‘Aparang Motho yo Mofsa’
1 Bakriste ba thabela go tseba therešo! Re ile ra ithuta kamoo re ka phelago ka gona e le gore re pheme tsela ya bao ba lego lefaseng. Ka go ‘tlogelana le bophelo bja Modimo,’ ba “fifetše thlaoloxanyô.” (Ba-Ef. 4:18) Re rutilwe go dira gore dikgopolo tša rena di se swane le tša lefase ka go apola motho wa kgale gomme ra apara yo mofsa.—Ba-Ef. 4:22-24.
2 Motho wa kgale o lebiša tseleng e nweletšego ka mo go tšwelago pele e gobogilego ya boitshwaro, yeo e feleletšago ka tšhilafatšo le lehu. Ka gona, re ipiletša go bohle bao ba tlago go theetša molaetša wa Mmušo gore ba lahle bogale, pefelo, bobe, maroga le dipolelo tša dihlong. Bao ba kganyogago go amogelwa ke Modimo ba swanetše go apola motho wa kgale ka botlalo le ka mo go feletšego—ka tsela yeo ba bego ba tla hlobola seaparo se se šilafetšego ka gona.—Ba-Kol. 3:8, 9.
3 Matla a Mafsa ao a Tutuetšago Monagano: Go apara motho yo mofsa go akaretša go mpshafatšwa matleng ao a tutuetšago menagano ya rena. (Ba-Ef. 4:23) Ke bjang motho a ka mpshafatšago matla ao goba tshekamelo ya monagano, e le gore a tle a sekamele mo go swanetšego? Se se dirwa ka go ithuta Lentšu la Modimo ka mehla le ka mafolofolo le ka go naganišiša ka seo le se bolelago. Ke moka, mokgwa o mofsa wa go nagana o a gola, gomme motho a bona dilo ka pono ya Modimo le Kriste. Bophelo bja motho bo fetolwa ke ge a apara dika tše dintši tša go swana le tša Kriste, go akaretša kwelobohloko, botho, boikokobetšo, boleta, go se fele pelo le lerato.—Ba-Kol. 3:10, 12-14.
4 Re ikarola lefaseng ka go apara motho yo mofsa. Tsela ya rena ya bophelo e dira gore re be ba fapanego. Re bolela therešo gomme ra diriša polelo e botse gore re age ba bangwe. Re laola bogale bja rena gomme pefelo, go hlaba lešata, maroga le bokgopo bjohle tša tšeelwa sebaka ke dika tša Modimo tša go loka. Re dira go feta seo ka tlwaelo se letetšwego go rena ka go ba ba swarelago. Tše ka moka di dirwa ka boikemišetšo go tšwa pelong.—Ba-Ef. 4:25-32.
5 Le ka mohla o se ke wa apola motho yo mofsa. Re ka se ke ra hlankela Jehofa ka mo go amogelegago ka ntle le yena. Mo dumelele gore a thuše go gogela batho therešong gomme o mo dumelele gore a tumiše Jehofa, Mmopi wa motho yo mofsa yo a kgahlišago.—Ba-Ef. 4:24.