THUTO 6

Morero wa Lengwalo o Hlalositšwe Gabotse

Ditiro 17:2, 3

KA BORIPANA: O se ke wa no balela batheetši lengwalo ke moka wa fetela ntlheng e latelago. Dira gore ba bone kamoo lengwalo leo o le badilego le thekgago taba ya gago.

O KA DIRA SEO BJANG?

Dira gore batheetši ba bone mantšu a motheo lengwalong. Ka morago ga go bala lengwalo, gatelela mantšu ao a thekgago dintlha tša gago tše dikgolo. O ka dira seo ka go boeletša mantšu ao a motheo, goba ka go botšiša batheetši potšišo yeo e tla dirago gore ba kgone go iponela ka noši mantšu ao a thekgago ntlha ya gago.

Ge e ba o hlalosa lengwalo le o le badilego o diriša mantšu a go fapana le a lengwalong leo, kgonthišetša gore ga o timetše batheetši. Ba thuše go bona kamoo mantšu a lengwalong leo o le badilego a thekgago ntlha ya gago.
Gatelela dintlha tša gago. Ge e ba pele o bala lengwalo o botša batheetši gore ke ka baka la eng o le bala, ka morago ga go le bala ba hlalosetše kamoo mantšu a itšego lengwalong leo a thekgago lebaka la gago.

Ge o dutše o hlalosa lengwalo, o se ke wa tswalela Beibele ya gago. Seo se thuša batheetši go bona kamoo mantšu a lengwalong leo a thekgago seo o ba rutago sona.
Dira gore batheetši ba bone kamoo lengwalo le ba holago ka gona. Phema go bolela dilo tšeo di sa hlokagalego. Go ithekgile ka seo batheetši ba gago ba šetšego ba se tseba ka taba ya gago, bolela feela dintlha tšeo di tlago go ba thuša go kwešiša gabotse mohola wa lengwalo le o le badilego.