Go Gokaganya Matseno A Rena Le Dipuku

1 Ge o lokišetša thero ya gago kgweding ye, mo gongwe o ka thoma ka go nagana ka mathata a magolo ao batho ba lebeletšanego le ona lefelong la gabo lena gomme o kgethe dipolelo tšeo di lego dimakasineng tša morago bjale goba go tšwa pukwaneng yeo e neago tharollo e holago ya Mangwalo.

2 Mafelong a mangwe, batho ba ka ba ba tshwenyegile ka go hlokega ga mediro moo go golago le go hlatloga ga ditheko. Ge o ka hwetša boemo bjo bjalo, o ka bolela bothata ka go lebanya matsenong a gago.

Mo gongwe o ka re:

◼“Re be re dutše re boledišana le baagišani ba rena ka seo se ka dirwago bakeng sa go kgonthiša gore motho o mongwe le o mongwe o ba le modiro le madulo. Na o dumela gore ke mo go kwagalago go letela gore mebušo ya batho e phethe se? [Letela karabo ya mong wa ntlo.] Go na le motho yo a kgonago go rarolla mathata a; ela hloko kholofetšo ya gagwe yeo e neago kholofelo go Jesaya 65:21-23. [Bala.] Mmopi wa rena o dirile gore kholofetšo ye e ngwalwe gore re hwetše kgothatšo, gomme ka moka ga rena re a e nyaka mehleng ye e thata, na ga go bjalo?”—rsSE, letl. 13.

3 Tabeng ye therong ya gago, o ka gokaganya taba yeo e tšwago ka makasineng wa morago bjale goba pukwana. Ge e ba o le modirong wa dimakasine, o ka kgetha ntlha e swanetšego sehlogong se se rego “Kholofelo e Fenya go Itlhoboga!” ka go tokollo ya July 1 ya Morokami. Ge e ba o neela pukwana ya ‘Bonang,’ ke ka baka la’ng o sa bontšhe taba ya madulo le mošomo ka gobane se ka moka se bontšhitšwe letlakaleng la ka pele le la ka morago la pukwana ye. O ka e bula e le gore mong wa ntlo a tle a bone seswantšho ka moka ka nako e tee.

4 Mašemong ao go ona beng ba dintlo ba tshwenyegilego ka dilo tše fapa-fapanego, matseno ao a feto-fetogago kudu le maemo e tla ba a holago. Mo gongwe o ka rata go leka matseno ao a lokeleditšwego ka go puku ya Go Boledišana ka tlase ga “Mmušo.”

O ka re:

◼“Jesu o re rutile gore re rapelele gore Mmušo wa Modimo o tle le gore thato ya Gagwe e dirwe mo lefaseng bjalo ka ge e dirwa legodimong. Na o nagana gore ge thato ya Modimo e dirwa ka mehla mo, na ruri lefase e tla ba paradeise?” Ka morago ga ge mong wa ntlo a arabile, rola Kutollo 21:3-5 gomme o e bale.

Ka morago, ge o neela pukwana ya Mmušo, bala dikarolo tše di kgethilwego tša dirapa tša matseno go letlakala 3. Ela hloko taba e rego: “Ka Mmušo, Modimo go se go ye kae o tla fediša dintwa, tlala, bolwetši le bokebekwa.” Botšiša mong wa ntlo gore ke bofe bja mathata a bjo a bonago eka bo iphile matla kudu.

Ge e ba o neela “Morokami” wa July 15, o ka re:

◼“Batho ba bantši ba rata go dumela gore kholofetšo ye e tla phethagala, eupja ga ba kgonthišege ge e ba Beibele e le tlhahlo e botegago. Ke holofela gore o tla hwetša sehlogo se se se rego, ‘Na Beibele e a Ikganetša?’ e le se se matlafatšago tumelo.”

5 Bafsa le bona ba ka neela molaetša wa Mmušo ka katlego, gaešita le go batho ba bagolo.

Mogoeledi wa mofsa ge a rola Jesaya 65:21-23, a ka re:

◼“Ke a tseba gore ka ge o le motho yo mogolo o na le phihlelo e kgolo bophelong go mpheta, eupja lengwalo le ke leo le kgothatšago go rena ka moka.”

6 Kgonthiša gore o boloka dipego ka moka tša dipuku tšeo di sepedišitšwego, go akaretša le dipukwana tše itšego goba dimakasine tšeo o di sepeditšego. O tla nyaka tsebišo ye ge o boela bakeng sa go hlagolela kgahlego.