Go Aga Ditswalano Tša Kgaufsi Tša Lapa
1 Batswadi ka ge ba e-na le dilo tše dintši gakaakaa tšeo di nyakago nako ya bona, ba lebeletšana le teko ya go aga lapa leo le tiilego borapeding bja therešo. Malapa a Bakriste a nyaka tlemo ya kgaufsi yeo e neago thekgo mehleng e thata ya bjale. (Mmo. 4:9-12; 2 Tim. 3:1-5) Ge boemo bja moya bo gola, lapa e ba leo le kopanego kudu gomme le tla matlafaletšwa go kgotlelela ditlhaselo tša Sathane le tshepedišo ya gagwe.
GO AGA DIKA TŠA MOYA
2 Diboka tša phuthego le thuto ya lapa ya Beibele di a nyakega thulaganyong ya lapa ya beke le beke. (Doit. 6:6, 7; Ba-Heb. 10:23-25; wSE86 11/1 matl. 23-5) Eupja, go nyakega go gontši. Go sa dutše go sa hole ge e ba se e le tlwaetšo feela ya moya yeo bana ba e hwetšago.
3 Tswalano e botse ya lapa e tšwelela ge batswadi ba e-na le kgahlego ya kgonthe katlegong ya moya ya bana ba bona. Isiraeleng, batswadi ba be ba ikarabela ka thuto le tlwaetšo ya bana ba bona, ba ba ruta bobedi ka mantšu le ka mohlala. Lenaneo la thuto la ba-Isiraele le be le akaretša tlwaetšo e holago ya bophelo bja batho ba bagolo, go ruta bokgoni bja motheo bja go bala le go ngwala le thuto ya go tšweletša dika tša moya. Tabeng ya go ruta bana, go be go gatelelwa go ba ruta go boifa Jehofa, Molao, go hlompha batswadi le batho ba bagolo le bohlokwa bja go kwa.
4 Katanela go fetša nako e bohlokwa le lapa la gago letšatšing le lengwe le le lengwe. Go ka boledišanwa ka ditaba tša moya boemong bjo bo sa rulaganyetšwago, go swana le nakong ya dijo. Motswadi o mongwe o ile a bolela ka bohlale gore: “Batswadi ba tla fetša nako le bana ba bona—e ka ba go tšweletšeng dika tša moya goba go ba thušeng go tšwa mathateng a latelanago.” Ke mo gokaone gakaakang go aga dika tšeo di nyakegago tša moya baneng e le gore ba kgone go phema mereo ya lefase!—1 Ba-Kor. 3:10-15.
GO THABELA MODIRO WA TIRELO YA TŠHEMO
5 Lethabo ke maikwelo ao a tsošwago ke go fihlelelwa goba tebelelo ya se sebotse. Ge motho a itokišeditše tirelo ya tšhemo, a ka fagahlela ka mo go swanetšego mafelelo a mabotse. Ka gona, go lokišetša ke senotlelo sa tirelo e thabišago ya tšhemo. Go itlwaetša ka mehla seo se ka bolelwago le le lapa pele le e-ya tirelong ya tšhemo go aga kgodišego. (Bapiša le Tito 3:1b.) O mongwe le o mongwe a ka ipeela pakane. Thero e bonolo e ka boeletšwa le bana ba banyenyane goba bao ba sa tšwago go thoma tirelong ya tšhemo.
6 Ka go šoma le bana ba bona bodireding bja Bokriste, batswadi ba ka ba thuša go hlagolela kgahlego ya motho ka noši ya go kgahlegela batho yeo Jehofa le Jesu ba nago le yona. Gape bodiredi bo re thuša go hlagolela tswalano ya kgaufsi le Jehofa. (wSE82 6/1 matl. 25-30) Malapa a mangwe a rulaganyetša go fetša letšatši ka moka gotee, a beakanyetša boitapološo bjo bobotse ka morago ga tirelo ya tšhemo. Se se dumelela nako ya poledišano tikologong ya boiketlo gomme e kopanya bana le batswadi.
7 Ikemišetšeng go hlagolela bokgoni bjo bo nyakegago bja poledišano gore le kgomarele tswalano ya kgaufsi le bana ba lena. Le se ke la dumelela selo lege e le sefe se le thibela go tšea nako e nyakegago le matlafatša lapa la lena moyeng. Go rapeleleng gotee le bana ba lena, le tseba gore Jehofa a ka atlegiša boiteko bja lena bja go aga.—Ps. 127:1; Die. 24:3.