Go Ithuta go a Putsa

NA O kile wa bogela batho ba kgetha dienywa? Ba bantši ba lebelela mmala le bogolo bja tšona go bona ge e ba di budule. Batho ba bangwe ba dupa seenywa. Ba bangwe ba a se kgoma, gaešita le go se pinyeletša. Ba bangwe ba a se kala, ba di swara ka diatleng ka bobedi go bona seo se nago le meetse a mantši. Batho ba ba nagana’ng? Ba seka-seka taba, ba ela diphapano, ba gopola dikgetho tša nakong e fetilego gomme ba bapiša seo ba se bonago gona bjale le seo ba šetšego ba se tseba. Ba letetšwe ke moputso o thabišago ka gobane ba ela hloko taba.

Ee, meputso ya go ithuta Lentšu la Modimo ke e megolo kudu. Ge thuto e bjalo e tšea sebaka sa bohlokwa maphelong a rena, tumelo ya rena e a tia, lerato la rena e ba le le tseneletšego, bodiredi bja rena e ba bjo bo enywago kudu gomme diphetho tšeo re di dirago di nea bohlatse bjo bogolo bja temogo le bohlale bja Modimo. Mabapi le meputso e bjalo, Diema 3:15 e re: “Talama tša xaxo tšohle xa di bo fihlêle.” Na o hwetša meputso e bjalo? Lebaka e ka ba tsela yeo o ithutago ka yona.—Ba-Kol. 1:9, 10.

Thuto ke eng? Ke se se fetago go fo bala. E akaretša go diriša matla a gago a monagano tsheka-tshekong e etšwego hloko goba e tseneletšego ya taba. E akaretša go seka-seka seo o se balago, go se bapiša le seo o šetšego o se tseba, le go lemoga mabaka ao a neilwego bakeng sa dipolelo tšeo di boletšwego. Ge o ithuta, nagana ka mo go tseneletšego ka dikgopolo le ge e le dife tšeo di hlalositšwego tšeo e ka bago e le tše difsa go wena. Gape, ela hloko kamoo wena ka noši o ka dirišago keletšo ya Mangwalo ka mo go tletšego. Bjalo ka Hlatse ya Jehofa, o bile o tla nyaka go nagana ka dibaka tšeo go tšona o ka dirišago taba go thuša ba bangwe. Go molaleng gore thuto e akaretša le go naganišiša.

Go Tsena Boemong bjo bo Swanetšego bja Monagano

Ge o lokišetša go ithuta, o ntšha dilo tšeo di swanago le Beibele ya gago, dikgatišo le ge e le dife tšeo o rulaganyetšago go di diriša, phentshele goba pene mohlomongwe le puku ya go ngwalela dintlha. Eupša na o lokišetša le pelo ya gago? Beibele e re botša gore Esera “pelo ya xaxwe e be e sa lese xo hlwa è nyaka molaô wa Morêna, le xo dira se se bolêlwaxo ke wôna, le xo ruta Isiraele melaô le dithswanêlô.” (Esera 7:10) Go lokišetšwa mo go bjalo ga pelo go akaretša’ng?

Thapelo e re dira gore re kgone go thoma thuto ya Lentšu la Modimo ka boemo bjo bo swanetšego bja kgopolo. Re nyaka gore pelo ya rena, motho wa ka gare-gare e amogele thuto yeo Jehofa a re neago yona. Mathomong a lenaneo le lengwe le le lengwe la thuto, lopa Jehofa bakeng sa thušo ya moya wa gagwe. (Luka 11:13) Mo kgopele gore a go thuše go kwešiša se se bolelwago ke seo o tlago go ithuta sona, kamoo se sepedišanago le merero ya gagwe ka gona, kamoo se ka go thušago ka gona go lemoga se sebotse le se sebe, kamoo o swanetšego go diriša melao ya gagwe ya motheo bophelong bja gago le kamoo taba e kgomago tswalano ya gago le yena ka gona. (Die. 9:10) Ge o dutše o ithuta tšwela pele o ‘kgopela Modimo’ bohlale. (Jak. 1:5) Itlhahlobe ka potego go ya ka seo o ithutago sona, ge o dutše o tsoma thušo ya Jehofa ge o tloša dikgopolo tše fošagetšego goba dikganyogo tše kwešago bohloko. Ka mehla “Ôpêlêlang Morêna ka xo mo leboxa” bakeng sa dilo tšeo a di utollago. (Ps. 147:7) Tsela ye ya go ithuta ka thapelo e lebiša go batamelaneng le Jehofa ka ge e re dira gore re kgone go arabela ge a bolela le rena ka Lentšu la gagwe.—Ps. 145:18.

Go amogela mo go bjalo go hlaola batho ba Jehofa go barutwana ba bangwe. Gare ga bao ba se nago boineelo go Modimo, ke mo go tlwaelegilego go belaela le go hlohla seo se ngwadilwego. Eupša bjoo ga se boemo bja rena bja kgopolo. Re bota Jehofa. (Die. 3:5-7) Ge go e-na le seo re sa se kwešišego, ga re phethe ka boikgogomošo gore se swanetše go ba se fošagetše. Ge re dutše re tsoma le go epa dikarabo, re letela Jehofa. (Mika 7:7) Go etša Esera, re na le pakane ya go diragatša le go ruta seo re ithutago sona. Ka baka la tshekamelo ye ya pelo, re tla buna meputso e humilego thutong ya rena.

Kamoo go ka Ithutwago ka Gona

Go e na le go fo thoma ka serapa 1 gomme wa bala go fihla mafelelong, sa pele tšea nako o hlahloba sehlogo ka moka goba kgaolo ya taba. Thoma ka go hlahloba mantšu a sehlogo. Se ke sehlogo seo o tlago go ithuta sona. Ke moka ela hloko kamoo dihlogwana di sepedišanago le sehlogo se segolo ka gona. Hlahloba diswantšho le ge e le dife, ditšhate goba mapokisi a rutago ao a sepedišanago le taba. Ipotšiše gore: ‘Go ya ka kakaretšo ye, ke letetše go ithuta’ng? Se se tla nkhola ka tsela efe?’ Se se nea thuto ya gago tlhahlo.

Bjale hwetša dintlha. Dihlogo tšeo di ithutwago tša Morokami le dipuku tše dingwe di akaretša dipotšišo tšeo di gatišitšwego. Ge o dutše o bala serapa se sengwe le se sengwe, ke mo go holago go swaya dikarabo. Gaešita le ge go se na dipotšišo tša thuto, o sa dutše o ka swaya dintlha tša bohlokwa tšeo o nyakago go di gopola. Ge e ba kgopolo e le e mpsha go wena, diriša nako e oketšegilego go se nene go yona gore o kgonthišetše gore o e kwešiša gabotse. Phafogela diswantšho goba ditaba tša go bea mabaka tšeo di tlago go go hola bodireding bja tšhemo goba tšeo di ka dirišwago kabelong e tlago ya polelo. Nagana ka batho ba itšego bao tumelo ya bona e ka matlafatšwago ge o ka abelana le bona seo o ithutago sona. Swaya dintlha tšeo o nyakago go di diriša, gomme o di boeletše ge o phetha thuto ya gago.

Ge o dutše o seka-seka taba, bala mangwalo ao a bontšhitšwego. Lekodišiša kamoo lengwalo le lengwe le le lengwe le sepedišanago ka gona le moko wa kakaretšo wa serapa.

O ka kopana le dintlha tšeo o sa di kwešišego di tloga fase goba tšeo o tla ratago go di nyakišiša ka mo go tseneletšego. Go e na le go di dumelela gore di go aroše, di swaye gore o di hlahlobe ka mo go tšwelago pele ka morago. Dintlha gantši di hlaloswa ka mo go kwagalago ge o dutše o bala taba ka moka. Ge go se bjalo, o ka dira nyakišišo e oketšegilego. Ke dilo dife tšeo di ka elwago hloko bakeng sa go newa tlhokomelo e bjalo? Mohlomongwe go ka be go e-na le lengwalo leo le tsopotšwego leo o sa le kwešišego ka mo go kwagalago. Goba o ka ba o sa kwešiše le semeetseng kamoo le šomago ka gona tabeng yeo e ahla-ahlwago. Mohlomongwe o nagana gore o kwešiša kgopolo e itšego tabeng eupša e sego ka mo go lekanego mo e lego gore o ka e hlalosetša motho yo mongwe. Go e na le go fo e tshediša mahlo, e ka ba gabohlale gore o dire nyakišišo ka yona ka morago ga ge o feditše seo o thomilego go ithuta sona.

Ge moapostola Paulo a be a ngwala lengwalo la gagwe le le yago go Bakriste ba ba-Hebere, o ile a khutša ganyenyane bogareng bja lona gomme a re: “Taba-kxolo [še].” (Ba-Heb. 8:1) Na o ke o iphe kgopotšo e bjalo nako le nako? Ela hloko lebaka leo ka lona Paulo a ilego a dira bjalo. Dikgaolong tša pele tša lengwalo la gagwe le le buduletšwego o be a šetše a bontšhitše gore Kriste e le Moperisita yo Mogolo kudu wa Modimo o be a tsene legodimong ka bolona. (Ba-Heb. 4:14–5:10; 6:20) Lega go le bjalo, ka go kgetholla le go gatelela taba yeo ya bohlokwa mathomong a kgaolo 8, Paulo o ile a lokišetša menagano ya babadi ba gagwe gore ba nagane ka mo go tseneletšego mabapi le kamoo e tswalanago le maphelo a bona ka gona. O ile a bontšha gore Kriste o be a tšwetše pele ga sefahlego sa Modimo bakeng sa bona gomme o be a butše tsela ya gore bona ka noši ba tsene “Sekxethweng” sa legodimong. (Ba-Heb. 9:24; 10:19-22) Go kgonthišetšwa ga kholofelo ya bona go be go tla thuša go ba tutueletša go diriša keletšo e tšwelago pele yeo lengwalo le le bego le e hupere mabapi le tumelo, kgotlelelo le boitshwaro bja Bokriste. Ka mo go swanago, go lebiša tlhokomelo dintlheng tše kgolo ge re ithuta go tla re thuša go lemoga go gola ga sehlogo gomme go tla nweletša menaganong ya rena mabaka a kwagalago a go gata mogato ka go dumelelana le sona.

Na thuto ya gago ya motho ka noši e tla go tutueletša gore o gate mogato? Ye ke potšišo ya bohlokwa. Ge o ithuta selo, ipotšiše gore: ‘Se se swanetše go kgoma bjang boemo bja-ka bja kgopolo le dipakane tša-ka bophelong? Nka diriša bjang tsebišo ye ge ke rarolla bothata, go dira phetho goba go fihlelela pakane? Nka e diriša bjang le lapa la-ka, bodireding bja tšhemo le ka phuthegong?’ Ela dipotšišo tše hloko ka thapelo, o nagana ka maemo a kgonthe ao o dirišago tsebo ya gago go ona.

Ka morago ga ge o feditše kgaolo goba sehlogo, diriša nako bakeng sa poeletšo e kopana. Bona ge e ba o ka gopola ditaba tša bohlokwa le ditlhaloso tšeo di di thekgago. Mogato wo o tla go thuša go boloka tsebišo bakeng sa go e diriša nakong e tlago.

Seo o Swanetšego go Ithuta Sona

Bjalo ka batho ba Jehofa, re na le mo gontši mo re ka ithutago gona. Eupša re swanetše go thoma kae? Re dira gabotse ge re ithuta temana ya letšatši le lengwe le le lengwe le ditlhaloso tšeo di tšwago go Go Hlahloba Mangwalo ka Mehla. Beke e nngwe le e nngwe re ba gona dibokeng tša phuthego gomme thuto yeo e phethilwego ge di lokišeletšwa e tla re thuša gore re holege ka mo go oketšegilego kudu. Go okeletša go se, ba bangwe ba dirišitše nako ka bohlale go ithuta tše dingwe tša dikgatišo tša rena tša Bokriste tšeo di gatišitšwego pele ga ge ba ithuta therešo. Ba bangwe ba kgetha karolo e itšego ya mmalo wa bona wa beke le beke wa Beibele gomme ba ithuta ka mo go tseneletšego ka ditemana tšeo.

Go thwe’ng ge e ba maemo a gago a sa go dumelele go ithuta ka kelohloko tsebišo ka moka yeo e tlago go ahla-ahlwa dibokeng tša phuthego tša beke le beke? Phema mereo ya go fo kga taba ka godimo feela gore o fete go yona goba se sebe le go feta, gore o se ithute taba le ge e le efe ka gobane o ka se kgone go ithuta yona ka moka. Go e na le moo, lekanya bogolo bja seo o ka kgonago go ithuta sona, gomme o ithute sona gabotse. Dira bjalo beke e nngwe le e nngwe. Ge nako e dutše e sepela, katanela go katološa gore o akaretše diboka tše dingwe.

‘Aga Ntlo ya Gago’

Jehofa o lemoga gore dihlogo tša malapa di swanetše go šoma ka thata gore di fepe baratiwa ba tšona. Diema 24:27 e re “Phêtha medirô ya xaxo ya ntlê, O itemêlê thšemo.” Lega go le bjalo, dinyakwa tša moya tša lapa la gago di ka se ke tša hlokomologwa. Ke ka baka leo, temana e tšwelago pele ka gore: “E bê xôna O axaxo ntlo ya xaxo.” Dihlogo tša malapa di ka dira se bjang? Diema 24:3 e re: “[Lapa le, NW] thêwa ka thlaoloxanyô.”

Temogo e ka hola lapa la gago bjang? Temogo ke bokgoni bja monagano bja go bona go feta seo se lego molaleng. Go ka bolelwa gabotse gore thuto e atlegago ya lapa e thoma ka go hlahloba lapa la gago ka bolona. Ditho tša lapa la gago di tšwela pele bjang moyeng? Theetša ka kelohloko ge o boledišana le tšona. Na go na le moya wa go belaela goba wa sekgopi? Na dilo tše di bonagalago ke tša bohlokwa kudu? Ge o le bodireding bja tšhemo le bana ba gago, na ba ikwa ba lokologile go itsebiša pele ga dithaka tša bona e le Dihlatse tša Jehofa? Na ba thabela lenaneo la gago la go bala le go ithuta Beibele le le lapa? Na ba dira tsela ya Jehofa tsela ya bona ya go phela e le ka kgonthe? Go lekola ka kelohloko go tla utolla seo wena bjalo ka hlogo ya lapa o swanetšego go se dira e le gore o thee le go aga dika tša moya go setho se sengwe le se sengwe sa lapa.

Hlahloba Morokami le Phafoga! bakeng sa dihlogo tšeo di bolelago ka dinyakwa tše itšego. Ke moka o botše lapa e sa le pele seo le tlago go ithuta sona e le gore le ka kgona go naganišiša ka tsebišo. Boloka moya wa lerato nakong ya thuto. Ka ntle le gore o omanye goba o hlabiše setho le ge e le sefe sa lapa dihlong, gatelela bohlokwa bja taba yeo e ahla-ahlwago, o bontšha kamoo e šomago ka gona ka go lebanya dinyakweng tša lapa la gago. Dira gore setho se sengwe le se sengwe se akaretšwe. Thuša yo mongwe le yo mongwe gore a bone kamoo Lentšu la Jehofa e lego le “phethagetšego” ka gona ka go mo nea seo se nyakegago e le ka kgonthe bophelong.—Ps. 19:7, NW.

Go Buna Meputso

Batho bao ba šetšago bao ba se nago kwešišo ya moya ba ka ithuta ka legohle, ka ditiragalo tša lefase gaešita le ka bona ka noši eupša ba palelwa ke go kwešiša tlhaloso ya kgonthe ya seo ba se bonago. Ka lehlakoreng le lengwe, ka thušo ya moya wa Modimo batho bao ba ithutago Lentšu la Modimo ka mehla ba ka lemoga dilong tša mediro ya Modimo, go phethagala ga boporofeta bja Beibele le go utologa ga morero wa Modimo bakeng sa go šegofatša batho bao ba kwago.—Mar. 13:4-29; Ba-Roma 1:20; Kut. 12:12.

Le ge seo e le se se kgahlišago gakaalo, ga se sa swanela go re dira gore re ikgogomoše. Go e na le moo, go hlahloba Lentšu la Modimo letšatši le letšatši go re thuša gore re dule re ikokobeditše. (Doit. 17:18-20) Go bile go re šireletša ‘boforeng bja sebe’ ka gobane ge Lentšu la Modimo le phela ka dipelong tša rena, go ipiletša ga sebe ga go bonale go ka fenya boikemišetšo bja rena bja go se ganela. (Ba-Heb. 2:1; 3:13; Ba-Kol. 3:5-10) Ka gona, re tla “[swara] ka tsela ye e loketšexo ba Morêna, e bê xo mo kxahla xohle, le xô e enywa dienywa ka medirô e botse yohle.” (Ba-Kol. 1:10) Go dira bjalo ke pakane ya rena ge re ithuta Lentšu la Modimo, gomme go e fihlelela ke moputso o mogolo kudu.