LISAU 12
Vikhi Vikukukwasa Kupama Kulilonga Bibilya?
Kulilonga Bibilya se suma salanda sihasa kukukwasa. Kukhanda yikwau, uvinga zikhono phala kulilonga Bibilya hamwe usoka uti kwesi kuhasa kupama kulilonga Bibilya. Mazi mukonda lya vikhi wafanya kupama kulilonga? Vikhi vikukukwasa kupama kulilonga ola mwemomo kuvinga zikhono?
1. Mukonda lya vikhi kulilonga Bibilya suma samboti?
“Mbimbi ya Suku yali na mwenyu, yali na zikhono zinzi.” (Hebreus 4:12) Kulilonga Bibilya se suma salanda. Bibilya yitulonga yiti Suku atusola sineni. Bibilya yakukukwasa kuziva vyuma vyauhi, kukhala na mwenyu wamboti na silevelelo samboti kuphala ya vizuwa. Nayu yakukukwasa hekha kukhala ukahalu kamboti na Suku. Nga walilonga Bibilya yakukukwasa kukhala na kusanguluka.
2. Mukonda lya vikhi twafanya kuhana mukomo kuvye Bibilya yilonga?
Mu Bibilya mwali vyuma vinzi vyamboti. Ayu yituywela yiti “sumbyenu sili kamusisumbisi.” (Provérbios 23:23) Nga twahana mukomo ku vye yuyu yilonga twakulumba zikhono phala kupama kulilonga ola ha twakuhita na vithombo.—Tanga Provérbios 2:4, 5.
3. Namwahi Yehova akukukwasa kupama kulilonga Bibilya?
Yehova kamba lyavi yindi akalumba vyuma viose kakwesi yo akuziva samboti nañgu Yehova endi wasola nga umuziva. Yehova akukuhana “sisola na zikhono zakulumba vyuma vyamboti.” (Tanga Filipenses 2:13.) Ni watala uti kwesi kuhasa kulilonga Bibilya, ni lowo kwesi kuhasa kulumba vye Bibilya yilonga lomba sikwasu kwa Yehova. Yehova akukukwasa kuhita na vithombo. Nga wavinga zikhono zakuhita na vithombo Yehova akukukwasa. Upama kulomba kwa Yehova phala kukukwasa kulilonga Bibilya.—1 Tessalonicenses 5:17.
LILONGI WEKHA
Tala momo yivi uhasa kupama kulilonga Bibilya ola kwesi na masimbu enzi ni lowo vathu vakwau kavasolele nga ulilonga. Tala wekha momo Yehova akukuhana zikhono phala kulilonga Bibilya.
4. Leka kwakuninga kulilonga Bibilya suma sinene phala yivi
Ahamwe twezi kukhala na vyuma vinzi phala kulumba, mazi ola mwemomo vikhi vikutukwasa kupama kulilonga Bibilya? Tangyenu Filipenses 1:10. Vyelienu kukhanda ya vihulu vye:
Mukusoka kwavi, vyuma vikhi vyali na mukomo winzi kumwenyu?
Namwahi uhasa kuleka kwakuninga kulilonga Bibilya suma sa mukomo phala yivi?
Nga wavanga kusulisa baldi na museki, huhaki siwa matali, kaesi kuzuka
Mazi nga wavanga kuhaka matali museki kawinzi wakusuvuka. Hi mwemumuheka nga wavanga kulumba “vyuma vali na mukomo winzi”, kwakusuvuka masimbu phala vyuma vikwau
Kulilonga Bibilya kutukwasa kuziva na kusimanya Suku. Tangyenu Mateus 5:3. Vyelienu kukhanda ya sihulu se:
Zimboti zikhi twakukhala nazu mukonda lya kulilonga Bibilya?
5. Kutusuli kulilonga Bibilya mukonda lya vakwenu
Hamwe vakwenu kavasolele nga ulilonga Bibilya. Talyenu VIDYU, phala kuziva vye vya kahita na Francesco. Vyelienu kukhanda ya vihulu vye
Kuti makamba na khumba ya Francesco vakaliva hosi akaywela heti yokumeteka kulilonga Bibilya?
Zimboti zikhi akatambula mukonda lya kulumba zikhono za kulilonga Bibilya?
Tangyenu 2 Timóteo 2:24, 25. Vyelienu kukhanda ya vihulu vye:
Namwahi makamba avi na khumba yavi vezi kuliva hosi vezi kukumona mu kulilonga Bibilya?
Vikhi Bibilya yilonga wafanya kulumba nga vakwenu kavakusolele wekha mukonda lya kulilonga Bibilya? Mukonda lya vikhi?
6. Khala na ufelelo kwakuninga Yehova akukukwasa
Nga twakhala tutuhalu twa Suku twakusola kulumba vye yindi asoli. Ola mwemomo ahamwe kumoneka ola kuhwinya kulumba vye yindi asoli. Mazi kuvutukili munyima ndoye kuphala Yehova akukukwasa. Talyenu VIDYU. Vyelienu kukhanda ya vihulu vye:
Vyuma vikhi vya viha muyala yo akatusula phala kusimanya Yehova?
Kuti yindi ali kulinu?
Tangyenu Hebreus 11:6. Vyelienu kukhanda ya vihulu vye:
Vikhi Yehova akulumba kuva valumba zikhono za kumuziva na kulumba vye yindi asoli?
Nañgu momo mwaywela sivatu se, Yehova ezi kuliva namwahi ha ezi kumona zikhono zose wezi kulumba phala kulilonga Bibilya?
NGA UMWE MUTHU AKUHULI MOMO: “Mukonda lya vikhi wakulilonga Bibilya na Zimbangi za Yehova?”
Wakumutava kuti?
VIKHI WATUVA?
Tuvinga kulumba zikhono phala kulilonga Bibilya. Mazi nga walilonga Bibilya wakukhala na kusanguluka kakwezi kuhwa. Nga wapama kufelela kwa Yehova endi wakukukwasa.
Kuzimbuluka
Evi vili mu Bibilya vyuma vyamboti phala yivi mukonda lya vikhi?
Vikhi wafanya kulumba phala kuhana mukomo ku vyuma vyamboti?
Mukonda lya vikhi wafanya kulomba sikwasu kwa Yehova phala kupama kulilonga Bibilya?
KENGA WEKHA
Tanga vyuma viwana vye vyakakwasa vathu kundesa samboti masimbu avu.
“Como aproveitar bem seu tempo” (Despertai!, fevereiro de 2014)
Muyala wa mukhetu yo kakasolele nga mukhetu wendi alilonga Bibilya. Tala momo Yehova akamukwasa.
Muyala wa mukhetu yo kakasolele nga mukhetu wendi alilonga Bibilya. Mazi ola mwemomo tala vye vya kamoneka na muyala wendi.
Avamwe vathu vezi kuywela veti Zimbangi za Yehova vezi kuvana khumba. Mazi ase sili?
“As Testemunhas de Jeová dividem ou unem as famílias?” (Mu jw.org)