Omukanda wa Vali Onohamba
24 Pononthiki mba Seoyakii, Nambukondonosole+ ohamba yo Mbambilonia eya okumulwisa, Seoyakii akala omuundapi wae omanima etatu. Mahi atyitukila-po Nambukondonosole ehemutavela. 2 Siovaa atumu ku Seoyakii ovanthu vamwe ovifwanga ova Kalindeya+ nova Silia, nova Moambe nova Amoo. Atwalako okuvetuma opo ahanye-ko o Sundaa ngeetyi tyapopile ondaka ya Siovaa+ etyi atuma ovaundapi vae ovauli. 3 Tyotyili o Siovaa watumine ovipuka ovio vimoneke mo Sundaa, opo evepole kotyipala tyae+ mokonda yononkhali ambuho Manasesi alingile,+ 4 nohonde amomesile+ yovanthu vahalingile natyike, mokonda weyulisile o Selusalei nohonde yovanthu vahalingile natyike. Siovaa ahahande okuveevela.+
5 Ovipuka ovikwavo viehipululo lya Seoyakii, ovipuka aviho alingile, kaviahonekelwe momukanda womahipululo o pononthiki mbonohamba mbo Sundaa?+ 6 Seoyakii akapululukwa-po nonombwale mbavo,+ Swakii omona wae emupingi kouhamba.
7 Ohamba yo Isitu aihatundu vali kotyilongo tyayo okuyumbahi omwenyo wayo, mokonda ohamba yo Mbambilonia yapolele ovipuka aviho viohamba yo Isitu,+ okutuka Komulola* wo Isitu+ atee kondongi Eufalate.+
8 Swakii+ wakala ohamba etyi ena omanima 18, atumina onohanyi ononthatu mo Selusalei.+ Ina utiwa o Neusita, omona wa Elenataa wo ko Selusalei. 9 Watwaile-ko okulinga ovivi komaiho a Siovaa ngeetyi tyalingaile tate yae. 10 Pononthiki opo, ovaundapi va Nambukondonosole ohamba yo Mbambilonia, avaende okukalwisa o Selusalei, epunda-umbo avelipake pokati.+ 11 Nambukondonosole ohamba yo Mbambilonia, eya mepunda-umbo etyi ovaundapi vae velipaka pokati.
12 Swakii ohamba yo Sundaa elipakula kohamba yo Mbambilonia,+ kumwe na ina novaundapi vae, novakwatesiko vae, novaundapi vomombonge.+ Ohamba yo Mbambilonia menima lya tyinana eli nokutumina,+ aimutwala koukonde. 13 Apolo-mo omalumono aeho omondywo ya Siovaa nomalumono aeho omondywo* yohamba.+ Atyopa-tyopa ovityuma aviho Salomau ohamba yo Isilayeli alingilile mondywo ya Siovaa.+ Otyo tyaenda ngeetyi Siovaa apopile. 14 Atwala koupika aveho vomo Selusalei novakwatesiko vohamba aveho,+ nomafwalali aeho okwapama no vokuhonga omavai aveho nononkhulungu,*+ atwala ovanthu 10.000 koupika. Amuhesala omunthu nawike, amusala vala ovanthu vahepa vali unene+ motyilongo. 15 Atwala Swakii+ ko Mbambilonia+ koupika, tupu apolo ina yohamba novakai vohamba, novaundapi vayo vomombonge, nomalombe atyo o motyilongo ko Selusalei evetwala ko Mbambilonia koupika. 16 Ohamba yo Mbambilonia tupu aitwala omaswalali aeho koupika ko Mbambilonia, omafwalali 7.000, tyahavalula vokuhonga omavai nononkhulungu* 1.000, aveho vokwapama valongeswa ovilwa. 17 Ohamba yo Mbambilonia aipake Mataniya una velilandula na tate ya Swakii+ kouhamba pomphangu ya Swakii, enyina liae alipilululwa aimuluku okuti o Sendekiya.+
18 Sendekiya wakala ohamba etyi ena omanima 21, atumina omanima 11 mo Selusalei. Ina utiwa o Hamutale+ omona wa Selemiya, wo ko Limbina. 19 Sendekiya walingile etyi tyapenga komaiho a Siovaa ngeetyi tyalingaile+ Seoyakii. 20 Ovipuka ovio viamoneka mo Selusalei nomo Sundaa mokonda yonyengo ya Siovaa, evetaata kotyipala tyae.+ Sendekiya atyitukila-po ohamba yo Mbambilonia.+