Diriša Dipampišana Tša Taletšo Gabotse
1 Dipampišana tša taletšo tša phuthego ke tše di holago bakeng sa go tsebiša batho setšhabeng aterese ya Holo ya Mmušo le nako e nepagetšego ya diboka. E tla ba mo gobotse go tlogelela motho yo mongwe le yo mongwe yo o kopanago le yena pampišana e tee. Ka baka leo, phuthego e nngwe le e nngwe e swanetše go ba le sesola se se lekanego sa dipampišana tša taletšo setokong. Bakeng sa diphuthego tšeo di fetolago dinako tša diboka ngwaga le ngwaga ka January, dipampišana tša taletšo di swanetše go otarwa ka October ya pele ga moo ngwaga o mongwe le o mongwe e le gore sesola seo se nago le dinako tša nako yeo tša diboka di dule di le gona. Difomo tša Odoro ea Limemo di swanetše go dirišetšwa morero wo. Ge le šetše le e-na le tšona, dipampišana tša taletšo di ka dirišwa bjang ka mo go holago?
2 Bagoeledi ba bantši ba hwetša gore go nea motho pampišana ke tsela e atlegago ya go itsebiša le go thoma dipoledišano. Go bontšha thulaganyo ya diboka goba molaetša karolong ya ka morago go ka bula tsela yeo e lebišago poledišanong yeo e lego mabapi le modiro wa rena le morero wa wona. Batswadi ba ka akaretša bana ba bona bodireding ka go dira gore ba nee pampišana ya taletšo ntlong. Bagoeledi bao ba bago le karolo go go neeng bohlatse ka go ngwala mangwalo ba swanetše go tsentšha pampišana ya taletšo ka gare ga lengwalo la bona gomme ba laletše motho gore a be gona dibokeng. Mo gongwe dipampišana tša taletšo di ka tlogelwa magaeng ao go ona go se nago motho, ge feela go šetšwa gore di tlogelwa ka tlase ga lebati mo di sa bonagalego ka mo go feletšego.
3 Dipampišana tša taletšo di tsentše letsogo go lebišeng batho ba dipelo tše di botegago therešong. Phihlelo e nngwe e bolela ka mosadi yo ka baka la pampišana ya taletšo a ilego a kgona go phethagatša kganyogo ya gagwe ya go kganyoga go kwešiša Beibele. Ka morago ga go fetša bošego a rapela Modimo, banyalani ba Dihlatse ba ile ba mo kokotela mesong. A hlodimetše ka lešobana o ile a bolela gore a ka se ke a bula lebati. Dihlatse di ile tša tsenya pampišana ya taletšo ka tlase ga lebati. E balega ka gore: “Tseba Beibele ya Gago.” O ile a e bona gomme a bula lebati. Kapejana thuto e ile ya thongwa, gomme ka morago a kolobetšwa. Le ka mohla o se ke wa tšeela fase matla a moya wa Modimo, eka ka mehla re ka diriša gabotse dipampišana tša taletšo ge re phetha bodiredi bja rena ka mo go tletšego.—Bona gape le Tirelo ya Rena ya Mmušo ya February 1994, letlakala 1.