Na Phuthego ya Gabo Lena e na le Tšhemo e Kgolo?
1 Go tloga metseng ya Judea go ya mafelong a magaeng a Galilea, Jesu o ile a nea bohlatse ka mo go tseneletšego tšhemong ka moka e kgolo ya Isiraele ya bogologolo. (Mar. 1:38, 39; Luka 23:5) Le rena re swanetše go fihlelela batho ba bantši kamoo re ka kgonago ka gona ka ditaba tše dibotse. (Mar. 13:10) Lega go le bjalo, se e ka ba tlhohlo. Ka baka la’ng?
2 Diphuthego tše dintši di na le tšhemo yeo karolo ya yona e kgolo e lego ya mafelo a magaeng, ye e akaretšago disekwere khilomithara tše makgolo-kgolo. Ba diphuthego tše di bolelago maleme a šele ba ka šoma mafelong a toropong a nago le baagi ba bantši, ba tsoma batho ba bolelago leleme la gabo bona. Re ka dira’ng go thuša batho ba dulago mašemong a magolo bjalo go ithuta therešo ka Jehofa, ka Jesu le ka Mmušo?
3 Rulaganya ka Kelohloko: Molebeledi wa tirelo le mohlanka wa tšhemo ba swanetše go lomaganya maiteko a phuthego a go phetha mo gontši kudu. Mohlomongwe go ka rulaganywa Mekibelo e kgethegilego nakong yeo ba bantši ba kgonago go fetša letšatši ka moka modirong. Ge go šongwa mašemo a kgole, rulaganyetšang go fetša matšatši a matelele tirelong ya tšhemo ge e ba go kgonega, le tšea dijo tšeo le ka di thabelago nakong ya mosegare. Le ka kopana bakeng sa tirelo ka pela go feta ka mo go tlwaelegilego gore le dumelele nako ya go tšea leeto la go ya tšhemong goba la swarela seboka sa tirelo kgaufsi le lefelo leo le tlago go šongwa. Bolokang dihlopha tša banamedi ba dikoloi e le tše dinyenyane e le gore ka moka ga bona ba swarege tirelong. Rulaganyetšang go šoma mafelong a magaeng nakong ya ngwaga ya ge boemo bja leratadima le maemo a ditsela e le a mabotse.
4 Bao ba šomago mašemong a bolelago leleme le šele ba ka boloka nako e bohlokwa ka gore ba be le lelokelelo le lego nakong la maina le diaterese le mmapa wa gona bjale. Rulaganyang mašemo e le gore sehlopha seo se lego tirelong se ka etela diatereseng ka moka tša lefelong leo ka kakaretšo.
5 Kgonthišetšang gore le tšea sesola se se lekanego sa dipuku. Ge e ba tšhemo e šongwa ka sewelo, e ka ba mo go swanetšego go tlogela pampišana goba makasine wa kgale magaeng ao go se nago batho go ona. Ge e ba pampišana ya Na o tla Rata go Tseba mo go Oketšegilego ka Beibele? e le gona ka leleme la gabo lena, e sepedišetšeng yo mongwe le yo mongwe yo le gahlanago le yena gomme le tlogele e tee magaeng ao go se nago batho.
6 Dirišanang ka Botlalo: Go šoma tšhemo e kgolo go nyaka tirišano ya yo mongwe le yo mongwe ka phuthegong. Ge go nyakega gore go dirišwe dikoloi kudu, bao ba sepelago gotee ba ka thušana ka ditshenyegelo tša peterole. Le swanetše go diriša kahlolo e botse ge le hwetša beng ba dintlo bao ba ratago poledišano. Dulang le phafogetše go nyakega ga go fihlelela bohle bao ba lego tšhemong, gomme le naganele bao ba letilego sehlopheng sa koloi yeo le sepelago ka yona. Ge e ba le rata go tšwetša pele poledišano le motho yo a thabelago ka nako e telele, na go ka dirwa dithulaganyo gore sehlopha ka moka se se ke sa ema ka lena?
7 Dirang dithulaganyo tše di tiilego gore le latelele kgahlego. Ka ntle le aterese, lekang go hwetša nomoro ya mogala ya motho yo a thabelago e le gore le kgone go ikgokaganya le yena le go nea bohlatse ka mo go tšwelago pele ka mogala. Ge e ba ditsela tša mafelo a magaeng di se na maina goba dintlo di se na dinomoro, thala mmapa ka kelohloko goba o ngwale tlhaloso ya kamoo o ka hwetšago motho yo a thabelago ge o dira leeto la go boela.
8 Ke tokelo gakaakang go rena go phethagatša ditaelo tša Jesu tše di rego: “Motseng goba motsaneng le ge e le ofe wo le tsenago go wona, le tsome yo go wona a swanelegago”! (Mat. 10:11, NW) Ka kgonthe Jehofa o tla šegofatša maiteko a lena ge le ikgafa ka go rata modirong wo wo o holago kudu!