“Dirang Byalo E Bê Xo Nkxopola”
1 Batho ba na le tshekamelo ya go dumelela seo se bolelwago ke ditaba tše bohlokwa se hwelela ge nako e dutše e e-ya. Le ke lebaka le lengwe leo ka lona ge a be a hloma “selalelo sa Morena” (PK) Jesu a ilego a laela barutiwa ba gagwe gore: “Dirang byalo e bê xo nkxopola.” Ga e sa le go tloga nakong yeo, letšatšing la segopotšo sa lehu la Jesu, Bakriste ba ile ba tšwela pele ka boikokobetšo ba ‘tsebatša lehu la Morena go fihla ge a e-tla.’—1 Ba-Kor. 11:20, 23-26.
2 Kgaufsinyane bjale, Jesu o tla amogela bodulong bja legodimong ba mafelelo ba mašaledi a “mohlatswana” o monyenyane ba fokotšegago. (Luka 12:32; Joh. 14:2, 3) Lenyaga mašaledi a batlotšwa gotee le lešaba le legolo la “dinku tše dingwê” leo le oketšegago ka mo go tšwelago pele ba tla boela ba ba le tokelo ya go gopola Selalelo sa Morena ka April 11. (Joh. 10:16; Kut. 7:9, 10) Go tla matlafatšwa tebogo ya go leboga lerato le legolo la go rata Jehofa bakeng sa go romela Morwa wa gagwe yo a tswetšwego a nnoši ka baka la batho. Go tla gatelelwa mohlala wa Jesu, lerato la gagwe, potego ya gagwe ya go botega go fihla lehung ge a nea topollo, le go buša ga gagwe mo nakong ye e le Kgoši ya Mmušo o hlomilwego wa Modimo, gotee le ditšhegofatšo tšeo Mmušo o tlago go di tlišetša batho. Ruri ke tiragalo yeo e swanetšego go gopolwa!
3 Lokišetša Gona Bjale: Anke ka moka re kataneleng go dira sehla se sa Segopotšo sa lethabo le legolo le go itebogela gotee le go lebogela bohle bao ba tlago go kopanela le rena. Re ka lokišetša pelo ya rena ka go bala gape dipego tša Beibele tšeo di lego mabapi le matšatši a sego kae a mafelelo a bodiredi bja Jesu le ditiragalo tšeo di lebišago lehung la gagwe. Thuto ya rena ya lapa dibeke tše mmalwa pele ga Segopotšo e ka gafelwa go boeletšeng dikgaolo 112-16 ka pukung ya Motho yo a Phagamego Kudu.
4 Ke ba bakae bao o ba tsebago bao ba ka tlago Segopotšong ge e ba o ka gata mogato wa pele gore o age tebogo ya bona ya go leboga tiragalo ye, wa ba laletša le go ba dira gore ba ikwe ba amogelega? Dira lelokelelo gona bjale, gomme o dire seo o ka se kgonago go ba thuša gore ba tle. Ka morago ga moo ba thuše go tšwela pele ba gola moyeng ka go ba kgothaletša go ba gona ka mehla dibokeng.
5 Sehleng sa Segopotšo go tla dirwa dithulaganyo tše kgethegilego bakeng sa go oketša dibaka tša yo mongwe le yo mongwe tša go dira boboledi. Ka thulaganyo e botse, na o ka ba mmulamadibogo wa go thuša ka April? ka May? E nngwe ya ditsela tše phalago tšohle ya go bontšha gore re gopola ka tebogo tšohle tšeo sehlabelo sa Jesu di se bolelago go rena ke go bolela ka Modimo wa rena Jehofa le ditšhegofatšo tšeo Mmušo o bušwago ke Morwa wa gagwe o tlago go di tliša.—Ps. 79:13; 147:1.