Holwa Ka Mo Go Tletšego Ke Kopano Ya Selete Ya “Thuto Ya Modimo” Ya 1993

1 “Jehofa, o nthute.” (Ps. 86:11, PK) Ye e swanetše go ba kgopelo e tšwago pelong ya mohlanka o mongwe le o mongwe yo a ineetšego wa Modimo. Re ikemišeditše go se kgaotše go ithuta le ka mohla le go se kgaotše go diriša seo re ithutago sona le ka mohla. Ka dinako tše dingwe re swanelwa ke go kgopamollwa gomme go swana le ge go dirile mopsalme, re swanetše go kgopela Modimo gore a kopanye pelo ya rena e le gore e se ke ya arogana. Lenaneo Kopanong ya Selete ya “Thuto ya Modimo” le tla nea tlhahlo e holago le go kgopamolla tšeo re di nyakago gore re hlankele Jehofa ka potego gare ga dikgateletšo tša tshepedišo ye ya dilo.

2 Kopano ya Matšatši a Mane: Lenaneo le tla neelwa mafelong a 19 ao a swanetšego Afrika Borwa le dinageng tša kgaufsi. Go oketša go go ba ka Seisemane, lenaneo ka moka le tla neelwa ka se-Afrikaans, Sepedi, Sepotokisi, Sesotho, se-Tsonga, Setswana, se-Xhosa le se-Zulu, mananeo a mangwe a neelwa ka Segerika le se-Venda. Mafelong a mararo go tla ba le go fetolelwa ka polelo ya diatla, e lego Cape Town, Durban, le Johannesburg. Lenaneo le tla thoma ka Labone ka 1:20 p.m. gomme le tla fela ka Sontaga thapama mo e ka bago ka 4:15 p.m. Dikgoro di tla bulwa kopanong e nngwe le e nngwe ka 7:30 mesong e mengwe le e mengwe. Hle gopolang gore ga go na yo a tlago go dumelelwa go tsena pele ga 7:30 a.m. ka ntle le ge a abetšwe go šoma pele ga nako yeo.

3 Ke eng seo re se boloketšwego? Dijo tše dintši tše di tiilego tša moya tšeo di neelwago ka ditsela tše di fapa-fapanego: dipolelo, dipontšho, dipoledišano le dipapadi tše pedi. O se ke wa lahlegelwa le ke selo sa tlhahlo ye e bohlokwa! Go oketša moo, re lebeletše pele go tsošološa ditlwaelano tša kgale le go dira tše dintši tše difsa. Baromiwa bao ba hlankelago ka tlase ga lekala la Afrika Borwa ba ka ba gona kopanong ya lena. Dirišang ka mo go holago sebaka sa go tsebana le bana ba babo rena le dikgaetšedi ba ba botegago. Ge e ba o le motswadi, akaretša bana ba gago poledišanong. Moya wa lethabo le wa boikgafo wa baromiwa ba o ka thea motheo baneng ba gago gore ba naganišiše ka modiro wa bophelo ka moka wa tirelo ya nako e tletšego.

4 Na o tla Tliša Karolo ya Lesome ka Moka Ngwakong wa Polokelo? Go Maleaki 3:10, Jehofa o ile a holofetša ba-Isiraele gore ge e ba ba be ba rata go mo leka gomme ba tliša karolo ya lesome ka moka ngwakong wa polokelo, o be a tla tšholla tšhegofatšo go fihlela ge go se sa nyakega.

5 Go ba bangwe, go leka Jehofa go tla bolela go ya go mothwadi wa bona kapejana ka mo go kgonegago bakeng sa go kgopela nako ya maikhutšo goba nako ya go se be modirong gore ba be gona kopanong. Ka dinako tše dingwe banababo rena ba ile ba dika-dika go dira se, ba nagana gore mothwadi wa bona a ka se ke a ba dumelela go ya kopanong. Lega go le bjalo, ditabeng tšeo di sa akaretšego dilo tša moya ba ka ba ba e-na le bothata bjo bonyenyane goba ba se na bjona tabeng ya go tsebiša mothwadi wa bona seo ba nyakago go se dira.

6 Re swanetše go ipotšiša gore: Ge e ba mogwera yo a rategago a be a nyala goba a nyalwa lefelong le lengwe, na re be re ka se ye go mothwadi wa rena gomme ra kgopela nako ya go se be gona mošomong gore re ye lenyalong? Ge e ba a be a bonala a dika-dika, na re be re ka se ke ra mo hlalosetša ka tlhompho kamoo go bego go tla ba bohlokwa ka gona go rena ge re ka kgona go ya? Ka kgonthe go rutwa ke Jehofa go bohlokwa kudu go feta go ya lenyalong! Ge e ba re tloga re kgodišegile gore lenaneo la kopano le bohlokwa bakeng sa kgolo ya rena ya moya, go tla ba bonolo go kgodiša mothwadi wa rena gore a re nee nako ya go se be gona mošomong gore re be gona kopanong.—Jak. 1:7, 8.

7 Isiraeleng karolo ya lesome e be e akaretša go thekga lefelo la Jehofa la borapedi ka dilo tše di bonagalago. Mehleng ya rena karolo ya lesome e akaretša nako, matla le ditšhelete tšeo di dirišwago ka go lebanya tirelong ya Jehofa le go thekgeng modiro wa Mmušo. Karolo ya lesome e akaretša nako yeo re e fetšago re le dibokeng, dikopanong tše dinyenyane le dikopanong tše dikgolo gotee le go hlokomeleng le go hlwekišeng mafelo a rena a diboka. Kopano ya Selete ya “Thuto ya Modimo” e tla re nea dibaka tše dintši tša go tliša karolo ya lesome ka moka ngwakong wa polokelo wa Jehofa wa moya. Tše dingwe tša tše ke dife?

8 Re ka tliša karolo ya lesome ka go hlwaya tsebe lenaneong la kopano, ka go tšea karolo ka phišego go opeleng kopelo e nngwe le e nngwe ya Mmušo le ka go theetša thapelo e nngwe le e nngwe ka kelohloko e le gore re kgone go tlaleletša ka amene ya rena e tšwago pelong.

9 Tšwelopele ya rena therešong e ithekgile ka kudu ka tsela yeo re theetšago ka yona. Holong e kgolo goba lepatlelong la dipapadi, go bonolo go fapošwa ke seo ba bangwe ba se dirago go re dikologa, ka baka leo re swanetše go boloka dikgopolo tša rena di tsepame. Kgonthišega gore o tla kopanong o itokišeditše ka mo go feletšego o swere Beibele ya gago, puku ya dikopelo, pene le pampiri ya go ngwalela dintlha le tokollo ya Morokami wo o tlago go balwa bekeng yeo. Ke mo go thušago go ngwala dintlha le ditemana tšeo di dirišwago ke seboledi se sengwe le se sengwe. Ngwala dintlha ka boripana; go ngwala dintlha tše dintši kudu go ka šitiša go tsepamiša kgopolo. Bana le bona ba swanetše go tlwaetšwa go ba batheetši ba hlwayago tsebe. Bana ba ka tliša karolo ya lesome gotee le batswadi ba bona ka go theetša lenaneo ka kelohloko ka mo go kgonegago.

10 Batswadi ba bangwe ba rulaganyetša nako ya go homola ka gae letšatši le lengwe le le lengwe ge bana ba bona ba letetšwe gore ba bale goba ba lebelele diswantšho ka go e nngwe ya dipuku tša Mokgatlo. Tlwaetšo ye e botse e dira gore go be bonolo kudu go bana gore ba kgosele dibokeng le dikopanong. Batswadi bao ba godišitšego bana bao ba beago mohlala ba bolela gore le ka mohla ga ba dumelele bana ba bona go tla le dibapadišwa goba dipuku tša go tsenya mebala dibokeng. Gaešita le bana ba banyenyane kudu ba ka ithuta gore lebaka la go ba gona dibokeng ke go rapela Jehofa. Batswadi bao ba rutago bana ba bona seo se bolelwago ke go tliša ga bona karolo ya lesome ka moka ngwakong wa polokelo ba swanetše go retwa e le ka kgonthe!

11 Gape re ka tliša karolo ya lesome ka go neela nako ya rena le matla go thuša go rulaganyetša kopano. Mafelong a mantši go hlwekiša pele ga kopano go rulaganyetšwa letšatši goba a mabedi pele ga ge kopano e thoma. Ge e ba o dula kgaufsi, ke ka baka la’ng o sa rulaganyetše gore lapa ka moka le tšee karolo? Banababo rena ba bangwe ba ile ba tla le barutwana ba bona ba Beibele bao ba tšwelago pele e le gore ba ba bafsa ba ka ithuta le pele ga ge ba kolobetšwa, seo se akaretšwago tabeng ya go thekga borapedi bja Jehofa. Go na le mo gontši mo go swanetšego go dirwa go kgonthišetša gore kopano e tla atlega. Ke ka baka la’ng le sa ithape le le lapa?

12 Go thekga ga rena kopano ka tša ditšhelete ke tsela e nngwe ya go tliša karolo ya lesome. Ge a hlalosa kamoo dimpho tša dilo tše di bonagalago di bego di swanetše go dirwa ka gona bakeng sa go thekga borapedi bjo bo sekilego, Jehofa o ile a laela setšhaba sa Isiraele gore: “Ba se kê ba bônala pele xa Morêna bà s’a swara selô. Mang le mang a tlê à swere neô ya xaxwe ka mo thšexofatšô ya Morêna Modimo wa xaxo e mo neilexo ka xôna.” (Doit. 16:16, 17) Go sa šetšwe ge e ba batho ba be ba kgona go nea mo gontši goba mo gonyenyane, sebego sa bona seo se bego se lokišeditšwe e sa le pele e be e le se kgahlišago go Jehofa. Ka mo go swanago, banababo rena ba bantši ba naganišiša ka thapelo ka moneelo wo ba tlago go o neela, e ka ba ka tšhelete goba ka tšheke (yeo e lebišitšwego go “Watch Tower Convention”). Na o ke o dumelele bana ba gago ba banyenyane gore ba tsenye moneelo ka lepokising?

13 Thakgang Thuto ya Modimo Mophološi wa Rena: Ka mekgwa ya rena e mebotse le boitshwaro bja rena bjo bobotse, re ka “thakxa thutô ya Modimo Mophološi wa rena [dilong tšohle, NW].” (Tito 2:10) Ka mantšu a mangwe, gona kua kopanong re ka bontšha gore thuto ya Modimo e a dirišwa maphelong a rena.

14 Go thwe’ng ka mekgwa ya rena? Lehono go naganela ba bangwe ke selo sa sewelo lefaseng. Eupja batho ba Jehofa bao ba hlahlwago ke melao ya motheo ya Mangwalo ba naganela e sego tša go hola bona ka noši eupja tša go hola mogagabo bona. (Ba-Fil. 2:4) Re tshwenyegile ka ba bangwe bao re lego gare ga bona. Ga re kgorometšane ge re le methalading ya dijo goba ya dipuku. Re naganela batšofadi le bana ba banyenyane bao ba ka bago ba letile mothalading le batswadi ba bona, bao ba ka kgorometšwago gabonolo ke batho ba bagolo bao ba ka bago ba sa ba bone. Mabenkeleng a go jela re ba ba bonolo le ba botho go bašomi, e sego ba bogale goba bao ba nyakago dilo ka kgapeletšo ge e ba tirelo e se kamoo re bego re letetše ka gona.

15 Boitshwaro bja rena bja go boifa Modimo bo na le tutuetšo ya kgonthe go bao re lego gare ga bona. Motseng o mongwe wa kopano ngwagola, lephodisa leo le bego le bile sehlopheng ka nywaga e 21 le itše: “Ke kgahlišwa ke boitshwaro bja batho ba lena. [Ba] ikgethile; ba topa ditlakala go se na motho yo a ba kgopelago go dira bjalo gomme ke ba ba rulagantšwego. Kopano ya lena e rulagantšwe gabotse.” O okeditše ka gore: “Ge batho ba lena ba re bona, ba a nywanywa. Ke seka se botse. Re nyaka seo. Ke seka sa bogwera gomme ga se sa swanela go utwa. Gape re lemoga kamoo bana ba dulago le batswadi ba bona ka gona gomme ba lailwe gabotse. Ntumeleng, ke kgahlegile. Ke mo go thabišago go abelwa go šoma mo.”

16 Bahlankedi ba bangwe ba mmušo ba ile ba tšea leeto le le kgethegilego la go ya Bethele ya Brooklyn go ya go ba laletša gore ba swarele kopano motseng wa bona. Mokgatlo o ile wa amogela taletšo e botho gomme ditho tša lekgotla la taolo la motse tša se ke tša nyamišwa. Mothuša-molaodi wa motse o itše: “Re thabela kudu go ba le sehlopha seo se hlomphegago se se swanago le sa lena se bokane motseng wa rena. Re dirile boiteko bjo bogolo bja gore le tle mo . . . gomme re be re thabile kudu.” Ka boitshwaro bja bona bjo bobotse, ngwanabo rena o mongwe le o mongwe le kgaetšedi ba ile ba tlaleletša bohlatseng bjo bobotse kudu bjo bo bego bo neilwe moo.

17 Na wena ka noši o tla thakga thuto ya Modimo Mophološi wa rena ka boitshwaro bja gago bjo bo retegago? Ditsela tše dintši tšeo se se ka dirwago ka tšona šidi:

Moaparo le go itokiša: Nakong ya ge re le kopanong, ga se ra swanela go nagana eka re maikhutšong. Go e na le moo, re itlišitše go Jehofa gore re rutwe ke yena. Ka ge go le bjalo, na ga se ra swanela go apara go swana le ka mo re bego re tla apara ka gona ge re e-ya dibokeng Holong ya Mmušo? (1 Tim. 2:9, 10) Go oketša moo, re swanetše go naganišiša ka šedi ka seo re tlago go se apara ka morago ga ge mananeo a fedile. Ge re boela marobalong a rena, na e tla ba mo go swanetšego go rena go sa šetšwe nywaga ya rena go fetoša diaparo tša rena tše di hlomphegago, tše di nago le seriti tša kopano ra apara diaparo tše di tla re neago ponagalo ya batho ba lefase bao ba aperego bošaedi le bao ba sa ithatego? Na se se ka se nee kgopolo ya gore diaparo tša rena tša go ya dibokeng e fo ba tša go tšhepha go e na le go ba pontšho ya tsela ya rena ya go phela? Gopola, re rwele leina la Jehofa gomme o mongwe le o mongwe wa rena o swanetše go hlokomela gore tatofatšo ye e swanetšego e se ke ya tlišwa malebana le tsela ya therešo.

Bao ba yago kolobetšong ba swanetše go gopotšwa gore ke mo go sa swanelago tiragalong e bjalo e kgethwa go apara dikhipha tše di nago le meano ya lefase, mantšu goba diphatlalatšo tša papatšo. Bagolo ba swanetše go kgonthišetša gore dipotšišo tša kolobetšo di hlahlobja e sa le ka pela kudu le gore o mongwe le o mongwe yo a yago kolobetšong o botšwa go sa na le nako ge e ba a dumeletšwe go ka kolobetšwa goba a se a dumelelwa. (Ge le hlahloba dipotšišo, e ka ba nako e swanetšego ya go nea ditšhišinyo tše di swanetšego mabapi le moaparo o swanetšego le o hlomphegago bakeng sa kolobetšo.) Go ka se nyakege gore bakolobetšwa bao ba dumeletšwego ke bagolo ba ngwadiše kopanong.

Dihotele: Bontšhang dienywa tša moya ge le ingwadiša hoteleng ya lena. Sehlopha sa bašomi sa hoteleng se ka ba se se sa hlamelwa go hlankela sehlopha se segolo ka nako e kopana. Le se fele pelo, e-bang le moya wa go naganela gomme le leboge ka mo go swanetšego.

Bana ba ka dira karolo ya bona ka go bontšha tlhompho bakeng sa thoto ya hoteleng le ka go kwa melao yeo e laolago go dirišwa ga letangwana la go rutha le ditlabakelo tše dingwe. E tla ba mo go holago gore batswadi ba fetše nako e itšego le bana ba bona pele ga kopano ba bušeletša mohuta wa boitshwaro bjo bo tla letelwago go bona, ba ba gopotša ka boikarabelo bja bona ka noši bja go itumelelanya le ditekanyetšo tša Bokriste tša boitshwaro.

Ditlabakelo tša go gatiša: Lege dikhamera tša video le digatiša-mantšu di dumeletšwe, re a tseba gore le tla naganela ba bangwe. E ka se be go bontšha lerato go šira batla-kopanong-gotee le wena ge o tšea filimi ya lenaneo. Ge e ba o ka kgona go gatiša ka bohlale o le setulong sa gago, o ka se ke wa ganetšwa go dira bjalo. Lega go le bjalo, hle gopolang gore ga go na dikhamera goba ditlabakelo tša go gatiša tšeo di swanetšego go kgokaganywa le tshepedišo ya tša mohlagase goba ya tša modumo kopanong, le gona sedirišwa ga se sa swanela go bewa ditsejaneng tša magareng ga ditulo goba mafelong ao go sepelwago go ona.

Madulo: Hle gopolang gore DITULO DI KA BEELWA FEELA DITHO TŠA KGAUFSI TŠA LAPA GOBA MOTHO LEGE E KA BA MANG YO A KA BAGO A SEPELA LE LENA KA KOLOI YA LENA. Go tla ba le mafelo a kgethegilego bakeng sa batšofadi le digole dikopanong ka moka. Hle naganelang batšofadi. Dinakong tše di fetilego, banababo rena ba bangwe ba ba tšofetšego ba ile ba swanelwa ke go nyaka madulo mafelong a sa tsenegego gabonolo ka baka la gore bafsa ba tladitše ditulo karolong ya batšofadi. Re manyami gore re ka se kgone go amogela dikgopelo bakeng sa mafelo a aroganego goba diphapoši bakeng sa bao ba nago le mathata a bjalo ka go se kwane ga mmele le maemo a itšego.

Dilo tša motho ka noši: Go šišinywa gore le boloke tekanyo e lekanetšego ya dilo lege e le dife tša motho ka noši tšeo le tlago le tšona kopanong. Ge e ba selo se sa lekane ka tlase ga setulo sa gago, go ka ba kaone go se tlogela gae goba ka puting ya koloi. Di-cooler tše dikgolo ga di a dumelelwa go bewa ditseleng tša magareng ga ditulo bakeng sa mabaka a polokego, gomme ge e ba di bewa setulong seo se lego kgaufsi le wena, motho o mongwe a ka hlokišwa setulo.

Tirelo ya dijo: Go tla lokišetšwa tirelo ya dijo dikopanong ka moka. Re rata go kgothaletša bohle bao ba tla bego ba le gona go diriša thulaganyo ya tirelo ya dijo.

Dikopanong ka moka go dirwa dithulaganyo bakeng sa go kgonthišetša gore go tla ba le dijo tše di lekanego bakeng sa ba-tla-kopanong ka moka. Moo palo e kgolo ya ba-tla-kopanong e tlago go robatšwa dikolong, Komiti ya Kopano e tla hlahloba taba bakeng sa go lokišetša dilapološi mantšiboa le sefihlolo mesong. Se se swanetše go fediša go nyakega ga gore ba-tla-kopanong ba tle le ditofo tša kgase le ditofo tša phorema. Re rata go bolela gore tše di tšweletša kotsi ya mollo mafelong ao ba-tla-kopanong ba robalago go ona. Re rata go kgothaletša bohle gore ba thekge dithulaganyo tša tirelo ya dijo ka pelo yohle. Re rata go oketša gore ka baka la go hlatloga ga ditefelo tša mafelo go thomile go ba thata gore lehlakore la tirelo ya dijo le kgone go lefelela ditshenyagalelo ka moka tša lefelo. Ka baka la se, mo gongwe le ka rata go romela moneelo pele ga nako motseng wo kopano e tlago go swarelwa go wona, moo phuthego ya lena e tla bego e e-ya gona. Meneelo ka moka e lebogwa kudu gomme Mokgatlo o rata go le leboga e sa le bjale bakeng sa go thekga ga lena dikgahlego tša Mmušo ka tsela ye ka pelo ka moka le ka botee.—Luka 6:38.

18 Ka go naganela ba bangwe ka lerato, rulaganyetšang go fihla e sa le ka pela letšatšing le lengwe le le lengwe, kudu-kudu ka Labone moo mohlomongwe go tlago go tšea nako e telele go feta mehleng go hwetša lefelo la go emiša koloi le madulo.

19 Re na le tokelo e kgolo gakaakang ya go rutwa ke Jehofa! Go diriša ga rena nako, matla le methopo ya dilo tše di bonagalago go thekga Kopano ya Selete ya “Thuto ya Modimo” go tla feleletša ka mehola ya ka mo go sa felego ya moya go rena le go malapa a rena.

Dikgopotšo tša Kopano ya Selete

Boitshwaro bjo bo Swanetšego: Ke gabohlokwa gore bohle bao ba lego kopanong ba itshware ka tsela e swanetšego, ba lebelela ka tlhompho lefelo la kopano e le “Ngwako wa Modimo.” (Ps. 55:14) Nakong ya ge dipolelo, dipapadi, dikopelo le dithapelo ka mo go kgethegiego di tšwela pele, hle phemang go dira selo lege e le sefe seo se tlago go aroša tlhokomelo ya ba bangwe bao ba theeditšego lenaneo. Go ema-ema mo go sa nyakegego, go bolela goba go diriša dikhamera tša flash goba metšhene ya go gatiša video ka tsela yeo e šitišago bao ba lekago go theetša ka kelohloko seo se bolelwago e ka se be go bontšha tlhompho. Go naganela ga rena le boitshwaro bjo bobotse di tla bontšha gore re leboga thuto ya Modimo e le ka kgonthe gomme re tlile kopanong go tla go rutwa ke Jehofa.

Tša Marobalo: Tirišano ya lena go dirišeng lefelo la marobalo leo le lokišeditšwego ke kopano e lebogwa kudu. Ge e ba o rulaganyetša go robala motseng wa kopano gomme o se wa hlwa o tiišetša go beelwa marobalo, hle dira bjalo gatee-tee.

Bangwaledi ba diphuthego ba swanetše go kgonthišetša gore difomo tša Kōpo ea Kamore di romelwa kapejana atereseng e swanetšego ya kopano. Ge e ba o swanelwa ke go phumola marobalo ao o a hweditšego ka Lefapha la tša Marobalo, o swanetše go tsebiša mong wa lefelo goba hotele le Lefapha la tša Marobalo la kopano gatee-tee gore phapoši e ka abelwa o mongwe. Dikopanong tše dingwe go ba thata ka mo go oketšegago go hweletša ba-tla-kopanong ba bantši marobalo. Gore go fenywe bothata bjo, dikomiti tša kopano di tla rulaganyetša go hira dikolo tša lefelong leo bjalo ka ge go dirilwe nakong e fetilego. Lega go le bjalo, ka baka la go oketšega ga dipalo tša bao ba nyakago marobalo a mohuta wo, bjale re tla diriša seo se bitšwago “dormitory system.” Ka mantšu a mangwe, dikgaetšedi di tla robatšwa ka go tše dingwe tša diklase le banababo rena ka go tše dingwe. Ka gona go ka se sa dumelwa gore malapa a robale gotee ka klaseng e tee. (Bonang Phafoga! ya January 8, 1992, letlakala 29.) Se ka dinako tše dingwe se ka ipontšha e le tšhitelo eupja re kgodišegile gore bohle ba tla kwešiša lebaka la se. Re rata go bolela gore thulaganyo ye e šetše e ile ya dirišwa dikopanong tše dingwe ka katlego e kgolo.

Diphorema tša Bana: Kgoro ya Bo-ra-ditima-mollo e eletša gore di se ke tša tsenywa ka holong gomme tša emišwa ditsejaneng tša go tsena le magareng ga methaladi ya ditulo. Ka ge mašaba a magolo a baka pitlagano, diphorema tša bana di ka ba kotsi e sego go ngwana feela eupja le go motho lege e le ofe yo di ka mo kgopago. Ka gona le kgopelwa gore le se ke la di tsenya ka holong. Lega go le bjalo, ditulo tša bana goba ditulo tša ka dikoloing di a dumelelwa ka ge di ka bofelelwa ditulong tše di lego kgaufsi le batswadi. Tirišano ya lena tabeng ye e tla lebogwa. Kae le kae mo go kgonegago Komiti ya Kopano e tla leka go lokišetša phapoši yeo bo-mma ba ka hlokomelago masea a bona go yona, ge e ba go nyakega.

Kolobetšo: Bao ba yago kolobetšong ba swanetše go ba madulong a bona lefelong leo le kgethilwego pele lenaneo le thoma ka Mokibelo mesong. O mongwe le o mongwe yo a rulaganyetšago go kolobetšwa o swanetše go tla le seaparo sa bothakga sa go tsena ka meetseng le toulo. Ka morago ga polelo ya kolobetšo le thapelo ka seboledi, modula-setulo wa lenaneo o tla nea bao ba yago kolobetšong ditaelo tše kopana ke moka a bolele kopelo yeo e tlago go opelwa. Ka morago ga temana ya mafelelo, bahlokomedi ba tla hlahla bao ba yago kolobetšong go ba iša lefelong la kolobetšo goba dinamelweng tšeo di tla ba išago moo. Ka ge go kolobetšwa bakeng sa go bontšha boineelo bja motho e le taba ya motho ka noši magareng ga motho le Jehofa, ga go na tokišetšo ya seo se bitšwago kolobetšo ya balekane yeo go yona bakolobetšwa ba babedi goba go feta moo ba gokarelanago goba ba swaranago ka diatla ge ba dutše ba kolobetšwa.

Tirelo ya Boithapo: Thušo ya boithapo e a nyakega bakeng sa gore kopano ya selete e sepele gabotse. Gaešita lege o ka kgona go šoma feela karolo e itšego ya kopano, modiro wa gago o tla lebogwa. Ge e ba o ka kgona go thuša, hle e-ya Lefapheng la Tirelo ya Boithapo kopanong. Bana ba nywaga ya ka tlase ga e 16 le bona ba ka tlaleletša katlegong ya kopano, eupja go nyakega gore ba šome le motswadi goba motho o mongwe yo mogolo yo a nago le boikarabelo.

Dikopelo: Ka ge go opela e le karolo ya borapedi bja rena re kgothaletša bohle gore ba itlwaetše dikopelo tše di latelago tšeo e tlago go ba karolo ya lenaneo: 91, 59, 111, 148, 191, 113, 114, 164, 183, 166, 156, 202, 105, 151, 181, 70, 42, 106, 53, 79 le 85. (Re kgothaletša gore diphuthego di thome go itlwaetša bonyenyane kopelo e tee ka morago ga seboka se sengwe le se sengwe.)

Seboka sa Bethele: Go tla ba le seboka letšatšing la bobedi bakeng sa bagoeledi lege e le bafe bao ba ineetšego ba nywga ya magareng ga e 19 le e 35 bao ba ka ratago go tsenela tirelo ya Bethele. Go tla dirwa ditsebišo kopanong mabapi le nako le lefelo bakeng sa seboka se.

Dipetšhe: Hle hlomelang petšhe e rulagantšwego ka mo go kgethegilego ge le le kopanong le ge le e-ya le ge le e-tšwa lefelong la kopano. Se gantši se dira gore re kgone go nea bohlatse bjo bobotse ge re dutše re sepela. Dipetšhe di swanetše go hwetšwa ka phuthego ya lena, ka ge di ka se be gona dikopanong. (Diphuthego di kgopelwa go hlokomela gore: Diotara tšeo di amogelwago ka morago ga November 1, 1993 di ka se ke tša romelwa. Bonang Tirelo ya Rena ya Mmušo ya August 1993, ka tlase ga Ditsebišo.)

Boitsebišo bja Motho ka Noši: Go okeletša go karata ya koketšo ya Kopano ya “Thuto ya Modimo,” o mongwe le o mongwe o kgathaletšwa go ba le karata ya Advance Medical Directive go yena. Ditho tša lapa la Bethele le babulamadibogo gape ba swanetše go ba le dikarata tša bona tša boitsebišo.

Mantšu a Temošo: Go sa šetšwe moo o emišago koloi gona, o swanetše go e notlela ka dinako tšohle gomme o se ke wa tlogela selo lege e le sefe se bonala ka gare. Bolokang dilo tša lena di notleletšwe ka puting ge e ba go kgonega. Gape, hlokomelang mahodu le bahlakodi bao ba gokwago ke dipokano tše dikgolo. Se se akaretša go se tlogele selo lege e le sefe sa bohlokwa go se yo a se hlokometšego ditulong kopanong. Gape go bile le dipego tše sego kae tša batho bao ba sa botegego bao ba lekago go gokeletša bana gore ba tloge lefelong la kopano. Hle hlokomelang.

Go begilwe gore dihotele tše dingwe di nea tumelelo ya go bona dipaesekopo tša thelebišene tše di gobogilego goba gaešita le tšeo di bontšhago batho bao ba hloboletšego. Se se gatelela go nyakega ga go thibela bana go bogela TV ba se na yo a ba hlokometšego mafelong a a marobalo.

Banababo rena ba bangwe le batho bao ba thabelago ba ile ba leletša sehlopha sa taolo ya lefelo la kopano ba tsoma tsebišo mabapi le dinako tša go thoma tša mananeo le ditaba tše dingwe. Hle le se ke la dira se. Ge e ba tsebišo yeo o e nyakago e sa hwetšagale ka go Tirelo ya Rena ya Mmušo, o swanetše go ngwalela atereseng ya kopano yeo o ka e hwetšago go mongwaledi wa phuthego ya geno.