1 Petulu
4 Mokonda Kilisitu wamuene ononkhumbi molutu luohitu, tupu no onwe lipongiyei opo musoke nga Kilisitu, tyetyi una umona ononkhumbi ulekesa okuti wayekapo ononkhali, 2 opo tyina nkhele ena omuenyo, ahalinge vali ehando liovanthu, mahi alinge ehando lya Huku. 3 Mokonda omuvo muapesela watuuka puetyi ankho mulinga ehando liovanthu vomalongo, novituwa* vikundisa, nepeleyo enene liokulihanda, nokunwa unene, novipito ovivi,* nomaunkholwa, nokufenda ovikahuku. 4 Iya ovanthu vahuva mokonda onwe kamueende vali navo monkhalelo ombi yomuenyo wavo, moluotyo vemupopia omapita. 5 Mahi ovanthu ovo mavakapulwa na una wafuapo pala okukoyesa ovanthu vokuna omuenyo na vana vokuankhia. 6 Tyotyili, etyi otyo onondaka onongwa tupu mbaivisililwe ko vokuankhia, opo namphila vakoyeswa muetyi vatuwa kondye mokutala kuovanthu, mahi mokutala kwa Huku, vapondola okukala-ko tyihongolelwa nononkhono mbae.
7 Mahi onthyulilo yovipuka aviho yehika popepi. Moluotyo, kalei nonondunge, kalei tyalunguka* mokutualako nomalikuambelo. 8 Kovipuka aviho, kalei nohole onene na vakuenyi, mokonda wokuna ohole apeho uhanda okuevela vakuavo. 9 Litambulei nawa kese umwe na mukuavo tyihañgoñgo. 10 Kese umwe watambula otyiawa, moluotyo, etyiundapese opo aundapele vakuavo, ngomuundapi ukahi nawa wokankhenda okanene ka Huku, kalekeswa mononkhalelo ononyingi. 11 Inkha umwe upopia, etyilinge ngatyina apopia onondaka mba Huku; inkha umwe omuundapi, etyilinge nononkhono Huku aava; opo Huku ankhimanekwe movipuka aviho menyina lya Sesusi Kilisitu. Omunkhima nepondolo ovia Huku apeho-apeho. Amem.
12 Nonthyolwe, muhahuvei novitateka ovinene mukahi nokumona, ngatyina mukahi nokumonekelwa notyipuka muhei. 13 Mahi, hambukwei tyina mukahi nokumona ononkhumbi nga mbuna Kilisitu amuene, opo no onwe muhambukwe tupu amukala tyeyula ehambu mokueenda kuehololoko liomunkhima wae. 14 Inkha mukahi nokupenyua* mokonda yenyina lya Kilisitu, muna ehambu, mokonda ononkhono mba Huku ononthyukuki nomunkhima wambo vikahi ku onwe.
15 Mahi, pu onwe pahakale nawike umona ononkhumbi mokonda omuipai, ine otyimphulu ine ulinga ovipuka ovivi ine ulipaka povipuka viamuene. 16 Mahi inkha umwe umona ononkhumbi mokonda Omukilisitau, tyehemukundise, mahi atualeko okunkhimaneka Huku mokutyinda enyina liae. 17 Mokonda ou omuvo wanakua opo ekoyeso lihimbikile mondyuo ya Huku. Inkha lihimbikila ku onthue, oñgeni matyikakala ku vana vehetavela onondaka onongwa mba Huku? 18 “Inkha omuviuki una okulinga ononkhono ononene opo Huku emuyovole, oityi matyikapita nondingavivi na una ulinga ononkhali?” 19 Ngotyo, vana vekahi nokumona ononkhumbi mbelikuata nehando lya Huku, veliave* ku Huku Omutungi omukuatyili, putyina valinga oviwa.