Ba Thušeng go Hwetša Bohlatse bjo bo Oketšegilego
1 Ge re dutše re bolela ditaba tše dibotse, gantši re gahlana le batho bao ba dulago ka ntle ga tikologo ya gabo rena goba bao ba bolelago polelo e nngwe, go akaretša le polelo ya diatla. Ba bangwe bao re ilego ra thabela dipoledišano tša Beibele le bona ba ka huduga tikologong ya gabo rena. Re ka rulaganyetša bjang gore batho ba bjalo ba hwetše bohlatse bjo bo oketšegilego? Ka go diriša fomo ya Hle Latelelang (S-43).
2 Batho gantši ba theetša ditaba tše dibotse ka kelohloko kudu ge ba di botšwa ka leleme la gabo bona. (Dit. 22:1, 2) Ge re gahlana le batho ba, re tla nyaka go diriša ka bohlale sedirišwa se sefsa sa Good News for People of All Nations seo re se amogetšego dikopanong tša rena tše di sa tšwago go feta. Ka gona, maemong a mantši, ge re gahlana le motho yo a bolelago polelo e nngwe, re swanetše go tlatša fomo gaešita le ge motho yoo a sa bontšhe kgahlego molaetšeng wa Mmušo. Lega go le bjalo, moo go nago le baagi ba bantši bao ba bolelago polelo yeo re sa e tsebego bao ba hwetšago bohlatse ka mehla, go ka no se be bohlokwa go tlatša fomo ye ka ntle le ge e ba ba bontšha kgahlego.
3 Go Tlatša Fomo: Ka bohlale leka go hwetša leina la motho, aterese ya gagwe le dinomoro tša gagwe tša mogala. Bontšha tekanyo ya kgahlego yeo e bontšhitšwego, nako yeo motho a ka hwetšwago ka yona, puku yeo a e sepedišeditšwego goba yeo a e kgopetšego le leleme leo motho a le kwešišago gabotse. Ka morago ga go tlatša fomo, e nee mongwaledi wa phuthego ka go akgofa, gomme yena o tla e romela phuthegong goba sehlopheng se se swanetšego.
4 Go Romela Fomo: Ge e ba mongwaledi a sa tsebe gore ke phuthego efe goba sehlopha sefe seo se swanetšego go amogela fomo goba a se na aterese ya sona ya poso, a ka leletša Lefapha Leo le Rulaganyago Tšhemo (Territory Desk) ofising ya lekala mogala bakeng sa go hwetša tsebišo e nyakegago. Ga go sa nyakega gore o tsebiše molebeledi wa motse ge o romela fomo ye.
5 Nako le nako ge phuthego goba sehlopha se amogela fomo e tladitšwego ya Hle Latelelang, dithulaganyo di swanetše go dirwa tša gore go etelwe motho yoo ka ntle le go senya nako. Ge re dutše re kgatha tema ya rena ka mafolofolo, re ka kgodišega gore Jehofa o tla bula dipelo tša bao ba “hlaoletšwexo bophelô byo bo sa felexo.”—Dit. 13:48.