Bontšha Gore O A Kgomega Ka Go Dira Maeto A Go Boela
1 Go tsoma batho ba ba thabelago ka ntlo le ntlo go bontšha go rata ga gago go nea ba bangwe sebaka sa go kwa molaetša wa Mmušo. Ka gona, kgonthišetša gore o boela mo o sepedišitšego dipuku ka kgwedi ya January, ka ge ye e le tsela e botse ya go bontšha gore o kgomega ka ba bangwe.
2O ka boela mo o sepedišitšego puku e rego, “O ka Hwetša Bjang Khutšo ya Kgonthe le Polokego?,” ka thero e kopana e swanago le ye:
◼ “Baetapele ba lefase lehono ba paletšwe ke go tliša khutšo le polokego. Jehofa Modimo ke yena a nnoši yo a ka dirago seo. Beibele e re bontšha seo re swanetšego go se dira. [Ahla-ahla dintlha tše di lego go dirapa 1 le 2 go letlakala 175, ke moka o bale Jesaya 26:4.] Ke tla rata go go bontšha kamoo puku ye e ka go thušago ka gona.”
3Ge e ba mong wa ntlo a se a tšea dipuku le ge e le dife eupša a bontšhitše kgahlego molaetšeng wa rena, mo gongwe o ka leka matseno a:
◼ “Ke thabela kudu go go hwetša gape ka gae. Ge ke be ke go etetše nakong e fetilego o bontšhitše kgahlego kholofetšong ya Beibele yeo e begilwego go Kutollo 21:3, 4. Lehono ke tla rata go go bontšha kamoo Modimo a tlago go phethagatša ka gona kholofetšo ya gagwe ya go dira lefase le paradeise. Ela hloko se se boletšwego mo go Psalme 37:9-11. [Bala.] Modimo o tla fediša batho ba kgopo. Na o tla rata go ba gare ga bao ba boleta ba ba tlago go thabela khutšo e kgolo? [Dumelela karabo.] Lebiša tlhokomelo gape go ditemana 29 le 34. Ke tla thabela kudu go boa gape ke tlo tšwetša poledišano ya rena pele ka nako ye e go swanetšego.” Mo gongwe o ka rata le go sepediša dimakasine tša morago bjale, go ithekgilwe ka maemo. Dira dithulaganyo tša kgonthe tša go boela.
4Mo gongwe o ka boela mo o sepedišitšego poroutšha e rego, “Na Modimo Ruri o na le Taba le Rena?,” ka tšhišinyo ye:
◼ “Nakong e fetilego ke go tlogeletše kopi ya poroutšha ye, yeo e rotošago potšišo e bohlokwa e rego: ‘Na Modimo ruri o na le taba le rena?’ Ka morago ga go tlhahloba poroutšha ye, ke phetho efe ye o e fihleletšego? [Dumelela karabo.] Mohlomongwe o ile wa kgothatšwa ke go bala mangwalo ao a holofetšago ka lefase le lefsa la paradeise moo re kago go phela ka khutšo. [Mmontšhe diswantšho tše di lego go matlakala 2 le 3, gomme o šupe dibopego tše dingwe tše di ipiletšago tša lefase le lefsa.] Ke ikwa ke kgodišegile gore wena le baratiwa ba gago le tla rata go phela lefaseng le bjalo. Hlokomela seo se bolelwago ke serapa 16 go letlakala 31 mabapi le se.” Bala serapa gomme o hlalose gore go tsoma Jehofa go bolela go ithuta go gontši ka yena le ka merero ya gagwe ka go ithuta Lentšu la gagwe, Beibele.
5Go dira maeto a atlegago a go boela, re swanetše go bontšha gore re kgomega ka batho ba bangwe. E tla ba mo go holago go gopola ka melao e meraro ya motheo. E-ba yo a feto-fetogago le maemo. Mong wa ntlo a ka ba a se a tlwaela go beela nako e kgethegilego ka thoko bakeng sa poledišano ya Beibele. Bolela ka boripana. O se ke wa dula nako e telele goba wa akaretša dintlha tše dintši kudu di tloga fase. Mabakeng a mantši, go tla ba le karabelo e kgahlišago kudu diketelong tša gago ge e ba o akaretša dintlha tše sego kae feela ka nako e kopana. E-ba yo botho le yo a nago le bogwera. Bontšha mong wa ntlo gore wena ka noši o a mo kgahlegela. Pakane ya rena gona bjale ke go akaretša mong wa ntlo poledišanong ya Mangwalo. Ka gona re nyaka go thoma thuto e enywago ya legae ya Beibele.
6 Jehofa o beile mohlala o phethagetšego bjalo ka Modiši yo lerato yo a hlokomelago dinku tša gagwe. (Hesek. 34:11-14) Boiteko bja rena bjo bo tšwago pelong bja go ekiša tlhokomelo ya gagwe e lerato bo a mo thabiša, bo bontšha lerato la rena e bile bo tlišetša ba bangwe ditšhegofatšo.