Ge dinoge di bolela gore di nea melaetša e tšwago bahung, ruri ye gabotse-botse e-tšwa kae?

Jes. 8:19: “Xe ba ka re: Botšišang ba medimo, le ba maphala le didupe! Le tlo re: A sethšaba xa se botšiše Modimo wa sôna? A fa bahu ba ka botšišwa ditaba tša ba ba phelaxo?” (Na Modimo o be a ka re lemoša malebana le mokgwa o bjalo, ge e ba ruri o be o re dira gore re boledišane le baratiwa ba rena?)

Dit. 16:16: “Ka ’tšatši le lengwê xe re ya thapelong, ra xahlana le mosetsana e mongwê e a naxo le môya wa bonoxê, e a bexo a ruiša beng ba xaxwe xa-xolo ka xo noxa.”

Bona le matlakala 95-97, tlase ga “Bonoge.”

Borapedi bja rena bo swanetše go išwa go mang?

Luka 4:8: “Jesu a re: Ntloxêlê Sathane; xo ngwadilwe xwa thwe: O khunamêlê [Jehofa] Modimo wa xaxo, O dirêlê Yêna a nnoši.”

Joh. 4:23, 24: “Xo tla lebaka, le byale ké lôna, leo barapedi ba makxonthe ba tl’o xo rapêla Tate ka Môya le ka therešo. Le xôna Tate ó nyaka ba ba mo rapêlaxo ka mokxwa woo. Modimo ké Môya; xomme ba ba mo rapêlaxo ba tlo Mo rapêla ka môya le ka xo rereša.”

Ke kholofelo efe e lego gona ya go kopanywa ga nako e tlago ga ditho tša lapa go akaretša le tšeo di šetšego di hwile?

Joh. 5:28, 29: “Di se kê tša Le tlaba; xobane xo tla lebaka leo bohle ba lexo mabitleng ba tl’o xo kwa Lentšu la Morwa-Modimo ka lôna. Xomme ba tlo tšwa; ba ba dirilexo tše botse ba tlo tsoxa ba phela; ba ba dirilexo tše mpe ba tlo tsoxa ba lahlwa.”

Go Tswalwa Gape

Tlhaloso: Tumelo ya gore motho o tswalwa gape boemong goba maemong a mantši a atlegilego, ao mo gongwe e ka bago ka go ba motho goba phoofolo. Gantši ke “moya” o sa swaregego wo go dumelwago gore o tswalwa gape mmeleng o mongwe. Ga se thuto ya Beibele.

Na maikwelo a makatšago a go kwa o tlwaelane le batho ba bangwe goba mafelo ao e lego a mafsa e le ka kgonthe, a hlatsela go tswalwa gape e le taba ya kgonthe?

Na o šetše o kile wa bona monna goba mosadi yo a phelago a swana le o mongwe yo le yena a phelago mo nakong ye? Batho ba bantši ba dirile bjalo. Ka baka la’ng? Ka gobane batho ba bangwe ba na le mekgwa e swanago goba ba bile ba bonala ekare ke bao ba swanago. Ka gona, maikwelo a gore o tseba motho gaešita lege e ba o se wa ka wa mmona le nakong ya pele, ruri ga a hlatsele gore o tlwaelane le yena bophelong bja nako e fetilego, na a dira bjalo?

Ke ka baka la’ng ntlo goba motse mo gongwe o ka bonala e le wo o o tlwaetšego, gaešita lege o se wa ka wa ba moo le ka mohla? Na ke ka gobane o kile wa phela moo nakong ya bophelo bjo bo fetilego? Dintlo tše dintši di agwa ka mokgwa o swanago. Diphahla tše di dirišwago metseng yeo e dulanego kgole mo gongwe di ka tšewa dilong tše di swanago. Na ga se therešo gore mafelo a mangwe ao a aroganego kudu a bonagala a swana? Ka gona, ka ntle le go dumela go tswalwa gape, ruri maikwelo a gago a go tlwaela dilo tšeo ke ao a kwešišegago.

Na go nagana ka bophelo ka nako e nngwe o le lefelong le lengwe ka ge go dirwa ke ge mogopolo o rarantšwe go hlatsela go tswalwa gape?

Ge mogopolo o rarantšwe, ruri tsebišo e ntši yeo e lotilwego bjokong e ka dirišwa. Bararanyi ba megopolo ba fata mogopolo wa go hlokomologa. Eupja megopolo yeo e bile moo bjang? Mo gongwe o badile puku, o bone paesekopo goba o ithutile ka batho ba bangwe thelebišeneng. Ge e ba o ipea sebakeng sa batho bao o ithutilego ka bona, gona mo gongwe seo se ka kgomarela mogopolong wa gago moo se ka dirago gore phihlelo ya bona e be bjalo ka ge ekare ke ya gago. Seo o se dirilego mo gongwe e ka ba e le sa kgale kudu mo o ka bago o šetše o se lebetše, eupja ka ge mogopolo o rarantšwe mo gongwe phihlelo e ka gopolwa go etša ge ekare o be o gopola ka “bophelo bjo bongwe.” Ge e ba seo e be e le sa therešo, ruri na batho bohle ba be ba ka se ke ba ba le megopolo e bjalo? Eupja ga se batho bohle ba nago le yona. Go hlokometšwe gore palo e golago ya dikgoro-kgolo tša mmušo kua United States ga di amogele bohlatse bja go newa ka mogopolo o rarantšwego. Kgoro-kgolo ya Minnesota ka 1980 e ile ya bolela gore “bohlatse bjo bo phalago bjohle bja batsebi bo bontšha gore ga go motsebi yo a ka bolelago ge e ba mogopolo e le woo o tšweletšwago ke go raranywa goba ge e ba karolo lege e le efe ya mogopolo woo e le therešo, maaka goba go naganelwa, e lego go tlatša dikgoba ka ditaba tšeo di se bago gona. Mafelelo a bjalo ga se ao a botwago ka mokgwa wa thutamahlale e le a nepagetšego.” (State v. Mack, 292 N.W.2d 764) Tutuetšo ya dikakanyo yeo e dirwago ke moraranyi wa megopolo mothong yoo a rarantšwego mogopolo ke lona lebaka mo tabeng ye ya go se botwe.

Na Beibele e na le bohlatse bja go dumela go tswalwa gape?

Na Mateo 17:12, 13 e bonagatša tumelo ya go dumela go tswalwa gape?

Mat. 17:12, 13: “[Jesu o itše:] Eliya ó be a tlile, ’me xa ba ka ba mo tseba. Ba mo dirile ka mo ba ratilexo. Le Morwa-motho ba tlo mo dira ka mokxwa woo; ba tlo mo tlaiša. Barutiwa xomme ba lemoxa xobane ó ba botša tša Johane Mokolobetši.”

Na se se be se bolela gore Johane Mokolobetši e be e le Eliya yo a tswetšwego gape? Ge baperisita ba ba-Juda ba be ba botšiša Johane gore, “A o Eliya?” yena o itše, “Xa se nna.” (Joh. 1:21) Jesu o be a bolela’ng? Go etša ge morongwa wa Jehofa a be a boletše e sa le pele, ruri Johane o be a eteletše Mesia wa Jehofa pele ka “môya wa Eliya le ka matla a xaxwe, xore dipelo tša bô-tata-xo-bana a di sokollêlê xo bana ba bôná, le baxanyetši a ba sokollêlê bohlaleng bya baloki, e bê xo lokišetša [Jehofa] sethšaba se se ithlamilexo.” (Luka 1:17) Ka gona, Johane Mokolobetši o be a phetha boporofeta ka go dira modiro o swanago le wola wa moporofeta Eliya.—Maleaki 4:5, 6.

Na go tswalwa gape go bontšhwa ke taba e lego go Johane 9:1, 2?

Joh. 9:1, 2: “Jesu, xe a iphetêla, a bôna motho e a tswetšwexo è le sefofu. Barutiwa ba xaxwe ba mmotšiša ba re: Moruti, xo sentše mang? A e ka ba yêna xoba batswadi ba xaxwe, xe a tlo tswalwa e le sefofu?”

Na mo gongwe ekaba e le gore barutiwa ba ba be ba tutueditšwe ke tumelo ya Bafarisei ba ba-Juda bao ba bego ba bolela gore “meoya ya batho ba go loka ke yona feela yeo e fetišetšwago mebeleng e mengwe”? (Wars of the Jews, Josephus, Puku II, kga. VIII, ser. 14) Ga go bonagale go le bjalo, ka ge potšišo ya bona e sa bontšhe gore ba be ba gopola gore e be e le ‘motho wa go loka.’ Go molaleng gore ka ge e be e le barutiwa ba Jesu, ruri ba be ba dumela Mangwalo gomme ba tseba gore moya o a hwa. Ee, ka ge le lesea leo le lego popelong le e-na le bophelo gomme le imilwe sebeng, gona mo gongwe ba ka ba ba be ba makatšwa ke taba ya ge e ba ngwana o bjalo yo a sešogo a belegwa a be a ka ba a dirile sebe seo se bego se ka feleletša ka go mo dira sefofu. Karabo ya Jesu ruri ga go na moo e bego e thuša go tswalwa gape goba kgopolo ya gore ngwana yo a sa lego ka popelong ya mmagwe o dira sebe pele ga ge a ka belegwa. Jesu o arabile ka gore: “Xa xo a senya yêna, le xe e le batswadi ba xaxwe.” (Joh. 9:3) Jesu o be a tseba gore ka ge re le bana ba Adama, ruri re abetše mefokolo ya gagwe le go se phethege ga gagwe. Jesu gore a tle a godiše Modimo, o ile a fodiša sefofu.

Na thuto ya Beibele ka moya le lehu e dumelela go tswalwa gape?

Genesi 2:7 e re: “[Jehofa] Modimo a na a bopa motho ka lerole la mmu; mo dinkong tša xaxwe a budulêla môya wa bophelô, motho a napa a ba môya o phelaxo.” Hlokomela gore motho ka noši o ile a ba moya; moya e be e se selo seo se sa bonwego, seo se arogilego mmeleng. “Moya o senyago ke ona o tlago go hwa.” (Hesek. 18:4, 20, PK) Motho yo a hwilego o bolelwa e le “moya o hwilego.” (Num. 6:6, NW) Lehung “môya wa motho o a tloxa, ’me yêna ó boêla mmung wa xaxwe; mohla woo ké mo xo fêlaxo maanô a motho.” (Ps. 146:4) Ka gona ge motho a e-hwa, ruri o hwile e le ka kgonthe; ga go na selo se sengwe seo se šalago se phela seo se ka kgonago go fetišetšwa mmeleng o mongwe. (Bakeng sa ditaba ka botlalo, hle bona hlogo e kgolo ya ditaba ya “Moya” le “Lehu.”)

Mmo. 3:19: “Xobane tše di tlêlaxo bana ba batho, di tlêla le diphôôfôlô; Xo hwa xo a swana.” (Go swana le tabeng ya motho, ruri ga go na seo se phologago lehung la phoofolo. Ga go na seo se ka tswalwago gape mmeleng o mongwe.)

Mmo. 9:10: “Tšohle tše ’atla sa xaxo se di kxônaxo, di dirê ka matla a xaxo, xobane kwa bo-dula-bahu mo o yaxo xôna, xa xo na modirô, xa xo na kxopolô, xa xo tsebô le bohlale.” (Ga se mmeleng o mongwe, eupja ke Sheol [bo-dula-bahu] yeo e lego lebitla le le tlwaetšwego la batho moo bahu ba yago.)

Ke go se swane mo gokaakang mo go lego gona magareng ga go tswalwa gape le kholofelo yeo Beibele e e bolelago?

Go tswalwa gape: Ka go ya ka tumelo ye, ge motho a e-hwa, ruri moya “e lego yena ka noši,” o fetela boemong bjo bongwe bjo kaone ge e ba motho a be a phela bophelo bjo bobotse le bjo bo swanetšego, eupja mo gongwe a ka ya boemong bja go ba phoofolo ge e ba pego ya gagwe e bile e mpe go e na le go ba e botse. Go tswalwa gape mo gongwe le mo gongwe go dumelwa gore go tliša motho gape tshepedišong ye ye swanago ya dilo, moo a tlago go lebana le mathata a mangwe gomme a feleletše ka lehu. Mesepelo ya go tswalwa gape e lebelelwa e le yeo e se nago mafelelo. Na bokamoso bjo bo bjalo ke bjoo ruri bo go letetšego? Ba bangwe ba dumela gore tsela feela ya go phonyokga, ke ka go fediša dikganyogo ka moka tša go kganyoga dilo tšeo di kgahlišago dikwi. Ba tšhabela go eng? Go seo ba bangwe ba se hlalosago e le bophelo bjo go bjona go sa kwiwego selo.

Beibele: Ka go ya ka Beibele, ruri moya ke motho ka noši. Gaešita lege motho mo gongwe a ile a dira dilo tše dibe nakong e fetilego, fela ge e ba a sokologa gomme a fetola ditsela tša gagwe, ruri Jehofa Modimo o tla mo lebalela. (Ps. 103:12, 13) Ge motho a e-hwa, ga go na seo se phologago. Lehu le swana le boroko bjo bogolo bjo go bjona motho a sa lorego selo. Go tla ba le tsogo ya bahu. Ye ga se go tswalwa gape, eupja ke go bušetšwa bophelong bjona bjola bja motho. (Dit. 24:15) Tsogo bathong ba bantši ruri e tla ba ya go tsogela bophelo lefaseng. E tla direga ka morago ga ge Modimo a fedišitše tshepedišo ye ya mehleng yeno e mpe. Bolwetši, mahloko gaešita le ka lona lehu, e tla ba dilo tša nako e fetilego. (Dan. 2:44; Kut. 21:3, 4) Na kholofelo e bjalo e kwala e le selo seo o ka ratago go ithuta go gontši ka sona, e le gore o hlahlobe mabaka a go e holofela?

Ge e ba o Mongwe a Bolela Gore

‘Ke dumela go tswalwa gape’

Mo gongwe o ka araba ka gore: ‘O holofela gore mo gongwe go tla feleletša ka bophelo bjo kaone, na go bjalo? . . . Anke o mpotše, na o be o ka rata go phela lefaseng le le swanago le leo le hlaloswago go Kutollo 21:1-5?’

Goba o ka re: ‘Ke leboga ge o mpotša se. Anke ke go botšiše, Na se ke selo seo o bego o dutše o se dumela? . . . Ke’ng yeo e