Go Hlokomela Dinyakwa Tša Moya Tša Difoa

1 Palo e golago ya difoa e gogelwa go Modiši yo Bolo gomme e tsena tswalanong ya boineelo le Jehofa Modimo. (Joh. 10:3, 11) Ba bangwe ka phuthegong, kudu-kudu bagolo ba swanetše go phafogela dinyakwa tša moya tša banababo rena le dikgaetšedi ba difoa.

2 Go Kgotsofatša Dinyakwa tša Difoa: Go dirwa dithulaganyo bakeng sa go fetolela diboka tša phuthego ka polelo ya diatla gohle mo go nago le bafetoledi ba ba swanelegago. Ge e ba go se na yo a tsebago polelo ya diatla ka phuthegong, e ka ba mo go swanetšego go romela difoa phuthegong ya kgaufsi yeo e ka neago thušo ye. Ee, ge e ba go se na tokišetšo e bjalo tikologong ya lena ka kakaretšo, mohlomongwe go ka kgonega gore bagoeledi bao ba kgethilwego ba šiedišane ka go dula kgaufsi le difoa gomme ba abelane le tšona dintlha tše di ngwadilwego mabapi le dintlha tše dikgolo tšeo di ahla-ahlwago.

3 Dithulaganyo tša Tikologo le tša Phuthego: Dithulaganyo tša go fetolela ka polelo ya diatla dikopanong tša tikologo le matšatšing a kgethegilego a kopano di dirwa ka molebeledi wa tikologo. Mogolo goba mohlanka wa bodiredi yo a swanelegago a ka kgethwa e le morulaganyi. Banababo rena le dikgaetšedi bao ba beago mohlala ba ka abelwa go tšea karolo go fetoleleng lenaneong la kopano. Go ka latelwa molao o swanago ka phuthegong, go kgonthišetša gore dinyakwa tša difoa di hlokomelwa ka mo go swanetšego.

4 Go kgethwa gore difoa di dule moo di ka kgonago go bona bao ba fetolelago le sethala ka mo go swanago. Se ke se se swanetšego bobedi dibokeng tša phuthego le dikopanong tša tikologo. Dibokeng tša phuthego go kgethwa gore mofetoledi a dule fase ge e ba palo ya bao ba lego gona ba difoa e le e nyenyane. Bagolo ba kgothaletšwa gore ba ikopanye le ngwanabo rena wa sefoa yo a gotšego ka tsebo, ge e ba go kgonega, bakeng sa ditšhišinyo tše itšego ka dithulaganyo tše di swanetšego tša madulo.

5 Ge e ba mofetoledi yo a swanelegago yo a hlankelago e le mogolo goba mohlanka wa bodiredi a le gona gomme palo ya banababo rena le dikgaetšedi ba difoa e dumelela seo, bagolo ba ka dira phetho ya gore diboka tše dingwe di swanetše go swarwa ka mo go feletšego ka polelo ya diatla. E ka ba mo gobotse gore Thuto ya Puku ya Phuthego e be seboka sa pele sa beke seo se rulaganywago bjalo. Ge e ba phuthego e tla rata go swara se sengwe sa diboka tše hlano tša beke ka polelo ya diatla goba ka leleme lege e le lefe ka ntle le (ma)leleme le legolo leo le dirišwago phuthegong, bagolo ba swanetše go tsebiša Mokgatlo ka kganyogo ya bona.

6 Gaešita lege poledišano magareng ga difoa le batho ba ba kwago e ka nyaka maiteko a kgethegilego dihlopheng ka bobedi, ditho ka moka tša phuthego di swanetše go katanela go tlwaelana e le gore go be le go kgothatšana ga kgonthe. (Ba-Heb. 10:24) Moya wo wo o lego gare ga banababo rena o tla dira gore ba bafsa ka moka ba ikwe ba amogelega.