Diriša Dimakasine Bodireding bja Gago
1, 2. Morokami le Phafoga! di ile tša kgoma bjang maphelo a batho?
1 “Ke tše di kgahlišago, tšeo di lego nakong gomme ke tše di tutuetšago.” “Ke dimakasine tše di tutuetšago kudu go feta tšeo nkilego ka di bala.” Ditlhaloso tše di hlalosa gabotse kamoo babadi lefaseng ka moka ba ikwago ka gona ka Morokami le Phafoga! Ke therešo gore dimakasine tša rena di ipontšhitše e le didirišwa tša bohlokwa kudu tabeng ya go fihlelela “batho bohle” ka ditaba tše dibotse.—1 Tim. 2:4.
2 Monna yo mongwe yo a tlogago a rata mošomo wa gagwe o ile a hwetša makasine wa Phafoga! wo o bolelago ka taba yeo e ilego ya mo kgahla. Ka morago, o ile a bala tokollo yeo e sepedišanago le wona ya Morokami, yeo e bego e e-na le sehlogo seo se bego se mo tutueletša gore a hlahlobišiše tumelo yeo a bilego go yona bophelo ka moka ya go dumela go Boraro botee. Sehlogo se se ile sa tsoša kgahlego ya gagwe. Dikgweding tše tshela ka morago o ile a kolobetšwa. Monna yo mongwe o be a amogela dimakasine ka mehla eupša a sa di bale le gatee. Ka lehlakoreng le lengwe, mosadi wa gagwe o be a efoga go kopana le Dihlatse eupša a bala dimakasine tšeo di di tlogeletšego monna wa gagwe. Pelo ya gagwe e ile ya kgongwa ke kholofetšo ya Beibele ya lefase la paradeise leo le tletšego ka batho ba lokilego. Ge nako e dutše e e-ya, yena, morwa wa gagwe le ngwanabo ba ile ba ba bahlanka ba Jehofa.
3. Mohola wa go sepediša dimakasine ka bobedi bja tšona ke ofe?
3 Di Sepediše Gotee: Go etša ge mehlala yeo e sa tšwago go ahla-ahlwa e bontšha, re ka se ke ra kgonthišega gore ke bomang bao ba tlago go bala dimakasine tša rena goba gore ke eng seo se ka tsošago kgahlego ya bona. (Mmo. 11:6) Ka gona, ke mo go holago go sepediša Morokami le Phafoga! ka bobedi bja tšona, gaešita le ge ka kakaretšo re gatelela makasine o tee feela therong ya rena. Maemong a mangwe, e ka ba mo go swanetšego go sepediša ditokollo tše di fapanego tša dimakasine tša rena ge re etetše mong wa ntlo.
4. Re ka rulaganya bjang modiro wa rena wa dimakasine?
4 Ke mo go holago go kgetha letšatši le tee bekeng e nngwe le e nngwe bakeng sa go tšea karolo modirong wa dimakasine. Go 2005 Calendar of Jehovah’s Witnesses, Mokibelo o mongwe le o mongwe o kgethilwe e le “Letšatši la Dimakasine.” Ke therešo gore ka ge maemo a tikologong le a motho ka noši a sa swane, ba bangwe ba ka beela letšatši le lengwe ka thoko bakeng sa go lebiša tlhokomelo ya bona go abeng dimakasine tša rena. Na ye ke karolo ya thulaganyo ya gago ya beke le beke?
5. Ke dibaka dife tšeo re swanetšego go di phafogela ge re sepediša dimakasine, gomme ke’ng se se ka re thušago go dira bjalo?
5 Ipeele Pakane: Go ipeela pakane kgwedi le kgwedi ya go sepediša dimakasine go ka re thuša gore re lebiše tlhokomelo ya rena kudu tabeng ya go sepediša dimakasine. Na o na le tsejana ya dimakasine? Na o sepediša dimakasine go bao o gahlanago le bona bodireding? Na o ka sepediša dimakasine modirong wa setarateng, tikologong ya tša kgwebo le mafelong a batho bohle? Na o sepela le dimakasine ge o le leetong, ge o le mabenkeleng le ge o yo phetha mabaka? Diriša sebaka se sengwe le se sengwe ka mo go swanetšego bakeng sa go thuša ba bangwe gore ba holwe ke Morokami le Phafoga!
6. Ke ka tsela efe re ka dirišago ditokollo tša kgale tša dimakasine gabotse?
6 Le gona re ka dira gore go sepediša dimakasine tša kgale tšeo re sa dutšego re na le tšona e be pakane ya rena. Gaešita le ge dimakasine di se tša sepetšwa kgweding yeo di lokolotšwego ka yona goba dikgweding tše pedi ka morago ga ge di lokolotšwe, tsebišo ya tšona e sa dutše e le ya bohlokwa. Di sepedišetše batho bao ba bontšhago kgahlego. Bathong ba bantši, dimakasine tša Morokami le Phafoga! e be e dutše e le “lentšu le bolêlwaxo lebakeng la xôna.” (Die. 25:11) Anke re di dirišetšeng go thuša ba bangwe ba dimilione gore ba tsebe Jehofa le go mo hlankela.