Kgaolo 9

Go Kgomarela Leina la Jesu

PEREGAMO

1. Ke phuthego efe yeo e ilego ya amogela molaetša o latelago wa Jesu, gomme Bakriste bao ba be ba phela motseng wa mohuta ofe?

GE RE sepela dikhilomithara tše 80 re lebile leboa ka tsela ya go bapa le lebopo go tloga Simirina gomme ra tsenelela ka nageng ka dikhilomithara tše 24 re phatša moeding wa Noka ya Caicus, re fihla Peregamo yeo mo nakong ye e bitšwago Beregama. Motse wo o be o tumile ka tempele ya wona ya Zeus goba Jupitere. Baepi ba marope nywageng ya bo-1800, ba ile ba iša aletare ya tempele yeo Jeremane moo e sa dutšego e ka bonwa gona gotee le dihlwa-dieme tše dintši le diswantšho tša medimo ya boheitene Musiamong wa Peregamo kua Berlin. Ke molaetša ofe wo Morena Jesu a bego a ka o romela phuthegong e phelago gare ga borapedi bjoo ka moka bja diswantšho?

2. Jesu o itlhalosa bjang, gomme ke’ng seo se bolelwago ke go ba ga gagwe le “tšhoša e telele ya magale a mabedi”?

² Sa pele, Jesu o itsebiša seo a lego sona ka gore: “Ngwalela morongwa wa phuthego ya Peregamo o re: Tše ke dilo tše di bolelwago ke yo a nago le tšhoša e telele ya magale a mabedi.” (Kutollo 2:12) Jesu mo o boeletša tlhaloso yeo e neilwego ka yena go Kutollo 1:16. Ka ge e le Moahlodi le Mophethi wa Kahlolo, o tla bolaya bao ba tlaišago barutiwa ba gagwe. Kholofetšo yeo e homotša gakaakang! Lega go le bjalo, mabapi le kahlolo, anke bao ba lego ka phuthegong le bona ba lemošwe gore Jehofa ka go diriša ‘motseta yo wa kgwerano,’ e lego Jesu Kriste, ‘e tla ba hlatse e tlago ka go akgofa’ malebana le bohle bao ba ipolelago gore ke bona Bakriste bao ba rapelago medimo ya diswantšho, ba dirago bootswa, ba bolelago maaka, ba sa botegego le bao ba palelwago ke go hlokomela bahlaki. (Maleaki 3:1, 5; Baheberu 13:1-3) Keletšo le tsholo tšeo Modimo a dirago gore Jesu a di nee, di swanetše go kwewa!

3. Ke borapedi bofe bja maaka bjo bo ilego bja ba gona Peregamo, gomme go ka bolelwa bjang gore “sedulo sa bogoši sa Sathane” se be se le moo?

³ Jesu bjale o botša phuthego gore: “Ke tseba mo o dulago gona, ke gore mo go lego sedulo sa bogoši sa Sathane.” (Kutollo 2:13a) Ka kgonthe, Bakriste bao ba be ba dikologilwe ke borapedi bja Sathane. Go oketša go tempele ya Zeus, go be go e-na le aletare e agetšwego Aesculapius, modimo wa phodišo. Peregamo le gona e be e tumile ka go ba lefelo la tirelo ya borapedi bja go rapela mmuši. Leina la Seheberu leo le fetolelwago e le “Sathane” le bolela “Moganetši,” gomme ‘sedulo sa gagwe sa bogoši’ se emela pušo ya gagwe ya lefase e le yeo e dumeletšwego ke Modimo ka nako e itšego. (Jobo 1:6, mongwalo wa ka tlase wa New World Translation Reference Bible) Bogolo bja borapedi bja medimo ya diswantšho Peregamo bo bontšhitše gore “sedulo sa bogoši” sa Sathane se be se hlomilwe ka go tia motseng woo. Sathane o swanetše go ba a ile a befelwa gakaakang ge Bakriste moo ba ile ba se ke ba mo khunamela borapeding bjoo bja setšhaba!

4. (a) Jesu o reta Bakriste ba Peregamo ka eng? (b) Ke’ng seo motseta wa Roma Pliny a ilego a se ngwalela Mmuši Trajan mabapi le tshwaro ya Bakriste? (c) Ke tsela efe yeo Bakriste ba Peregamo ba ilego ba e tšea, go sa šetšwe kotsi?

⁴ Ee, “sedulo sa bogoši sa Sathane” se gona moo Peregamo. Jesu o tšwela pele ka gore: “Lega go le bjalo, o dula o kgomaretše leina la-ka, gomme ga se wa latola tumelo ya gago go nna gaešita le mehleng ya Antipase, hlatse ya-ka e botegago, yo a ilego a bolaelwa kgaufsi le lena moo Sathane a dulago gona.” (Kutollo 2:13b) A theto e tutuetšago gakaakang! Go bolaelwa tumelo ga Antipase ka ntle le pelaelo go bakilwe ke go gana ga gagwe go dumelelana le mekgwa ya botemona gotee le borapedi bja go rapela mmuši wa Roma. Go se gwa ya kae ka morago ga ge Johane a amogetše boporofeta bjo, Pliny yo Monyenyane, yena motseta wa Mmuši Trajan wa Roma o ile a ngwalela Trajan gomme a hlalosa tsela ya gagwe ya go swara batho bao ba bewago molato ka go ba ga bona Bakriste, e lego tsela yeo mmuši a ilego a e amogela. Bao ba ilego ba latola go ba ga bona Bakriste ba ile ba hunollwa nakong ya ge go etša ge Pliny a boletše, “ba boeleditše ka morago ga-ka thapelo yeo e direlwago medimo, ba išitše diorelo le beine seswantšhong sa gago [Trajan] . . . gomme go oketša seo, ba rogile Kriste.” Bao ba ilego ba hwetšwa e le Bakriste ba ile ba bolawa. Bakriste ba Peregamo gaešita le ge ba ile ba lebana le kotsi e bjalo, ga se ba ka ba lahla tumelo ya bona. Ba ile ba ‘kgomarela leina la Jesu’ ka ge ba ile ba tšwela pele ba hlompha boemo bja gagwe bjo bo phagamego e le Molwedi wa Jehofa le Moahlodi yo a beilwego. Ba ile ba latela ka go botega dikgatong tša Jesu e le dihlatse tša Mmušo.

5. (a) Ke sebopego sefe sa mehleng yeno se se swanago le borapedi bja go rapelwa ga mmuši seo se baketšego Bakriste ba mehleng ya rena diteko tše šoro? (b) Ke thušo efe yeo Morokami o e neilego Bakriste?

⁵ Jesu ka dinako tše di sa swanego o be a tsebaditše gore Sathane o buša lefase le la mehleng yeno le lebe, eupša ka baka la potego ya Jesu, Sathane o be a se na se a ka mo dirago sona. (Mateo 4:8-11; Johane 14:30) Mehleng ya rena ditšhaba tše matla, kudu-kudu “kxoši ya leboa” le “kxoši ya borwa,” di ile tša lwela go buša lefase. (Daniele 11:40) Moya wa borata-naga o ile wa hlohleletšwa gomme tirelo ya borapedi bja go rapela mmuši e na le seo e swanago le sona sa mehleng yeno e lego leuba la moya wa botšhaba leo le apareditšego lefase. Dihlogo tše di bolelago ka boema-gare ka go Morokami (wa Seisemane) wa November 1, 1939 le ka go Morokami wa June 1, 1980 le wa September 1, 1986 di boletše gabotse thuto ya Beibele ka taba ye gomme tša nea tlhahlo go Bakriste bao ba ratago go sepela leineng la Jehofa le go fenya lefase go etša ge Jesu a dirile seo ka sebete.—Mika 4:1, 3, 5; Johane 16:33; 17:4, 6, 26; 18:36, 37; Ditiro 5:29.

6. Dihlatse tša Jehofa di eme bjang mehleng yeno ka go tia ka go swana le Antipase?

⁶ Keletšo e bjalo e bile yeo e bego e nyakega kudu. Dihlatse tša Jehofa tšeo e lego batlotšwa gotee le bagwera ba bona ge ba lebane le moya wa borata-naga wa go hloka tlhaologanyo, ba ile ba swanelwa ke go ema ba tiile tumelong. Bana ba makgolo le barutiši United States ba ile ba rakwa dikolong ka baka la ge ba ile ba se ke ba dumediša folaga ya setšhaba, ge Dihlatse Jeremane di be di tlaišwa o šoro ka baka la go gana go dumediša swastika (folaga ya Jeremane). Bjalo ka ge go šetše go lemogilwe, Manazi a Hitler a ile a bolaya bahlanka ba botegago ba Jehofa ba dikete-kete ka gobane ba be ba gana go ba le karolo borapeding bjo bo bjalo bja diswantšho bja setšhaba. Nywageng ya bo-1930, nakong ya ge borapedi bja Shinto bja go rapela mmuši bo be bo atile kua Japane, badiredi ba babedi ba babulamadibogo ba ile ba bjala peu e ntši ya Mmušo Taiwan yeo e bego e dulwa ke Majapane. Babuši ba tša bohlabani ba ile ba ba lahlela kgolegong moo yo mongwe wa bona a ilego a hwa ka baka la tshwaro e sehlogo. Yo mongwe o ile a hunollwa ka morago e le feela gore a tle a thunywe mokokotlong, a ba Antipase wa mehleng yeno. Go fihlela le lehono le, go na le dinaga tšeo go tšona go rapelwa ga dika tša botšhaba le go ineela ka mo go feletšego Mmušong go gapeletšwago. Dihlatse tše dintši tše e lego bafsa di golegilwe gomme ba bantši ba bolailwe, ka baka la go ema ga bona ba tiile e le Bakriste bao ba sa tšeego lehlakore. Ge e ba o le mofsa yo a lebanego le dikganetšo tše bjalo, gona ithute Lentšu la Modimo ka mehla e le gore o tle o be le “tumelo e phedišago moya,” o e-na le tebelelo ya bophelo bjo bo sa felego.—Baheberu 10:39–11:1; Mateo 10:28-31.

7. Bana ba kua India ba ile ba lebana bjang le dikgang tša borapedi bja botšhaba, gomme ka mafelelo afe?

⁷ Bana dikolong ba lebane le dikgang tše di swanago. Seleteng sa Kerala, India ka 1985, bana ba bararo ba banyenyane ba Dihlatse tša Jehofa ba ile ba gana go kwanantšha tumelo ya bona yeo e theilwego Beibeleng gomme ba gana go opela kopelo ya setšhaba. Ba ile ba ema ka mokgwa wa go hlompha nakong ya ge ba bangwe ba opela, eupša lega go le bjalo ba ile ba rakwa sekolong. Tatago bona o ile a iša taba ye Kgorong e Phagamego ya India moo baahlodi ba babedi ka go kwela bana bohloko, ba ilego ba bolela ka sebete gore: “Setlogo sa rena se ruta kgotlelelo; filosofi ya rena e ruta kgotlelelo; molao wa rena o diriša kgotlelelo; anke re se ke ra o senya.” Ditaba tše di ilego tša ngwalwa dikuranteng le dipego tše botse tša barulaganyi ba ditaba tša mabapi le molato wo di ile tša tsebiša setšhaba ka moka, seo ka nako yeo se bego se bopša ke mo e ka bago karolo ya bohlano ya baagi ba lefase, gore go na le Bakriste nageng yeo bao ba rapelago Modimo wa therešo, Jehofa, le gore ba ba kgomarela melao ya motheo ya Beibele ka go botega.

Ditutuetšo tše di Senyago

8. Jesu o hwetša e le mo go swanetšego go sola Bakriste ba Peregamo ka eng?

⁸ Ee, Bakriste ba Peregamo ke babotegi. Jesu o re: “Lega go le bjalo, ke na le dilo tše sego kae tše ke di solago go wena.” Ba be ba dirile’ng seo se bego se ba bakela gore ba solwe? Jesu o a re botša: “Gore moo o na le bao ba kgomaretšego thuto ya Bileama yo a ilego a thoma go ruta Balaka go bea tšhitišo pele ga bana ba Isiraele le gore ba je dilo tše di hlabetšwego medimo ya diswantšho le go otswa.”—Kutollo 2:14.

9. Bileama e be e le mang, gomme keletšo ya gagwe e ile ya bea “tšhitišo pele ga bana ba Isiraele” bjang?

⁹ Kgoši Balaka wa Moaba mehleng ya Moše o ile a thwala Bileama, moporofeta yo e bego e se Moisiraele yo a bego a tseba se sengwe ka ditsela tša Jehofa gore a roge Baisiraele. Jehofa o ile a thibela Bileama gomme a mo gapeletša gore a bolele ditšhegofatšo go Baisiraele, gomme a bolele madimabe go manaba a bona. Bileama o ile a kokobetša bogale bja Balaka bjo bo bakilwego ke seo ka go šišinya gore go dirwe tlhaselo e nngwe yeo e sa lemogegego kudu: Anke basadi ba Moaba ba gogele banna ba Isiraele bootsweng bjo bo gobogilego le borapeding bja medimo ya diswantšho bja Baali-Peoro modimo wa maaka! Maano a a ile a atlega. Bogale bjo bo lokilego bja Jehofa bo ile bja tuka ka ge a ile a romela kotlo yeo e ilego ya bolaya ba 24 000 ba diotswa tšeo tša Baisiraele, gomme e bile kotlo yeo e ilego ya fela feela nakong ya ge moperisita Finease a gata mogato o lebanego ka go fediša bobe Isiraeleng.—Numeri 24:10, 11; 25:1-3, 6-9; 31:16.

10. Ke dilo dife tšeo di kgopišago tšeo di bego di šetše di šwahletše phuthego ya Peregamo, gomme ke ka baka la’ng mo gongwe Bakriste bao ba be ba nagana gore Modimo o tla hlokomologa diphošo tša bona?

¹⁰ Bjale, na go na le dikgopišo tše di swanago Peregamo mehleng ya Johane? Di gona! Bootswa le borapedi bja medimo ya diswantšho bo šwahletše phuthego. Bakriste bao ga se ba kwa ditemošo tša Modimo tše di neilwego ka moapostola Paulo. (1 Bakorinthe 10:6-11) Ka ge ba kgotleletše tlaišo, mo gongwe ba nagana gore Jehofa o tla hlokomologa diphošo tša bona tša boitshwaro bja botona le botshadi. Ka gona Jesu o bolela molaleng gore ba swanetše go furalela bobe bjo bo bjalo.

11. (a) Bakriste ba swanetše go itiša malebana le eng, gomme ke kgopolo ya mohuta ofe yeo ba swanetšego go e phema? (b) Ke ba bakae bao ba kgaotšwego phuthegong ya Bokriste ka nywaga e mentši, gomme gantši e le ka lebaka lefe?

¹¹ Bakriste ka mokgwa o swanago lehono, ba swanetše go itiša malebana le go “[fetola] botho bjo bo sa swanelago bja Modimo wa rena ba bo dira lebaka la boitshwarelelo bakeng sa boitshwaro bjo bo hlephilego.” (Juda 4) Re tlamegile go hloya bobe gomme re ‘tule mebele ya rena’ e le gore re tle re phegelele tsela ya boitshwaro bja Bokriste. (1 Bakorinthe 9:27; Psalme 97:10; Baroma 8:6) Le ka mohla re se ke ra nagana gore go fišega tirelong ya Modimo le go botega tlase ga tlaišo go re nea tumelelo ya go itahlela boitshwarong bjo bo gobogilego bja botona le botshadi. Badiri ba bobe bao ka nywaga e mentši ba kgaotšwego phuthegong ya Bokriste ya lefase ka bophara bao gantši e bilego ka baka la bootswa, ba balwa ka masome a dikete. Nywageng e mengwe go bile le ba bantši kudu go feta le bao ba ilego ba bolawa Isiraeleng ya kgale ka baka la Baali-Peoro. Eka re ka itiša, e le gore le ka mohla re se ke ra wela sehlopheng seo!—Baroma 11:20; 1 Bakorinthe 10:12.

12. Go etša ge go be go le bjalo go bahlanka ba Modimo mehleng ya pele, ke melao efe ya motheo yeo e dirišwago go Bakriste lehono?

¹² Jesu le gona o sola Bakriste ba Peregamo ka baka la ‘go ja dilo tšeo di hlabetšwego medimo ya diswantšho.’ Se se be se tla akaretša’ng? Ka baka la mantšu a Paulo go Bakorinthe, mo gongwe ba bangwe ba be ba diriša tokologo ya bona ya Bokriste gampe gomme ba kgopiša matswalo a ba bangwe ka boomo. Lega go le bjalo, mo gongwe ba be ba e-ba le karolo ka tsela e itšego ditirelong tša kgonthe tša borapedi bja medimo ya diswantšho. (1 Bakorinthe 8:4-13; 10:25-30) Bakriste ba botegago lehono ba swanetše go bontšha lerato leo e sego la boithati ge ba diriša tokologo ya bona ya Bokriste, gomme ba hlokomele gore ba se ke ba kgopiša ba bangwe. Ge e le gabotse, ba swanetše go phema mekgwa ya mehleng yeno ya go rapela diswantšho yeo e swanago le go rapela dinaletšana tša thelebišene, dipaesekopo le dipapadi, goba go dira tšhelete gaešita le ka dimpa tša bona ka noši modimo!—Mateo 6:24; Bafilipi 1:9, 10; 3:17-19.

Phemang go Ikaga Dihlotswana!

13. Ke mantšu afe a tsholo ao Jesu a a neago Bakriste ba Peregamo, gomme ke ka baka la’ng phuthego e be e swanetšwe ke ona?

¹³ Jesu o tšwela pele go sola Bakriste ba Peregamo ka gore: “Le gona, o bile o na le bao ba kgomaretšego thuto ya sehlotswana sa Nikolase.” (Kutollo 2:15) Jesu pele ga mo o be a ile a reta Baefeso ka go hloya ga bona ditiro tša sehlotswana se. Eupša Bakriste ba Peregamo ba be ba swanetšwe ke go eletšwa mabapi le go dira gore phuthego e se ke ya ikaga dihlotswana. Go nyakega go tia e le ka kgonthe gore go kgomarelwe ditekanyetšo tša Bokriste, e le gore botee bjoo Jesu a bo rapeletšego go Johane 17:20-23 bo ka kgomarelwa. Go nyakega gore ‘go eletšwe ka thuto e phelago le go sola bao ba ganetšago.’—Tito 1:9.

14. (a) Phuthego ya Bokriste go tloga mehleng ya pele e be e swanetše go lwa le bomang, gomme moapostola Paulo o ile a ba hlalosa bjang? (b) Ke mantšu afe a Jesu ao a swanetšego go kwewa ke mang le mang yo a ka bago a e-na le tshekamelo ya go latela sehlopha seo se ikarolago?

¹⁴ Phuthego ya Bokriste go tloga mehleng ya pele e ile ya swanelwa ke go lwa le bahlanogi ba baikgogomoši, bao ka dipolelo tša boreledi le tša bofora “ba bakago dikarogano, le maemo a bakelago kgopišo ka go fapana le thuto” yeo e newago ka mokero wa Jehofa. (Baroma 16:17, 18) Moapostola Paulo o lemošitše ka kotsi ye mo e ka bago mangwalong a gagwe ka moka.a Mehleng ye, ge Jesu a bušeditše phuthego ya therešo tlhwekong ya yona le boteeng bja yona bja Bokriste, kotsi ya go ikaga dihlotswana e sa dutše e le gona. Ka gona, mang le mang yo a ka ratago go latela sehlopha seo se ikarolago, ka gore se ipopa sehlotswana sa bokgelogi, o swanetše go kwa mantšu a latelago a Jesu: “Ka gona, itshole. Ge e ba o sa dire bjalo, gona ke tla go wena ka pela, gomme ke tla lwa le bona ka tšhoša e telele ya molomo wa-ka.”—Kutollo 2:16.

15. Go ikaga dihlotswana go thoma bjang?

¹⁵ Go ikaga dihlotswana go thoma bjang? Mo gongwe yo a itirilego morutiši a ka bjala dipelaelo gomme a ganetša ditherešo tše dingwe tša Beibele (tšeo di swanago le go ba ga rena mehleng ya bofelo), moo sehlopha se ipopilego se ikarolago gomme sa mo latela. (2 Timotheo 3:1; 2 Petro 3:3, 4) Goba motho yo mongwe a ka sola tsela yeo Jehofa a dirago modiro wa gagwe ka yona gomme a ipiletša moyeng wa go ipabalela, ka go bolela gore go ya ka ntlo le ntlo ka molaetša wa Mmušo ga se mo e lego ga Mangwalo goba mo go nyakegago. Go ba le karolo tirelong e bjalo ka go latela mohlala wa Jesu le baapostola ba gagwe go be go tla dira batho ba gore e be bao ba ikokobeditšego; fela ba kgetha go ikarola le go ipabalela, gomme mo gongwe ba ka bala Beibele feela ka dinako tše dingwe e le sehlopha seo se lego ka thoko. (Mateo 10:7, 11-13; Ditiro 5:42; 20:20, 21) Batho ba bjalo ba ikakanyetša dikgopolo tša bona ge e le ka Segopotšo sa lehu la Jesu, taelo ya Mangwalo ya go ila madi, go binwa ga matšatši a maikhutšo le go dirišwa ga motšoko. Go feta mo, ba nyenyefatša leina la Jehofa; ba boela gatee-tee ditseleng tša go dumelela dilo tšohle tša Babilona o Mogolo. Se sebe kudu, ba bangwe ba tutuetšwa ke Sathane gore ba tsogele le go ‘itia bahlanka-gotee le bona,’ e lego bao e kilego ya ba bana babo bona.—Mateo 24:49; Ditiro 15:29; Kutollo 17:5.

16. (a) Ke ka baka la’ng bao ba teka-tekago ka baka la tutuetšo ya bahlanogi ba swanetše go akgofela go itshola? (b) Go tla direga’ng go bao ba ganago go itshola?

¹⁶ Mang le mang yo a teka-tekago ka baka la tutuetšo ya bahlanogi o swanetše go akgofela go kwa mokgoši wa Jesu wa gore a itshole! Phora-foretšo ya bahlanogi e swanetše go ganwa ka ge e le mpholo! Motheo wa yona ke lehufa le lehloyo, ka go fapana le toko, tlhweko le ditherešo tše di rategago tšeo Jesu a fepago phuthego ya gagwe ka tšona. (Luka 12:42; Bafilipi 1:15, 16; 4:8, 9) Ge e le mabapi le bao ba ganago go itshola, Morena Jesu o “lwa le bona ka tšhoša e telele ya molomo [wa gagwe].” O hlokola batho ba gagwe e le gore a tle a lote botee bjoo a bo rapeletšego mantšiboeng a gagwe a mafelelo le barutiwa ba gagwe lefaseng. (Johane 17:20-23, 26) Ka ge bahlanogi ba gana keletšo e lerato le thušo e newago ke dinaledi tše di lego ka seatleng sa gagwe se setona, gona Jesu o a ba ahlola le go ba otla “o šoro kudu-kudu,” gomme o ba kgorometša “lefsifsing ka ntle.” Ba a kgaolwa gomme ga ba sa hlwa ba dira e le komelo gare ga batho ba Modimo.—Mateo 24:48-51; 25:30; 1 Bakorinthe 5:6, 9, 13; Kutollo 1:16.

‘Manna a Utilwego le Lefsikana le Lešweu’

17. Ke moputso ofe wo o letetšego Bakriste ba tloditšwego bao ba “fenyago,” gomme ke’ng seo Bakriste ba Peregamo ba ilego ba swanela go se fenya?

¹⁷ Moputso o mogolo o letetše batho ka moka bao ba kwago keletšo ya Jesu yeo e neilwego ka tlhahlo ya moya o mokgethwa wa Jehofa. Theetša! “Yo a nago le tsebe a kwe seo moya o se botšago diphuthego: Yo a fenyago ke tla mo nea a mangwe a manna a utilwego, ke tla mo nea lefsikana le lešweu leo go lona go ngwadilwego leina le lefsa leo go se nago yo a le tsebago, ge e se feela yo a le amogelago.” (Kutollo 2:17) Ka gona, Bakriste ba Peregamo ka go swana le Bakriste ba Simirina, ba kgothaletšwa go ‘fenya.’ Bao ba lego Peregamo mo go lego sedulo sa bogoši sa Sathane ba swanetše go furalela borapedi bja medimo ya diswantšho, ge e ba ba rata go atlega. Ba swanetše go fenya boitshwaro bjo bo gobogilego, go ikaga dihlotswana, bohlanogi bjo bo kgokaganego le Balaka, Bileama le thuto ya sehlotswana sa bokgelogi sa Nikolase. Ka go dira bjalo, Bakriste bao ba tloditšwego, ba tla laletšwa go ja “manna a utilwego.” Se se bolela’ng?

18, 19. (a) Manna ao Jehofa a ilego a a nea Baisiraele ke’ng? (b) Manna ao a bego a utilwe ke’ng? (c) Ke’ng seo se swantšhetšwago ke go ja manna a utilwego?

¹⁸ Jehofa mehleng ya Moše o ile a nea manna gore a fepe Baisiraele nakong ya ge ba le leetong la bona la lešokeng. Manna ao a be a se a utwa ka gobane mesong e mengwe le e mengwe ka ntle le ka Sabatha, a be a tšwelela ka mohlolo go swana le šobane yeo e welego lefaseng. E be e le tokišetšo ya Modimo ya go dira gore Baisiraele ba phele. Jehofa o ile a laela Moše gore a boloke “boxôbê” bjo ka pitšaneng ya gauta e lego arekeng e kgethwa ya kgwerano gore e be segopotšo go “ditloxolo tša [Baisiraele].”—Ekisodo 16:14, 15, 23, 26, 33; Baheberu 9:3, 4.

¹⁹ A go swantšhetšwa mo go swanetšego gakaakang! Manna a a ile a utwa Sekgethwa-kgethweng sa tabarenakele moo seetša sa mohlolo seo se bego se apešitše sekhurumelo sa Areka, se bego se swantšhetša go ba gona ga Jehofa. (Ekisodo 26:34) Ga go na motho yo a bego a dumelelwa go tsena lefelong leo le lekgethwa, e le gore a je manna a utilwego. Lega go le bjalo, Jesu o boletše gore balatedi ba gagwe ba tloditšwego bao ba fenyago ba tla ja “manna a utilwego.” Ka go swana le Kriste yo a bilego pele ga bona, ba tla tsena ‘e sego lefelong le lekgethwa leo le dirilwego ka diatla, leo e lego seswantšho sa selo sa kgonthe, eupša ba tsena legodimong.’ (Baheberu 9:12, 24) Ba apara go se bole le go se hwe tsogong ya bona, e lego tokišetšo e makatšago ya Jehofa yeo e swantšheditšwego ke go newa ga bona “manna a utilwego” ao a sa bolego. Sehlotswana seo se senyenyane sa bafenyi se šegofaditšwe gakaakang!—1 Bakorinthe 15:53-57.

20, 21. (a) Ke’ng seo se swantšhetšwago ke go newa ga Bakriste ba tloditšwego lefsikana le lešweu? (b) Ka ge go e-na le mafsikana a mašweu a 144 000 feela, ruri ke kholofelo efe yeo lešaba le legolo le nago le yona?

²⁰ Ba ba amogela le ka “lefsikana le lešweu.” Dikgorong tša Roma go be go dirišwa mafsikana a ge go dirwa kahlolo.b Lefsikana le lešweu le be le bolela go hunollwa molatong, ge lefsikana le leso gantši le be le bolela go ahlolelwa lehu. Go nea ga Jesu Bakriste ba Peregamo “lefsikana le lešweu” go be go tla bolela gore o ba ahlola e le bao ba se nago molato le go ba ba hlwekilego. Eupša mantšu a Jesu mo gongwe a ka ba le se sengwe seo a se bolelago. Mehleng ya Roma mafsikana a gape a be a dirišwa go swana le dithekethe tša go dumelelwa go tsena ditiragalong tše bohlokwa. Ka gona, lefsikana le lešweu le be le ka bolela selo se sengwe seo e bego e le se se kgethegilego kudu go Mokriste yo a tloditšwego yo a fenyago, e lego go amogelwa ga gagwe lefelong le le hlomphegago legodimong lenyalong la Kwana. Ke feela mafsikana a bjalo a 144 000 ao a newago.—Kutollo 14:1; 19:7-9.

²¹ Na se se bolela gore o tlogetšwe o sa elwe hloko ge e ba o le yo mongwe wa lešaba le legolo la barapedi bao e lego bagwera ba batlotšwa? Le gatee-tee! Gaešita le ge o sa hwetše lefsikana le lešweu la go amogelwa legodimong, fela ge e ba o kgotlelela, gona o ka phologa masetlapelong a magolo gore o tle o be le karolo modirong o thabišago wa go tsošološa Paradeise lefaseng. Bao ba tlago go ba gotee le wena go se, e tla ba batho ba tsošitšwego ba botegago ba mehleng ya pele ga Bokriste gotee le ba bangwe ba dinku tše dingwe bao ba ka bago ba hwile e sego kgale. Mafelelong, bahu ba bangwe ka moka bao ba lopolotšwego ba tla šegofatšwa ka go tsošetšwa bophelong lefaseng la paradeise.—Psalme 45:16; Johane 10:16; Kutollo 7:9, 14.

22, 23. Ke’ng seo se bolelwago ke leina leo le ngwadilwego lefsikaneng leo le newago Bakriste ba tloditšwego gomme se se swanetše go nea kgothatšo efe?

²² Leina le lefsa leo le ngwadilwego lefsikaneng ke’ng? Leina ke mokgwa wa go šupa motho le go hlaola motho yoo go ba bangwe. Bakriste ba ba tloditšwego ba hwetša lefsikana ka morago ga ge ba feditše tsela ya bona ya lefaseng e le bafenyi. Ka gona, go molaleng gore leina leo le lego lefsikaneng le swanetše go dumelelana le tokelo ya bona ya go ba gotee le Jesu legodimong, e lego boemo bjo bohlokwa kudu bja tirelo ya bogoši bjo bo swanetšego go lebogwa e le ka kgonthe le go thabelwa ke bao feela ba amogelago Mmušo wa legodimo. Ka gona ke leina, goba boemo bjo bo hlaolago, ke “leo go se nago yo a le tsebago, ge e se feela yo a le amogelago.”—Bapiša le Kutollo 3:12.

²³ A tutuetšo e kaakang go sehlopha sa Johane gore se “kwe seo moya o se botšago diphuthego,” gomme se se diriše! Se se kgothatša gakaakang bagwera ba bona, e lego lešaba le legolo gore ba hlankele le bona ka go botega ge ba sa dutše ba thabela bogwera bja bona mo lefaseng, gomme ba be le karolo gotee le bona tabeng ya go tsebatša Mmušo wa Jehofa!

[Mengwalo ya ka tlase]

[Diswantšho go letlakala 43]

Dilo tše tše di hlatselago borapedi bjo bo apareditšego bja boheitene di bontšhitšwe Musiamong wa Peregamo Berlin

[Diswantšho go letlakala 45]

Karolo ya manna e ile ya utwa arekeng ya kgwerano. Go batlotšwa ba fenyago, go newa manna a utilwego a seswantshetšo go bolela gore ba newa go se hwe

Lefsikana le lešweu ke la bao ba amogelwago lenyalong la Kwana