Omukanda wa Vali Onohamba
20 Pononthiki opo, Isekiya avele unene tyokuhungi umwe kononkhia.*+ Omuuli Isaiya omona wa Amosi aende kwe emupopila okuti: “Siovaa wati: ‘Longesa vomeumbo liove mokonda ove monkhi, kumahupu.’”+ 2 Apilulukila moluhinyi ahimbika okulikwambela ku Siovaa, ati: 3 “Ame ndyiita kwoove Siovaa, mbambavo hinangela okuti ame naendela monondyila mbove noukwatyili nomutima wange auho, nalinga etyi tyaviuka komaiho ove.”+ Isekiya ahimbika okulila unene.
4 Isaiya nkhele ankho kenehike pepata lyo pokati etyi atambula onondaka ombu mba Siovaa:+ 5 “Kondoka kapopile Isekiya onkhalamutwe yovanthu vange uti: ‘Etyi, otyo tyapopia Siovaa Huku ya ho-mbwale yove Ndaviti, wati: “Neiva elikwambelo liove. Namona ononkhuka mbove.*+ Ame mandyikuhakula.+ Monthiki ya tatu moende kondywo ya Siovaa.+ 6 Komanima omwenyo* wove mandyiyawisa-ko vali omanima 15, mandyikuyovola noove nepunda-umbo eli pomavoko ohamba yo Asilia,+ mandyiyakulila epunda-umbo eli mokonda yenyina liange na Ndaviti omuundapi wange.”’”+
7 Isaiya ati: “Etei omungome womakuyu akukuta.” Aveweeta avapake potyinthimba tyatyo, katutu-katutu ahimbika okuveluka.+
8 Isekiya wapulile Isaiya okuti: “Olipi enyingilikilo+ malindekesa okuti Siovaa mambelula, monthiki ya tatu andyiende kondywo ya Siovaa?” 9 Isaiya emukumbulula okuti: “Enyingilikilo lya Siovaa malikulekesa okuti Siovaa malingi etyi apopia-e, olieli: Ove wahanda otyindindimbe etyi tyiende no komutwe omatyeko 10 ondondelo* ine wahanda tyilihahe omatyeko 10?”+ 10 Isekiya ati: “Tyapepuka vali tyiende no komutwe omatyeko 10, tyipona okulihaha omatyeko 10.” 11 Pahe Isaiya omuuli aiti ku Siovaa, Ngwe alingi okahi kahembuluka-le* ondondelo ya Akasi, akelihahe omatyeko 10.+
12 Pononthiki opo ohamba yo Mbambilonia Mbelondake-Mbalandaa omona wa Mbalandaa, atumu omikanda kohamba Isekiya notyiawa, mokonda ankho weivile okuti Isekiya wavelele.+ 13 Isekiya evetambula,* evelekesa omalumono ae aeho meumbo liae,+ opalata noolu, nomulela wombasamu, nomilela omikwavo vikahi nawa, notyilimba* tyae tyovihongati novipuka aviho ankho vikahi momalumono ae. Petupu natyike ehevelekesile meumbo* liae no moutumini wae auho.
14 Pahe omuuli Isaiya aende kohamba Isekiya eipulu okuti: “Oityi ovalume ovo vekupopila, vatunda-pi?” Isekiya akumbulula ati: “Vatunda kotyilongo tyimwe kokule, ko Mbambilonia.”+ 15 Isaiya emupulu vali okuti: “Oityi vamona meumbo liove?”* Isekiya akumbulula okuti: “Vamona atyiho tyili meumbo liange.* Petupu natyike momalumono ange nehevelekesile.”
16 Isaiya apopila Isekiya okuti: “Tehelela etyi Siovaa apopia:+ 17 ‘Tala! Makuya ononthiki ovipuka aviho vili meumbo liove* na vina ovakwaukulu vove vapakele nawa atee hono, mavikatwalwa ko Mbambilonia.+ Kamapakahupa natyike,’ o Siovaa wetyipopia. 18 ‘Vamwe povana vove, ava motyiti mavakatyindwa-po,+ avakakala ovaundapi mombala yohamba yo Mbambilonia.’”+
19 Isekiya apopila Isaiya okuti: “Ondaka ya Siovaa ove wapopia ikahi nawa.”+ Apopi vali okuti: “Ikahi nawa mokonda makukala ombembwa netuliyo* mononthiki ame nkhele ndyina omwenyo.”*+
20 Ovipuka ovikwavo viehipululo lya Isekiya, ovilinga viae aviho ovinene, neetyi alinga etangi+ liomaande nomukungu, etyi aeta omaande mepunda-umbo,+ kaviahonekelwe momukanda womahipululo o pononthiki mbonohamba mbo Sundaa? 21 Isekiya akapululukwa-po nonombwale mbavo,+ Manasesi+ omona wae emupingi kovipundi.+