Omukanda wo Tete Onohamba

20 Mbeni-Handande+ ohamba yo Silia+ aongiya omaswalali ae, nonohamba 32, nononkhambe mbae, nomatemba ae ovilwa. Avaende+ ko Samaliya,+ avelisete nayo aveilwisa. 2 Atumu ovatumwa-ndaka mepunda-umbo, ku Akambe+ ohamba yo Isilayeli, vekemupopile okuti: “Mbeni-Handande wati: 3 ‘Opalata yove noolu yove oviange, ovakai vove novana vavo, vokukahi vali nawa ovange.’” 4 Ohamba yo Isilayeli aiti: “Tyikale ngeetyi wapopia tatekulu yange hamba. Ndyikale wove, kumwe novipuka viange aviho.”+

5 Ovatumwa-ndaka avakondoka vali ku Akambe, avemupopila okuti: “Mbeni-Handande wati: ‘Natuma vekupopile okuti: “Momphe opalata yove, noolu yove, novakai vove, novana vove.” 6 Muhuka ngo opo, mandyitumu ovaundapi vange ngwe mavaovolola nawa meumbo liove, no momaumbo ovaundapi vove avapolo-mo ovipuka aviho oviwa, avaende navio.’”

7 Ohamba yo Isilayeli aiihana ovakulu aveho votyilongo aivepopila okuti: “Mbambavo nthehelelei. Talei vala omulume ou, watokola okutwetela ovitateka, wanthuma ndyimwavele ovakai vange, novana vange, nopalata yange noolu yange, ame hemwanyene natyike.” 8 Ovakulu aveho novanthu aveho avemupopila okuti: “Mwanya, wehemwavele natyike.” 9 Pahe, apopila ovatumwa-ndaka va Mbeni-Handande okuti: “Kapopilei tatekulu yange ohamba okuti: ‘Mandyilingi atyiho waita potete kwaame muundapi wove, mahi hipondola okulinga etyi wandyita pahetyino.’” Ovatumwa-ndaka avaende, aveketyipopila Mbeni-Handande.

10 Mbeni-Handande atumu vekemupopile okuti: “Ono huku mbumonese ononkhumbi, mbutyilinge nonya ine ombuma yo Samaliya maituuka okwavela ovalume aveho ndyina-vo, aiyula peke!” 11 Ohamba yo Isilayeli aikumbulula okuti: “Mupopilei okuti: ‘Una wavala ondyakulilo ehelimphande ngatyina eilula-mo-ale.’”+ 12 Etyi Mbeni-Handande etyiiva, pweetyi ankho ekahi nokunwa nonohamba momakaka avo,* apopila ovaundapi vae okuti: “Manekei mukevelwise!” Ngootyo avamaneka vakalwise epunda-umbo.

13 Mahi omuuli umwe afwene ku Akambe+ ohamba yo Isilayeli, emupopila okuti: “Siovaa wati: ‘Weete ovanthu ava ovanyingi-nyingi? Hono mandyivepakula pomavoko ove, ove monoñgonoka okuti ame, ame Siovaa.’”+ 14 Akambe apulu okuti: “Metyilingi ñgeni?” Omuuli emukumbulula okuti: “Siovaa wati: ‘Mandyitumu ovakwatesiko vovatumini vomapunda-umbo omanene.’”* Akambe apulu vali okuti: “Olie mahimbika ovilwa?” Omuuli emukumbulula okuti: “Ove yatyo tatekulu!”

15 Akambe avalula ovakwatesiko vovatumini vomapunda-umbo omanene: ankho vena 232; konyima avalula ovalume aveho vo Isilayeli: ankho vena 7.000. 16 Avaende komutenya, etyi nkhele Mbeni-Handande, nonohamba 32 ovakwatesiko vae vekahi komakaka,* nokukolwa. 17 Ovakwatesiko vovatumini vomapunda-umbo omanene avatetekela okwenda. Liwa-liwa Mbeni-Handande atumu ovatumwa-ndaka, avemupopila okuti: “Kukahi nokuya ovalume vo ko Samaliya.” 18 Ngwe evepopila okuti: “Ine vekahi nokuya nombembwa, vekwatei nomwenyo; ine vekahi nokuya tyovilwa, no ngootyo vekwatei nomwenyo.” 19 Mahi pweetyi ovakwatesiko vovatumini vomapunda-umbo omanene nomafwalali ekahi nokuvelandula vatunda mepunda-umbo, 20 aveho atyiti ou waipaa ondyale yae, ou waipaa ondyale yae. Ova Silia avaende-nkholo,+ ova Isilayeli avevelandula, mahi Mbeni-Handande ohamba yo Silia, akahateka nonkhambe kumwe novakwavo vena ononkhambe. 21 Mahi ohamba yo Isilayeli aikatuka, aikalwisa onondyale mbayo mbukahi kononkhambe no komatemba ovilwa, aiipaa* unene ova Silia.

22 Konyima, omuuli+ afwene pohamba yo Isilayeli eipopila okuti: “Enda, kelipameke osoko nawa etyi molingi,+ mokonda konthyimbi yenima maliya,* ohamba yo Silia maiya okukulwisa.”+

23 Ovaundapi vohamba yo Silia avemupopila okuti: “Huku yavo o Huku yonomphunda, otyo twatilila-ko. Mahi ine tulwa navo atulwila moluhandya, matuvevili. 24 Tyihe-otyo vala, linga ñgaa: onohamba+ ambuho mbupola ovilinga viambo, opake-po ovatumini vomapunda-umbo. 25 Konyima oongiya* omaswalali elifwe pu ana wapeseka, nononkhambe, nomatemba ovilwa ngaa wapeseka. Tuvelwisilei moluhandya, tyotyili mavatili-ko kwoonthwe.” Etavela etyi vemupakela-mo, ngootyo alinga.

26 Tyina tyiti konthyimbi yenima,* Mbeni-Handande aongiya ova Silia avaende ko Afeke+ opo vakalwise ova Isilayeli. 27 Ovanthu vo Isilayeli navo avaongiywa, avapewa oviawa, avekelivasa navo. Etyi ova Isilayeli vaonga onthanda popepi navo, ankho vekahi vala ngatyina ovinyongo vivali viovinkhombo, mahi ova Silia veyula motyilongo atyiho.+ 28 Omuuli wa Huku yotyotyili afwene pohamba yo Isilayeli eipopila okuti: “Siovaa wati: ‘Mokonda ova Silia vati: “Siovaa o Huku yonomphunda, ha Huku-ko yomaluhandya,” mandyipakula ovanthu ava aveho ovanyingi-nyingi pomavoko ove,+ onwe mamunoñgonoka okuti ame, ame Siovaa.’”+

29 Omaswalali ova Isilayeli no ova Silia avakala mononthanda onombali tyelipilukila mononthiki epandu-vali, monthiki ya pandu-vali ovilwa avihimbika. Monthiki ike vala, ova Isilayeli avaipaa omafwalali okweendela pohi 100.000 ova Silia. 30 Vokwahupa-po avaende-nkholo no ko Afeke,+ avanyingila mepunda-umbo. Mahi otyimato atyitokela kovalume 27.000 ankho vokwahupapo. Mbeni-Handande aende-nkholo no mokati kepunda-umbo, aholama mondywo imwe koluhinyi.

31 Ovaundapi vae avemupopila okuti: “Tatekulu hamba tutehelele. Tweiva okuti onohamba mbo veumbo lyo Isilayeli vena okankhenda.* Mbambavo, twende tukelipakule kohamba yo Isilayeli tyavala onongosa, atuliwingila omapanda momitwe. Hamwe uhupisa omwenyo wove.”*+ 32 Avavale onongosa, aveliwingila omapanda momitwe, avaende kohamba yo Isilayeli avati: “Omuundapi wove Mbeni-Handande wati: ‘Mbambavo hupisa-vo omwenyo wange.’”* Ohamba aiti: “Nkhele kenenkhie, una omwenyo? Oo tulilandula nae.” 33 Ovalume ovo ngo omo vakwatekenyina, avamono omphitilo yokumupopila okuti: “Yoo, Mbeni-Handande mulilandula nae.” Pahe ngwe evepopila okuti: “Endei, kemupolei.” Mbeni-Handande eya okulipakula kohamba, ohamba Akambe emupake ketemba liae liovilwa.

34 Mbeni-Handande emupopila okuti: “Omapunda-umbo tate apola ku ho, ame mandyikukondolela-o; ove mokaholovona omatapalo ko Ndamasiku omu mokalingila onondando mbove, ngeetyi tate alinga mo Samaliya.”

Akambe ati: “Ine tulinga omphango oyo,* mandyikuyeke oende.”

Avalingi omphango, emuyeke aende.

35 Ngeetyi ankho atumwa na Siovaa, umwe povana vovauli*+ apopila mundyila yae okuti: “Mbambavo mbete.” Mahi aanye okumuveta. 36 Omuuli oo emupopila okuti: “Mokonda kwetavelele ondaka ya Siovaa, tyina wenda pena onkhulika maikwipaa.”* Etyi mundyila yae apita, onkhulika imwe aimuvasi, aimwipaa.

37 Omuuli avasi omulume omukwavo, emupopila okuti: “Mbambavo mbete.” Omulume emuvete, akala notyipute.

38 Omuuli aende atee metapalo, akevelela ohamba. Eliimbilisa, elihiki motyipala notyinyanga. 39 Putyina ohamba ilamba, eilaveleya ati: “Omuundapi wove ankho ukahi pokati kovilwa, omulume umwe aeta onkhwatwa, ati: ‘Yunga omulume oo. Ine umuyeka aye, pomwenyo wae+ mofete-po wove,* okuti hatyo, mofete otalendu* ike yopalata.’ 40 Pahe ame muundapi wove pokuli nokulinga ovilinga ovikwavo, onkhwatwa aikahomboka.” Ohamba yo Isilayeli aimupopila okuti: “Etyi wapopia, otyo molingwa; mwene ove wetyipopia.” 41 Elipolo otyinyanga motyipala, ohamba yo Isilayeli aimwimbuka okuti o umwe povauli.+ 42 Apopila ohamba okuti: “Siovaa wati: ‘Mokonda yetyi wayeka+ omunthu una ankho nati una okwipawa, omwenyo wove maupingi pomwenyo wae,*+ ovanthu vove mavapingi povanthu vae.’”+ 43 Ohamba yo Isilayeli ayeende no keumbo liayo ko Samaliya+ tyeihamenwa nokwasoya.