Bokriste, gona o laolwa ke mang? Gomme Modimo o lebelela se bjang?

1 Joh. 2:15; 5:19: “Le se kê la rata lefase le tše lefaseng; xe motho a rata lefase, leratô la Tata-wešo xa le xôna mo xo Yêna.” ‘Lefase ka moka le rapaletše matleng a yo mobe.’

Jak. 4:4: “E a rataxo xo xwêrana le lefase, ó itira lenaba la Modimo.”

Bokgopo

Tlhaloso: Seo e lego se sebe kudu boitshwarong. Gantši se bolela seo se gobatšago, se se šoro goba se se senyago kudu tutuetšong.

Ke ka baka la’ng go e-na le bokgopo bjo bontši gakaakaa?

Modimo ga se yena yo a swanetšego go belaelwa. O neile batho mathomo a phethagetšego, eupja batho ba kgethile go hlokomologa ditaelo tša Modimo gomme ba ikgethela seo e lego se se lokilego le seo e lego se sebe. (Doit. 32:4, 5; Mmo. 7:29; Gen. 3:5, 6) Ka go dira se, ba ipeile ka tlase ga tutuetšo ya matla a mabe a phagametšego motho.—Ba-Ef. 6:11, 12.

1 Joh. 5:19: ‘Lefase ka moka le rapaletše matleng a e mobe.’

Kut. 12:7-12: “Kwa lexodimong xwa tsoxa ntwa . . . Nôxa [ya] lwa e na le Barongwa ba yôna. Nôxa ya se kê ya fenya; xwa se kê xwa hlwa xo e-ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna. . . . Thabang-xê, lena Maxodimo, le ba ba axilexo xôna. Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena a tuka boxale ka kudu; ó tseba xe a sa šaletšwe ke lebakanyana fêla.” (Madimabe a a golago a lefase a tšweletše ga e sa le Sathane a lelekwa legodimong ka morago ga go tswalwa ga Mmušo. Bona Kut 12 temana ya 10.)

2 Tim. 3:1-5: “Tseba xore mehleng ya bofêlô xo tlo tla mabaka a mathata. Batho e tlo ba ba xo ithata, ba mexabaru, ba lenyatšô le baikxoxomoši, le ba maroxa, le ba xo se kwe batswadi, ba xo se leboxe, ba xo se ile selô. E tlo ba ba-hlala-leratô, babata-sekxoro, e tlo ba dihwirihwiri, le ba ba sa tsebexo xo ithswara, manaba a tše boló. E tlo ba baeki, baipuši, baikxanthši ba xo iphsina ba lahlile Modimo. Xe O ba bôna, O tl’o re ba n’e borapedi; anthe matla a byôna xa ba a dumele.” (Tše ke dienywa tša makgolo a nywaga a bohlanogi bja go hlanogela borapedi bja therešo. Maemo a a tšweletše ka gobane batho bao ba ipolelago gore ke ba bodumedi, ba hlokomologile seo Lentšu la Modimo le se bolelago e le ka kgonthe. Ba ipontšhitše e le ba maaka matleng a seo se lokilego, ao boineelo bja therešo bo ka a tšweletšago bophelong bja motho.)

Ke ka baka la’ng Modimo a bo dumeletše?

Ka dinako tše dingwe mo gongwe go rena re ka bona selo se kaone e be e ka ba go fediša batho bohle bao e lego ba babe. Re duma go bona go fedišwa bokgopo, fela re bile go bjona ka nywaga e sego mekae e le ka kgonthe ge e bapišwa le nako yeo bokgopo bo bilego gona ka yona. Jehofa Modimo o swanetše go ba a ikwa bjang? Batho ka dikete-kete tša nywaga ba mmelaetše gomme ba bile ba mo rogile ka baka la maemo a mabe ao ba a kgotleletšego. Lega go le bjalo, a ga a tlišwe ke yena, eupja a tlišwa ke Sathane le ke batho ba babe. Jehofa o na le matla a go senya bobe. Ruri, go swanetše go ba go e-na le mabaka a mabotse a lebaka leo a bontšhitšego kgotlelelo e bjalo. Ge e ba tsela ya Jehofa ya go swara boemo e le yeo e fapanego le seo re bego re ka se dira, gona na seo se swanetše go re makatša? Tsebo ya gagwe ke e kgolo kudu go feta ya motho, gomme kamoo a lebelelago ka gona boemo ke ga tlhaloganyo kudu go phala kamoo motho lege e le ofe a ka dirago ka gona.—Bapiša le Jesaya 55:8, 9; Hesekiele 33:17.

Go be go ka se ke gwa ba le bokgopo, ge nkabe Modimo a be a se a nea dibopiwa tše di hlalefilego khunologo. Eupja Modimo o re neile matla a go kgetha go mo kwa ka gobane re mo rata, goba go kgetha go se mo kwe. (Doit. 30:19, 20; Još. 24:15) Na re duma ge nkabe go be go le ka tsela e nngwe? Ge e ba re le batswadi ruri ke sefe seo se re thabišago kudu, na ke ge bana ba rena ba re kwa ka gobane ba re rata goba ke ge re ba dira gore ba re kwe? Na Modimo o be a swanetše go gapeletša Adama gore a mo kwe? Na ruri re be re tla ba ba thabilego ge e ba re be re phela lefaseng leo go lona re gapeletšwago go kwa Modimo? Modimo pele ga ge a ka senya tshepedišo ye ye mpe, o dumeletše batho sebaka sa gore ba bontšhe ge e ba ba rata e le ka kgonthe go phela ka go dumelelana le melao ya gagwe ya go loka, goba go se dire bjalo. Nakong ya gagwe e beilwego, o tla fediša bobe ka ntle le go palelwa.—2 Ba-Thes. 1:9, 10.

O dumelela ka bohlale nako ya go lokiša dikgang tše dikgolo: (1) Go loka le tshwanelo ya pušo ya Jehofa di ile tša ganetšwa kua Edene. (Gen. 2:16, 17; 3:1-5) (2) Potego ya bahlanka ba Modimo ka moka legodimong le lefaseng e ile ya belaelwa. (Jobo 1:6-11; 2:1-5; Luka 22:31) Modimo o be a ka senya bahlanogi (Sathane, Adama le Efa) gatee-tee, eupja seo se be se ka se ke sa dira gore ditaba di lokišwe. Mo gongwe se be se ka se ke sa bontšha gore tsela ya gagwe ke e lokilego. Dikgang tše di bego di tšweleditšwe e be e le tša boitshwaro. Go dumelela ga Modimo nako e be e se go hlatsela ntlha lege e le efe go yena, eupja e be e le go dumelela dibopiwa ka moka tšeo di hunologilego gore di iponele ka noši dienywa tše dibe tšeo di bego di tšweleditšwe ke bohlanogi bjo bo dirilwego malebana le pušo ya gagwe, le gona e be e le go di nea sebaka sa gore di bontšhe moo di emego gona ge e le ka ditaba tše tše bohlokwa. Ge dikgang tše di lokišitšwe, ruri le ka mohla go ka se sa ba le motho yo a dumelelwago go šuhla khutšo. Taolo e botse, kwano le boiketlo bja legohle ka moka di ithekgile ka go kgethwa ga leina la Jehofa, go hlomphiwa ga gagwe ka tlhompho e tšwago pelong ke dibopiwa ka moka tše bohlale. (Bona gape le matlakala 391, 392, tlase ga hlogo ya ditaba ya “Sathane Diabolo.”)

Seswantšho: Ge e ba motho o mongwe a go bea molato pele ga setšhaba ka moka gore o diriša ka phošo boemo bja gago o le hlogo ya lapa, le gore bana ba gago ba be ba ka phela gabotse ge e ba ba be ba ka itirela diphetho ka ntle le go ithekga ka wena le gore ka moka ga bona ba go kwa e sego ka baka la lerato, eupja ka baka la mehola ya dilo tše di bonagalago tšeo o ba neago tšona, gona tsela e kaone ya go lokiša ditaba e be e ka ba efe? Na go thunya mmegi yo wa maaka go be go tla dira gore melato e lokišwe megopolong ya setšhaba? Go e na le moo, a karabo e botse gakaakang yeo e bego e tla ba yona ge e ba o be o ka nea bana ba gago sebaka sa gore e be dihlatse tša gago ka go bontšha gore o hlogo ya lapa e lokilego le ya lerato, le gore ba dula le wena ka gobane ba go rata! Ge e ba ba bangwe ba bana ba gago ba dumela lenaba la gago gomme ba tlogela legae, ba senya maphelo a bona ka go phela ka ditsela tše dingwe, gona se se be se tla dira feela gore bahlokomedi ba botegago ba lemoge gore bana ba be ba tla phela kaone ge e ba ba be ba ile ba kwa tlhahlo ya gago.

Na rena ka tsela lege e le efe re hotšwe ke go dumelela ga Modimo bokgopo go fihlela mo nakong ye?

2 Pet. 3:9: “[Jehofa] xa a diexiše tše a di boletšexo a re di tlo tla, bo-ka ba bangwê xe ba re ke xo diexiša; sa xaxwe ké xo se Le fêlêlê pelo, xobane xa a rate xe xo na le ba ba lahlêxaxo; ó rata xe bohle ba ka fihlêla thsokoloxô.” (Ka baka la ge go se fele pelo ga gagwe go bontšhitšwe go fihlela mo mehleng ya rena, gona re na le sebaka sa go bontšha gore re a sokologa le gore go e na le go itirela diphetho tšeo e lego tša rena ge e le ka seo e lego se se botse le se sebe, ruri re rata go ikokobeletša pušo ya Jehofa ya go loka.)

Ba-Roma 9:14-24: “Byalo re tlo re’ng? A ke xo re mo xo Modimo xo na le xo se loke?—Xa xo byalo. . . . Byale, xe Modimo a ratile xo bônaxatša boxale bya xaxwe le xo tsebatša matla a xaxwe, ké xore dibya tšeo tša xo bônaxatša boxale ka tšôna, tšeo di diretšwexo xo senyêxa [ke gore o kgotleletše go ba gona ga batho ba babe ka nako e itšego], ó di neneketša ka pelo-telele. A xa se xore a bônaxatšê lehumô la letaxô la xaxwe ka dibya tšeo tša xo bônaxatša kxauxêlô, tše a di lokišeditšexo xo tlo išwa letaxong? [ke gore o be a tla diriša nako go bontšha kgaugelo bathong ba bangwe, ka go dumelelana le morero wa gagwe] Ké bo-rena bao, ba re biditšwexo ke Yêna; a se bitše Ba-Juda fêla, a bitša le ba-ntlê.” (Ka gona, Modimo o ile a široša tshenyego ya ba babe e le gore a tle a dumelele nako ya go kgetha batho bao a bego a tla ba tagafatša gotee le Kriste e le ditho tša Mmušo wa legodimo. Na go dira ga Modimo seo e bile mo go gobatšago motho o mongwe? Aowa; ke karolo ya thulaganyo ya Jehofa ya go šegofatša batho ba mehuta yohle bao ba tlago go šegofatšwa ka sebaka sa go phela ka mo go sa felego lefaseng la paradeise. Bapiša le Psalme 37:10, 11.)

Ge e ba o Mongwe a Bolela Gore

‘Ke ka baka la’ng Modimo a dumeletše bokgopo bjo bo bjalo?’

Mo gongwe o ka araba ka gore: ‘Potšišo ya gago ke e botse. Bahlanka ba bantši ba botegago ba Modimo ba ile ba tshwenywa ke bokgopo bjo bo bego bo ba dikologile. (Habak. 1:3, 13)’ Mo gongwe o ka oketša ka gore: (1) ‘Ga se ka baka la go se ele hloko lege e le gofe ka lehlakoreng la Modimo. O re kgonthišetša gore o beile nako yeo ka yona a tlago go fediša bobe. (Habak. 2:3)’ (2) ‘Eupja ke’ng seo se nyakegago ka lehlakoreng la rena, ge e ba re tla ba gare ga baphologi ge nako yeo e fihla? (Habak. 2:4b; Tsef. 2:3)’

Goba o ka re: ‘Ke thabišwa ke ge o botšišitše potšišo yeo. Ke e nngwe yeo e tshwenyago batho ba bantši ba dipelo tše di botegago. Mo ke na le tsebišo e holago kudu yeo e arabago potšišo ya gago. (Gona balang gotee tsebišo e nngwe ye e lego matlakaleng 92, 93.)’

‘Ka morago ga nywaga ye ka moka, ruri ga ke dumele gore Modimo o tla dira se sengwe go fetola ditaba’

Mo gongwe o ka araba ka gore: ‘Ke thabišwa ke go kwa gore o dumela Modimo. Ruri ke therešo gore go na le bokgopo bjo bontši, gomme bo thomile kgale kudu pele ga mehla ya rena. Eupja na o kile wa ela hloko se . . . ? (Diriša dintlha tše di lego serapeng sa 1 letlakaleng la 92, mabapi le botelele bja nako yeo Modimo a bo kgotleletšego ka yona.)’

Goba o ka re: ‘Ke holofela gore o tla dumelelana le nna ge ke bolela gore motho yo a kgonago go aga ntlo, ruri o kgona le go e hlwekiša. . . . Ka ge Modimo a bopile lefase, gona e ka se ke ya ba taba e thata go yena go le hlwekiša. Ke ka baka la’ng a letile ka nako e telele gakaakaa? Ke hwetša karabo ye e le yeo e kgotsofatšago kudu. Mpotše seo o se naganago. (Balang gotee taba e lego matlakaleng 92, 93.)’

Bonoge

Tlhaloso: Tumelo ya gore karolo ya moya ya batho e phologa lehu la mmele wa nama, gomme e ka kgona go boledišana le ba ba phelago gantši ka motho yo a dirago e le senoge. Batho ba bangwe ba dumela gore dilo ka moka tše di dirilwego le dilo tše dikgolo tša tlhago di na le meoya yeo e dulago go tšona. Boloi ke go dirišwa ga matla ao go dumelwago gore a tšwa meoyeng e