1 Petulu
5 Moluotyo, mokonda na ame ndyimukulu wewaneno, ombangi yononkhumbi Kilisitu akalele nambo, iya mandyikakala nae menkhimano malikaholololwa, ndyipopila* ovakulu vewaneno vekahi pokati kenyi okuti: 2 Nthitei otyunda tya Huku tyikahi pomavoko enyi, ngatyina muvakulu vewaneno,* tyihakuluminyua, mahi tyeliava komaiho a Huku; ha nelungavi liokumonena-mo, mahi onehando ewa liokutyilinga; 3 hakutumina epingo lya Huku, mahi avelei otyunda ongeleka ongwa. 4 Iya tyina omunthita omunene amamoneka, mamukatambula ekolowa liomunkhima lihahanyauka.
5 Tupu, onwe valume ovakuendye, tavelei kovalume ovakulu.* Mahi onwe amuho kalei nomutima weliola* kese umwe na mukuavo, mokonda Huku uyele vana velipaka kounene, mahi ukala nokankhenda okanene na vana veliola omutima.
6 Ngotyo, kalei nomutima weliola mombuelo yokuvoko kwa Huku kuepondolo, opo emunkhimaneke momuvo watamo, 7 putyina mupakula otyiho* tyenyi atyiho kwe, mokonda ngwe wesuka no onwe. 8 Tualeiko okukala nonondunge, kalei tyipahi! Ondyale yenyi Eliapu, iliseta-seta ngonkhulika ikoma yovola ou maili. 9 Mahi onwe muna okuiyala nekolelo liapama, okunoñgonoka okuti ovakuatate venyi mouye auho vekahi nokumona ononkhumbi ngo onwe. 10 Mahi tyina muamamono katutu ononkhumbi, Huku mokankhenda kae okanene, una wemuihana momunkhima wae uhapu menyina lya Kilisitu, mamanuhula okumulongesa. Memukalesa tyitai, memukalesa tyapama, emupake kelisesu liapama. 11 Epondolo oliae apeho. Amem.
12 Silivanu,* omukuatate omukuatyili, wankhuatesako okumuhonekela omukanda ou iya onwe nemuhonekela onondaka mbehehi opo ndyimupameke nokumuavela oumbangi wokuti aka okankhenda kotyotyili ka Huku. Tualeiko tyapamena muko. 13 Omukai* ukahi Mombambilonia, waholovonua ngo onwe umukukunya-po, na Maluku, omona wange. 14 Likukunyei na vakuenyi nombesu yohole.
Amuho ovalongwa va Kilisitu kalei nombembwa.