Ovilinga
4 Puetyi ankho Petulu na Suau vekahi nokupopila ovanthu, ovanene-nakwa, nomutumini wovayungi vondyuo ya Huku nova Sanduseu aveya kuvo. 2 Ankho vanumana mokonda ono apositolu vekahi nokulongesa ovanthu, tupu ankho vekahi nokupopila ovanthu konthele ya Sesusi wapinduluapo mononkhia.* 3 Ngotyo avevekuate, avevepake mokaleya alo onthiki onkhuavo, mokonda ankho kuanthikovela-le. 4 Mahi, ovanthu ovanyingi pu vana vokueiva etyi vapopia avetavela iya ombalulo yovalume ankho ihungi po 5.000.
5 Onthiki onkhuavo, ovatumini vavo, novakulu, novahoneki vovitumino aveliongiya mo Selusalei, 6 kumwe na Anasi omunene-nakwa na Kaifaa na Suau na Alesandele nombunga aiho yomunene-nakwa. 7 Avapake Petulu na Suau pokati kavo, avahimbika okuvepula okuti: “Epondolo patyi ine omenyina lya-lie mualinga otyipuka etyi?” 8 Petulu, eyulwa nononkhono mba Huku iya evepopila okuti:
“Vatumini vovanthu, no onwe vakulu, 9 inkha onthue hono tukahi nokupulwa otyipuka otyiwa omulume umwe ankho walemana alingwa iya onwe muhanda okunoñgonoka olie walinga nawa omulume ou, 10 onwe amuho kumwe novanthu aveho vo Isilayeli noñgonokei okuti omenyina lya Sesusi Kilisitu omu Nasalee, una muaipaela momuti, mahi Huku emupindula-po pokati ko vokuankhia, omulume ou akalela nekongoko momaiho enyi. 11 Olio, olio ‘emanya onwe vatungi muaanya, amuhelimono okuti liakala emanya liavilapo liopevindi.’* 12 Iya kutupu vali omunthu omukuavo weeta eyovo, mokonda pokati kovanthu mombuelo yeulu petupu nawike wapeua enyina omu tupondola okuhupila.”
13 Etyi vamona okuti Petulu na Suau vakola omutima,* avaimbuka okuti kavatangele monosikola ononene,* avahuvu. Iya avahimbika okuimbuka okuti vakalele na Sesusi. 14 Mahi mokonda ankho veete omulume oo wahakulua utai puvo, avahapopi natyike. 15 Moluotyo, avevetumu nkhele valupuke Mombonge onene yova Sundeu iya avahimbika okulipula muene poyavo, 16 okuti: “Oityi matulingi ovalume ava? Mokonda ehuviso valinga enene, liamoneka kovanthu aveho vakala mo Selusalei iya onthue kamatutyivili okupopia okuti hatyili-ko. 17 Opo tyiheivale vali kovanthu ovakuavo, tuvelingei etyi tyivetilisa owoma iya atuvepopila opo vahapopile vali nawike konthele yenyina olio.”
18 Moluotyo, aveveihana iya avevepopila opo vahapopie natyike movanthu, ine vahalongese natyike menyina lya Sesusi. 19 Mahi Petulu na Suau avevepopila okuti: “Inkha muati hamwe okutavela ku onwe otyo tyaviuka tyipona okutavela ku Huku, muene otyenyi. 20 Mahi onthue, katupondola okutalama okupopia konthele yovipuka tuamona nevi tueiva.” 21 Ngotyo etyi vevetilisa vali owoma, aveveyeke mokonda kavamuene natyike tyapenga valinga opo vevemonese ononkhumbi. Tupu ankho vatila owoma ovanthu vekahi nokuhilivika Huku mokonda yetyi ankho tyamoneka-po. 22 Mokonda omulume wokuahakulua kehuviso* ankho una omanima 40.
23 Etyi veveyeka, avaende no kovalongwa vakuavo avevepopila etyi ovanene-nakwa novakulu vevepopila. 24 Etyi vetyiiva, avakatulila kumwe onondaka mbavo ku Huku avati:
“Mukulami Tatekulu, ove watunga eulu nohi, nelunga, novipuka aviho vili-mo. 25 Iya ove kononkhono mbove, wapopila momulungu womukuakulu wetu Daviti, omuumbili wove okuti: ‘Omokonda yatyi ovanthu vomalongo vakatulila onondyaya? Oityi ovanthu vasokela ovipuka vihasilivila? 26 Onohamba mbo pohi mbelipongiya opo mbutyitukile-po Siovaa nomulembulwa wae* iya ovatumini veliongiya opo vevetyitukile-po.’ 27 Mokonda, tyili-tyili Helode na Posiu Pilatu novanthu veheva Sundeu novanthu vo Isilayeli veliongiyile mepunda-umbo eli, avatyitukila-po omuumbili wove omusukuki Sesusi, una ove walembula, 28 veliongiyile opo valinge etyi wapopile. Ovipuka ovio viamoneka ngetyi ove uhanda mokonda yepondolo liove. 29 Pahe Siovaa, tehelela etyi vekahi nokutuhonga, okuatesako ovapika vove opo vatualeko okupopia ondaka yove tyihena owoma, 30 putyina ove uyelula okuvoko kuove pala okuhakula nokulinga omanyingilikilo nomahuviso menyina liomuumbili wove omusukuki Sesusi.”
31 Etyi vamana okulikuambela,* omphangu apa ankho veliongiya aiteketa iya aveho avakala tyeyula ononkhono mba Huku, avapopi ondaka ya Huku tyihena owoma.
32 Tupu ovanthu ovanyingi vokuetavela avakala vala nonkhalelo ike yokusoka, avelitehelela monkhalelo ike,* iya ankho nawike upopia okuti ovipuka ena oviae muene, mahi ovipuka aviho ankho vena-vio vahonyeka. 33 Iya nepondolo enene, ono apositolu ambutualako okuava oumbangi konthele yetutilo lya Tatekulu Sesusi iya Huku akala nokankhenda okanene navo. 34 Ankho nawike puvo una etyi akamba, mokonda aveho ankho vokuna omapia nomaumbo veelandesa avaeta onombongo valandesa, 35 avaeta onombongo mbatyo kono apositolu. Ngwe avembutepaula okutalela kuetyi kese umwe esukisa. 36 Iya Suse una ankho ono apositolu vaihana okuti Balanabe (tyihangununa okuti, “Omona Wekengelelo”) omu Levi wo ko Sipele, 37 ankho una ohika eilandesa aeta onombongo mbatyo kono apositolu.