Jehofa O Buša Ka Kwelobohloko

HISTORING ka moka babuši ba bantši bao e lego batho ba dirišitše matla ka go se šetše mo go hlokago kwelobohloko bakeng sa tlaišego ya balata ba bona. Lega go le bjalo, Jehofa o neile se se fapanego ka go kgetha setšhaba—e lego Isiraele—gomme a se buša ka kwelobohloko.

Ge ba-Isiraele e be e sa le makgoba a Egipita ya bogologolo, Jehofa o ile a kwa dillo tša bona tša go llela thušo. “Mehlakong ya bôná yohle, ó be a hlaka le Yêna; . . . a ba lokolola ka leratô la xaxwe le ka xo ba hlômôxêla pelo.” (Jesaya 63:9) Jehofa o ile a phološa Isiraele, a ba nea dijo tša mohlolo gomme a ba iša nageng ya gabo bona.

Seka sa Jehofa sa kwelobohloko se ile sa bontšhwa ka mo go tšwelago pele melaong yeo a e neilego setšhaba se. O ile a laela ba-Isiraele gore ba dirišane le dišuana, bahlologadi le badiiledi ka kwelobohloko. Ba be ba se ba swanela go ikhola ka mo go sa lokago ka digole.

Molao o be o nyaka gore kwelobohloko e bontšhwe go bao ba hlokago. Badiidi ba be ba ka budutša ka morago ga puno. Dikoloto di be di phumolwa ngwageng wa Sabatha (wa bošupa). Naga ka moka ya bohwa yeo e bego e rekišitšwe e be e swanelwa ke go bušetšwa ka ngwaga wa (bo-50) wa Megobo. Ancient Israel—Its Life and Institutions e bega gore: “Isiraeleng go be go tloga go se na dihlopha tša tša leago go ya ka kgopolo ya mehleng yeno.” “Mehleng ya bofaladi, ba-Isiraele ka moka ba ile ba thabela boemo bjo bo nyakilego bo swana bja go phela.”—Lefitiko 25:10; Doiteronomio 15:12-14; 24:17-22; 27:18.

Go Ekiša Kwelobohloko ya Jehofa

Bahlanka ba Modimo ba tutuetšwa ke kwelobohloko ya gagwe. Ka mohlala, historing ka moka dikgoši tše di sa tšwago go bewa di ile tša bolaya ditho tše di šetšego tša lešika la bogoši la nakong e fetilego. Eupša mohlanka wa Jehofa Dafida ga se a ka a dira se. Ka morago ga lehu la Kgoši Saulo, Dafida o ile a šireletša Mefibosethe yo e bego e le setlogolo se se šetšego sa Saulo e bile e le moja-bohwa. “Kxoši ya xauxêla Mefibosethe morwa wa Jonathane morwa wa Saulo.”—2 Samuele 21:7.

Ga go na motho yo mongwe yo a ekišitšego kwelobohloko ya Jehofa go etša ge Jesu a dirile. Bontši bja mehlolo ya gagwe bo be bo tutuetšwa ke kwelobohloko ya Modimo. Sebakeng se sengwe molephera o ile a mo kgopela gore: “Morêna, xe O ka rata, O ka kxôna xo mphodiša!” Jesu o ile a tutuetšwa ke lešoko gomme a mo kgwatha a re: “Ke rata fao; fôla!” (Mareka 1:40-42) Ka nako e nngwe mašaba a mantši a ile a latela Jesu. Gare ga lešata le legolo, Jesu o ile a lebiša tlhokomelo go difofu tše pedi tšeo di bego di lla ka gore: “Re xauxêlê, Morêna Morwa wa Dafida! . . . Jesu a ba šôkêlwa, a kxwatha mahlô a bôná, ba napa ba bôná è sa le semetseng.”—Mateo 20:29-34.

Mašaba a mantši ga se a ka a fokodiša maikwelo a Jesu bakeng sa ba bangwe. Ka ge ba be ba se ba ja ka nako e teletšana, lebakeng le lengwe o ile a bolela gore: “Mašaba á ke a kwêla bohloko.” Ka gona a ba fepa ka mohlolo. (Mareka 8:1-8) Ge Jesu a be a le leetong, ga se feela gore o ile a ruta mašaba eupša o be a šetša dinyakwa tša bona. (Mateo 9:35, 36) Ka morago ga leeto le le bjalo, Jesu le barutiwa ba gagwe ba be ba se na le nako ya go ikhutša gaešita le ya go ja dijo. Pego ya Beibele e re botša gore: “Ba tloxa ka le-sela-watlê, ba ya felô xo lexo lešôka, mo xo sexo batho. Fêla, mašaba a ba bôna xe ba e-ya; ba bantši ba mo tseba. Ba tla bà e-tšwa metseng bà sepela ka dinaô, bà kxanyêlêla felo moo a yaxo, ba bokana à sešo a fihla. Jesu xe a tšwêlêla a bôna è le lešaba le lentši; a ba šôkêlwa xobane ba be ba le byalo ka dinku tše di se naxo modiši; a thôma xo ba ruta ka ditaba tše ntši.”—Mareka 6:31-34.

Seo se bego se tutuetša Jesu e be e se feela bolwetši le bodiidi tša batho, eupša e be e le boemo bja bona bja moya. Baetapele ba bona ba be ba ikhola ka bona, ka gona Jesu “[o ile] a ba šôkêlwa.” Lentšu la Segerika bakeng sa “šôkêlwa” le bolela “go kwa mala a fišega.” Jesu e be e le motho wa kwelobohloko e le ka kgonthe!

Kwelobohloko Lefaseng le Šoro

Jesu Kriste mo nakong ye ke Kgoši ya Mmušo wa legodimong wa Jehofa. Go etša ge a dirile Isiraeleng ya bogologolo, lehono Modimo o buša batho ba gagwe ka kwelobohloko. “E tlo ba batho ba-ka!—Ó r’yalo Morêna.—Ka lôna ’tšatši leo ke le beilexo ba tlo ba lehumô la-ka; ke tlo ba setša.”—Maleaki 3:17.

Bao ba nyakago go ba baamogedi ba kwelobohloko ya Jehofa ba swanetše go ekiša ditsela tša gagwe. Ka kgonthe, re phela lefaseng leo go lona batho ba kgahlegelago kudu go šireletša mokgwa wa bona wa go phela go e na le go thušeng bao ba hlokago. Batho bao ba bušago gantši ba tsoma poelo ka go bea tšhireletšego ya bašomi le bareki kotsing. Go 2 Timotheo 3:1-4, Beibele e hlalosa ka mo go nepagetšego boemo bja boitshwaro bja mehleng ya rena bjo bo bolailego kwelobohloko ka dipelong tša ba bantši kudu.

Lega go le bjalo, mo gongwe re ka hwetša dibaka tša go bontšha kwelobohloko. Na re ka nea baagišani ba rena thušo e itšego e nyakegago? Na go na le motho yo a babjago yo re ka mo etelago? Na re ka homotša bao ba gateletšegilego ka go dumelelana le keletšo e rego: “Le tsošê ba dipelo tše di tapilexo; Le thekxetšê bafokodi”?—1 Ba-Thesalonika 5:14.

Kwelobohloko gape e tla re thuša go phema go arabela ka bogale ge ba bangwe ba dira diphošo. Re botšwa gore: “Tše e kexo ké sekxoro, le bonaba, le mašata, le maroxa, a di bê kxolê le lena, le bobe byohle. Sa lena a e bê xo dirana ka botho le ka bonôlô, le xo xauxêlana byalo ka xe Modimo le Yêna a Le xauxetše ka Kriste.”—Ba-Efeso 4:31, 32.

Kwelobohloko e tla re thuša go phema tshekamelo ya go diriša matla gampe. Beibele e re: “Aparang kxauxêlô le botho le boikokobetšô le bolêta le xo se fêle pelo.” (Ba-Kolose 3:12) Boikokobetšo bo dira gore re kgone go ipea boemong bja bao ba lego ka tlase ga tlhokomelo ya rena. Go ba ba ba kwelago bohloko go akaretša go ba ba ikokobeditšego le ba leka-lekanego go e na le go ba ba go lego thata go kgahlišwa. Bokgoni ga se bja swanela go ba seširelo sa go swara batho bjalo ka ge eka e fo ba dikarolo tša motšhene. Gape, banna ba kwelobohloko ka lapeng ba gopola gore basadi ba bona ke dibjana tše fokolago. (1 Petro 3:7) Go naganišiša ka mohlala wa Jesu wa kwelobohloko go ka re thuša go se ka moka.

Ka ge Jesu a ile a kwela batho bohloko kudu nakong ya bodiredi bja gagwe bja lefaseng, re ka kgonthišega gore mo nakong ye ke Mmuši wa kwelobohloko gomme o tla tšwela pele go ba yena. Psalme 72 e bolela ka yena ka mokgwa wa boporofeta gore: “Ó tlo ahlolêla babôtlana ba sethšaba, ó tlo thuša bana ba bahumanexi; ’me bapateletši a ba šilakanya. Mmušô wa xaxwe o tlo xóma ka lewatlê thokô tšohle, xo tloxa nokeng xo fihla mafêlêlong a lefase. Ó tlo xauxêla mosenyi le mohloki; meôya ya bahumanexi ó tlo e phološa.”—Psalme 72:4, 8, 13.

Lentšu la Modimo le bolela e sa le pele gore: “Ó tlo ahlolêla babôtlana ka xo se hlaole motho, bahlaki ó tlo ba êmêla ka xo loka; . . . a bolaye e mobe.” Ka morago ga go hlalosa kamoo gaešita le batho ba bangwe ba šoro, ba ba swanago le dibata ba tlago go fetoša ditsela tša bona ka gona, boporofeta bo tšwela pele gore: “Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:4-9) Boporofeta bjo bo holofetša e le ka kgonthe lekoko la lefase ka bophara la batho bao ba tsebago Jehofa gomme ba ekiša ditsela tša gagwe tša kwelobohloko!