Balebeledi Bao ba Etelelago Pele—Baswari ba Thuto Ya Puku Ya Phuthego
1 Ke tokelo e kgolo bakeng sa mogolo yo a swanelegago goba mohlanka wa bodiredi gore a hlankele e le moswari wa Thuto ya Puku ya Phuthego. Go hlokomela dinyakwa tša moya tša bao ba lego sehlopheng sa gagwe ke boikarabelo bjo bogolo. Mediro ya gagwe e arotšwe ka dikarolo tše tharo.
2 Bokgoni bja go Ruta: Go nyakega go lokišetša mo go tseneletšego ga moswari wa Thuto ya Puku ya Phuthego gore a fetišetše kwešišo sehlopheng beke e nngwe le e nngwe. O tsoma go godiša tebogo ya go leboga taba yeo e ithutwago. Go e na le gore a hlalose kudu nakong ya thuto, ge go nyakega o tla rotoša dipotšišo tša tlaleletšo gore a tšweletše dintlha tša motheo tša thuto. Tlhohlo ya gagwe ke go dira gore thuto e be e kgahlišago le e rutago le go akaretša yo mongwe le yo mongwe poledišanong. Pakane ya gagwe ke go aga moyeng, go gatelela bohlokwa bjo bo šomago bja thuto le go dira gore taba e fihlelele bobedi monagano le pelo.—1 Ba-Thes. 2:13.
3 Bodiši bjo bo Holago: Moswari wa Thuto ya Puku ya Phuthego o “bjalo ka tšhireletšo ge phefo e foka, le setšhabelo sa go tšhabela pula.” (Jes. 32:2, PK) O hlokomela e le ka kgonthe bohle bao ba lego sehlopheng sa gagwe le go kgonthišetša gore thušo ya moya e a newa ge yo mongwe wa bao ba lego tlhokomelong ya gagwe a nyamišitšwe.—Hesek. 34:15, 16; 1 Ba-Thes. 2:7, 8.
4 Go Bolela Ebangedi ka Mafolofolo: Moswari wa Thuto ya Puku ya Phuthego o tshwenyega ka go dira dithulaganyo tše di šomago bakeng sa bohle bao ba lego sehlopheng sa gagwe gore ba be le karolo ka mo go tletšego bodireding bja tšhemo. O etelela pele modirong wa ebangedi, a tseba gore go ba gona ka mehla, mafolofolo le phišego tšeo a di bontšhago bakeng sa tirelo di tla bonagala sehlopheng ka moka. (Ba-Kol. 4:17; 2 Ba-Thes. 3:9) Ka nako e swanago, o katanela go šoma tirelong le setho se sengwe le se sengwe sa sehlopha sa gagwe. Ge e ba re nyaka go loutša bokgoni bja rena bja go bolela le go ruta bodireding, moswari wa Thuto ya Puku ya Phuthego a ka re thuša gore re fihlelele pakane ya rena.—1 Tim. 4:16; 2 Tim. 4:5.
5 Re šegofaditšwe e le ka kgonthe ka dimpho tše e lego banna bao ba dulago ba itokišeleditše go re nea thušo ya moya le thekgo e lerato. (1 Ba-Thes. 5:14) Eka re ka bontšha tebogo bakeng sa tokišetšo ye e kgahlišago e tšwago go Jehofa ka go ba le karolo ka mehla thutong ya puku le ka thekgo ya rena ya potego modirong wa boebangedi.—Ba-Heb. 10:25.