Retang Jehofa “Ka Mehla”

¹ Psalme 145:2 e na le kholofetšo yeo Kgoši Dafida a e holofeditšego Jehofa e rego: “Ka mehla ke tlo Xo rêta, ka xoloka leina la xaxo ka mehla le neng le neng.” Le rena re na le lebaka la go reta le go tumiša Tatago rena wa legodimong! Eupša re ka ekiša bjang mohlala wa Dafida ka go godiša bogoši bja Jehofa “ka mehla”?

² Re Tlatše Dipelo tša Rena ka Tebogo ya go Leboga Jehofa: Thuto ya ka mehla ya Lentšu la Modimo e nweletša lethabo la rena bakeng sa seo Jehofa a se dirilego, seo a se dirago le seo a tlago go re direla sona. Ge re godiša tebogo ya rena ya go leboga ditiro tša gagwe tše di kgahlišago, re tla ikhwetša re phophoma ka botho bja gagwe. (Ps. 145:7) Re tla tumiša Jehofa ka mafolofolo lebakeng le lengwe le le lengwe le le swanetšego.

³ Tumišang Jehofa Poledišanong ya Letšatši le Letšatši: Ge re boledišana le baagišani, bao re tsenago le bona sekolo, bašomi-gotee le rena le ba bangwe bao re kopanago le bona letšatši le letšatši, re ka hwetša dibaka tša go abelana kholofelo ya rena le bona. Moagišani a ka bontšha go tshwenyega ka bosenyi setšhabeng; yo o tsenago le yena sekolo a ka belaela ka go dirišwa gampe ga dihlare-tagi goba boitshwaro bjo bo gobogilego; mošomi-gotee le wena a ka bolela kgopolo ya gagwe mabapi le kgang e itšego ya tša bopolitiki. Re ka šupa melaong ya motheo le dikholofetšong tšeo di lego ka Lentšung la Modimo tše di bontšhago tsela yeo e swanetšego go tšewa gona bjale le kalafo ya mafelelo mathateng a. Mantšu a bjalo ao a bolelwago “lebakeng la xôna” e ka ba tšhegofatšo!—Die. 15:23.

⁴ Bolelang ka Jehofa ka Nako e Tletšego: Motho yo a nago le tebogo e tseneletšego ya go leboga Jehofa o nyaka go abelana ditaba tše di lokilego le ba bangwe ba bantši ka mo go kgonegago. (Ps. 40:8-10) Tabeng ye re swanetše go ipotšiša gore, ‘Na ke dira sohle seo maemo a-ka a tlago go ntumelela go se dira?’ Ba bantši ba ile ba hwetša gore ge ba dira dipeakanyo tše dingwe tše di swanetšego, ba ile ba kgona go ba babulamadibogo ba ka mehla. Ge e ba maemo a gona bjale a sa re dumelele seo, na re ka ngwadiša re le babulamadibogo ba go thuša? Ka ge sehla seo se tlago sa Segopotšo e le nako ya modiro o oketšegilego, dikgwedi tša March le April e tla ba nako e botse ya go oketša tirelo ya rena ka go ba babulamadibogo ba go thuša.

⁵ Thušang ba Bafsa go re Tlatša go Reteng Jehofa: Go binwa ga Segopotšo sa lehu la Jesu ka mehla go re gopotša ka mabaka a go leboga Jehofa le go tumiša leina la Gagwe. Ye ke nako e botse kudu ya go kgothaletša barutwana ba rena ba Beibele gore ba re tlatše go boleleng phatlalatša ka bogoši bja Jehofa. Ba kgothaletše go naganišiša ka thapelo ka seo se bolelwago go dirapa 7-9 go matlakala 173-5 ka pukung ya Tsebo e Išago Bophelong bjo bo sa Felego. Ge e ba ba swanelega, ga ba na lebaka la go gogela morago feela ka gobane ba se na phihlelo. Bagoeledi bao ba nago le bokgoni ba gona bakeng sa go ba bontšha kamoo modiro wa go bolela ka Mmušo o dirwago ka gona. Ge e ba ba bafsa ba ka rapa sebete sa go bolela ditaba tše di lokilego, ba ka kgodišega gore Jehofa o tla ba thuša.—Dit. 4:31; 1 Ba-Thes. 2:2.

⁶ Re itlišetša mehola ya ka mo go sa felego gotee le go e išetša ba bangwe ge re tsoma go reta Jehofa ka mehla.