Phegelela Kgolong​—“Letšatši le Legolo la Jehofa le Kgaufsi”

“A re phegeleleng kgolong.”—BAHEB. 6:1.

1, 2. Ke sebaka sefe sa go ‘tšhabela dithabeng’ seo se ilego sa bulegela Bakriste ba lekgolong la pele la nywaga kua Jerusalema le Judea?

GE JESU a be a le mo lefaseng, barutiwa ba gagwe ba ile ba tla go yena gomme ba mmotšiša gore: “Pontšho ya go ba gona ga gago le ya bofelo bja tshepedišo ya dilo e tla ba eng?” Boporofeta bjo Jesu a ba neilego bjona ge a araba potšišo ye, bo phethagatše la mathomo lekgolong la pele la nywaga. Jesu o boletše ka tiragalo e sa tlwaelegago yeo e bego e tla bontšha gore bofelo bo kgaufsi. Ge ba bona tiragalo yeo, ‘bao ba lego Judea ba be ba swanetše go thoma go tšhabela dithabeng.’ (Mat. 24:1-3, 15-22) Na barutiwa ba Jesu ba be tla lemoga pontšho yeo gomme ba latela ditaelo tša gagwe?

² Ka morago ga mo e nyakilego go ba nywaga e masome a mararo, ka 61 C.E., moapostola Paulo o ile a ngwalela Bakriste ba Baheberu bao ba dulago Jerusalema le metseng ya kgaufsi molaetša o matla o ilego wa dira gore ba naganišiše. Paulo le badumedi-gotee le yena ba be ba sa tsebe gore leswao leo le bego le tla bontšha go thoma ga karolo ya pele ya “masetlapelo a magolo” le be le tla tšwelela nywageng e mehlano e latelago. (Mat. 24:21) Ka 66 C.E., Cestius Gallus o ile a etelela madira a Roma pele tlhaselong yeo e nyakilego go atlega kgahlanong le Jerusalema. Eupša o ile a boela morago go sa letelwa gomme a bula sebaka sa gore batho bao ba lego kotsing ba tšhabe.

3. Ke keletšo efe yeo Paulo a ilego a e nea Bakriste ba Baheberu, gona ka baka la’ng?

³ Bakriste bao ba be ba swanetše go ba le temogo e tseneletšego le pono ya moya e le gore ba lemoge phetogo yeo gomme ba tšhabe. Lega go le bjalo, ba bangwe ba ile ba “[retela] tabeng ya go kwa.” Ba be ba le bjalo ka bana bao ba nyakago “mafsi.” (Bala Baheberu 5:11-13.) Gaešita le ba bangwe bao ba ilego ba sepela tseleng ya therešo ka nywaga e mentši ba be ba bontšha maswao a go “katologela kgole le Modimo yo a phelago.” (Baheb. 3:12) Ba bangwe ba be ba “tlwaetše” go foša diboka tša Bokriste ka nako yeo ka yona ‘letšatši leo la masetlapelo le bego le batamela.’ (Baheb. 10:24, 25) Paulo o ile a ba nea keletšo e lego nakong, a re: “Ka ge bjale re tlogetše thuta-tumelo ya pele mabapi le Kriste, a re phegeleleng kgolong.”—Baheb. 6:1.

4. Ke ka baka la’ng go le bohlokwa gore re dule re phafogile moyeng, gona ke’ng seo se tla re thušago go dira bjalo?

⁴ Re phela nakong ya go phethagatšwa ga karolo ya mafelelo ya boporofeta bja Jesu. “Letšatši le legolo la Jehofa”—letšatši leo le tlago go fediša tshepedišo ka moka ya Sathane—“le kgaufsi.” (Tsef. 1:14, PK) Re swanetše go dula re phafogile moyeng go feta le ge e le neng pele. (1 Pet. 5:8) Na ruri se ke sona seo re se dirago? Kgolo ya Bokriste e tla re thuša go dula re gopola moo re lego gona mosepelong wa nako.

Seo Kgolo ya Bokriste e Lego Sona

5, 6. (a) Kgolo ya moya e akaretša’ng? (b) Go phegelela kgolong go nyaka gore re dire maiteko dilong dife tše pedi?

⁵ Paulo ga se a ka a kgothaletša Bakriste ba Baheberu ba lekgolong la pele la nywaga gore ba phegelele kgolong feela, eupša o ile a ba botša gape gore kgolo ya moya e akaretša eng. (Bala Baheberu 5:14.) “Batho ba godilego” ga ba kgotsofalele go nwa “mafsi” feela. Ba ja “dijo tše di tiilego.” Ka baka leo, ba tseba “dilo tša motheo” le ‘dilo tše di tseneletšego’ tša therešo. (1 Bakor. 2:10) Ka godimo ga moo, matla a bona a temogo a tlwaeditšwe ka go dirišwa—ka go diriša seo ba se tsebago—bakeng sa go ba thuša go kgethologanya se se nepagetšego le se se fošagetšego. Ge ba swanetše go dira phetho, tlwaetšo ye e ba thuša go lemoga melao ya motheo ya Mangwalo e akaretšwago le kamoo ba ka e dirišago ka gona.

⁶ Paulo o ngwadile gore: “Go [nyakega] gore re hlokomeleng go feta ka mo go tlwaelegilego dilo tše re di kwelego, gore re se ke ra gogolega.” (Baheb. 2:1) Go aroga tumelong mo go bjalo go ka direga pele re go lemoga. Re ka phema seo ka go ‘hlokomela go feta ka mo go tlwaelegilego’ ge re ahla-ahla ditherešo tša moya. Ka gona, yo mongwe le yo mongwe wa rena o swanetše go ipotšiša gore: ‘Na ke sa dutše ke ela hloko dilo tša motheo? Na go ka direga gore ke fo ithola kgwara le gore therešo ga se ya nwelela ka pelong ya-ka? Nka dira tšwelopele ya kgonthe ya moya bjang?’ Go phegelela kgolong go nyaka gore re dire maiteko bonyenyane dilong tše pedi. Re swanetše go tlwaelana gabotse le Lentšu la Modimo. Le gona, re swanetše go ithuta go kwa.

Tlwaelana Gabotse le Lentšu la Modimo

7. Re ka holwa bjang ke go tlwaelana gakaone bjang le Lentšu la Modimo?

⁷ Paulo o ngwadile gore: “Yo mongwe le yo mongwe yo a nwago mafsi ga se a tlwaelana le lentšu la toko, ka ge e le ngwana.” (Baheb. 5:13) E le gore re fihlelele kgolo, re swanetše go tlwaelana gabotse le Lentšu la Modimo, e lego molaetša wa gagwe go rena. Ka ge molaetša woo o le ka Lentšung la gagwe e lego Beibele, re swanetše go ba diithuti tše dibotse tša Mangwalo le tša dikgatišo tša “mohlanka yo a botegago le wa temogo.” (Mat. 24:45-47) Go ithuta megopolo ya Modimo ka tsela ye go ka re thuša go tlwaetša matla a rena a temogo. Ela hloko mohlala wa Mokriste yo a bitšwago Orchid.a O re: “Kgopotšo e nkgomilego kudu ke ya mabapi le go bala Beibele ka mehla. Go ntšere mo e ka bago nywaga e mebedi gore ke fetše Beibele ka moka, eupša go be go bonala eka ke gona ke thomago go tseba Mmopi wa-ka. Ke ile ka ithuta ditsela tša gagwe, dilo tšeo a di ratago le tšeo a di hloilego gotee le bogolo bja matla le bohlale bja gagwe. Go bala Beibele letšatši le letšatši go mmatlafaditše dinakong tše thata tšeo ke ilego ka lebeletšana le tšona.”

8. Lentšu la Modimo le ka ba le tutuetšo efe e matla go rena?

⁸ Go bala Lentšu la Modimo ka mehla go dumelela molaetša wa lona gore o ‘be le matla’ go rena. (Bala Baheberu 4:12.) Go le bala ka tsela yeo go ka bopa motho yo re lego yena ka gare gomme gwa dira gore re kgahliše Jehofa. Na go nyakega gore o beele nako ka thoko e le gore o bale Beibele gomme o naganišiše ka seo e se bolelago?

9, 10. Go tlwaelana le Lentšu la Modimo go akaretša’ng? Bontšha.

⁹ Go tlwaelana le Beibele go akaretša go feta go fo tlwaelana le seo e se bolelago. Bao e bego e le bana moyeng mehleng ya Paulo e be e se batho bao ba sego ba tlwaelana ka mo go feletšego le Lentšu la Modimo leo le buduletšwego. Lega go le bjalo, ga se ba ka ba diriša seo le se bolelago e le gore ba bone mohola wa lona. Ga se ba ka ba itlwaelanya le molaetša wa lona ka go o dumelela gore o ba hlahle e le gore ba dire diphetho tše bohlale maphelong a bona.

¹⁰ Go tlwaelana le Lentšu la Modimo go bolela go tseba seo le lego sona le go diriša tsebo yeo. Phihlelo ya kgaetšedi wa Mokriste yo a bitšwago Kyle e bontšha kamoo se se ka dirwago ka gona. Kyle o ile a lwa ka mantšu le yo mongwe wa bašomi gotee le yena. O ile a dira’ng gore a rarolle bothata? O hlalosa gore: “Lengwalo leo ke ilego ka le gopola gatee-tee ke Baroma 12:18 yeo e rego: ‘Go fihla moo go ithekgilego ka lena, e-bang le khutšo le batho bohle.’ Ka gona, ke ile ka kgopela mošomi-gotee yoo gore re kopane ka morago ga mošomo.” Poledišano ya bona e ile ya ba le mafelelo a mabotse gomme mošomi-gotee le Kyle o ile a kgahlwa ke kgato yeo Kyle a e tšerego. Kyle o re: “Ke ithutile gore re ka se ke ra palelwa ke selo ge e ba re diriša melao ya motheo ya Beibele.”

Ithute go kwa

11. Ke’ng seo se bontšhago gore go ka ba thata go kwa ka tlase ga maemo a boima?

¹¹ Go diriša seo re ithutilego sona Mangwalong go ka ba thata, kudu-kudu ge maemo a le thata. Ka mohlala, nakwana ka morago ga ge Jehofa a lokolotše Baisiraele bokgobeng Egipita, ba ile ba “lwa le Mošê” gomme ba “leka Morêna.” Ka baka la’ng? Ka gobane ba be ba se na meetse ao ba ka a nwago. (Ek. 17:1-4) Nakong ya ka tlase ga dikgwedi tše pedi ba tsenetše kgwerano le Modimo gomme ba dumetše go dira “tšohle tše Morêna a di boletšexo,” ba ile ba roba molao wa gagwe wa mabapi le borapedi bja medimo ya diswantšho. (Ek. 24:3, 12-18; 32:1, 2, 7-9) Na se se be se bakilwe ke gore go se boe ga Moše ka pela ge a be a newa ditaelo Thabeng ya Horebe go be go ba tladitše poifo? Na mohlomongwe Baisiraele ba ile ba nagana gore Baamaleke ba be ba tla ba hlasela gape le gore ba be ba ka se kgone go iphemela ka ntle le Moše, yoo matsogo a gagwe ao a bego a phagamišitšwe a ba thušitšego go fenya pejana? (Ek. 17:8-16) Go ka direga gore go be go le bjalo, eupša go sa šetšwe gore boemo e be e le bofe, Baisiraele ‘ba ile ba gana go kwa.’ (Dit. 7:39-41) Paulo o kgothaleditše Bakriste gore ba ‘dire sohle seo ba ka se kgonago’ gore ba pheme go “wela mohlaleng o swanago wa go se kwe” woo Baisiraele ba o bontšhitšego ge ba be ba boifa go tsena Nageng ya Kholofetšo.—Baheb. 4:3, 11.

12. Jesu o ithutile go kwa bjang, gona ka mafelelo afe?

¹² Go phegelela kgolong go nyaka gore re dire sohle seo re ka se kgonago go kwa Jehofa. Bjalo ka ge mohlala wa Jesu bontšhitše, gantši re ithuta go kwa dilong tšeo re tlaišegilego ka tšona. (Bala Baheberu 5:8, 9.) Pele a e-tla lefaseng, Jesu o be a e-kwa Tatagwe. Lega go le bjalo, go dira thato ya Tatagwe ge a be a le mo lefaseng go be go akaretša gore a tlaišege mmeleng le monaganong. Ka go bontšha go kwa ge a be a lebeletšane le tlaišego e sehlogo, Jesu o ile a ‘dirwa yo a phethagetšego’ bakeng sa boemo bja gagwe bjo bofsa bjoo Modimo a bego a mmeetše bjona, e lego go ba Kgoši le Moperisita yo a Phagamego.

13. Ke’ng seo se bontšhago ge e ba re ithutile go kwa?

¹³ Go thwe’ng ka rena? Na re ikemišeditše go kwa Jehofa gaešita le ge re lebeletšane le mathata a gateletšago? (Bala 1 Petro 1:6, 7.) Keletšo ya Modimo mabapi le boitshwaro, go botega, go diriša leleme gabotse, thuto ya motho ka noši ya Mangwalo, go ba gona dibokeng tša Bokriste le go tšea karolo modirong wa boboledi e a kwagala. (Još. 1:8; Mat. 28:19, 20; Baef. 4:25, 28, 29; 5:3-5; Baheb. 10:24, 25) Na re kwa Jehofa ditabeng tše gaešita le ge re lebeletšane le tlaišo? Go kwa ga rena ke sešupo sa gore re gatetše pele kgolong ya moya.

Ke ka Baka La’ng Kgolo ya Bokriste e le Bohlokwa?

14. Bontšha kamoo go phegelela kgolong e ka bago tšhireletšo.

¹⁴ Ruri ke tšhireletšo gore Mokriste a be le matla a temogo ao a tlwaeditšwego gabotse e le gore a kgethologanye se se nepagetšego le se se fošagetšego lefaseng le leo le “[lahlegetšwego] ke maikwelo ohle a boitshwaro.” (Baef. 4:19) Ka mohlala, ngwanabo rena yo a bitšwago James, yoo ka mehla a bego a bala dikgatišo tše theilwego Mangwalong e bile a di tšeela godimo kudu, o ile a hwetša mošomo lefelong leo go lona bašomi-gotee le yena ka moka e bego e le basadi. James o re: “Gaešita le ge go be go le molaleng gore bontši bja bona ga bo na boitshwaro, mošomi yo mongwe yena o be a bonala a hlomphega e bile a kgahlegela Beibele. Lega go le bjalo, ge re be re le gotee ka phapošing e nngwe mošomong, o ile a thoma go nkgoketša gore ke be le kopano ya botona le botshadi le yena. Ke be ke nagana gore o a swaswa, eupša ka hwetša go le thata gore ke mo thibele. Ka yona nako yeo ke ile ka gopola phihlelo yeo e laodišitšwego ka go Morokami ya mabapi le ngwanabo rena yo a ilego a lebeletšana le teko e swanago mošomong. Sehlogo seo se ile sa diriša mohlala wa Josefa le mosadi wa Potifaro.b Gatee-tee ke ile ka kgorometša ngwanenyana yoo gomme a tšwa a tšhaba.” (Gen. 39:7-12) James o ile a thabela gore ga go selo seo se ilego sa direga ka morago ga moo le gore o ile dula a e-na le letswalo le lebotse.—1 Tim. 1:5.

15. Go phegelela kgolong go ka matlafatša pelo ya rena ya seswantšhetšo bjang?

¹⁵ Kgolo e bohlokwa gape ka gobane e matlafatša pelo ya rena ya seswantšhetšo gomme e a re šireletša gore re se ke ra “gogolwa ke dithuto tše fapa-fapanego le tše šele.” (Bala Baheberu 13:9.) Ge re katanela go dira tšwelopele ya moya, menagano ya rena e dula e tsepame ‘dilong tše bohlokwa kudu.’ (Bafil. 1:9, 10) Ka gona, re leboga Modimo ka mo go tseneletšego bakeng sa ditokišetšo ka moka tšeo a re diretšego tšona e le gore re holege. (Baroma 3:24) Mokriste yo a “gotšego ka mo go feletšego matleng a go kwešiša” o hlagolela tebogo e bjalo gomme o thabela tswalano ya kgaufsi le Jehofa.—1 Bakor. 14:20.

16. Ke’ng seo se thušitšego kgaetšedi yo mongwe go hlagolela ‘pelo e tiilego’?

¹⁶ Kgaetšedi yo a bitšwago Louise o ile a dumela gore ka nako e itšego ka morago ga go kolobetšwa o be a tshwenyegile kudu ka tsela yeo ba bangwe ba mo lebelelago ka yona. O itše: “Ke be ke sa dire selo se se fošagetšego, eupša pelo ya-ka e be e se na kganyogo e matla ya go hlankela Jehofa. Ke ile ka lemoga gore ke swanetše go dira diphetogo ge e ba ke be ke nyaka go ikwa gore ke nea Jehofa sohle seo nka kgonago go mo nea sona. Phetogo e kgolo e bile go mo hlankela ka pelo ya-ka ka moka.” Ka go dira boiteko bjo bjalo, Louise o ile a hlagolela ‘pelo e tiilego’ gomme pelo yeo e ile ya mo thuša ge a be a lebeletšane le boemo bjo bo gateletšago bja tša maphelo. (Jak. 5:8) Louise o itše: “Ke bile le mathata a mantši, eupša ke ile ka batamela kgaufsi kudu le Jehofa.”

‘E-kwa go Tšwa Pelong’

17. Ke ka baka la’ng go kwa go be go le bohlokwa kudu lekgolong la pele la nywaga?

¹⁷ Keletšo ya Paulo ya gore re ‘phegelele kgolong’ e ile ya phološa maphelo a Bakriste ba lekgolong la pele la nywaga bao ba bego ba dula Jerusalema le Judea. Bao ba ilego ba e theetša ba bile le temogo e tseneletšego ya moya yeo e bego e nyakega e le gore ba lemoge pontšho yeo Jesu a bego a ba neile yona ya gore ba “thome go tšhabela dithabeng.” Ge ba bona “makgapha a bakago tšhwalalanyo . . . a eme lefelong le lekgethwa,” ke gore, madira a Roma a dikaneditše Jerusalema e bile a e šwahlela, ba ile ba tseba gore ke nako ya go tšhaba. (Mat. 24:15, 16) Go ya ka radihistori wa tša bodumedi e lego Eusebius, Bakriste ba ile ba theetša temošo ya Jesu ya boporofeta gomme ba tšhaba Jerusalema pele e fedišwa, ke moka ba dula motseng wa Pella tikologong ya dithaba ya Gileada. Ka go rialo di ile tša efoga kotsi e sehlogo kudu yeo e ilego ya wela Jerusalema historing e tsebjago.

18, 19. (a) Ke ka baka la’ng go kwa go le bohlokwa mehleng ya rena? (b) Go tla ahla-ahlwa’ng sehlogong se se latelago?

¹⁸ Go kwa mo go bakwago ke go phegelela kgolong go tla phološa maphelo gape ge re lebeletšana le phethagatšo e kgolo ya boporofeta bja Jesu bja gore “go tla ba le masetlapelo a magolo” ao go sa kago gwa ba le a swanago le ona. (Mat. 24:21) Na re tla latela tlhahlo le ge e le efe e akgofilego yeo re tlago go e newa ke “molaki yo a botegago” nakong e tlago? (Luka 12:42) Ruri ke gabohlokwa gore re ithute ‘go kwa go tšwa pelong!’—Baroma 6:17.

¹⁹ Go fihlelela ga rena kgolo go nyaka gore re tlwaetše matla a rena a temogo. Re ka dira bjalo ka go katanela gore re tlwaelane gakaone le Lentšu la Modimo le ka go ithuta go kwa. Go fihlelela kgolo ya Bokriste go tlišetša bafsa ditlhohlo tše kgethegilego. Sehlogo se se latelago se tla ahla-ahla kamoo ba ka lebeletšanago le ditlhohlo tše bjalo ka katlego.

[Mengwalo ya tlase]

O Ithutile’ng?

• Kgolo ya moya ke’ng, gona re ka e fihlelela bjang?

• Go tlwaelana le Lentšu la Modimo go kgatha tema efe go phegeleleng ga rena kgolo?

• Re ka ithuta go kwa bjang?

• Kgolo e re hola ka ditsela dife?

[Seswantšho go letlakala 10]

Go diriša keletšo ya Beibele go re thuša go lebeletšana le mathata ka tsela e bontšhago kgolo ya moya

[Seswantšho go letlakala 12, 13]

Go latela keletšo ya Jesu go ile gwa phološa maphelo a Bakriste ba lekgolong la pele la nywaga