Omukanda Wa Vali wa Samuwele
17 Aitofeli apopila Ambisalau okuti: “Mbambavo eta ndyiholovone ovalume 12.000, andyilandula Ndaviti hono kounthiki. 2 Mandyimulwisa tyina amaponwa, ehena vali ononkhono,*+ andyimutumphulula. Aveho ena-vo mavakahateka, andyiipaa-po vala ohamba.+ 3 Mandyikondola ovanthu aveho kwoove. Opo ovanthu aveho vakondoke tyitei ku etyi matyimoneka nomunthu ukahi nokwovola. Ovanthu aveho mavakakala nombembwa.” 4 Onondaka ombo ankho mbaviuka komaiho a Ambisalau no kovakulu aveho vo Isilayeli.
5 Mahi Ambisalau apopi okuti: “Nkhele ihanei Husai+ omu Alikita, tutehelele etyi mapopi.” 6 Etyi Husai apita ku Ambisalau, Ambisalau emupopila okuti: “Otyo, otyo tyapopia Aitofeli. Tulinga ngeetyi apopia? Okuti hatyo-ko, ove popia etyi tuna okulinga.” 7 Husai apopila Ambisalau okuti: “Hono etyi Aitofeli apopia katyaviukile.”+
8 Husai apopi vali okuti: “Ove utyii nawa okuti ho nomaswalali ae vapama,+ vahulilwa,* vekahi ngehambaungu liavomba koviwena vialio moluhandya.+ Tyihe-otyo vala, ho omukwa-vita+ kamalala-le kumwe novanthu aveho. 9 Pahetyino tyipondola waholama meleva* ine momphangu onkhwavo.+ Ine oe utetekela okutulwisa, omunthu metyiivi mati: ‘Ovanthu vokwahula ku Ambisalau vatila-ko!’ 10 Atee umwe omulume wakola omutima, wokuna omutima ngo wonkhulika,+ masosoloka mokonda yowoma, ova Isilayeli aveho vetyii okuti tate yove omukwa-vita wapama, ovalume+ aveho ena-vo vakola omutima. 11 Ame etyi ndyikupopila tuna okulinga otyetyi: Ihana ovalume aveho ova Isilayeli aveya kwoove oveongiya, okuhimbikila ko Ndaa atee ko Mbelesemba,+ avakala ovanyingi ngoluheke lwo konthele yelunga;+ ovetwala vakalwe. 12 Apa eli matumuvasi atumulwisa, matumutokela ngomata eyombo atokela kombanda yohi; nawike puvo mahupu, nae nomaswalali ae. 13 Ine ukaholama mepunda-umbo, matwende-ko nova Isilayeli aveho, atulihanye-po atulikokela komulola nomapanda, nalike emanya malisala-mo.”
14 Ambisalau novalume aveho vo Isilayeli avati: “Etyi Husai omu Alikita apopia tyikahi vali nawa+ tyipona etyi Aitofeli apopia!” Siovaa ankho watokola* okutyopola etyi Aitofeli apopia tyikahi nawa.+ Siovaa ankho walinga ngootyo opo tyietele ovitateka Ambisalau.+
15 Konyima Husai apopila ovanakwa Sandoke na Ambiyatale okuti:+ “Otyo Aitofeli apopila ngootyo Ambisalau novakulu vova Isilayeli, ame nemupopila etyi. 16 Pahe tumei liwa ondaka kalondolei Ndaviti muti: ‘Ahalale ponondyapu-ndyila* popepi noluhandya, mahi ayauke ondongi, ine kalingi umwe ngootyo matyiti nae novanthu vae mavanyimwa-ko.’”*+
17 Sonataa+ na Aimaasi+ ankho vekahi nokukevelela mo Ene-Loseli;+ omuundapi umwe omukai atumwa opo ekevepopile, ngwe avakapopila Ohamba Ndaviti, ankho kavahandele okuyumbahi omwenyo wavo okumoneka tyina vanyingila mepunda-umbo. 18 Mahi omukwendye umwe evemono, eketyipopia ku Ambisalau. Ngwe avaende liwa-liwa no keumbo liomulume umwe ko Mbaulii+ ankho una onyombo meumbo liae pepata. Avaholama mokati konyombo oyo, 19 omukai womulume oo ahiki komulungu wonyombo, anyaneka-ko olukale; nawike wetyimwene. 20 Ovaundapi va Ambisalau avaende keumbo liomukai oo, avemupulu okuti: “Aimaasi na Sonataa veli-pi?” Omukai evekumbulula okuti: “Vaviuka vala ngaava venda no kondongi oko.”+ Ovalume aveveovola, mahi avehevevasi. Avakondoka ko Selusalei.
21 Etyi ovalume vokuveovola vapita, aveho vevali monyombo avatundu-mo avakapopila Ohamba Ndaviti. Vemupopila okuti: “Endei! Yaukei liwa ondongi, mokonda Aitofeli waava elondolo liokumwipaesa, wati ñgaa-ñgaa.”+ 22 Etyi Ndaviti novanthu aveho ankho ena-vo vetyiiva, avayauka ondongi Solondau. Tyina kutya, aveho vayauka ondongi Solondau, nawike wesala-ko.
23 Etyi Aitofeli atala okuti etyi apopia katyetavelelwe, avelama kotyimbulu, aende keumbo mepunda-umbo liae.+ Pahe alongesa vomeumbo liae,+ konyima eliyendye.*+ Etyi ankhia, akapakwa meendo liovakwaukulu vae.
24 Pononthiki opo, Ndaviti aende ko Maanaii,+ Ambisalau ayauka o Solondau kumwe novalume aveho vo Isilayeli. 25 Ambisalau apake Amasa+ pomphangu ya Sowambe+ opo ahongolele omafwalali. Amasa omona womulume umwe utiwa o Itala, omu Isilayeli, walalele na Ambingaili+ omona wa Naasi, Ambingaili velilandula na Seluya, ina ya Sowambe. 26 Ambisalau novalume ova Isilayeli avaongo onthanda kotyilongo tyo Sileyande.+
27 Etyi Ndaviti ehika ko Maanaii, Sombi omona wa Naasi wo ko Lambaa+ wova Amoo, na Makili+ omona wa Amiyeli wo ko Lo-Ndembale, na Mbalasilai+ omu Sileyande wo ko Loselii, 28 avaeta omaula, nonombasia, nonombiya mboluma, notiliku, nosevata, nohinde, nononkhange, notyipoke, novingomene, nononthanga mbakangwa, 29 nowiki, nomulela wongombe, nonongi, nonthonthi. Ankho vaetela Ndaviti novanthu ena-vo ovipuka ovio aviho opo valie+ mokonda ankho vasoka okuti: “Ovanthu oola oyo moluhandya valiwa nondyala, nohunga, vaponwa.”+