Fihlelelang Dipelo Ka Dithuto Tše Di Atlegago Tša Beibele
1 Jesu o be a thabela go dira thato ya Tatagwe, le gona o be a kgahlišwa ke go thuša ba bangwe gore le bona ba direle Jehofa. (Ps. 40:8; Mat. 9:37, 38; 11:28-30) Jesu o be a sa kgotsofatšwe ke go fo rola molaetša wa gagwe. Ge e ba re tla atlega go kgothaletšeng ba bangwe gore ba kopanele le rena modirong wa boebangedi, gona re swanetše go fihlelela dipelo tša barutwana ba rena ba Beibele. Se se akaretša se se fetago go swara poledišano ya puku ya dipotšišo le dikarabo. Gore re fihlelele pelo, re swanetše go lokišetša re naganne ka morutwana wa rena.
2 Jesu o bile le kgahlego ya motho ka noši go ba bangwe. O be a ela hloko pono ya bona. O dirišitše diswantšho go nolofatša ditaba tše thata. (Mat., dikgao. 5-7) Jesu ge a be a lemoga mathata ao ba bego ba tla lebeletšana le ona, o be a nea keletšo e swanetšego. (Mar. 9:33-37) Ge batheetši ba gagwe ba be ba palelwa ke go kwešiša thuto ya gagwe di sa tloga fase, o be a swantšha ka go se fele pelo seo a bego a nyaka go se bolela. (Mat. 16:5-12) Kgahlego e tseneletšego ya Jesu ya go kgahlegela ba bangwe e swanetše go re tutueletša go botšiša gore, ‘Ge nkabe ke be ke le morutwana, ke be ke tla swanelwa ke go tseba eng e le gore ke kwešiše gomme ke tutuetšwe ke seo se rutwago?’—Ela hloko 1971 Yearbook, matlakala 246-7.
GATELELA BEIBELE
3 Ge banyalani ba bangwe ba be ba botšišwa ka seo se ba dirilego gore ba arabele kapejana gakaakaa bohlatseng bjo bo neilwego, ba ile ba araba ka gore: “Se be se le ka Beibeleng.” Ee, Lentšu la Modimo le fihlelela dipelo. (Ba-Heb. 4:12) Dira ditšhupetšo go yona ka mehla, o diriše ditemana tšeo di lego dirapeng ka bolokologi. Thuša morutwana go bona lebaka leo ka lona tsela e itšego e lego ya bohlale goba ya bošilo. Bontšhana le yena mabaka mabapi le kamoo go kwa melao ya Modimo go tlago go mo hola ka gona.—Bona Morokami wa March 15, 1985, matlakala 29-30.
4 Bagoeledi ba bantši ba hweditše gore go diriša puku ya Go Boledišana ke mo go holago kudu tabeng ya go gatelela Beibele. Ka mohlala, mong wa ntlo ge a hlahloba letlakala 124, serapa 13 pukung ya Phela ka mo go sa Felego, a ka botšiša lebaka leo ka lona moruti wa gagwe a bolelago gore bana ba hwa ka gobane Modimo a nyaka gore ba be le yena legodimong. Tsheka-tsheko ya taba yeo e lego go letlakala 249 la puku ya Go Boledišana ka tlase ga “Ke ka baka la’ng masea a e-hwa?” e gatelela go thabela ga Jehofa go šireletša thulaganyo ya lapa. Tsebišo e ka kgodiša motho ka lerato la Jehofa go batho.
BOTŠIŠA DIPOTŠIŠO
5 Go diriša dipotšišo ka mo go holago go thušitše Jesu go dira batho gore ba nagane. (Mat. 17:24-27) Dikarabo tša morutwana di ka re thuša go lemoga seo a ithutago sona gotee le dikgopolo tšeo e sego tša mangwalo tšeo a ka bago a sa di kgomaretše. Mohlomongwe morutwana o lwa le mokgwa wa go kgoga. Le ithutile taba yeo e lego go kgaolo 27 ya puku ya Phela ka mo go sa Felego gotee le tsebišo yeo e lego go matlakala 13-16 tokollong ya Awake! ya July 8, 1989. O bona bohlokwa bja go kgaotša. Lega go le bjalo, na o kgodišegile e le ka kgonthe gore o swanetše go o tlogela? Mo gongwe o ka re: “O ikwa bjang ka se? Anke re re o be o swanetše go kgaotša gona bjale eupja ba bangwe ba bagwera ba gago ba go kodutla. O be o tla dira’ng?”
6 Lega go le bjalo, hlokomela. Ka dinako tše dingwe dipotšišo tše bjalo di ka tliša dikarabo tšeo di go makatšago goba go go nyamiša. Ka gona o tla dira’ng? Ge e ba e le taba yeo e ka bakago bothata, gona e ka ba mo gokaone go se gapeletše taba eupja wa re: “Ga bjale a re tšwele pele. Re ka boela go se ka moragonyana.” Goba, “Ee, ke selo seo go ka naganwago ka sona, na ga go bjalo?” (Joh. 16:12) Ge o tseba kamoo morutwana a ikwago ka gona e le ka kgonthe ka taba, o ka lokišeletša tsebišo yeo e ka mo thušago go dira tšwelopele. Re swanetše go katanela go tutuetša pelo ya motho gomme re rapele gore Jehofa a mo thuše go gola moyeng.—1 Ba-Kor. 3:5-9.
7 Ge o swere thuto ya Beibele, ka mehla gopola go tšea nako e lekanego o bontšhana mabaka le morutwana ka taba yeo e ithutwago. Rulaganya mekgwa ya gago ya go ruta gore e swanele dinyakwa tša gagwe tše itšego. Šomela go aga ka pelong ya gagwe lerato le tlhompho tše di tiilego go Jehofa, Beibele le phuthego ya Jehofa. Eka re ka phetha karolo ya rena go thuša ba bangwe go ba barutiwa ba Kriste ka go katanela go swara dithuto tše di atlegago tša Beibele.—Dit. 2:41-46.