यसैया
२२ दर्शन बेँसीबारे* एउटा घोषणा:+
तिमीलाई के भयो? तिम्रा सबै मानिस किन छतमा उक्लेका छन्?
२ ए खैलाबैला र रमाहटले भरिएको सहर!
तिमी रमझममा चुर्लुम्मै डुबेका थियौ।
मारिएका तिम्रा मानिसहरू तरबारले काटिएका होइनन्,
तिनीहरू युद्धमा मारिएका पनि होइनन्।+
३ तिम्रा सबै तानासाह एकसाथ भागेका छन्।+
धनु नचलाईकनै तिनीहरूलाई कैदी बनाएर लगियो।
जो-जो फेला परे, तिनीहरू सबैलाई कैदी बनाएर लगियो,+
भागेर टाढा-टाढा पुगेकाहरूसमेत बच्न सकेनन्।
५ किनकि ब्रह्माण्डका मालिक, सेनाहरूका यहोवाको तर्फबाट+
दर्शन बेँसीमा गोलमाल, हार
र आतङ्कको दिन आएको हो।
सहरको पर्खाल भत्काइएको छ+
र मानिसहरूको चीत्कार डाँडासम्मै सुनिएको छ।
७ तिम्रा राम्रा-राम्रा बेँसीहरू
युद्धका रथहरूले भरिनेछन्
अनि मूलढोकामा घोडचढीहरू आ-आफ्नो स्थानमा खडा हुनेछन्।
८ यहुदाको पर्दा* हटाइनेछ।
“त्यस दिन तिमीले वन-भवनको+ सिलखानातिर हेर्नेछौ। ९ तिमीले दाउदनगरको पर्खालमा थुप्रै चिरा देख्नेछौ।+ अनि तिमीले तल्लो कुण्डको पानी जम्मा गर्नेछौ।+ १० तिमीले यरुसलेमका घरहरू गन्नेछौ र पर्खाललाई बलियो बनाउन घरहरू भत्काउनेछौ। ११ पुरानो कुण्डको पानी जम्मा गर्न तिमीले दुई वटा पर्खालबीच पोखरी बनाउनेछौ। तर पुरानो कुण्ड बनाउनुहुने महान् रचनाकारलाई तिमीले हेर्नेछैनौ। हो, जसले धेरै पहिल्यै त्यो रच्नुभएको थियो, उहाँलाई तिमीले हेर्नेछैनौ।
१२ त्यस दिन ब्रह्माण्डका मालिक, सेनाहरूका यहोवाले
तिमीलाई रुन र शोक गर्न,+
कपाल खौरन र भाङ्ग्रा ओढ्न भन्नुभयो।
१३ तर तिमीले भने उत्सव मनायौ र रमाहट गऱ्यौ,
भेडा र वस्तुभाउ काट्यौ,
मासु खायौ र रक्सी पियौ।+
अनि यसो भन्यौ, ‘आओ, खाऔँ र पिऔँ किनकि भोलि त हामी मर्नेछौँ।’”+
१४ त्यसपछि सेनाहरूका यहोवाले मेरो कानमा यसो भन्नुभयो: “ब्रह्माण्डका मालिक, सेनाहरूका यहोवा यसो भन्नुहुन्छ, ‘तिमीहरू नमरेसम्म तिमीहरूको यो पापको प्रायश्चित हुनेछैन।’”+
१५ ब्रह्माण्डका मालिक, सेनाहरूका यहोवा यसो भन्नुहुन्छ: “महलको रेखदेख गर्ने जिम्मेवारी पाएको भण्डारे सेब्नाकहाँ जाऊ+ अनि त्यसलाई यसो भन, १६ ‘तँ यहाँ के गर्दै छस्? तेरो यहाँ को छ र? तैँले किन यहाँ आफ्नो निम्ति चिहान खन्न लगाइस्?’ त्यसले अग्लो ठाउँमा आफ्नो निम्ति चिहान खन्दै छ; चट्टानमा आफ्नो निम्ति विश्राम गर्ने ठाउँ* तयार पार्दै छ। १७ ‘ए मानिस, हेर्! यहोवाले तँलाई जोडले तल फ्याँक्नुहुनेछ अनि तँलाई कसेर पक्रनुहुनेछ। १८ उहाँले निश्चय तँलाई कसेर पोको पार्नुहुनेछ र भकुन्डोलाई जस्तै खुला मैदानमा हुर्ऱ्याउनुहुनेछ। तँ त्यहाँ मर्नेछस्, तेरा शानदार रथहरू पनि त्यहीँ जाकिनेछन् र ती तेरो मालिकको घरको लागि अपमानको कारण बन्नेछन्। १९ अनि म तँलाई तेरो ओहदाबाट हटाउनेछु र तेरो जिम्मेवारी खोस्नेछु।
२० “‘त्यस दिन म हिल्कियाहको छोरा अर्थात् मेरो दास एलियाकिमलाई+ बोलाउनेछु। २१ अनि म उसलाई तेरो अलखा* पहिराइदिनेछु र उसको कम्मरमा तेरो पटुका बलियोसित कसिदिनेछु।+ म तेरो अख्तियार उसको हातमा सुम्पनेछु। अनि ऊ यरुसलेमका बासिन्दा र यहुदाको घरानाको बुबा हुनेछ। २२ म उसको काँधमा दाउदको घरानाको+ साँचो राखिदिनेछु। उसले जे खोल्छ, त्यो कसैले बन्द गर्नेछैन अनि उसले जे बन्द गर्छ, त्यो कसैले खोल्नेछैन। २३ म उसलाई बलियो ठाउँमा किलाझैँ ठोक्नेछु र ऊ आफ्नो बुबाको घरानाको लागि गरिमामय सिंहासनजस्तै हुनेछ। २४ अनि उसको बुबाको घरानाको सारा गौरव* उसैमा अडिनेछ। जसरी ससाना भाँडाकुँडा र कचौराका साथै ठूलठूला भाँडाहरू पनि किलामा अडिन्छन्, त्यसरी नै उसका शाखासन्तान उसैमा भर पर्नेछ।
२५ “‘सेनाहरूका यहोवा यस्तो घोषणा गर्नुहुन्छ, ‘नहल्लिनेगरि ठोकिएको किला त्यो दिन उखेलिनेछ+ र त्यसलाई फ्याँकिनेछ। अनि त्यसले जे-जे कुरालाई आड दिएको थियो, ती सबै लडेर नाश हुनेछन् किनकि यहोवाले नै यो कुरा भन्नुभएको हो।’”