Kgothaletša Ba Bangwe Go Iša Mahlo Go Jesu

1 Puku ya Motho yo a Phagamego Kudu yo a Kilego a Phela ke e kgahlišago kudu. Dikgaolo tša yona tše 133 di ka kgothaletša babadi go iša mahlo go Jesu le go ba tutueletša go ekiša mohlala wa gagwe. Go hlalositšwe ka mo go kwalago gore dikgoši ka moka tšeo di kilego tša buša, ge di kopantšwe ga se tša ka tša kgoma bophelo bja motho lefaseng le ka matla gakaakaa go etša ge Jesu a dirile. Bao ba išago mahlo go Jesu ruri ba tla holega.

2 Jesu o rutile barutiwa ba gagwe ka Tatagwe gomme a ekiša dika tša Modimo tše bohlokwa. Dipelo tša rena di a tutueletšega ge re ela hloko bokgoni bjo bogolo bja Jesu e le morutiši, boetapele bja gagwe bja sebete gotee le kwelobohloko ya gagwe e lerato. Ge re gopola ditlaišego tša gagwe ge a be a neela bophelo bja gagwe bakeng sa go re lopolla, re tlala tebogo! Puku ya Motho yo a Phagamego Kudu yo a Kilego a Phela e ka thuša batho go lebelela Jesu ka tsela ye.

3 Lokišetša Gabotse: E-ba yo a itokišitšego gabotse bakeng sa go thoma poledišano ya Beibele yeo e tlago go kgothaletša ba bangwe go iša mahlo go Jesu. Dihlopha tša malapa le ba bangwe ba ka itlwaetša gotee. Katanela go tsoša kgahlego le go tutueletša batho go bala puku ya Motho yo a Phagamego. Go ka tšea dipoledišano tše di fetago e tee le motho go fihlelela se. Moo motho a sa kgonego go lefelela puku goba a gana mpho, mo gongwe o ka rata go sepediša dimakasine tša morago-rago goba wa tlogela pampišana. Ge e ba kgahlego ya mathomo e le e nyenyane, re ka tlogela pampišana goba mohlomongwe pukwana (brochure) goba makasine.

4 Dipoledišano tša rena ka ntlo le ntlo ka December di tla thewa go Jesu gomme tša kgothaletša batho go mo tseba kaone. Ka go bolelela dikgopolo tšeo di hlalositšwego ka pukung ya Motho yo a Phagamego, re ka thuša batho go lebelela Jesu e sego bjalo ka motho wa histori, eupja bjalo ka Morwa wa Modimo le Kgoši e bušago ya mmušo wo o tlago go rarolla mathata ka moka a batho.

5 Go etša ge re gateletše ka go Tirelo ya Rena ya Mmušo kgweding e fetilego, re rata go diriša dipuku tša rena ka bohlale. Ka December, ge batho ba bantši ba nagana ka Jesu, re tla ba le dibaka tše dintši tša go sepediša puku ya Motho yo a Phagamego. Gape re swanetše go phafogela go sepediša puku ge re nea bohlatse bjo bo sa rulaganyetšwago. Anke re nagane ka ditsela tša go nea bohlatse go baeng, meloko, bašomi-gotee le rena le batho bao re gahlanago le bona ge re reka mabenkeleng. Rulaganya e sa le pele o e-na le dipuku tše di lekanego tša Motho yo a Phagamego bakeng sa go di neela modirong wa ntlo le ntlo le bakeng sa ge o nea bohlatse bjo bo sa rulaganyetšwago.

6 Motho o mongwe yo a sa thabelego go bala ka mehla o bontšhitše tebogo ya go leboga puku ya Motho yo a Phagamego, a bolela gore e dirile gore go bala e be mo go thabišago go yena mafelelong. Anke re thušeng ba bangwe gore ba ikwe ka tsela e swanago, re dire boiteko bjohle bja go ba kgothaletša go iša mahlo go Jesu ka go bala puku ya Motho yo a Phagamego Kudu yo a Kilego a Phela ka kgahlego ya kgonthe.