‘Bontšhang go se Fele Pelo’

¹ Ge re dutše re bona bofelo bja tshepedišo ya kgale ya Sathane bo batamela kudu le go feta, ke gabohlokwa gore re “bontšhe go se fele pelo” ge re dutše re letetše letšatši la Jehofa la phološo. Kudu-kudu mehleng ye ya makgaola-kgang, madira a kgopo a manaba a ikemišeditše go aroša tlhokomelo ya rena go kgang ya bohlokwa kudu ya bogoši bja Jehofa gomme a re leka gore re šitišwe ke dilo tše dintši tše kgahlišago tša motho ka noši. Ka tsela ye, Sathane a ka re hlalefetša gomme ra nyema moko goba ra nyefiša modirong wa go bolela ka Mmušo. (Jak. 5:7, 8; Mat. 24:13, 14) Ke ka ditsela dife re ka bontšhago go se fele pelo mo go bjalo mo go nyakegago?

² Ka go ba ba Kgotlelelago: Ge go e-na le go se thabele goba kganetšo bodireding bja rena, kgotlelelo e tla re thuša go phegelela bodireding. Re ka se ke ra tšhošetšwa gabonolo goba ra kgopišega ge e ba batho bao re kopanago le bona e le ba sa theetšego goba ba sego botho. (1 Pet. 2:23) Matla a a ka gare a ka re šireletša gore re se bolele ka mo go sa kgahlišego ka batho bao ba lego tšhemong ya rena bao ba bontšhago go se thabele goba lehloyo modirong wa rena, re lemoga gore dipolelo tše bjalo di ka re nyamiša gomme tša nyamiša le bao ba šomago le rena bodireding.

³ Ka go Phegelela ka go se Fele Pelo: E ka ba mo go lekago go se fele pelo ga rena ge ka morago ga gore re be le poledišano e botse bodireding bja tšhemo, re se ke ra hwetša motho yo a thabelago a le gona gape gae. Go bjalo ka mo go swanago ge e ba bao re ithutago le bona ba diega go dira tšwelopele goba go emela therešo. Lega go le bjalo, go phegelela ka go se fele pelo gantši go putswa ka mafelelo a mabotse. (Ba-Gal. 6:9) Kgaetšedi o ile a dira maeto a mmalwa a go boela go mosadi wa mofsa pele ga ge thuto ya Beibele e thongwa. Maetong a mahlano a mathomo, mosadi o be a swaregile ka ditaba tše dingwe. Boitekong bja botshelela, kgaetšedi o ile a nelwa ke pula ya magadima, eupša a hwetša go se na motho gae. Lega go le bjalo, a ikemišeditše go nea mosadi sebaka se sengwe se oketšegilego, kgaetšedi o ile a etela gape gomme a hwetša mosadi a itokišeditše go ithuta. Ka morago ga moo, morutwana o ile a dira tšwelopele e tiilego gomme ka nako e kopana o ile a neela bophelo bja gagwe go Jehofa.

⁴ Re a tseba gore letšatši la Jehofa le ka se diege. Ka gona re letela go phethagatšwa ga ditaba tša gagwe, re tseba gore go se fele pelo ga Modimo go tla tšweletša dienywa tše dibotse. (Habak. 2:3; 2 Pet. 3:9-15) Re swanetše go bontšha go se fele pelo go etša ge Jehofa a dira gomme ra se lesetše bodireding. “Ka tumelo le go se fele pelo,” (NW) lebelela go Jehofa gore a go putse bakeng sa modiro wa gago o thata.—Ba-Heb. 6:10-12.