gore ke ka baka la eng re tshepa gore nakong e tlago, Modimo o tlo diriša Mmušo wa gagwe go dira dilo ka moka tšeo a re tshepišago tšona ka Beibeleng.
4. Mmušo wa Modimo o tlo fediša mebušo ka moka ya batho
Mmoledi 8:9 e re: “Motho [o] buša yo mongwe gore a mo gobatše.” Jehofa o tlo diriša Mmušo wa gagwe go fediša dilo ka moka tše mpe, tšeo di bilego gona ka baka la ge batho ba buša gampe.
Balang Daniele 2:44 le 2 Bathesalonika 1:6-8, gomme le boledišaneng ka dipotšišo tše di latelago:
Jehofa le Morwa wa gagwe Jesu, ba tlo dira’ng ka mebušo ya batho le bao ba e thekgago?
Ka ge Jehofa le Jesu ba tlo fediša batho ka moka ba babe le mebušo ya batho, na se se ra gore ba tla be ba sa bontšhe toka? Go re’ng o re’alo?
5. Jesu ke Kgoši yeo e phalago dikgoši ka moka
Ka ge Jesu e le Kgoši ya Mmušo wa Modimo, o tlo thuša batho mo lefaseng ka dilo tše dintši. Bapalang BIDIO ye, gomme le bone gore Jesu o šetše a bontšhitše bjang gore o nyaka go thuša batho, le gore Modimo o mo file matla a go dira bjalo.
Ge Jesu a be a le mo lefaseng, o ile a dira dilo tšeo Mmušo wa Modimo o tlago go re direla tšona ge o buša mo lefaseng. Ke dilo dife tšeo di bontšhitšwego mo, tšeo o felago pelo ya go tlo di bona di direga? Balang mangwalo ao a sepedišanago le dilo tšeo morutwana a rego o fela pelo ya go tlo di bona.
GE JESU A BE A LE MO LEFASENG . . . |
GE JESU A BUŠA A LE LEGODIMONG . . . |
|---|---|
|
|
|
|
|
|
|
|
6. Mmušo wa Modimo o tlo re direla dilo tše dintši tše dibotse
Mmušo wa Modimo o tlo dira gore batho ba ipshine ka bophelo, ka ge Jehofa a be a nyaka gore ba phele bjalo ge a be a bopa lefase. Ba tlo phela go ya go ile paradeiseng mo lefaseng. Bapalang BIDIO ye, gomme le boneng gore Jehofa o diriša bjang Morwa wa gagwe e lego Jesu, go dira gore lefase le be ka tsela ye a bego a nyaka le eba ka yona.
Balang Psalme 145:16, gomme le boledišaneng ka potšišo e latelago:
Taba ya gore Jehofa o tlo “kgotsofatša kganyogo ya sephedi se sengwe le se sengwe” e dira gore o ikwe bjang?
BATHO BA BANGWE BA RE: “Ge ka moka ga rena re ka rapela, mathata a lefase le a tlo fela.”
Mmušo wa Modimo o tlo fediša mathata afe ao mebušo ya batho e sa kgonego go a fediša?
O ITHUTILE ENG?
Jehofa o tlo diriša Mmušo wa gagwe go dira dilo tšeo yena a nyakago di direga mo lefaseng. Mmušo wo o tlo fetoša lefase ka moka paradeise, gomme gwa dula batho ba go loka bao ba tlago go mo hlankela go ya go ile.
Dipotšišo
Mmušo wa Modimo o tlo kgethagatša leina la Jehofa bjang?
Ke ka baka la’ng re dumela gore Mmušo wa Modimo o tlo dira dilo ka moka tšeo Beibele e re tshepišago tšona?
Ka ge Mmušo wa Modimo o tlo re direla dilo tše dintši tše dibotse, wena ke selo sefe seo o felago pelo ya go tlo se bona se direga?
ITHUTE KA MO GO OKETŠEGILEGO
Ekwa gore Haramagedone ke eng.
“Ntwa ya Haramagedone ke Eng?” (Sehlogo se se lego wepesaeteng)
Ekwa gore go tlo direga eng nakong yeo Jesu a e biditšego gore ke “masetlapelo a magolo.” —Mateo 24:21.
“Masetlapelo a Magolo ke Eng?” (Sehlogo se se lego wepesaeteng)
Ekwa gore malapa a ka dira eng gore a ipone a le paradeiseng.
Ekwa gore monna yo a bego a lwantšhana le mmušo o ile a thušwa ke eng gore a se sa lwantšhana le wona. Bala sehlogo seo se rego: “Ke be ke Tshwenywa ke Dipotšišo tše Dintši.”
“Beibele e Fetoša Maphelo” (Morokami wa January 1, 2012.)