THUTO 37
Beibele e re Ruta Eng ka Mošomo le Tšhelete?
Na o kile wa ikwa o tshwenyegile ka gore o tlo hwetša bjang mošomo goba tšhelete? Ka dinako tše dingwe go ka ba thata gore re šome gore re kgone go itlhokomela, mola re swanetše gore re hlankele Jehofa. Bjale re ka thušwa ke’ng? Re ka thušwa ke dikeletšo tša ka Beibeleng.
1. Beibele e re’ng ka Mošomo?
Jehofa o nyaka gore re ipshine ka go šoma. Beibele e re: ‘Ga go se se phalago gore motho a thabe ka baka la ge a šomile ka thata.’ (Mmoledi 2:24) Jehofa le yena o šoma ka thata. Ge e ba le rena re šoma ka thata go swana le yena, re a mo thabiša e bile le rena re tlo thaba.
Mošomo o bohlokwa, eupša ga se ra swanela go o dumelela o re šitiša go hlankela Jehofa. (Johane 6:27) Jehofa o re tshepiša gore ge e ba re tšea go mo hlankela go le bohlokwa kudu go feta dilo ka moka, o tlo re hlokomela.
2. Na ke phošo go ba le tšhelete?
Ga se phošo go ba le tšhelete ka gore Beibele e re tšhelete e a “šireletša.” Eupša ga se gore e tlo dira gore re thabe. (Mmoledi 7:12) Ke ka baka leo e re botšago gore re se ke ra rata tšhelete, eupša re ‘kgotsofalele dilo tšeo re nago le tšona’. (Bala Baheberu 13:5.) Ge re ka kwa keletšo ye, re ka se tsoge re tshwenyegile ka gore ga re na dilo tše dintši, gomme re ka se tsene dikolotong go sa hlokagale. (Diema 22:7) E bile re ka se senye tšhelete ka go petšha, le go goketšwa ke batho bao ba re tshepišago gore re ka huma kapejana ge re ka dira dilo tše itšego.
3. Re ka bontšha bjang gore ga re timane ka tšhelete ya rena?
Jehofa ga a timane, le gona re tla be re mo ekiša ge e ba le rena re ‘abelana le ba bangwe’ tšhelete ya rena. (1 Timotheo 6:18) Re ka diriša tšhelete ya rena go neela ka phuthegong, le go thuša batho ba bangwe bao ba hlokago thušo, kudukudu bana babo rena le dikgaetšedi. Jehofa ga a na taba le gore re ntšha bokae, eupša sa bohlokwa go yena ke ge re ntšha tšhelete yeo ka go rata. Ge re dira bjalo, re tlo thaba e bile ra thabiša le Jehofa.—Bala Ditiro 20:35.
ITHUTE KA MO GO TSENELETŠEGO
Ekwa gore re tlo holega bjang ge re sa dumelele mošomo o re šitiša go hlankela Jehofa, e bile re kgotsofaletše dilo tšeo re nago le tšona.
4. Šoma ka tsela yeo e dirago gore Jehofa a thabe
Ka ge re le bagwera ba Jehofa, re swanetše go šoma ka thata re se ke ra tšwafa. Bapalang BIDIO ye, gomme le boledišaneng ka dipotšišo tše di latelago:
Bidiong ye, ke’ng seo se go kgahlago ka Tebogo tseleng yeo a bego a itshwara ka yona mošomong?
O ile a bontšha bjang gore ga a dumelele mošomo o mo šitiša go hlankela Jehofa?
Balang Bakolose 3:23, 24, gomme le boledišaneng ka dipotšišo tše di latelago:
Ke ka baka la’ng go le bohlokwa gore re ipotšiše gore re itshwara bjang mošomong?
Mošomo o bohlokwa, eupša ga se wa swanela go ba bohlokwa kudu go rena go feta go hlankela Jehofa.
5. Ge re kgotsofala go tlo holega rena
Batho ba bantši ba nyaka go huma. Eupša Beibele e re nea keletšo yeo e fapanego le seo batho ba se naganago ka tšhelete. Balang 1 Timotheo 6:6-8, gomme le boledišaneng ka potšišo e latelago:
Beibele e re eletša gore re dire eng?
Re ka thaba le ge re se na le tšhelete e ntši. Bapalang BIDIO ye, gomme le boledišaneng ka potšišo e latelago:
Le ge malapa a re a bonego mo bidiong ye a be a se na le tšhelete e ntši, ke’ng seo se ilego sa dira gore a thabe?
Ekwa gore Jesu o ile a re ke ka baka la eng go le kotsi go se kgotsofalele dilo tšeo re nago le tšona. Balang Luka 12:15-21, gomme le boledišaneng ka dipotšišo tše di latelago:
O ithutile’ng papišong ya Jesu?—Bona temana 15.
Balang Diema 10:22 le 1 Timotheo 6:10 gomme le bapišeng mangwalo a. Ke moka le boledišaneng ka dipotšišo tše di latelago:
O nagana gore ke’ng seo se lego bohlokwa magareng ga go ba mogwera wa Jehofa le go ba le tšhelete e ntši? Go re’ng o re’alo?
Go kitimiša tšhelete go ka re bakela mathata afe?
6. Jehofa o tlo re hlokomela
Ge re na le mathata a mošomo le a ditšhelete, yeo ke nako ya go bona ge e ba re tshepa Jehofa gore o tla re hlokomela. E le gore le kwe gore re ka dira eng ge re na le mathata a mohuta wo, Bapalang BIDIO ye gomme le boledišaneng ka dipotšišo tše di latelago:
Ngwanabo rena wa mo bidiong ye o ile a ba le mathata afe?
O ile a dira’ng gore a kgotlelele mathata ao?
Balang Mateo 6:25-34, gomme le boledišaneng ka potšišo e latelago:
Jehofa o tshepiša batho bao ba dirago gore a tle pele maphelong a bona gore o tlo ba direla eng?
BATHO BA BANGWE BA RE: “Nka se kgone go ya dibokeng beke e nngwe le e nngwe, ka gore ke swanetše go šoma ka thata gore ke hlokomele lapa la ka.”
Wena ke lengwalo lefe leo le dirago gore o tshepe gore o ka se tsoge o itshotše ge o ka dira gore Jehofa a tle pele bophelong bja gago?
O ITHUTILE ENG?
Go šoma le go ba le tšhelete go bohlokwa, eupša ga se ra swanela go dumelela dilo tšeo di re šitiša go hlankela Jehofa.
Dipotšišo
Ke’ng seo se ka go thušago gore o se dumelele mošomo o go šitiša go hlankela Jehofa?
Go kgotsofala go go hola bjang?
O ka bontšha bjang gore o tshepa Jehofa ge a re o tla hlokomela batho ba gagwe?
ITHUTE KA MO GO OKETŠEGILEGO
Na ka nnete Beibele e re tšhelete ga se ya loka? Bala sehlogo se gore o hwetše karabo.
Ekwa gore re ka diriša tšhelete ya rena bjang ka tsela yeo e thabišago Modimo.
“Beibele e re’ng ka go fa?” (Sehlogo seo se lego wepesaeteng)
Na ke phošo go petšha?
Ekwa gore monna yoo a bego a rata go petšha le go utswa o ile a thušwa ke eng gore a fetoge.
“Ke be ke Fišegela Mekato ya Dipere” (Morokami wa November 1, 2011.)