Jehofa O Nea Matla A Fetago A Tlwaelegilego
1 Tokelo e bohlokwa ya tirelo e kgethwa—bodiredi bja Bokriste—e gafetšwe barutiwa ka moka ba Jesu. (Mat. 24:14; 28:19, 20) Eupša, go se phethege ga batho le dikgateletšo tša tshepedišo ye ya dilo ka dinako tše dingwe di re bakela gore re itebelele re le bao ba tlogago ba sa swanelege.
2 Ge se se direga, re ka homotšwa ke lengwalo la moapostola Paulo leo le yago go Bakriste ba tloditšwego ba Korinthe. O ngwadile gore: “Lehumô leo re le swere ka dibya tša letsopa.” (2 Ba-Kor. 4:7) Paulo o be a kgodišegile gore: “Ge re na le bodiredi bjo . . . , ga re lape.” (2 Ba-Kor. 4:1, PK) Ke therešo gore, ke tlhohlo go yo mongwe le yo mongwe wa rena, go sa šetšwe gore ke motlotšwa goba wa “dinku tše dingwe,” go tšwela pele re tsebatša ditaba tše di lokilego gomme ‘ra se lape.’ (PK) Re nyaka matla a tšwago go Modimo, yo a neago “matla a fetago a tlwaelegilego.”—Joh. 10:16; 2 Ba-Kor. 4:7b, NW.
3 Ka mo go kgothatšago, Dihlatse tše dintši ke baebangedi ba fišegago go sa šetšwe gore di swanelwa ke go katana le kganetšo e šoro, mathata a magolo a tša maphelo goba ditšhelete tše di lekanyeditšwego. Ka moka ga rena re swanetše go lemoga gore kabelo ya rena ya go bolela e thekgwa ke Jehofa. Go e na le go dumelela go nyema moko goba poifo di fokodiša boikemišetšo bja rena bja go bolela, anke re ‘tieng Moreneng le thateng ya matla a gagwe.’—Ba-Ef. 6:10; Die. 24:10.
4 Kamoo o ka Hwetšago Matla a Modimo ka Gona: Phegelela thapelong, o kgopela thušo ya Modimo le matla. (Ba-Roma 12:12; Ba-Fil. 4:6, 7) Ke moka, ka pelo ya gago ka moka, bota Jehofa gore a go nee matla a fetago a tlwaelegilego. (Die. 3:5) Bala ditaodišo-phelo tša mehleng yeno ka dimakasineng tša rena, ka gobane di nea bohlatse bja gore Jehofa o thuša bahlanka ba gagwe lehono gore ba kgotlelele diteko. Dula o le kgaufsi le banabeno ka phuthegong, gomme o se ngale diboka tša phuthego.—Ba-Roma 1:11, 12; Ba-Heb. 10:24, 25.
5 Eka re ka dira sohle seo re ka se kgonago gore re ipee boemong bja go amogela matla a Jehofa—e lego matla a fetago a tlwaelegilego le ao a tlago go re thuša gore re se nyeme moko modirong o bohlokwa kudu wa go bolela ka Mmušo.