यहोसु
२२ अनि यहोसुले रुबेनको कुललाई, गादको कुललाई र मनस्सेको आधा कुललाई बोलाए २ र तिनीहरूलाई भने: “यहोवा परमेश्वरका सेवक मोसाले दिएका सबै आज्ञा तिमीहरूले पालन गरेका छौ+ र मैले भनेका सबै कुरा पनि तिमीहरूले मानेका छौ।+ ३ तिमीहरूले आफ्ना भाइबन्धुलाई अहिलेसम्म साथ दिइरहेका छौ+ अनि यहोवा आफ्ना परमेश्वरको आज्ञा पालन गरेर आफ्नो कर्तव्य पूरा गरेका छौ।+ ४ यहोवा तिमीहरूका परमेश्वरले आफ्नो प्रतिज्ञाअनुसारै अहिले तिमीहरूका भाइबन्धुलाई शान्ति दिनुभएको छ।+ त्यसैले तिमीहरू यहोवा परमेश्वरका सेवक मोसाले तिमीहरूको अधिकारमा दिएको यर्दनपारिको* इलाकामा जाओ र आ-आफ्नो पालमा बस।+ ५ तिमीहरूले यहोवा आफ्ना परमेश्वरलाई प्रेम गरेर,+ उहाँले देखाउनुभएको बाटोमा हिँडेर,+ उहाँका सबै आज्ञा पालन गरेर,+ उहाँसँग घनिष्ठ भइरहेर+ अनि आफ्नो सारा हृदयले र आफ्नो सारा ज्यानले+ उहाँको सेवा गरेर+ यहोवा परमेश्वरका सेवक मोसाले तिमीहरूलाई दिएका आज्ञाहरू र व्यवस्थाहरू होसियार भई पालन गर्नू।”+
६ त्यसपछि यहोसुले तिनीहरूलाई आशिष् दिए अनि तिनीहरू आ-आफ्नो पालमा फर्के। ७ मनस्सेको आधा कुललाई मोसाले पैतृक सम्पत्तिको रूपमा बासान दिएका थिए+ र बाँकी आधा कुललाई यहोसुले अरू इस्राएलीहरूसँगै यर्दनको पश्चिमतिरको इलाका दिएका थिए।+ साथै यहोसुले तिनीहरूलाई आशिष् दिएर आ-आफ्नो पालमा पठाए। ८ यहोसुले तिनीहरूलाई भने: “प्रशस्त धनसम्पत्ति, वस्तुभाउ, सुनचाँदी, तामा, फलाम अनि लुगाफाटा लिएर आ-आफ्नो पालमा जाओ।+ तिमीहरूले शत्रुहरूबाट लुटेको धनसम्पत्ति+ आफ्ना भाइबन्धुसित पनि बाँड।”
९ त्यसपछि रुबेनको कुल, गादको कुल र मनस्सेको आधा कुलका मानिसहरू कनानको सिलोमा अरू इस्राएलीहरूसँग बिदा भएर आफूले अधिकार गर्न पाएको इलाका गिलादतर्फ फर्के,+ जहाँ तिनीहरू यहोवा परमेश्वरले मोसामार्फत आज्ञा गर्नुभएबमोजिम बसोबास गर्थे।+ १० रुबेनको कुल, गादको कुल र मनस्सेको आधा कुलका मानिसहरू कनानमा यर्दननजिकै पुगेपछि तिनीहरूले त्यहाँ ठूलो र भव्य वेदी बनाए। ११ यसरी वेदी बनाएको कुरा अरू इस्राएलीहरूले सुनेपछि+ यसो भने: “हेर त! रुबेनको कुल, गादको कुल र मनस्सेको आधा कुलका मानिसहरूले हाम्रो इलाकामा के गरेछन्! तिनीहरूले यर्दननजिकै कनानको सिमानामा एउटा वेदी बनाएका छन्।” १२ यो कुरा सुनेपछि इस्राएलीहरूको सारा समुदाय तिनीहरूसित लडाइँ गर्न सिलोमा+ जम्मा भयो।
१३ त्यसपछि इस्राएलीहरूले पुजारी एलियाजारका छोरा पिनहासलाई+ रुबेनको कुल, गादको कुल र मनस्सेको आधा कुलका मानिसहरूलाई भेट्न गिलादमा पठाए। १४ तिनीहरूले पिनहाससँगै १० जना नाइकेलाई पनि पठाए—हरेक कुलबाट एक जना नाइके। यिनीहरू हजारौँ इस्राएली मिलेर बनेको आ-आफ्नो बुबापट्टिको घरानाका नाइके थिए।+ १५ तिनीहरूले रुबेनको कुलका, गादको कुलका र मनस्सेको आधा कुलका मानिसहरूलाई भेटेर भने:
१६ “यहोवा परमेश्वरको सारा समुदायले यसो भनिरहेको छ: ‘तिमीहरू किन यस्तो काम गरेर इस्राएलका परमेश्वरसित विश्वासघात गर्दै छौ?+ यो वेदी बनाएर तिमीहरूले यहोवा परमेश्वरको विद्रोह गरेका छौ; तिमीहरू आज यहोवा परमेश्वरको पछि लाग्न छोडेर उहाँबाट तर्किएका छौ।+ १७ पोअरमा हामीले गरेको पाप सानो थियो र? यहोवा परमेश्वरका सारा मानिसमाथि त्यतिबेला आएको विपत्ति तिमीहरूले बिर्सिसक्यौ?+ आज हामी त्यही गल्ती दोहोऱ्याउँदै छौँ। १८ के आज तिमीहरू फेरि यहोवा परमेश्वरको पछि लाग्न छोडेर उहाँबाट तर्किन चाहन्छौ? आज तिमीहरूले यहोवा परमेश्वरको विद्रोह गऱ्यौ भने भोलि इस्राएलीहरूको सारा समुदायसित उहाँ क्रोधित हुनुहुनेछ।+ १९ यदि तिमीहरूले आफ्नो इलाका अशुद्ध भएकोले वेदी बनाएका हौ भने यहोवा परमेश्वरको वासस्थान* भएको+ यहोवाको इलाकामा+ आओ र हामीसँगै बसोबास गर। तर यहोवा परमेश्वरको विद्रोहचाहिँ नगर अनि हाम्रा परमेश्वर यहोवाको वेदी छँदाछँदै अर्को वेदी बनाएर हामीलाई पनि विद्रोही नबनाओ।+ २० नाश गर्नुपर्ने कुराहरू चोरेर जेरहको छोरा आकानले+ परमेश्वरसित विश्वासघात गरेकोले इस्राएलीहरूको सारा समुदायसित उहाँ क्रोधित हुनुभएको थिएन र?+ उसको पापले गर्दा उसले मात्र होइन, अरूले पनि ज्यान गुमाउनुपऱ्यो।’”+
२१ तब रुबेनको कुलका, गादको कुलका र मनस्सेको आधा कुलका मानिसहरूले इस्राएलीहरूका हजार-हजारको समूहका नाइकेहरूलाई यसो भने:+ २२ “ईश्वरहरूका ईश्वर यहोवा, उहाँ सबै कुरा जान्नुहुन्छ! हो, ईश्वरहरूका ईश्वर यहोवालाई+ सबै कुरा थाह छ र सबै इस्राएलीले पनि यो कुरा थाह पाउनेछन्। यदि हामीले यहोवा परमेश्वरको विद्रोह गरेका रहेछौँ र हामी उहाँप्रति वफादार भएका रहेनछौँ भने आज हामीलाई जीवित नछोड्नुहोस्। २३ यदि हामीले यहोवा परमेश्वरलाई त्याग्न अनि अग्निभेटी, अन्नभेटी र मेलबलि चढाउन यो वेदी बनाएका रहेछौँ भने यहोवा परमेश्वरले नै हामीलाई दण्ड देऊन्।+ २४ तर हामीले यो वेदी अर्कै कारणले बनाएका हौँ। हामीले यस्तो सोच्यौँ, ‘पछि तपाईँहरूका सन्तानले हाम्रा सन्तानलाई यसो भन्न सक्छन्: “तिमीहरू र इस्राएलका परमेश्वर यहोवाबीच कुनै सम्बन्ध छ र? २५ हे रुबेनको कुलका र गादको कुलका मानिसहरू हो, यहोवा परमेश्वरले यर्दनलाई तिमीहरूको र हाम्रो सिमाना तोकिदिनुभएको छ। त्यसैले यहोवा परमेश्वरको उपासनामा तिमीहरूको केही हिस्सा छैन।” यसो भनेर तपाईँहरूका सन्तानले हाम्रा सन्तानलाई यहोवाको सेवा गर्नदेखि* रोक्न खोज्नेछन्।’
२६ “त्यसैले हामीले सोच्यौँ, ‘हामी एउटा वेदी बनाऔँ तर अग्निभेटी र बलिदान चढाउनको लागि होइन। २७ बरु त्यो तपाईँहरू र हामीबीच+ अनि तपाईँहरूको र हाम्रो सन्तानबीच* साक्षी होस्। त्यो वेदी हामी यहोवासामु अग्निभेटी, मेलबलि र अरू बलिहरू+ चढाएर उहाँकै सेवा गरिरहनेछौँ भन्ने कुराको साक्षी हुनेछ ताकि तपाईँहरूका सन्तानले हाम्रा सन्तानलाई पछि यसो भन्न नपाऊन्: “यहोवा परमेश्वरको उपासनामा तिमीहरूको केही हिस्सा छैन।”’ २८ त्यसैले हामीले यस्तो सोच्यौँ, ‘यदि तिनीहरूले पछि हामीसँग वा हाम्रा सन्तानसँग यस्तो कुरा गरे भने त्यतिबेला हामी पनि यसो भन्न सक्नेछौँ: “यहोवा परमेश्वरको वेदीजस्तै देखिने हाम्रा पुर्खाहरूले बनाएको वेदी हेर! अग्निभेटी र बलिदान चढाउनको लागि यो बनाइएको होइन बरु तिमीहरू र हामीबीच साक्षी होस् भनेर हो।”’ २९ यहोवा हाम्रा परमेश्वरको वासस्थानमा भएको वेदीबाहेक अर्को वेदी बनाउने अनि त्यसमा अग्निभेटी, अन्नभेटी र अरू किसिमका बलि चढाएर यहोवा परमेश्वरको विद्रोह गर्ने र यहोवा परमेश्वरको पछि लाग्न छोडेर उहाँबाट तर्किने कुरा हामी सोच्न पनि सक्दैनौँ।”+
३० रुबेन, गाद र मनस्सेका सन्तानको कुरा सुनेपछि पुजारी पिनहास र हजारौँ इस्राएली मिलेर बनेको घरानाहरूका नाइकेहरूको चित्त बुझ्यो।+ ३१ त्यसैले पुजारी एलियाजारका छोरा पिनहासले रुबेन, गाद र मनस्सेका सन्तानलाई यसो भने: “आज हामीले थाह पायौँ, यहोवा परमेश्वर हामीसँगै हुनुहुन्छ किनभने तिमीहरूले यहोवा परमेश्वरसित विश्वासघात गरेका रहेनछौ। अब यहोवा परमेश्वरले हामी इस्राएलीहरूलाई सजाय दिनुहुनेछैन।”
३२ त्यसपछि पुजारी एलियाजारका छोरा पिनहास र ती नाइकेहरू रुबेनको कुल र गादको कुलको इलाका गिलादबाट कनान फर्के अनि त्यहाँ भएको सबै कुरा अरू इस्राएलीहरूलाई सुनाइदिए। ३३ तिनीहरूको कुरा सुनेपछि सबै इस्राएलीको चित्त बुझ्यो। अनि ती इस्राएलीहरूले परमेश्वरको प्रशंसा गरे; त्यसपछि रुबेनको कुल र गादको कुलसित लडाइँ गर्ने अनि तिनीहरूको इलाका ध्वस्त पार्ने कुरा इस्राएलीहरूले गरेनन्।
३४ यसपछि रुबेनको कुल र गादको कुलका मानिसहरूले त्यस वेदीको नाम* राखे र यसो भने: “यहोवा नै साँचो परमेश्वर हुनुहुन्छ भनेर यो वेदी हामी सबैको लागि साक्षी हो।”