Kodi Ufumu wa Mulungu N’ciyani?

Nkhani yaikulu m’Baibo ni yokhudza Ufumu wa Mulungu. Yehova adzagwilitsa nchito Ufumu umenewo kukwanilitsa cifunilo cake ca poyamba cokhudza dziko lapansi. Kodi Ufumu wa Mulungu n’ciyani? Tidziŵa bwanji kuti pali pano ukulamulila? Nanga n’ciyani cimene wacitapo kale? Kodi udzacita ciyani m’tsogolo? Mafunso aya adzayankhidwa m’phunzilo lino, komanso m’maphunzilo aŵili otsatila.

1. Kodi Ufumu wa Mulungu n’ciyani? Nanga Mfumu yake ndani?

Ufumu wa Mulungu ni boma limene Yehova Mulungu analikhazikitsa. Mfumu yake ni Yesu Khristu, ndipo akulamulila kucokela kumwamba. (Mateyu 4:17; Yohane 18:36) Baibo imakamba za Yesu kuti: “Iye adzalamulila monga Mfumu . . . kwamuyaya.” (Luka 1:32, 33) Monga Mfumu yoikidwa na Mulungu kumwamba, Yesu adzalamulila anthu onse padziko lapansi.

2. Kodi ndani akulamulila pamodzi na Yesu?

Yesu sakulamulila yekha. Anthu ocokela “mu fuko lililonse, cinenelo ciliconse, mtundu uliwonse, ndi dziko lililonse. . . . adzakhala mafumu olamulila dziko lapansi.” (Chivumbulutso 5:9, 10) Ni angati amene adzalamulila na Khristu? Kucokela pamene Yesu anali padziko lapansi, Akhristu mamiliyoni akhala otsatila ake. Koma anthu okwana 144,000 okha ni amene amapita kumwamba kukalamulila na Yesu. (Ŵelengani Chivumbulutso 14:1-4.) Akhristu ena otsalawa adzakhala nzika za Ufumuwo.—Salimo 37:29.

3. Kodi Ufumu wa Mulungu umapambana bwanji maboma a anthu?

Ngakhale olamulila atayesesa bwanji kucita zabwino, alibe mphamvu zokwanitsa kucita zonse zimene afuna. Ndipo m’kupita kwa nthawi, angaloŵedwe m’malo na olamulila ena adyela osafuna kuthandiza anthu. Koma Yesu, monga Mfumu yoikidwa na Mulungu, sadzaloŵedwa m’malo na wina aliyense. Mulungu wakhazikitsa “Ufumu umene sudzawonongedwa ku nthawi zonse.” (Danieli 2:44) Yesu adzalamulila dziko lonse lapansi, ndipo sadzakondela munthu aliyense. Iye ni wacikondi, wokoma mtima, komanso wacilungamo. Adzaphunzitsa anthu kukhalanso na makhalidwe amenewa—kucitilana zinthu mwacikondi, mokoma mtima, komanso mwacilungamo.—Ŵelengani Yesaya 11:9.

4. Ufumu wa Mulungu ni boma limene lidzalamulile dziko lonse lapansi

Yesu Khristu ali na mphamvu zambili zolamulila, kuposa wolamulila aliyense m’mbili yonse ya anthu. Ŵelengani Mateyu 28:18, na kukambilana funso ili:

• Kodi ulamulilo wa Yesu umapambana bwanji ulamulilo wa munthu aliyense?

Maboma a anthu amasintha-sintha, ndipo boma lililonse limalamulila cabe mbali yocepa ya dziko lapansi. Nanga bwanji za Ufumu wa Mulungu? Ŵelengani Danieli 7:14, na kukambilana mafunso aya:

• N’cifukwa ciyani zili bwino kuti Ufumu wa Mulungu “sudzawonongedwa”?

• Ndipo n’cifukwa ciyani zili bwino kuti udzalamulila dziko lonse lapansi?

5. Maulamulilo a anthu ayenela kuloŵedwa m’malo

N’cifukwa ciyani Ufumu wa Mulungu uyenela kuloŵa m’malo maboma a anthu? Tambani VIDIYO, na kukambilana mafunso otsatilawa.

VIDIYO: Kodi Ufumu wa Mulungu N’ciani?—Mbali Yake (1:41)

• Kodi ulamulilo wa anthu wabweletsa mavuto otani?

Ŵelengani Mlaliki 8:9, na kukambilana mafunso aya:

• Kodi muona kuti Ufumu wa Mulungu ufunikadi kuloŵa m’malo maboma a anthu? Cifukwa ciyani?

6. Ufumu wa Mulungu uli na olamulila amene amatimvetsetsa

Cifukwa cakuti Yesu, Mfumu yathu, anakhalapo munthu, iye amatha kutimvela “cisoni pa zofooka zathu.” (Aheberi 4:15) Amuna na akazi okhulupilika okwana 144,000, amene adzalamulile pamodzi na Yesu, Yehova amawasankha kucokela mu “fuko lililonse, cinenelo ciliconse, mtundu uliwonse, ndi dziko lililonse.”—Chivumbulutso 5:9.

• Kodi n’zokulimbikitsani kudziŵa kuti Yesu na olamulila anzake amatimvetsetsa pa mavuto amene timakumana nawo? Cifukwa ciyani?

7. Ufumu wa Mulungu uli na malamulo abwino kuposa maboma a anthu

Maboma amapanga malamulo amene colinga cake ni kupindulila nzika zawo na kuziteteza. Ufumu wa Mulungu nawonso uli na malamulo amene nzika zake ziyenela kutsatila. Ŵelengani 1 Akorinto 6:9-11, na kukambilana mafunso aya:

• Kodi muganiza dziko lidzakhala bwanji pamene munthu aliyense azikatsatila malamulo a Mulungu?a

• Kodi muganiza n’zomveka Yehova kuyembekezela nzika za Ufumu wake kumvela malamulo ake? Cifukwa ciyani?

• N’ciyani cionetsa kuti anthu osamvela malamulo a Mulungu akhoza kusintha?—Onani vesi 11.

CIDULE CAKE

Ufumu wa Mulungu ni boma lenileni kumwamba, limene lidzalamulila dziko lonse lapansi.

Mafunso Obweleza

• Kodi amene adzakhale olamulila mu Ufumu wa Mulungu ndani?

• N’cifukwa ciyani Ufumu wa Mulungu umapambana boma lililonse la anthu?

• Kodi Yehova amayembekezela zotani kwa nzika za Ufumu wake?

FUFUZANI

Onani zimene Yesu anaphunzitsa za kumene Ufumu wa Mulungu uli.

“Kodi Ufumu wa Mulungu Uli mu Mtima Mwanu?” (Nkhani ya pawebusaiti)

N’cifukwa ciyani Mboni za Yehova zimasankha kukhulupilika ku Ufumu wa Mulungu, m’malo mwa ulamulilo wa anthu?

Kudzipeleka ku Ufumu wa Mulungu (1:43)

Onani zimene Baibo imafotokoza zokhudza anthu okwana 144,000 amene Yehova amawasankha kukalamulila pamodzi na Yesu.

“Ndani Amapita Kumwamba?” (Nkhani ya pawebusaiti)

N’ciyani cinapangitsa mzimayi wina m’ndende kukhulupilila kuti ni Mulungu yekha angabweletse cilungamo padziko lapansi?

“Kumene Ndinadziwira Yemwe Adzathetse Kupanda Chilungamo” (Galamukani! November 2011)